Tech Xtream

الأسبوع اللي فات نظام Express Entry الخاص بالهجرة إلى كندا فتح تاني بعد ما اتوقف في 2020. النظام ده ممتاز جدا لأن ممكن من خلاله تحصل على الإقامة الدائمة في كندا خلال 6 شهور فقط. النظام ده بيستهدف بشكل رئيسي جلب عمالة ماهرة لكندا، وطبعا زيادة عدد السكان من خلال الهجرة وبيعتمد على النقاط بناءً على حاجات زي العمر، المستوى التعليمي، إتقان لغات أجنبية، إتقان مهنة معينة، بتمتلك عرض عمل وهكذا.. كل ما تحقق شرط معين تحصل على نقاط، وبتدخل مع مجموعة من المتقدمين، وحسب عدد نقاطك بيكون ليك ترتيب معين، وبيتم إرسال دعوات للمشاركين لتقديم طلب الهجرة حسب ترتيبهم في المجموعة. تقدر تعمل الموضوع ده بنفسك بدون حاجة إلى مساعدة، والخطوات كالتالي: 1- بتتأكد إنك مؤهل للتقديم في البرنامج 2- بتعمل ملف شخصي بالبيانات الخاصة بيك 3- بتعرف عدد النقاط اللي حصلت عليها وترتيبك 4- كل أسبوعين بيتم إرسال دعوات لأعلى الأشخاص في الترتيب للتقديم النظام ده هيفضل متاح لغاية عام 2024، وهيتم قبول 110 ألف شخص كل سنة. لينك الموقع الرسمي موجود فيه كل التفاصيل اللي محتاج تعرفها وطريقة التقديم في أول تعليق 👇

اليورو حاليا واخد زوحليقة وهبط لمستوى 1 دولار.. يعني حاليا 1 يورو = 1 دولار، وده أسوء أداء لليورو من سنة 2002. ربنا يستر على اللحلول الغلبان بتاعنا.. الدولار لو كح فيه هيطيره

شركة آبل أعلنت عن ميزة مهمة جدا قادمة للآيفون وهي وضع الإغلاق Lockdown 🔒 الميزة هدفها الرئيسي تعزيز حماية الآيفون بشكل غير مسبوق بعد معاناة الموبايل من سلسلة من الثغرات والاختراقات الأمنية اللي استغلتها شركات زي NSO Group لاختراق هواتف صحفيين ونشطاء وحقوقيين وحتى مسئولين في مناصب حكومية. الميزة دي باختصار لما يتم تفعيلها بتبدأ تعزز حماية الموبايل من خلال تعطيل بعض المزايا المعروف إنها بتكون مدخل للهاكرز ولاكتشاف أو استغلال ثغرات في نظام التشغيل. من الأمثلة على المزايا دي المرفقات اللي بتكون مع الرسائل هيتم حظرها باستثناء الصور، هيتم حظر استعراض الروابط، في المتصفح هيتم تعطيل معظم أكواد الجافاسكريبت، على التطبيقات زي FaceTime هيتم حظر المكالمات الواردة إلا لو كان المستخدم نفسه هو اللي أرسل الدعوة، هيتم عمل بلوك لأي اتصال سلكي بين الآيفون وأي جهاز خارجي. شركة آبل كمان طلبت من الباحثين الأمنيين اختبار النظام وعرضت مكافآت تصل إلى 2 مليون دولار في حالة اكتشاف طرق لتجاوز وضع الإغلاق. الميزة دي هتكون متاحة على الآيفون بنظام iOS 16 | الآيباد بنظام iPadOS 16 | الماك بنظام macOS Ventura.

