Bugun.uz | Расмий канал

Ўзбекистонда риэлторлар учун малака сертификати жорий этилади Ўзбекистонда риэлторлик фаолиятини тартибга солувчи алоҳида қонун қабул қилинди. Ҳужжат 8 ноябрдан кучга киради. Қонунга кўра, риэлторлар малака имтиҳонидан ўтиб, 5 йиллик сертификат олиши керак бўлади. Шунингдек, риэлторлар, риэлторлик ташкилотлари ва кўчмас мулк агентлари ҳақидаги маълумотлар киритиладиган очиқ Ягона реестр юритилади. Ҳужжатда кўчмас мулк олди-сотдиси, ижараси ва бошқа битимлар бўйича хизмат кўрсатиш тартиби, шартномаларни расмийлаштириш ҳамда мижозлар ҳуқуқларини ҳимоя қилиш қоидалари ҳам белгиланган. Қонун Қонунчилик палатаси томонидан 2025 йил 1 июлда, Сенат томонидан эса 2026 йил 7 апрелда маъқулланган.

Сенат Президент администрацияси мақомини белгилайдиган конституциявий қонунни маъқуллади Олий Мажлис Сенати «Ўзбекистон Республикаси Президенти администрацияси тўғрисида»ги Конституциявий қонунни маъқуллади. Қонун билан Президент администрациясининг давлат бошқаруви тизимидаги ўрни, ҳуқуқий мақоми, асосий вазифалари ва ваколатлари конституциявий қонун даражасида белгилаб қўйилмоқда. Шунингдек, ҳужжатда администрациянинг таркибий тузилиши, давлат органлари ва бошқа ташкилотлар билан ҳамкорлик механизмлари, мансабдор шахслар ва ходимлар фаолиятининг ҳуқуқий кафолатлари белгиланган. Қонунни тайёрлашда АҚШ, Финляндия, Чехия, Словакия, Руминия, Латвия ва Қозоғистон тажрибаси ўрганилган.

Ўзбекистон Журналистлар уюшмаси қошида Блогерлар ижодий кенгаши ташкил этилди Янги тузилмага журналист ва блогер Эльдар Асанов раис этиб сайланди. Кенгаш блогерларни бирлаштириш, уларнинг қонуний манфаатларини ҳимоя қилиш, ахборот олишдаги муаммолар, таҳдид ва босим ҳолатларида ҳуқуқий кўмак бериш, шунингдек, давлат идоралари билан мулоқот учун майдон яратишни мақсад қилган. Блогерлар учун семинар, тренинг, медиасаводхонлик, ҳуқуқий ва рақамли хавфсизлик бўйича курслар ҳам ташкил этилиши режалаштирилган. Шунингдек, блогерлик муҳити учун касбий ва этик меъёрларни шакллантириш ҳам кенгашнинг устувор вазифаларидан бири сифатида белгиланган.

Актёр Абдуманнон Убайдуллаев 86 ёшида вафот этди Таниқли ўзбек актёри, режиссёр ва педагог Абдуманнон Убайдуллаев 86 ёшида вафот этди. У томошабинларга, аввало, «Ватан» фильмидаги Қурбон роли билан танилган. Шунингдек, актёр «Омад», «Сўнгги лаҳза», «Ҳижрон», «Назар», «Йигит йиғламасин», «Алданган кўнгил» ва «Меҳр» каби фильмларда роль ижро этган. Убайдуллаев ижодий фаолият билан бирга Ўзбекистон давлат санъат ва маданият институтида талабаларга дарс бериб келган.

Мирзиёев Трампни Ўзбекистонга расмий ташриф билан таклиф қилди Шавкат Мирзиёев ва АҚШ президенти Дональд Трамп ўртасида телефон мулоқоти бўлиб ўтди. Суҳбатда Ўзбекистон–АҚШ стратегик шериклигини янада ривожлантириш, олий даражада эришилган келишувлар ижроси ҳамда бўлажак икки ва кўп томонлама тадбирлар режаси муҳокама қилинди. Трамп икки мамлакат муносабатлари «мисли кўрилмаган даражага етгани»ни таъкидлаган. Суҳбат якунида Мирзиёев Трампни ўзи учун қулай вақтда Ўзбекистонга расмий ташриф билан келишга таклиф қилди.

