Tech Xtream

باحث أمني اكتشف ثغرة في منصة الألعاب الشهيرة Steam كانت بتسمحله يشحن رصيد على حسابه من غير ما يدفع حاجة 😯 الثغرة كانت بتعتمد على التلاعب في الريكويست الخاص بعملية الدفع. في البداية بيتم تغيير البريد الإلكتروني على حساب ستيم، مثلا لو عايز تشحن 1000 دولار بتعمل جزء من الإيميل كدة amount1000 بعد كدة بيتم اعتراض طلب الدفع عبر أي أداة زي مثلا BurpSuite ومن خلال تعديلات على الريكويست والتلاعب في بعض الحقول واستغلال وجود كلمة amount1000 الموجودة في الإيميل بيتم إضافة حقل جديد اسمه amount وقيمته = 1000. بعد كدة بتكمل عملية الدفع وبتدفع أي مبلغ مثلا 1$ وبعد اكتمال عملية الدفع بيكون في رصيدك 1000 دولار. ثغرة زي دي لو كان تم اكتشافها من بلاك هاكرز كان ممكن تخسر الشركة مبالغ ضخمة لأن الهاكرز كان هيقدروا يشحنوا رصيد وهمي ويشتروا الألعاب وبعد كدة يبيعوها بأسعار أقل. الباحث بلغ الثغرة لستيم وخد مكافأة 7,500 دولار بحالهم 🙂

فريق برنامج التعدين NBMiner قدروا يكسروا حماية Nvidia اللي نزلت على كروت الشاشة الحديثة لخفض قدرتها على التعدين ⚒ الفريق وصل لإمكانية استخدام 70% من قدرة الكارت على التعدين بشكل مستقر، وقريبا هيوصلوا للنسبة الكاملة 💯 يبقى الحل الوحيد في أزمة كروت الشاشة واستخدامها في التعدين هو التحديث القادم لعملة الإيثريوم اللي هتنتقل من إثبات العمل Proof of Work إلى إثبات الحصة Proof of Stake وبعد التحديث ده مش هيكون فيه حاجة للتعدين بكروت الشاشة.

وزارة العدل الأمريكية عاملة موقع على الدارك ويب لأي شخص عايز يبلغ عن عصابات الهاكرز المتخصصة في هجمات الفدية "تحديدا العصابات المدعومة حكوميا" وعاملة مكافآت تصل إلى 10 مليون دولار 😯 اللذيذ في الموضوع إنها عاملة الموقع على الدارك ويب عشان أي حد يقدر يبلغ بدون ما يكشف هويته، وكمان المكافآت هيتم دفعها باستخدام العملات الرقمية لتشجيع الناس اللي عايزة تبلغ بشكل مجهول 💂

جروب الهاكرز المعروف باسم Conti والمتخصص في هجمات الفدية من الجروبات اللي بتجند مخترقين بالعمولة.. هما بيساعدوه على بمواد تدريبية وثغرات وطرق لتخطي حماية الأجهزة والشبكات، وفي المقابل بيحصلوا على من 20%-30% من الفدية اللي بيتم دفعها بعد هجوم ناجح، والشخص اللي بيشتغل بالعمولة بياخد الباقي.. المهم تقريبا في واحد كان شغال معاهم ولما عملوا الهجوم بمساعدته خدوا فدية ملايين الدولارت وراحوا دفعوله منهم 1500 دولار 😂 المهم صاحبنا من حرقة قلبه سرب كل الماتريال اللي خدها من جروب Conti بما في ذلك المواد تعليمية، مجموعة الثغرات اللي بيتعمدوا عليها، مجموعة أدوات اختراق متقدمة طورها الجروب، عناوين الآي بي لسيرفر C2 كانوا بيستخدموه في الهجمات بتاعتهم وليلة كبيرة..

صورة من القمر الصناعي تظهر حجم الدمار اللي اتعرضت ليه جزيرة Evia تاني أكبر جزيرة يونانية في خلال 10 أيام فقط! من المتوقع زيادة انتشار الحرائق مع توقع رجال الأرصاد رياح قوية. الحرائق حتى الآن هي أسوء موجة حرائق حدثت في منطقة البحر المتوسط [اليونان - إيطاليا - مقدونيا - ألبانيا - تركيا] ودرجة الحرارة وصلت في بعض البلاد دي إلى 53 درجة مئوية. الحرائق في اليونان حتى الآن دمرت أكتر من 240 ألف فدان من من المزارع والغابات الخضراء.

