"СЭТТИЭЛЭ"

Күндү доҕоттор, бу киэһэ 10 чаастан араадьыйаҕытын холбуургутун эбэтэр төлөпүөҥҥүтүгэр НВК Саха хачайдаан бэлэмнээн баран "Тэтим" эбилигэр киирэргитин умнумаҥ. "Аарыма" сэһэн 3-үс чааһын истээриҥ. Аныгы айымньыттан астыныы, дуоһуйуу ылыаххыт диэн эрэнэбин. Умнумаҥ! Аарыма эмиэ "Тэтим" долгуннарыгар!

Күндү доҕоттор, кэлэр ый, о.э. бэс ыйын 1-кы күнүттэн киэһэ аайы 10 чаастан аатырбыт Аарыма сэһэн үһүс чааһын "Тэтим" араадьыйаҕа биэриэхтэрэ. Көтүппэккэ истээриҥ. Алаастаах тыа бөрөлөрүн аҕа баһылыга буолбут Аарыма хомуур үөрүн кытта Муустаах байҕалга баран кэлиитин туһунан истиэххит. Хотугу дойду кыһыҥҥы ураты айылҕатыгар тыа кыыллара хайдах айанныылларын, бултуулларын, таас хайалар чубукутун, хомпоруун хотойун, Муустаах байҕал улуу тойоно Үрүҥ эһэни кытта көрсүһүүлэрин, буурҕа будулҕанын хайдах туоруулларын билиэххит. Ону таһынан хотугу бөрө Үрүҥчэй ураты дьылҕатын туһунан истиэххит. Сарсын Саха национальнай араадьыйатыгар " Тэтимҥэ анонс иһиллиэҕэ. Онно билиһиннэриэхтэрэ. Сэргээҥ, умнубакка араадьыйаҕытын холбооруҥ.

– Күн-дьыл туруга эмискэ сылыйыытынан-тымныйыытынан, халлаантан сөҥүү хойуутук түһүүтүнэн «Бүлүү» суол управлениета «Бүлүү» уонна «Халыма» федеральнай суолларга, бары суоппардарга туһаайан, сэрэхтээх буоларга ыҥырар. Чуолаан, хайаан даҕаны айан түргэнин хонтуруоллуурга, инники иһэр тыраанаспар икки ардын ырааҕын-чугаһын тутуһарга уонна эмискэ тосту манёвру оҥорууттан туттунарга диэн сэрэтэр. – «Арассыыйаҕа хас биирдии суоппарга ОСАГО полиһын сыанатыгар быһаччы дьайар бонус-малус коэффициена муус устар бастакы күнүгэр хос ааҕыллыаҕа» диэн «РИА Новостига» Арассыыйа автостраховщиктарын сойууһун бэрэсидьиэнэ Евгений Уфимцев кэпсээтэ. Кини «коэффициент үрдүөҕэ, ааспыт кэм устата, ол эбэтэр муус устар бастакы күнүттэн саҕаланан, үүнэр сыл кулун тутар отут биир күнүгэр диэри информация автоматизированнай систиэмэҕэ киирдэҕинэ: страховой төлөбүр төһөнөн элбэх да, соччонон бу коэффициент үрдүүр» диэтэ. Онуоха «бэрээдэктээх суоппардарга ОСАГО төлөбүрэ намтыаҕа» диэн быһаарда. Успуорт-күрэс сонуна – Саха сиригэр хайыһар успуорда төрүттэммитэ 100 сылыгар анаан хайыһарга улахан марафон ыытылынна. Олохтоохтору кытта түһүү кирбиитигэр аатырбыт хайыһардьыттар – Ванкувердааҕы Олимпиада чөмпүйүөнэ Никита Крюков, Аан дойду чөмпүйэнээтин үс төгүллээх үрүҥ көмүс призёра Александр Бессмертных – таҕыстылар. Барыта сүүстэн тахса киһи – уопуттаах хайыһардьыттартан саҕалаан кыра оҕолорго тиийэ – кытыннылар. – Нерюнгри куоракка ыытыллыбыт Арассыыйа мас тардыһыыга күрэхтэһиитин түмүгүнэн улахан норуоттар икки ардыларынааҕы күрэхтэһиилэргэ кыттарга дойду сүүмэрдэммит хамаандатын састааба быһаарылынна. Саха мадьыныларын туһунан этэр буоллахха, аан дойду күрэхтэһиитигэр кыттар быраабы ыллылар: Артур Жирков (алта уон киилэ), Ариан Григорьев (алта уон биэс киилэ), Айсиэн Мигалкин (сэттэ уон киилэ), Константин Жирков (сэттэ уон биэс киилэ), Василий Захаров (аҕыс уон киилэ), Семён Борисов (тоҕус уон киилэ), Семён Степанов (сүүс биэс киилэ), Ирина Севрюк (алта уон биэс киилэ), Саина Седалищева (сэттэ уон биэс киилэ) уонна Валерия Никифорова (аҕыс уон биэстэн үөһэ киилэ). Сэттиэлэ сонуннарын бэлэмнээтэ: Борис Гоголев. Тылын-өһүн көрдө: Арчылан. Аахта: Эрэл Эрилик. Чэ, этэҥҥэ буолуоҕуҥ! Кэлэр сэттиэлэ ситиһиилээх буоллун!