Марказий банк мижозлар мурожаатлари бўйича энг салбий кўрсаткичга эга банкларни эълон қилди 2026 йил II чоракда банклар фаолияти бўйича Марказий банкка 11 331 та мурожаат келиб тушган. Мижозлар сонига нисбатан мурожаатлар улуши энг юқори бўлган банк — AVO Bank, индекс 4,42. Кейинги ўринларда Бизнесни ривожлантириш банки — 2,78, Микрокредитбанк — 2,69, TBC Bank — 2,63 ва Anor Bank — 1,84 қайд этилган. Бу ерда индексни тўғри тушуниш муҳим: 4,42 — мижозларнинг 4,42 фоизи шикоят қилган дегани эмас. Марказий банк банкнинг барча мурожаатлардаги улушини унинг барча банк мижозларидаги улушига бўлиб ҳисоблаган. Яъни AVO Bank’нинг мурожаатлардаги улуши унинг мижозлар бозоридаги улушидан 4,42 баравар юқори бўлган. Топ-10’га, шунингдек, Invest Finans Bank ва Turonbank — 1,46, Asakabank — 1,28, Ipoteka Bank — 1,09 ҳамда Kapitalbank — 1,07 билан кирган. Марказий банкнинг ўзи ҳам бу рейтинг банкнинг молиявий барқарорлиги ёки ишончлилигини баҳоламаслигини, фақат мижозлар сонига нисбатан келиб тушган мурожаатлар улушини кўрсатишини таъкидлаган. Чорак давомида 100 тадан кам мурожаат келиб тушган банклар индексга киритилмаган.

Дам олиш кунлари Ўзбекистонда ҳаво 42 даражагача исийди 8–9 август кунлари республика бўйича ҳаво ҳарорати 37–40 даражагача, шимолий, жанубий ва чўл ҳудудларда эса айрим жойларда 41–42 даражагача кўтарилади. Ўзгидрометга кўра, асосий ҳудудларда ёғингарчилик кутилмайди. Фақат тоғли жойларда қисқа муддатли ёмғир ёғиб, момақалдироқ бўлиши мумкин. Тошкент вилояти ва Фарғона водийсининг тоғолди ҳамда тоғли ҳудудларида сел-сув тошқини хавфи бор. Шимол ва чўл ҳудудларда шамол 13–18 м/с гача кучайиб, айрим жойларда чанг-тўзон кузатилиши мумкин. Тошкентда дам олиш кунлари ҳаво 37–39 даражагача исийди.

AI-суперкомпьютерини кенгайтириш учун яна 70 млн доллар йўналтириш таклиф қилинди Президент Шавкат Мирзиёев сунъий интеллект экотизимини ривожлантириш бўйича тақдимот билан танишди. Ўтган ой «Рақамли ҳукумат» дата-марказида NVIDIA технологиялари асосида ишга туширилган суперкомпьютернинг юкламаси бир ой ичида 90 фоизга етган. Ҳозиргача ҳисоблаш инфратузилмасига 24 млн доллар сарфланган, кластерни кенгайтириш учун эса яна 70 млн доллар йўналтириш таклиф қилинган. Мирзиёев жорий йилнинг ўзида иқтисодиёт ва ижтимоий соҳаларда 100 тадан ортиқ AI лойиҳасини амалга ошириш, ҳисоблаш қувватларини ошириш ва сифатли маълумотлар базасини шакллантириш бўйича топшириқлар берди. 2030 йилгача Ўзбекистонда AI асосидаги дастур ва хизматлар ҳажмини 1,5 млрд долларга етказиш режалаштирилган.

