ڤِينْكَا

مبكرهمش في حياتي أد الناس اللي بتفضل دايما توريك السلبي اللي بتمر بيه وبس . مفيش يوم عدى كويس؟ مفيش يوم ابتسمت فيه حتى؟ مفيش لحظة شكرت فيها ربنا إنه لسا مديك الصحة والعافية؟ مفيش مرة قولت الحمدلله عشان ربنا يراضيك؟ ليه ي جماعة كل حياتكم سلبية وبتنقلوها لغيركم بالشكوى والبوستات؟ مفيش حد خالي من الحزن والمشاكل، ومفيش مشكلة إلا وليها حل حتى لو لسا مكتشفناهوش، ومفيش يوم بيعدي غير وبنبتسم فيه حتى لو على ميمز عابرية . بطلوا نكد ويأس عشان بتأثروا على اللي حواليكم وعشان نفسكم أولا، بصوا للجانب الإيجابي في الحياة ومتقولش مفيش، وجودك على الأرض وأنت ساند طولك دا إيجابي لوحده، سعيك في تغيير البؤرة السلبية اللي مش عجباك دا إيجابي، أعضاء جسمك السليمة دي نعمة من ربنا إيجابي تقدر تعمل أي حاجة في الوقت اللي ربنا عايزه . - بلاش تشاؤم عشان مفيش حاجة بتكون نهاية المطاف، ولو أنت عايز تنهي حياتك بدري يبقى مع نفسك متلومش غيرك وتفضل ولهان في دور الضحية ..! بسنت سيد .

خليكوا عارفين دايما إن طول ما الصداقة مقفولة على أنها ترفيه ليكم وجدعنة بينكم وبين بعض من غير أي مقابل لأي حاجة هتفضل دايما دايمة . لو ركزت واتعاملت على حاجات أكتر من كدا الدنيا هتخرب بقصد أو من غير من كل الأطراف . - إحنا بنصحاب غيرنا علشان يكون مصدر ترفيه وانعزال عن كل حاجة سلبية حتى لو مش هتحكي مشاكلك مجرد وجود أصدقاء في حياتك كويسين كفيل يخلي في جزء منور في العتمة اللي جواك . - في الآخر أنت مش ملزم تخلي حد في حياتك مصدر إزعاج ونوش أو حتى مش مرتاحله أيا كان العلاقة بينكم أي لمجرد إن في بينكم ذكريات . - إحنا بنشتري راحتنا وعلشان هي غالية محدش بيشتريها غير اللي مقدر تمنها كويس، فـ كفاية ناس وظيطة عالفاضي . بسنت سيد .

أقولكم سر . أنا لما ببقى مضايقة بقول لنفسي جوايا عيطي يا بسنت حتى لو مش عايزة أعيط . مجرد ما أدي الفرصة لنفسي أنها تفرغ مشاعرها السلبية بالعياط بهون على قلبي كتير . - أنتوا كمان ادوا الفرصة لنفسيكم تخرج كل الطاقة السلبية اللي جواها🤍

أنا بحترم العياط أوي! معنديش أوبشن كتم العياط، عايز تعيط عيط يا حبيبي وبعدها طبطب بأيدك الحنينة دي على نفسك وواسيها . متديش لعقلك الإشارة إنك strong man لأ المان الصح هو اللي لما يحس نفسه مخنوق وعايز يعيط بيعيط . - أصل أنا لما أكتم حزني في قلبي النهاردة وأصحى كويس بكرة مش عارف هبقى فين! بسنت سيد .

دائمًا ما نجلب العناء لأنفسنا لذا نعبث في أماكن لا تشبهنا . بسنت سيد .

أنا عايزة أتخرج بس مش عايزة أنتوا فاهمني؟ يعني عايزة أخلص دراسة بس مش عايزة أبطل أنزل الكلية وأشوف صحابي ونقعد نهزر في المكان اللي كان حلمنا من وأحنا أطفال ..! بسنت سيد .

يقول أحدهم: كنتُ أضع نفسي جِواري لتكون محبوبتي هي النفس الأولىٰ التي تبقىٰ على بالي دائمًا في جميع الأحوال بكل المشاعر التي يحملها قلبي بداخلهِ . أما أنا فلا بأسٍ؛ سأظل بخير متىٰ كانت هي أيضًا كذلك . بسنت سيد .

بقالي شهرين بحضر نفسي علشان حفلة التخرج ونسيت اذاكر علشان أتخرج أصلا! بسنت سيد .

دايما بنستغرب إزاي بنبقى مع صحابنا رغايين أوي ومبسوطين ونضحك ونهزر ومجرد ما نروح البيت بننطوي مع نفسنا ونقعد لوحدنا منتكلمش . - السبب لأن إحنا بنلاقي نفسنا معاهم، ناس شبهنا مودهم زينا قادرين نهون على بعض مجرد ما نقعد في وش بعض بس . - وأحنا في البيت بنعافر عشان نفهمهم إن عادي يبقى لينا مشاكل في حياتنا إحنا ك شباب، وعادي أننا نزعل عشان إحنا بني آدمين، بتبقى كل القاعدة عبارة عن أنت قاعد واكل شارب نايم ناقصك أي تاني عشان تقول أنت حزين! بسنت سيد .

