ConceptX International School

🚨ဆေးရုံသို့ ချက်ချင်း သွားရောက်ပြသသင့်သော အခြေအနေများ🚨 အောက်ပါ လက္ခဏာများ ရှိပါက နီးစပ်ရာဆေးရုံ၊ ဆေးခန်းသို့ အမြန်ဆုံး သွားရောက်ပြသသင့်ပါသည်။ ဝမ်းထဲတွင် သွေးပါလာခြင်း၊ အဖျားကြီးခြင်း၊ အဆက်မပြတ် အန်ခြင်း၊ ပြင်းထန်သော ရေဓာတ်ခန်းခြောက်ခြင်း (ရေမသောက်နိုင်‌တော့ခြင်း၊ မျက်လုံးချိုင့်ဝင်ခြင်း၊ ငိုသော်လည်း မျက်ရည်မထွက်ခြင်း၊ အသားအရေအလွန်ခြောက်ကပ်နေခြင်း၊ အလွန်အမင်းမှိုန်းနေခြင်း၊ တစ်နှစ်အောက်ကလေးများတွင် ငယ်ထိပ်များချိုင့်ဝင်နေခြင်း)၊ အသက်ရှူမြန်ခြင်း၊ သတိလစ်ခြင်း တို့ဖြစ်ပါသည်။ 🎓ဝမ်းပျက်ဝမ်းလျှော ဖြစ်ပွားပါက ပြုစုကုသနည်း ဝမ်းပျက်ဝမ်းလျှော ဖြစ်ပွားသောအခါ ရေဓာတ်ပြန်လည်ဖြည့်တင်းခြင်းသည် အရေးကြီးဆုံး ကုသမှုဖြစ်ပါသည်။ ORS (Oral Rehydration Solution) ဓာတ်ဆားရည်ကို ညွှန်ကြားချက်အတိုင်း သောက်ပါ။ ( ဝမ်းသွားသော ပမာဏ၊ အန်ထားသော ပမာဏထက် အနည်းငယ် ပိုသော ဓာတ်ဆားရည်ကို ဖြည်းဖြည်းခြင်း ခွဲသောက်ပါ။ ) သန့်ရှင်းသော ရေများများ သောက်ပါ။ ( သန့်ရှင်း သော အုန်းရည်နှင့် ကြက်ပြုတ်ရည် အကြည်တို့လည်း သောက်နိုင်ပါသည်။) ထမင်းပြုတ်၊ ဆန်ပြုတ်၊ ငှက်ပျောသီး၊ ဟင်းချို စသည့် အစာကြေလွယ်သော အစားအစာများကို စားသုံးပါ။ အဆီများသော အစားအစာများကို ခေတ္တရှောင်ကြဉ်ပါ။ နို့စို့ကလေးများကို မိခင်နို့ ဆက်လက်တိုက်ကျွေးပါ။ ဆရာဝန်၏ ညွှန်ကြားချက်မရှိဘဲ ဆေးများကို မိမိဘာသာ မသောက်သုံးသင့်ပါ။ 🎓ဝမ်းပျက်ဝမ်းလျှောရောဂါကို ကာကွယ်နိုင်ရန် ကျိုချက်ထားသောရေနှင့် သေသေချာချာ သန့်စင်ပြီးသော ရေသန့်ရေကိုသာ သောက်ပါ၊ အစားအစာများကို သန့်ရှင်းစွာ ချက်ပြုတ်စားသောက်ပါ၊ လမ်းဘေးအစားအစာများ သတိထားစားပါ၊ အစားမစားမီနှင့် အိမ်သာသုံးပြီးတိုင်း လက်ဆေးပါ၊ အမှည့်လွန်သောအသီးများနှင့် ယင်နားစာများကို ရှောင်ကျဉ်ပါ၊ ဈေးမှဝယ်လာသော ပစ္စည်းများကို သေသေချာချာ ဆေးကြော သန့်စင်၍ သိမ်းဆည်းပါ၊ တစ်နှစ်အောက် ကလေးများကို rotavirus ကာကွယ်ဆေး ထိုးပေးထားခြင်းတို့ ဖြစ်ပါသည်။ မိုးရာသီတွင် ဝမ်းပျက်ဝမ်းလျှောရောဂါများ အဖြစ်များတတ်သဖြင့် အစားအသောက်နှင့် သောက်သုံးရေ သန့်ရှင်းရေးကို အထူးသတိထားရပါမည်။ ကလေးငယ်များ၊ သက်ကြီးရွယ်အိုများနှင့် ကိုယ်ခံအားနည်းသူများတွင် ရေဓာတ်ခန်းခြောက်ခြင်းသည် အသက်အန္တရာယ်ဖြစ်စေနိုင်သောကြောင့် ဝမ်းပျက်ဝမ်းလျှောလက္ခဏာများ ဖြစ်ပေါ်ပါက နီးစပ်ရာ ဆေးရုံ၊ ဆေးခန်းများတွင် အချိန်မီ ကုသမှုခံယူသင့်ပါသည်။ School Health Department ConceptX International School