Наманган шаҳрининг собиқ ҳокими Анвар Отахўжаев 11 йилга қамалди Жиноят ишлари бўйича Ўзбекистон туман судининг 7 августдаги ҳукми билан Наманган шаҳрининг собиқ ҳокими Анвар Отахўжаев 11 йилга озодликдан маҳрум қилинди. У ўзлаштириш, фирибгарлик, мансаб ваколатини суиистеъмол қилиш ва ваколат доирасидан четга чиқиш, мансабга совуққонлик, мансаб сохтакорлиги ҳамда пора олиш жиноятларини содир этганликда айбли деб топилган. Шунингдек, Отахўжаев 3 йил давомида мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилинган.

Урганчда BYD Chazor ҳайдовчиси учта машинага қасддан шикаст етказди 4 август куни Урганч шаҳрида икки фуқаро ўртасида келишмовчилик келиб чиққан. Хоразм вилояти ИИБ маълумотига кўра, шундан сўнг 1999 йилда туғилган Х.Б. BYD Chazor автомашинасини кескин бошқариб, Cobalt, яна бир BYD Chazor ва Damas’га қасддан уриб, шикаст етказган. Ҳодиса оқибатида ҳеч ким тан жароҳати олмаган. «Ташвиш тугмаси» орқали келиб тушган хабардан сўнг ИИО ходимлари воқеа жойига бориб, ҳайдовчининг ҳаракатларини тўхтатган. Ҳозир терговга қадар текширув олиб борилмоқда. Унинг якунига кўра қонуний қарор қабул қилинади.

Ўзбекистонда кузатилмайдиган иқтисодиёт ЯИМнинг 22,9 фоизига тушди 2026 йилнинг биринчи ярмида Ўзбекистонда кузатилмайдиган иқтисодиёт ҳажми 245,5 трлн сўмни ташкил этди. Унинг ЯИМдаги улуши ўтган йилнинг шу давридаги 26,1 фоиздан 22,9 фоизга тушган. Шундан 165,5 трлн сўми норасмий иқтисодиёт, яна 80 трлн сўми яширин иқтисодиёт ҳиссасига тўғри келади. Яширин иқтисодиётнинг ўзи ЯИМнинг 7,5 фоизини ташкил этган. Энг юқори кўрсаткич қишлоқ, ўрмон ва балиқчилик хўжалигида — 60,5 фоиз. Кейин хизматлар соҳаси — 23 фоиз, қурилиш — 17,8 фоиз ва саноат — 6,7 фоиз қайд этилган. Ярим йилда Ўзбекистон ЯИМ ҳажми 1,072 квадриллион сўмга етган ва реал ҳисобда 8,5 фоизга ўсган.

KFC ва Evos ярим йилда умумий овқатланиш соҳасидаги солиқларнинг қарийб 10 фоизини тўлади 2026 йилнинг январь—июнь ойларида Ўзбекистонда умумий овқатланиш соҳасида ишловчи 23 148 та юридик шахс 1 трлн 8,9 млрд сўм солиқ тўлаган. Энг йирик солиқ тўловчилар рўйхатида KFC бренди остида ишловчи INTERNATIONAL FOODCHAIN 52,2 млрд сўм билан биринчи ўринни эгаллади. Evos’га тегишли MAK FOOD SERVIS 41,4 млрд сўм, KETRING 24,8 млрд сўм, Oqtepa Lavash’нинг OQTEPA-FOOD SERVICE компанияси эса 20 млрд сўм солиқ тўлаган. KFC ва Evos’нинг ўзи ярим йилда жами 93,6 млрд сўм солиқ тўлаган. Бу умумий овқатланиш соҳасидаги барча солиқ тушумларининг 9,3 фоизи, энг йирик 20 та корхона тўлаган солиқларнинг эса 43,4 фоизи дегани. Биринчи бешликка Bellissimo Pizza ҳам кирган — компания 11,7 млрд сўм солиқ тўлаган. Энг йирик бешта корхонанинг жами тўлови 150,1 млрд сўмга, яъни топ-20 тўлаган солиқларнинг қарийб 70 фоизига тўғри келган. Умуман, топ-20 корхонанинг товар айланмаси 2,89 трлн сўм, тўлаган солиғи 215,9 млрд сўм бўлган. Улар соҳадаги умумий товар айланмасининг 20,6 фоизини, солиқ тушумларининг 21,4 фоизини таъминлаган. Шу билан бирга, ушбу 20 та корхонага 25 млрд сўмлик солиқ имтиёзлари қўлланган. Бу умумий овқатланиш соҳасида берилган барча солиқ имтиёзларининг 31,1 фоизини ташкил этади.

