رسائل دينيه

السلام عليكم ورحمة الله وبركاته صباح الخير يا شباب لو طالب مجتهد خلص مذاكرة قبل الامتحان بكام يوم وقال لوالده أنا هقضي اليومين اللي جايين بحل أسئلة وبراجع تاني.. يا ترى هيقوله ليه يا ابني ما أنت ذاكرت خلاص، قضيهم نوم ولا ترفيه وتسلية لحد ميعاد الامتحان!! أكيد طبعًا لأ! طب ليه بنعتبر سنن الصلوات زيادة ممكن نستغنى عنها وكفاية الفروض! وليه بيصعب علينا نصحي ولادنا يصلوا قيام مثلًا! وليه أي واحدة حجابها تمام وحابة تزود خطوة أو توسع أكتر نقولها ملهوش لازمة ما أنتِ كدا كويسة! ليه بنكتفي باللي يدوب ينجحنا في الدين، ومش بنفرط في درجة ولا درجتين في الدنيا!! الخلاصة.. اللي يقدر ياخد خطوة زيادة لربنا ميتأخرش؛ لأن اللي بيقولك لا إنت كدا كويس ومش محتاج تزود مش هينفعك يوم القيامة. قال تعالى: {وَلِكُلٍّ دَرَجَاتٌ مِّمَّا عَمِلُواْ...}، الناس يوم القيامة هيكونوا درجات في الجنة ودركات في النار بحسب اللي اكتسبوه من إيمان أو كفر والعياذ بالله. فلا تغفل واشتغل على الدرجة اللي عايز تكون فيها! عايز تكون من الأوائل ولا يدوب تجيب درجة النجاح؟!