النهاردة أكبر بنك في روسيا Sberbank طبع مليار روبل روسي على البلوكتشين الخاصة بيه.. في أول عملية من نوعها في روسيا. عملية طباعة النقود رقميا بقالها انتشرت بشكل كبير في الفترة الأخيرة، وبتعتمد على امتلاك الجهة اللي طبعت النقود لأصول تساوي أو تجاوز قيمة النقود اللي طبعتها بشكل رقمي، وفي نوع تاني قائم على الخوارزميات ومحاولة السيطرة على سعر العملة بالاعتماد على أصل رقمي آخر، لكن العملية دي أثبتت عدم نجاحها بعد اللي حصل في الدولار الرقمي UST لمشروع Terra. بالنسبة للمؤسسات بتختلف أصولها ما بين سندات أو ممتلكات أو حتى أرصدة من الدولار النقدي أو غيرها من الأصول. أهم دولة اعتمدت على النظام ده هي الصين بعد ما أصدرت اليوان الرقمي e-CNY، ودي عملة أصدرها البنك المركزي الصيني نفسه. اعتماد دول زي الصين وروسيا على إصدار النقود رقميا ليه دلائل كتيرة أهمها محاولة التحرر من سطوة الدولار، محاولة التحرر من نظام سويفت والتأثر بالعقوبات الأمريكية، امتلاك نظام مالي متطور قائم على تقنية عظيمة زي تقنية البلوكتشين، ده بالإضافة لأن الدول دي هيكون ليه سيطرة وقدرة أفضل على مراقبة حركة الأموال على الشبكة الخاصة بيها. المضحك في الموضوع إن المؤسسات العادية عشان مثلا تطبع دولار رقمي لازم يكون عندها أصول تغطي المبالغ اللي هتطبعها، في حين إن الدولار نفسه البنك المركزي الأمريكي بيطبعه بدون أي غطاء 👈👉

موقع المصرية للاتصالات مش بيفتح أو بطيء جدا في التحميل.. ويبدو إن عندهم مشكلة أو حد عامل عليهم هجوم DDoS

محامي إيلون ماسك من شوية بلغ شركة تويتر بانسحابه من صفقة الاستحواذ لأن الشركة رفضت تقدم بيانات دقيقة عن عدد الحسابات الوهمية على المنصة. الشركة في البيانات اللي قدمتها قالت إن الحسابات الوهمية بتمثل أقل من 5% من الحسابات النشطة على المنصة بدون تقديم أدلة ملموسة. بعد خبر انسحاب ماسك من الصفقة هبط سهم تويتر بنسبة 5% ووصل سعره حاليا إلى حدود 37$ مقارنة بسعر 54$ اللي ماسك كان هيشتري بيه. في بند في الاتفاق بين الطرفين إن في حالة انسحاب ماسك من الصفقة هيدفع غرامة مليار دولار.. وفي الغالب هتبدأ من دلوقتي سلسلة من القضايا بين الطرفين، وأعتقد إن هيكون في قضية هيرفعها حملة الأسهم ضد ماسك بسبب تلاعبه في سعر السهم خلال الفترة اللي فاتت بداية من وقت الإعلان عن الصفقة، مرورا بالتصريحات اللي كان بيعملها وتجميد الاتفاق، وصولا لانسحابه من الصفقة. الجدير بالذكر إن ماسك حاليا بيواجه قضية من بعض المستثمرين في عملة DOGE وبيتهموه بالاحتيال من خلال التغريد المستمر عن العملة لرفع سعرها اللي وصل حتى 0.60$ قبل ما سعرها ينهار ويهبط أسفل 10 سنت.

بالرغم من إن الصين تعتبر هي مصنع الشرائح الأول على مستوى العالم من حيث الإنتاج، لكنها معتمدة بشكل شبه كلي على تقنيات أجنبية، وده كان واضح جدا لما تم فرض حظر أمريكي على شركة هواوي وازاي الشركة فشلت في تطوير معالج بدون الاعتماد على تقنيات أجنبية. طبعا في ناس كتير مفكرة إن منع الصين من امتلاك الماكينة دي لأسباب تجارية فقط؛ لكن ده مش صحيح. السبب الرئيسي إن تقدم الصين في مجالات زي الذكاء الاصطناعي؛ تطوير الأسلحة؛ الحرب السيبرانية وغيرها من المجالات الخطيرة والمعقدة معتمد على امتلاكها أحدث تكنولوجيا وصلها البشر في صناعة الشرائح، لأن الشرائح هي العقل المفكر للأجهزة التقنية. حاليا الرئيس الأمريكي "جو بايدن" عامل خطة لتطوير صناعة الشرائح في أمريكا ورصد لها 50 مليار دولار عشان يضيق الخناق أكتر على الصين في المجال، وتبعه في ده شركات تانية زي إنتل اللي هتسثمر 20 مليار دولار لتطوير صناعة المعالجات الخاصة بيها. الصين هتعمل إيه؟ حاليا الصين هتفضل متخلفة عن باقي الدول الغربية في ظل عدم امتلاكها للجيل الثالث والأحدث من الماكينة دي، وهي حاليا بتحاول توصل للتقنية دي من خلال تحالف أكبر شركات تقنية صينية زي هواوي وشاومي وأوبو لبدء تطوير حاجة مشابهة، لكن وصولهم لصناعة ماكينة بالتطور والتعقيد ده شيء شبه مستحيل، لأن الوصول للمستوى ده من التطور استغرق جهد ودراسة وإنفاق مليارات الدولارات على البحث العلمي من عام 1980.