Электр ва газ муаммоларини ҳал қилиш бўйича Янгийўл тажрибаси яна 13 туманда жорий этилади Янгийўл туманида аҳоли ва тадбиркорларнинг электр узилишлари, қувват етишмаслиги, газ босими пасайиши ва техник шарт олиш билан боғлиқ муаммоларини жойида ўрганувчи махсус штаб иш бошлаган. Президентга тақдим этилган режага кўра, ушбу тизим яна 13 та туманда жорий этилади, кейинчалик бошқа ҳудудларга ҳам тарқатилади. Қайси туманлар танлангани очиқланмаган. Шунингдек, электр ва газ тармоқларига уланиш учун техник шарт беришда коррупциянинг олдини олиш, авариявий узилишлар ва энергия йўқотишларини камайтириш топширилган.

Россияга ишлаш учун бораётган ўзбекистонликлар оқими 13 фоиздан кўпроқ камайди 2026 йилнинг биринчи ярмида Ўзбекистон фуқароларининг Россияга ишлаш мақсадидаги киришлари 13,2 фоизга қисқариб, 1,17 миллиондан ошган. Шунга қарамай, Ўзбекистон Россияга меҳнат мақсадида энг кўп фуқаро кирган давлат бўлиб қолмоқда. Кейинги ўринларда Тожикистон — 494,5 мингта кириш ва Қирғизистон — 289,1 мингта кириш билан қайд этилган. Бу кўрсаткичлар мос равишда 17,9 ва 16,7 фоизга камайган. Умуман, ярим йилда уч давлат фуқароларининг Россияга ишлаш учун киришлари қарийб 1,9 миллион мартага етган. Бу ўтган йилнинг шу давридаги 2,3 миллиондан ортиқ кўрсаткичга нисбатан тахминан 15 фоизга кам. Экспертлар пасайишни Россияда миграция сиёсати кучайтирилгани, ишлаш патенти қимматлашгани, шунингдек, тиббий кўрик, уй-жой ижараси ва транспорт харажатлари ошгани билан изоҳламоқда. Шу билан бирга, Марказий Осиё давлатларида янги иш ўринлари пайдо бўлаётгани ва Жанубий Корея, Хитой, Яқин Шарқ ҳамда Европа давлатларида ишлаш имкониятлари кенгаяётгани Россиянинг меҳнат мигрантлари учун жозибадорлигини пасайтирмоқда.

Тошкентда палов тайёрлаш 128,7 минг сўмга тушади Миллий статистика қўмитаси 2026 йил июль ойида ҳудудлар кесимида паловга ишлатиладиган маҳсулотларнинг ўртача нархларини ҳисоблади. Ҳисоб-китобда 0,3 литр ёғ, 300 грамм пиёз, 700 грамм мол гўшти, 1 килограмм сабзи, 1 килограмм лазер гуручи, 100 грамм нўхат, зира ва туз инобатга олинган. Ушбу маҳсулотларнинг умумий қиймати Тошкент шаҳрида 128 730 сўмни ташкил этган. Бу республикадаги энг юқори кўрсаткич. Кейинги ўринларда Фарғона вилояти — 125 283 сўм, Тошкент вилояти — 122 346 сўм ва Самарқанд вилояти — 122 320 сўм қайд этилган. Палов учун маҳсулотлар энг арзон Қорақалпоғистонда — 107 396 сўмга тушган. Шунингдек, Сирдарёда бу кўрсаткич 113 707 сўм, Андижонда эса 116 554 сўм бўлган.