فكرة إن الإنسان بيحاول يتخطى كل حاجة في حياته لمجرد إن مفيش حد يحكيله مشاكله ويهون عليه أيامه دي مرهقة أكتر من الظروف السيئة نفسها ..! بسنت سيد .

الفقدان مش صعب . الصعب الحقيقي هو الوجود المعدوم . بسنت سيد .

مفيش أجمل من إحساسك وأنت تايه وسط الزحمة وتلاقي أيد أخدت بإيدك لطريق الأمان اللي مفيهوش غير الوضوح والسلام . بسنت سيد .

هو لما الإنسان ينسى أحداث كتيرة من حياته كأنها محصلتش إطلاقًا سواء حلوة أو وحشة - دا ميزة ولا عيب؟!

كلهم بيقولوا اللي عايز يعمل حاجة بيعملها . - ميعرفوش إني كل ما أتقدم خطوة حبال الماضي بترجعني ألف لورا ..! بسنت سيد .

يا بخت أي حد عنده حد بيحاول علشانه . بسنت سيد .

هحكيلكم موقف يبين فيه أد إيه الناس مبقاش عندها قلب حرفيا . كنت في مشوار مع مامتي ودخلنا شارع مليان ناس رايحة وجاية ويعتبر عالطريق . المهم لفت انتباهنا راجل عجوز واقف بضهره ومميل شوية ووشه لزجاج محل، كنا مستعجلين ومشينا خطوتين داخلين المكان اللي رايحينه وطلعنا أول سلمة بصينا على الراجل كدا فجأة لقيناه بنفس الواقفة بس كان (بيست-فرغ) وثابت مكانه مش بيتحرك . جبنا ماية بسرعة وأنا روحتله عقبال م مامتي تحاسب وعماله أكلم في الراجل وهو حرفيا ثابت، مش عايزة أقرف-كم ولكن الحاجات اللي خارجة من فمه ثابتة وهو مكنش سامعني وأنا خوفت أهزه بإيدي علشان يسمعني مفيش! جت مامتي ياحج خد ماية يا حج وهزته من كتفه راح مسح بالمنديل وماما سقته الماية راح فرد ظهره وبصلنا إحنا الاتنين وقالنا بالحرف (أنا كدا خفيت خلاص) !! طب أنت كويس في حد نتصلك بيه كان رده (كلهم ماتوا ٩٢ سنة مفيش غيري، بس لما بعوز حاجة ربنا بيوقعني في ولاد الحلال اللي زيكوا شكرا) طب أنت محتاج حاجة حاسس بحاجة (أنا خفيت خلاص، أنا كنت تعبان وخفيت) كل دا والناس حوالينا بيتفرجوا عند أولاد رجب في أول فيصل . الراجل أكتر من ٥ دقايق والله أعلم كان موجود بقاله أد إيه من قبل ما إحنا نيجي ومحدش هان عليه يشوفه ميت ولا عايش ولا ماله!! الراجل بحالته دي أنا متأكدة أنه كان متوفي من الثبات وكششان الجسم وبوق الماية دا كان محتاجة يرويه الراجل بعدها مشي قدامنا فارد ضهره وكأنه عنده ٥٠ سنة!! متخافوش تقفوا للناس طلما في مكان عام وحواليكم ناس آه مش هيساعدوكوا بس على الأقل مش هتحس إنك لوحدك . لينوا قلوبكم مع الناس اللي في الشارع ساعدوا حتى لو اكتشفت إن الشخص دا ميستاهلش بس هي اتحسبتلك أنت عند ربنا! أنا عشان مستعجلة قولت لمامتي تلاقيه واقف بيتفرج عشان كان مدينا ظهره، وربنا يريد أننا نبص عليه عشان نرجعله ونبقى سبب في ردود روحه ليه والله أعلم بحاله لحظتها! متعملوش زيي مهما كنتم مستعجلين لازم تقفوا لأي حد محتاج لازم متترددوش لحظة . - وافتكر إن كما تدين تدان، ساعدت هتلاقي اللي يساعدك، كبرت دماغك هتلاقي اللي يكبر دماغه منك وأنت في أشد الاحتياج للمساعدة، عملت خير هيقعدلك ولو أذيت حد هيقعدلك وربنا هيخلص حق المظلوم منك في الدنيا وفي الآخرة عشان ربنا مبينساش وعادل🤍

أما أنا فـ والله لا أريد الغد حتىٰ لا نلتقي ولو صدفة ..! بسنت سيد .

في فرق كبير بين إنك راجل وتصرفاتك حكيمة عارف تحط لكل موقف حدوده . - وبين إنك عايز تعمل راجل وتخيب في تصرفاتك وتدخل كل الأمور في بعضها عشان تحس بعضلاتك الطرية ..! بسنت سيد .

خلصت فترة العتاب إحنا دلوقتي على نظام اللي يجي منه الريح سده واستريح . بسنت سيد .

دايما عندي قناعة تامة إن الإنسان الكويس بيتعرف من خلال تقديره للي قدامه من كل الجوانب . فـ شابو لكل حد محترم عرف يقدر نفسه اللي خلته عارف يقدر اللي معاه . بسنت سيد .