اللي في الصورة دي ماكينة متخصصة في صناعة الرقائق المتطورة بتقنية الليثوجرافيا فوق البنفسجية الفائقة (Extreme Ultraviolet Lithography)، ودي الماكينة اللي بتصنع الشرائح المتطورة اللي بيتم استخدامها في صناعة المعالجات بتقنية 5 نانو. الماكينة دي حاليا تعتبر أهم ماكينات التصنيع في العالم، تمنها حاليا 164 مليون دولار وبتتكون من 100 ألف قطعة، وفي شركة واحدة في العالم فقط هي اللي بتصنعها وهي شركة هولندية اسمها ASML. في 2019 أمريكا منعت هولندا من بيع أحدث نسخة من الماكينة دي في إطار الحرب التجارية على الصين، وحاليا الصين بتمتلك فقط الجيل الأول منها اللي بيصنع شرائح بتقنية 14 نانو فقط. في الوقت الحالي أمريكا بدأت تضغط على الحكومة الهولندية لحظر بيع الإصدار القديم كمان (Deep Ultraviolet Lithography) DUV لأنه ما زال الأكثر شيوعًا وهو المستخدم في صناعة شرائح الموبايل والسيارات والحواسيب اللي السوق حاليا بيعاني من نقص كبير منها. مش بس كدة، أمريكا دلوقتي بتضغط على اليابان لحظر شركة Nikon من تصدير تقنياتها للصين، لأن شركة Nikon بتطور تقنيات مشابهة لتقنيات شركة ASML.

لما نفضل نعمل منشن لماسك عشان يساعدنا في الهاشتاج وميعبرناش.. طب اهو:

بيت المجوهرات البريطاني الشهير "جراف دياموندز" دفع فدية قيمتها 7.5 مليون دولار مقابل عدم تسريب بيانات عملائه. في شهر سبتمبر الماضي جروب الهاكرز الروسي Conti نجحوا في سرقة بيانات الشركة وطلبوا فدية 15 مليون دولار مقابل عدم تسريب البيانات وحاولوا الضغط على الشركة من خلال تسريب بيانات بعض العملاء اللي لسوء حظهم كان فيها بيانات لأعضاء من العائلات الحاكمة في الإمارات والسعودية وقطر. امبارح فقط عرفنا إن الشركة بعد التفاوض مع الجروب وافقت على دفع نصف الفدية 7.5 مليون دولار بعملة البتكوين مقابل عدم تسريب أي بيانات تانية لحماية خصوصية عملائها.

من جهازه قدر الهاكرز يخترقوا السيستم الخاص ببروتوكول Ronin ونجحوا في السيطرة على 4 من أصل 9 من نودز أو عقد بتستخدم للتدقيق والمصادقة على المعاملات داخل الشبكة.. بعدها قدر الهاكرز يسيطر على النود رقم 5 بسبب خطأ ساذج من المطورين.. وبكدة الهاكرز أصبح معاهم تحكم +50% من الشبكة وقدروا ينفذوا عملية السرقة. منصة لينكدإن أصبحت واحدة من أكبر المنصات اللي بيستخدمها الهاكرز في التسلل واختراق الشركات وأنظمتها من خلال استغلال أضعف العناصر فيها وهو العنصر البشري. العملية دي وعمليات أخرى مشابهة تم ربطها بجروب هاكرز كوري شمالي معروف باسم Lazarus.