هجوم "شي جين بينج" يسحق كبرى الشركات التكنولوجية في الصين 🔨 جريدة The Economist عاملة تقرير مهم جدا عن الأوضاع الصعبة اللي بتعيشها الشركات العملاقة في الصين في الفترة الأخيرة من خلال التضييق عليها بأوامر من الرئيس الصيني "شي جين بينج". في خلال الأشهر الأخيرة تم إصدار أكثر من 50 دعوة قضائية وإجراء تنظيمي لكبح جماح عمالقة التكنولوجيا ما بين قضايا احتكار إلى عقوبات لانتهاك بيانات المستخدمين. صناعة التكنولوجيا في الصين اللي وصلت قيمتها 4 تريليون دولار تأثرت بالإجراءات الأخيرة لدرجة فقدان المستثمرين ما يقرب من ترليون دولار من الاستثمارات. كاتب المقال تكهن إن هدف الحزب الشيوعي الصيني من الإجراءات دي هو إذلال كبار رجال الأعمال ومنح المنظمين المزيد من السيطرة على الأسواق الرقمية وإعادة تصميم الصناعة وفقا لخطته. كان في تقرير نشرته مجلة The Financial Times من يومين إن من بداية شهر 7 فقط خسر أغنى رجال الأعمال الصينيين ما يقرب من 87 مليار دولار من ثروتهم بسبب الإجراءات الحكومية.

اللي تابع في الفترة الأخيرة تقديم ليونيل ميسي بعد توقيعه لنادي PSG ممكن يكون لاحظ إنه لابس تيشيرت مكتوب عليه "Visit Rwanda". رواندا من 25 سنة حصل فيها واحدة من أبشع الحروب الأهلية بين قبيلتي الهوتو والتوتسي ومات فيها أكتر من 800 ألف إنسان. بعد تعافي البلد من الحرب الأهلية تحولت في أقل من 3 عقود لتصبح أجمل عاصمة دولة إفريقية، وتم تصنيفها على أنها البلد الأكثر جمالا وأمنا في إفريقيا. رواندا اللي مساحتها 26 ألف كيلومتر مربع فقط، وعدد سكانها حوالي 10 مليون نسمة دلوقتي أصبح اقتصادها أسرع الاقتصادات الإفريقية نموا، وفي 2019 تفوقت على الصين والهند في معدل النمو الاقتصادي. رواندا دلوقتي راعي لفريق PSG وفريق أرسنال وهتلاقي على قمصانهم شعار زوروا رواندا Visit Rwanda وهيلاقي إعلانتها بتتعرض في الدوري الإنجليزي. في 2018 شركة "فولكس فاجن" الألمانية عملت مصنع في رواندا بيتم فيه تصنيع سياراتها بالكامل. رواندا مصنفة على إنها أفضل بلد لاحتضان الشركات الناشئة. تقدر تأسس شركة في رواندا في أقل من 5 ساعات بدون رسوم، وبدون ضرائب على الدخل. الواحد سعيد بالتجربة الرواندية واتمنى إننا نتعلم منهم ونستفيد من تجربتهم.

في مالوير جديدة انتشرت اليومين اللي فاتوا اسمها FlyTrap بتسرق حسابات فيسبوك وتم اكتشاف سرقتها لحسابات في 140 دولة 😯 البرمجية الخبيثة دي كانت موجودة في تطبيقات بتوعد المستخدم بالحصول على كوبونات تخفيض أو تطبيقات التصويت على أفضل لاعب في المبارة وتطبيقات مشابهة. التطبيقات دي عشان تشتغل مع المستخدم لازم يسجل دخول بحسابه على فيسبوك، وفعلا كانت بتستخدم بوابة تسجيل الدخول الرسمية للموقع.. يعني لو بصيت على رابط الموقع والصفحة نفسها هتلاقي إن كل المعلومات سليمة، لكن الخدعة كانت في استخدام تقنية اسمها JS Injection، ودي تقنية بتعتمد على حقن أكواد جافاسكريبت في الصفحة لجمع معلومات منها، كان من ضمن المعلومات دي الكوكي الخاصة بجلسة المستخدم، وطبعا الملف ده ممكن يتم استخدامه للدخول لحسابك بدون إيميل أو باسورد بسهولة. الناس تخلي بالها لأني شوفت مصر من ضمن الدول المنتشر فيها المالوير دي ☢️