Чэ, саҕалаатыбыт. Сэттиэлэ сонуннара. Кулун тутар сүүрбэ үс – сүүрбэ тоҕус күннэрэ. – Ил Дархан Айсен Николаев Москубаҕа дойду Судаарыстыбаннай Сүбэтин энэргиэтикэҕэ хамыыһыйатын мунньаҕын ыытта. Кытыы уонна уустук суоллаах-иистээх сирдэргэ улахан уонна кыра кээмэйдээх чох уматыктаах уоту оҥорууну сайыннарыы кэскилин дьүүллэстилэр уонна, аныгы технологиялары олоххо киллэриини өйөөн, үлэни салгыы ыытар туһунан быһаарыы ылыннылар. – Кулун тутар 24 күнүгэр Ил Дархан Арассыыйа култуураҕа миниистирэ Ольга Любимованы кытта көрсүһүүтүгэр «Дьиэ кэргэн» национальнай барылы олоххо киллэриигэ саҥа соруктары ырыттылар. Миниистир өрөспүүбүлүкэ ситиһиилэрин бэлиэтээтэ уонна дойду култуураҕа министиэристибэтин кытта биир ситимнээх ыытыллар үлэни үрдүктүк сыаналаата. Кинилэр Арассыыйа Бэрэсидьиэнэ Владимир Владимирович Путин тус сорудаҕынан тутуллар Василий Афанасьевич Босиков аатынан Муусука үрдүкү оскуолатын 240 миэстэлээх үөрэнэр куорпустаах, 150 миэстэлээх интэринээттээх саҥа комплексын тутуу, тэрилинэн хааччыйыы туһунан кэпсэттилэр. Эбийиэк 2026 сыл ахсынньытыгар арыллыахтаах. – Кулун тутар 25 күнүгэр Айсен Николаев өрөспүүбүлүкэ култууратын үлэһиттэрин идэлээх бырааһынньыктарынан эҕэрдэлээтэ. Кини култуура дьон-сэргэ кута-сүрэ, сомоҕолоһуутун төрүтэ уонна көлүөнэлэри ситимниир күүс буоларын, бу элбэх омуктаах, баай фольклордаах уонна талааннаах дьонноох Сахабыт сиригэр уратытык биллэрин бэлиэтээтэ. – Айсен Николаев Саха сирин олохтоохторун аан дойдутааҕы Тыйаатыр күнүнэн эҕэрдэлээтэ. Эҕэрдэҕэ тыйаатырга ааспыт уонна аныгы үйэ холбоһорун, сомоҕолоһуу күүһүрэрин, өрөспүүбүлүкэбит тыйаатыр эйгэтигэр Арассыыйа биир чаҕылхай түөлбэтинэн ааҕылларын туһунан этиллэр. Быйыл Александр Пушкин аатынан Нуучча академическай тыйаатырын 135 сылын уонна Былатыан Ойуунускай аатынан Саха академическай тыйаатырын 120 сылын бэлиэтиибит. Олоҥхо тыйаатыра Саха сирин омуктарын култуурунай нэһилиэстибэлэрин эбийиэгинэн билиниллибитэ. Тыйаатырдар үлэлэрин сүрүнүнэн көрөөччүлэр тапталлара, сыанабыллара буолар. – Кулун тутар 27 