Mhmd S. AbuRayan

نجيب محفوظ في أحد حواراته التلفزيونية اتسأل "أستاذ نجيب جائزة نوبل غيرت فيك إيه؟" فكانت إجابته "لما جاتلي كان فات وقت التغيير". الفنان التشكيلي الراحل حسن سليمان، بيحكي في كتابه "حرية الفنان"، عن الفنان الروسي/الفرنسي "دي ستيل" اللي الثراء طرق بابه بعد ما ماتت مراته على طول بسبب الجوع والبرد والمرض.. وساعتها قرّر الانتحار لأنه لم يتحمل شذوذ ومرارة هذا الواقع اللي الحاجة مابتجيش فيه في وقتها. إدجار آلان بو - أو حد أمريكي تاني مش فاكر- حكى عن صديق ليه روائي لفّ على دور النشر يترجاهم يشتروا منه أي حاجة من الـ3 روايات اللي كتبهم، لغاية لما يئس. وفي اليوم اللي مراته ماتت بسبب إنه مكنش لاقي فلوس يجيبلها علاج أو حتى غطا يدفيها بيه.. خبط على بابه بالليل مندوب من إحدى دور النشر وإدّاله شيك بمبلغ محترم نظير واحدة من الروايات اللي الدار قرّرت تشتريها. الراجل شكره بكل مرارة وامتنان، وقفل الباب ورمى الشيك على جنب ودخل انتحر. في الفيلم العظيم "المريض الإنجليزي"، ألماسي خرج في قلب معمعة الحرب العالمية التانية على جبهة شمال أفريقيا، وباع أسرار عسكرية وسرق طيارة حربية عشان يلحق يجيب علاج ويرجع لكاثرين اللي كان سايبها مصابة إصابة خطيرة في كهف في قلب الصحرا، ورجع متأخر كام ساعة بس. الكام ساعة اللي كان اتأخر فيهم، هي كانت لفظت أنفاسها الأخيرة بالفعل. توفيق الحكيم في إحدي تجلياته الخالدة بيقول "مأساة الإنسان اليوناني كانت في الصراع مع القدر؛ أما مأساة الإنسان المصري فهي في الصراع مع الزمن". من ارتشافات الحكمة المتأخرة إنك تسلّم بإنك مش في سباق في الزمن، ولا في صراع معاه؛ لأنك كإنسان: إنت ولا حاجة في مواجهة الزمن. الزمن دايمًا أقوى مننا، وسيء الحظ والمصير في الحياة دي هو اللي بيتورّط في صراع مع الزمن أو بيوهم نفسه بكدة - بمعنى أدق-. والخلاصات اللي كان الإنسان متعلّق بأستارها، على شاكلة "أن تصل متأخرًا خير من ألا تصل أبدًا"، بتكتشف إن الحكمة - وفقا للتجربة وللأمثلة المذكورة فوق- على عكسها تمامًا، وإنك أحيانًا "ألا تصلَ أبدًا، هذا أفضل بكثير من أن تصِل متأخرًا". لكن يظل في الجوهر من كل دة، إنك "مش مهم توصل". فعلاً مش مهم. دة فضلاً عن إنك توصل في الزمكان المناسب أصلاً. المهم إنك تكون شارخ في طريقك ومكمل حركة ومواصل عليه. وبصرف النظر عن فوات الزمان والمكان لإحراز إنجاز ما على هذا الطريق، فانت مكمّل، وهذه حكمة جليلة متوارية في إجابة نجيب محفوظ.