Тўрт вилоятнинг тоғли ҳудудларида сел-сув тошқини юз бериши мумкин 7 август куни Тошкент, Андижон, Наманган ва Фарғона вилоятларининг тоғолди ва тоғли ҳудудларида сел-сув тошқини юз бериши мумкин. Ўзгидромет маълумотига кўра, республика тоғли ҳудудларининг айрим жойларида қисқа муддатли ёмғир ёғиши ва момақалдироқ бўлиши эҳтимоли бор. Ҳарорат кечаси 13–18 даража, кундузи 22–27 даража бўлади. Республиканинг асосий қисмида ёғингарчилик кутилмайди. Қашқадарё ва Сурхондарё вилоятларида ҳаво ҳарорати 40 даражагача, Қорақалпоғистон, Хоразм, Бухоро ва Навоий вилоятларида эса 39 даражагача кўтарилади. Тошкент шаҳрида ҳаво бироз булутли бўлиб, ёғингарчилик кутилмайди. Ҳарорат кечаси 21–23 даража, кундузи 35–37 даража бўлади.

Чинозда уйларга «Уятли хонадон» плакати ёпиштирилади Тошкент вилояти Чиноз тумани ҳокими Шерзод Салиховнинг топшириғига кўра, санитар ҳолати талабга жавоб бермайдиган ва деворлари оқланмаган хонадонларга «Уятли хонадон» деган плакат ёпиштирилади. Тошкент вилояти ҳокими Зоир Мирзаевнинг топшириғига кўра, йўл бўйида жойлашган ва кўзга ташланадиган маҳаллаларнинг санитария ҳолати ўрганилмоқда. Текширув доирасида Чиноз туманидаги «Бирлик» маҳалласига «Шармандали маҳалла» деган плакат илинган. Туманда корхона ва ташкилотлар раҳбарларидан иборат 40 нафар масъулга маҳалла раислари билан бирга хонадонларни айланиб чиқиш вазифаси юкланган. Улар дарвозалар бўялганини, деворлар оқланганини, кўчага райҳон экилганини, шунингдек, ҳовли ва томорқалар ҳолатини ўрганиб, суратга олиши ҳамда туман ҳокимига ҳисобот бериши керак. Шерзод Салихов аниқланган камчиликлар бир кун ичида бартараф этилмаса, бундай хонадонлар дарвозасига шахсан «Уятли хонадон» плакатини ёпиштиришини билдирган.

«Қўйлиқ» деҳқон бозори фаолияти қисман чекланди Тошкент шаҳар Фавқулодда вазиятлар бошқармаси Бектемир туманидаги «Қўйлиқ» деҳқон бозори фаолиятини қисман чеклади. Бунга бозорда ёнғин хавфсизлиги талаблари бузилгани сабаб бўлган. Аниқланган камчиликлар ёнғин келиб чиқиши, шунингдек, фуқаролар ҳаёти, соғлиғи ва мол-мулкига хавф туғдириши мумкинлиги айтилган. Бозор электр таъминотидан ҳам қисман узилган. Камчиликлар тўлиқ бартараф этилгач, бозор фаолияти қайта тикланади.

Эртага айрим ҳудудларда қисқа муддатли ёмғир ёғиши мумкин 6 август куни Ўзбекистоннинг асосий қисмида ёғингарчилик кутилмайди. Кундузи ҳаво ҳарорати 32–40 даража атрофида бўлади. Фақат Фарғона водийсида айрим жойларда қисқа муддатли ёмғир ёғиши ва момақалдироқ бўлиши мумкин. Тоғли ҳудудларда ҳам ёмғир ва момақалдироқ кутилмоқда. Тошкент, Андижон, Наманган ва Фарғона вилоятининг тоғ олди ҳамда тоғли ҳудудларида сел келиши хавфи эълон қилинган. Тошкент шаҳрида ёғингарчилик кутилмайди. Ҳаво 34–36 даража исийди.