بكرة الصبح الساعة 9 بالليل الدوري الإنجليزي هيبتدي.. لكن الأهم من الدوري الإنجليزي هو فانتازي الدوري الإنجليزي 🏆 لو متعرفش لعبة الفانتازي فهي عبارة عن لعبة بتختار فيها لاعيبة قبل كل جولة وبتحاول من خلال اللاعيبة دي تحقق أكبر عدد من النقاط من خلال توقع أفضل اللاعبين اللي هيحققوا أفضل أداء 👨‍💼 هتستفيد إيه من النقاط 🤔 شوف هي اللعبة بتقدم جوايز لكن عشان احنا مصريين ومعروف إن المصريين مش بيكسبوا حاجة فبنلعبها عشان المتعة والإثارة والتشويق.. لكن لو بتسأل على الجوائز فالمركز الأول في نهاية الموسم بياخد رحلة 7 أيام لإنجلترا مدفوعة بالكامل، وحضور VIP لمبارتين في الدوري ونسخة من لعبة فيفا الجديدة وشنط وملابس رياضية من نايكي وموتوسيكلات وعجل وأجهزة كمبيوتر وترابيزات بلياردو وبينج وكل اللي نفسك فيه 🎁 بردو بيكون فيه جوائز لصاحب المركز التاني والتالت ولأكتر شخص جمع نقاط كل أسبوع وكل شهر، ده غير جوايز الكاس وليلة كبيرة سعاتك 🙆‍♂️ لو انت بتلعب الفانتازي بالفعل اشترك في دوري نتاوي كلاسيك من خلال الكود ده 👈 4c5anj 👉 في الرابط ده موجود شرح بالتفصيل عن كل حاجة عن اللعبة وازاي تلعبها 👇 https://bit.ly/3hm9RvE

جزء من مكافآة التوقيع اللي حصل عليها ليونيل ميسي بعد الانضمام لنادي PSG كانت عبارة عن توكنز أو عملات رقمية من عملة النادي PSG Token. في حاجة دلوقتي اسمها Fan Tokens وده نوع جديد من العملات الرقمية بيسمح لمتابعين نادي معين التصويت على قرارات ثانوية داخل النادي مقابل الاستثمار في العملة، وطبعا العملات دي بتتأثر بأخبار السوق والانتقالات وسعرها بيتحرك على هذا الأساس زي ما بيحصل مع العملات الرقمية التانية. نادي PSG ونادي برشلونة من ضمن النوادي اللي بيمتلكوا Fan Tokens.. وقريبا نادي مانشستر سيتي ومانشستر يونايتد هيكون ليهم Fan Tokens كذلك. الناس تخلي بالها من النوع ده من العملات عشان فيها أرباح كويسة. توكن PSG في بداية شهر يناير كان سعرها في حدود 8 دولار.. دلوقتي سعرها قفز لـ40$ بعد التوقيع مع ميسي.

منصة Poly Network لتبادل العملات الرقمية اتعرضت للاختراق وسرقة أكتر من 600 مليون دولار من العملات الرقمية 😯 المنصة أعلنت من ساعات على تويتر عن تعرضها للاختراق وسرقة أرصدة إيثريوم بقيمة 273 مليون دولار، Binance Smart Chain بقيمة 253 مليون دولار، USDC بقيمة 85 مليون دولار. حتى الآن غير معلوم كيف تمت عملية الاختراق اللي تعتبر حاليا واحدة من أكبر 3 عمليات سرقة حصلت في سوق العملات الرقمية.

من الحاجات المهمة جدا اللي لازم تدور عليها وانت بتشتري لاب توب أو حتى كمبيوتر عادي إن يكون في الجهاز وسيط تخزين "هارد" من نوع SSD 🚀 وسيط التخزين ده في الغالب بتكون مساحته قليلة يعني ممكن 128 أو 256 جيجابايت لأن سعره بيكون أغلى، لكنه مهم جدا وهيساعدك إن جهازك يكون سريع جدا لأنه بيكون عليه نظام التشغيل وملفات البرامج.. وطبعا متوفر منه نسخ بمساحة كبيرة زي الـHDD لو محتاج. ➖➖➖➖➖➖➖➖➖➖➖➖➖➖➖➖➖➖ الفرق إن الـSSD مش بيعتمد على أي حركة ميكانيكية زي الهارد HDD واللي بيعتمد على الدوران ووجود ذراع بيقرأ البيانات أو بيكتبها، وبالتالي بيكون استخدامه أسرع ومش بيكون ليه صوت زي الهارد من نوع HDD، ده غير إنه أفضل في مقاومة الصدمات وتحمل درجات الحرارة العالية، كمان استهلاكه للطاقة أقل ↘️↘️ في قطع SSD دلوقتي بتوفر سرعات خرافية زي مثلا وسيط سامسونج SSD 980 PRO بيوفر سرعة كتابة 5,100 ميجابايت في الثانية، وسرعة قراءة تصل إلى 7,000 ميجابايت في الثانية ⬆️⬆️ ➖➖➖➖➖➖➖➖➖➖➖➖➖➖➖➖➖➖ ده مقال مهم فيه معلومات قيّمة عن وسائط التخزين SSD وأنواعها المختلفة وازاي تختار SSD بشكل صحيح 👇 https://bit.ly/3lnAfsQ