күнүгэр Айсен Николаев Саха сиригэр үөрэххэ уһулуччу ситиһиилээх оҕолору өйүүр дьаһал салҕанарын туһунан иһитиннэрдэ. Биир кэлим эксээмэҥҥэ 100 баалы ылбыт оскуоланы бүтэрээччилэргэ 100 тыһыынча солкуобай төлөбүр уһатылынна. Ил Дархан хас биирдии «сүүс бааллаах» түмүк кэннигэр улахан уонна боччумнаах үлэ, дириҥ билии-көрүү, үтүө майгы-сигили уонна дьулуурдаах буолуу турарын, бу ситиһиигэ төрөппүттэр уонна учууталлар улахан өйөбүллэрэ баарын, кинилэр мындыр салайыылара эмиэ улахан суолталааҕын бэлиэтээтэ. – Пастереллез сүөһү ыарыытын утары быһыыны биэрии кулун тутар 28 күнүттэн саҕаланна диэн, Саха сиринээҕи ветеринария управлениета иһитиннэрдэ. Быһыыны туруоруу босхо. Тыа хаһаайыстыбатын сүөһүтүн барытын ФГИС «ВетИС» систиэмэҕэ «Хорриот» компонеҥҥа, оттон дьиэ кыылын «Все звери» систиэмэҕэ бэлиэтиир наадалааҕын иһитиннэрэллэр. Тыа хаһаайыстыбатын министиэристибэтигэр анал ыстаап үлэлиир. Саха сирин ветеринарияҕа управлениетын быһа нүөмэрэ: +7 (4112) 508-766. Туһааннаах төлөпүөн төгүрүк суукка устатыгар үлэлиир. – Саха Өрөспүүбүлүкэтин тырааныспарга уонна суол хаһаайыстыбатыгар министиэристибэтэ иһитиннэрбитинэн, муус устар бастакы күнүттэн муус суолларга тиэхиньикэ уйугар хааччахтааһыннар киириэхтэрэ. Кыраапык маннык бигэргэннэ: «Вилюй» суол управлениетын көрүүтүгэр баар «Бүлүү» уонна «Халыма» федеральнай суолларга муус устар бастакы күнүттэн — отут туоннаҕа диэри; муус устар ахсыс күнүттэн сүүрбэ туоннаҕа диэри; муус устар уон биэс күнүттэн бары тырааныспардарга муус суол сабыллар. Бу дьаһал «Дьокуускай–Аллараа Бэстээх» хайысханан, Бүлүү эбэни туоруур түөрт муус суолга, Алдан өрүскэ эмиэ туһааннаах. Саха сирин айан суолларын управлениетын көрүүтүгэр баар эрэгийиэннээҕи уонна муниципальнай таһымнаах суолларга муус устар уон күнүттэн хааччахтыыр уйук сүүрбэ туоннаҕа диэри кыччыаҕа. Барыллаан быһаарыынан, муус устар уон бэһис күнүттэн барыта сабыллар.

Сэттиэлэ сонуннарын бэлэмнээтэ: Борис Гоголев. Тылын-өһүн көрдө: Арчылан. Аахта: Эрэл Эрилик. Чэ, этэҥҥэ буолуоҕуҥ! Кэлэр сэттиэлэ ситиһиилээх буоллун!