عرض وظيفة مزيف اتسبب في أكبر عملية سرقة في سوق العملات الرقمية 👇 في شهر مارس اللي فات بروتوكول Ronin مطور لعبة Axie Infinity الشهيرة اتسرق منه ما قيمته 625 مليون دولار من العملات الرقمية. تفاصيل كتير عن السرقة كانت غير معلنة لغاية امبارح لما عرفنا إن السرقة تمت من خلال استهداف أحد المهندسين من خلال هجمات هندسة اجتماعية متطورة جدا. الهجوم اعتمد على شبكة لينكدإن المهنية، والهاكرز بنوا بروفايل كامل لشركة بشكل احترافي جدا، وبدأو يتواصلوا مع أشخاص مسئولين عن عمليات التطوير الخاصة باللعبة والبروتوكول. واحدة من الهجمات بتاعتهم نجحت في اصطياد مهندس تطوير، وبعد كدة عرضوا عليه وظيفة في الشركة بتاعتهم وبعتوله ملف PDF في الأبلكيشن للوظيفة، وطبعا بمجرد ما "المهندس" فتح الملف اخترقوا جهازه بالكامل.

عرض حالة الطقس باستخدام تقنية الواقع المعزز 😯

إليك أفضل 11 اختبار أونلاين تقدر تستخدمهم لتحديد قوة لغتك الإنجليزية اللي مش موجودة 👇 https://bit.ly/2O5IKMU

بيانات مليار مواطن صيني معروضة للبيع على الدارك ويب 👇 يبدو إن في شخص قدر يوصل لقاعدة بيانات خاصة بشرطة مدينة شنجهاي، وقدر إن يحصل على بيانات بحجم 22 تيرابايت لمليار مواطن. البيانات بتتضمن: ▪️ الاسم ▪️ العنوان ▪️ محل الميلاد ▪️ الرقم القومي ▪️ رقم الموبايل ▪️ السجل الجنائي الشخص عرض عينة من البيانات اـ750 ألف شخص وتم التحقق من صحتها. البيانات معروضة للبيع مقابل 10 بتكوين فقط (أقل من 200 ألف دولار).

بيانات مليار مواطن صيني معروضة للبيع على الدارك ويب 👇 يبدو إن في شخص قدر يوصل لقاعدة بيانات خاصة بشرطة مدينة شنجهاي، وقدر إن يحصل على بيانات بحجم 22 تيرابايت لمليار مواطن. البيانات بتتضمن: ▪️ الاسم ▪️ العنوان ▪️ محل الميلاد ▪️ الرقم القومي ▪️ رقم الموبايل ▪️ السجل الجنائي الشخص عرض عينة من البيانات اـ750 ألف شخص وتم التحقق من صحتها. البيانات معروضة للبيع مقابل 10 بتكوين فقط (أقل من 200 ألف دولار).

الحل بسيط يا جماعة 🤡

فيديو لهجوم إلكتروني على أحد مصانع الصلب في إيران الفيديو نشرته مجموعة قرصنة تسمى GonjeshkeDarand كان جزء من هجوم على 3 مصانع للصلب في إيران تسببت في تعطيلها. الهجوم كان رد على هجوم سيبراني إيراني على أنظمة الإنذار العامة في الكيان الصهيوني تسبب في دوي صافرات الإنذار بشكل مستمر في خمس مدن وأجزاء من القدس المحتلة.

امبارح حسابات الجيش البريطاني على تويتر، فيسبوك، يوتيوب تم اختراقها، وحاول الهاكرز استغلال الحسابات في النصب على المتابعين من خلال عمل عروض هدايا وهمية لرموز غير قابلة للاستبدال NFT. بالنسبة لقناة اليوتيوب فتم مسح محتواها بالكامل ونشر مقاطع فيديو متعلقة بالكريبتو، وحاول الهاكرز الاحتيال على المشاهدين من خلال عمل بث مباشر باستخدام مقاطع فيديو قديمة لبعض الشخصيات المشهورة بيتكلموا فيها عن العملات الرقمية. اختراق حسابات مشهورة وتغيير بياناتها واستغلال عدد المتابعين للنصب عليهم بقت واحدة من أكتر الطرق المستخدمة في القترة الأخيرة، وتقريبا نفس الهاكرز اللي اخترقوا حسابات الجيش البريطاني استخدموا نفس الطريقة والمحتوى للاحتيال بعد ما اخترقوا حساب أحد المشاهير على تويتر ونجحوا في سرقة 1.3 مليون دولار.