Mentesnot Kebede

ማክሰኞ 03/13/18 የማቴዎስ ወንጌል መልዕክት (ክፍል 59) እናንተው የሚበሉትን ስጡአቸው ማቴ14:13-21 የመጥምቁ ዮሐንስ ደቀ መዛሙርት ወደ ጌታ መጥተው የዮሐንስን መሠዋት ሲነግሩት ከነበረበት ስፍራ ወደ ምድረ በዳ ፈቀቅ አለ፡፡ ምክንያቱም ሄሮድስ በኢየሱስ እየተፈጸመ ያለውን ተዓምራት ሰምቶ ይህ መጥምቁ ዮሐንስ ነው፤ እርሱ ከሙታን ተነሥቶአል፥ ስለዚህም ኃይል በእርሱ ይደረጋል በማለት ስጋት ላይ በመሆኑ ለጥንቃቄ ራሱን መሰወሩ ነው፡፡ ሰይጣን በምድራዊ ነገሥታት በኩል ስለሚሰራ አስፈላጊው ነገር ጥንቃቄ ነው፡፡ ብዙ ሰዎች ያለ እግዚአብሔር ፈቃድ አንዳች አይሆንም ይላሉ ነገር ግን በምድር ላይ ብዙ አመጾች እየሆኑ ያሉት እኮ ያለ እግዚአብሔር ፈቃድ መሆኑን አያስተውሉም፡፡ ደግሞም የሰይጣን ዋንኛ ዓላማ የእግዚአብሔርን ፈቃድ በምድር ላይ ማስተጓጎል ነው፡፡ ስለዚህ ነው ጥንቃቄ ያስፈለገው ጠቢቡ ሲናገር “ጥንቃቄ ይጠብቅሃል፥ ማስተዋልም ይጋርድሃል” ምሳ2፡11 አለ፡፡ ህዝቡ ጌታ ፈቀቅ ማለቱን ሲያውቁ በእግር ተከተሉት፣ ከእርሱ ጋር ብዙ ሰዓታት ቆይተዋልና ኢየሱስ ያደረገላቸውን ተአምራትና ለደቀ መዛሙርቱ በቀጣይ አገልግሎታቸው ትልቅ ትምህርት የሚሆን እውቀት የሰጠበትን ይህን ክፍል እንመለከታለን፡- 1. ርህራሄው "ወጥቶም ብዙ ሕዝብ አየና አዘነላቸው ድውዮቻቸውንም ፈወሰ" ማቴ14:14 አገልግሎት የሚጀምረው ለምናገለግለው ግለሰብ ይሁን ህዝብ ሸክምና የልብ ርህራሄ ሲኖረን ነው፡፡ ጸጋም በሙላት መለቀቅ የሚጀምረው በዚህ ዓይነት መንፈስ መንቀሳቀስ ስንችል ነው፡፡ እናት ልጅ ስትወልድ ልጁን በህይወት የሚያስቀጥል ወተት ታግታለች፣ ይህ ተፈጥሮአዊ ክስተት ነው፡፡ ጳውሎስ ሲናገር “ስለዚህም አሕዛብ ስለ ሆናችሁ ስለ እናንተ የክርስቶስ ኢየሱስ እስር የሆንሁ እኔ ጳውሎስ ለእግዚአብሔር እንበረከካለሁ። ለእናንተ ስለ ተሰጠኝ ስለ እግዚአብሔር ጸጋ መጋቢነት በእርግጥ ሰምታችኋል” ኤፌ3፡1,2 ጳውሎስ ለአህዛብ ጥሪና በእግዚአብሔር ፊት የሚያበረክከው ሸክም ብቻ ሳይሆን የነበረው፣ ህዝቡን የሚያገለግልበት የመጋቢነት ጸጋም ተሰጥቶታል፡፡ ኢየሱስም ህዝቡን አይቶ አዘነላቸውና ድውያቸውን ፈወሰ፡፡ ስለ ፈውስ መወዛገብና መንታ ልብ ሊኖረን አይገባም፣ እንደህ ዓይነት አቋም እምነትን ሽባ ያደርገዋል ያዕ1፡7,8፡፡ ጌታ ራሱ ፈውስ የልጆች እንጀራ ነው ብሎአል ማቴ15፡26 ጌታ በሚያደርገው ነገር ሁሉ አንድም እንዲ አንድም እንዲያ የሚባል ነገር የለውም “ኢየሱስ ክርስቶስ ትናንትና ዛሬ እስከ ለዘላለምም ያው ነው” ዕብ13፡8 በሰንበት ሰዎች ያርፉ ዘንድ ሰንበትን የሰጠ ጌታ በሰንበት ሰዎችን ይፈውስ የነበረው ሰዎች እረፍታቸው ሙሉ ይሆን ዘንድ ፈቃዱ በመሆኑ ነው፡፡ ፈወሳቸው የሚል ቃል እያነበብን በሽታ የለም የሚል አቋም ሊኖረን አይችልም፡፡ ፈውስ ግን ፈቃዱ ነው፡፡ ዛሬም ህዝብን በዚህ አገልግሎት መጥቀም፣ ጸጋን ማካፈል የምንችለው እንዲህ ዓይነት አቋም ሲኖረን ብቻ ነው፡፡ 2. የሰው ምክንያት "በመሸም ጊዜ ደቀ መዛሙርቱ ወደ እርሱ ቀርበው፡— “ቦታው ምድረ በዳ ነው አሁንም ሰዓቱ አልፎአል፤ ወደ መንደሮች ሄደው ለራሳቸው ምግብ እንዲገዙ ሕዝቡን አሰናብት፡” አሉት" ማቴ14:15 ስጋዊና መንፈሳዊ አስተሳሰብ ሰማይ ከምድር ከፍ እንደሚል እንዲሁ የተራራቁ ናቸው ኢሳ55፡9፡፡ ስጋዊ አስተሳሰብ በውጫዊ አምስቱ የስሜት ህዋሳት መረጃዎች ላይ ጥገኛ በመሆኑ ከዚህ ሌላ መንገድ አይታየውም፡፡ ደቀ መዛሙርትም ጊዜው መምሸቱን፣ ስፍራው ምንም የማይገኝበት ምድረ በዳ መሆኑን፣ ህዝቡም መራቡን አስተውለዋል፣ ከዚህም ግንዛቤ በመነሳት በቀጣይ ጌታ ህዝቡን እንዲያሰናብት ምክራቸውን ለገሱ፡፡ ደቀ መዛሙርት በመንፈስ ዓለም ሌላ ዳይሜንሽን መኖሩን ገና አልተረዱም፡፡ ስለዚህ ነው ጠቢቡ “በፍጹም ልብህ በእግዚአብሔር ታመን፥ በራስህም ማስተዋል አትደገፍ” ምሳ3፡5 ያለው፡፡ በስጋ ብቻ ስንመላለስ እግዚአብሔርን ደስ አናሰኝም ሮሜ8፡7-8 ነገር ግን ደቀ መዛሙርት በፍጻሜው አገልግሎታቸው በዚህ መረዳት አልቀሩም ጴጥሮስን እንኳን ለሽባው ሰው ፈውስ “ያለኝን እሰጥሃለሁ” በማለት ተነስቶ እንዲራመድ አዘዘው፡፡ መንፈሳዊውን እውነታና ከእርሱም የተሰጠንን ስንረዳ ለሌሎች የምንሰጠው በውጫዊ አስተሳሰብ ያልተገደብን እንሆናለን፡፡ 3. መለኮታዊ አቅርቦት "ኢየሱስም፡— “እናንተ የሚበሉትን ስጡአቸው እንጂ ሊሄዱ አያስፈልግም” አላቸው" ማቴ14:16 ጌታ ያመጡትን መረጃ ሰምቶ መልካም ነው አላለም ነገር ግን፣ እናንተው ራሳችሁ ስጡአቸው እንጂ መሄድ አያስፈልጋቸውም በማለት ሴቶችና ህጻናት ሳይቆጠሩ ለአምስት ሺህ ወንዶች ይህን ማለቱ የሚያስገርማቸው ጉዳይ ነው፡፡ ይሁን እንጂ እኔ እመግባቸዋለሁ ብሎአቸው ቢሆን በደስታ በፈነደቁ ነበር ነገር ግን እናተው ስጠአቸው ማለቱ ግራ ገብቶአቸው ከአንድ ህጻን ልጅ የተቀበሉትን ጥቂት ነገር ይዘው መጡ “ከአምስት እንጀራና ከሁለት ዓሣ በቀር በዚህ የለንም አሉት” “የለንም” የሚለው ቃል በኋላ “ያለኝን እሰጥሃለሁ” በሚለው ቢተካም አሁን ግን ከስጋዊ መረጃ ውጪ ሌላ እይታ የላቸውም፡፡ ስጋዊ እይታ ውስን ሲሆን መለኮታዊ እይታ ግን እጅግ ሰፊ ነው፡፡ በዚህም ጌታ የመለኮታዊ አቅርቦት ምስጥርን ገለጠላቸው፡፡ በመጀመሪያ እነዚያን አምጡልኝ አለ፣ በእርግጥ ይህ በቂ ሆኖ ሳይሆን ዘር ስለሆነ ነው፡፡ ሁለተኛ የሚመጣውን አቅርቦት በሚገባ ለማስተዳደር እንዲቻል ህዝቡን በስርዓት በማስቀመጥ የማኔጅመንት ስራ እንዲሰሩ አደረገ በሶስተኛ ደረጃ ያመጡትን ይዞ በረከትን በሚሰጥ አምላክ ፊት አመሰገነ፣ በመጨረሻም ከጌታ የተቀበሉትን ለህዝቡ በታማኝነት ሰጡ፡፡ ሁሉም በልተው ጠገቡ አተረፉም፡፡ ጸጋ ይብዛላችሁ Telegram:- @mentesnotkebede2020 👍 Join በማድረግ እየተቀላቀሉን ሌሎችም እንዲሳተፉ ሼር በማድረግ ይሳተፉ Email:- mentesnot_kebede@yahoo.com ስልክ:- 0911693190