شركة GIGABYTE التايوانية اتعرضت لهجوم فدية نتج عنه تشفير حوالي 112 جيجابايت من البيانات 😯 الهجوم كان وراه جروب هاكرز معروف باسم RansomEXX واللي مش بس قدروا يشفروا الملفات، دول كمان قدروا يحصلوا على نسخة من الملفات دي، ودلوقتي بيبتزوا الشركة عشان تدفع وإلا هيتم تسريب الملفات 💦 من فترة قريبة شركة EA Sports رفضت تدفع فدية 28 مليون دولار مقابل عدم تسريب الملفات اللي اتسرقت منها في هجوم فدية مشابه وكانت النتيجة إن الهاكرز نشروا الكود المصدري للعبة FIFA 21 كعقاب للشركة. الملفات اللي اتسرقت من شركة GIGABYTE فيها بيانات حساسة زي مفاتيح تشفير الـvBIOS - مخططات تصميم حصرية - ثغرات Zero-Day لم يتم إصلاحها وغيرها من المعلومات عن بعض عملاء الشركة المهمين زي AMD | Intel | Nvidia.

شركة SpaceX بتجهز دلوقتي لتوفير وسيلة للشركات لعرض إعلاناتها في الفضاء 👽 شركة SpaceX بالتعاون مع شركة GEC بيطورا قمر اصطناعي اسمه CubeSat هيكون مزود بعصا سيلفي وشاشة إعلانية رقمية. الشاشة هتعرض إعلانات الشركات في الفضاء وبعد كدة هيتم التقاط صور حية للإعلان من الفضاء من خلال عصا السيلفي وبثها بشكل مباشر على تويتش ويوتيوب وغيرها من المنصات 👩‍🚀👩‍🚀

لو بتستخدم تطبيق مشاركة ملفات زي Shareit أو غيره وزهقت من إعلانات مدام أماني اللي بتظهر لك كل شوية فأنا بنصحك تجرب تطبيق Files 📂 تطبيق Files من تطوير شركة جوجل بيسمح لك بمشاركة الملفات على بين الموبايلات بسرعة تصل إلى 480 ميجابت في الثانية، كمان تقدر تستخدمه بدون نت وسرعته في النقل بتكون ممتازة وكل ده بدون إعلانات مزعجة 👌 التطبيق برضه بيوفر أداة لتنظيف الموبايل وحذف الملفات الغير هامة ومخلفات النظام، وتقدر برضه تستخدمه كمشغل ميديا للفيديو والصوت وأنواع تانية من الملفات. ده شرح سريع لطريقة إرسال الملفات باستخدام التطبيق 👇 https://youtu.be/JzPrkA8kEBY

لو بتستخدم تطبيق مشاركة ملفات زي Shareit أو غيره وزهقت من إعلانات مدام أماني اللي بتظهر لك كل شوية فأنا بنصحك تجرب تطبيق Files 📂 تطبيق Files من تطوير شركة جوجل بيسمح لك بمشاركة الملفات على بين الموبايلات بسرعة تصل إلى 480 ميجابت في الثانية، كمان تقدر تستخدمه بدون نت وسرعته في النقل بتكون ممتازة وكل ده بدون إعلانات مزعجة 👌 التطبيق برضه بيوفر أداة لتنظيف الموبايل وحذف الملفات الغير هامة ومخلفات النظام، وتقدر برضه تستخدمه كمشغل ميديا للفيديو والصوت وأنواع تانية من الملفات. ده شرح سريع لطريقة إرسال الملفات باستخدام التطبيق 👇 https://youtu.be/JzPrkA8kEBY

شركة أمازون تدمر ملايين المنتجات التي لم يسبق استخدامها سنويا بسبب امتلاء مستودعاتها وعدم بيع هذه المنتجات ! تحقيق صادم نشرته شبكة التلفزيون البريطاني ITV من فترة عن طريقة تعامل أمازون بريطانيا مع المنتجات الزائدة بإنه بيقوم بإتلافها أو دفنها في مكبات للنفايات. ➖➖➖➖➖➖➖➖➖➖➖➖➖➖ التقرير ذكر إن أمازون بتدمر حوالي 130 ألف منتج كل أسبوع إما تكون سلع بتمتلكها الشركة، أو بتكون المنتجات مملوكة لبائعين آخرين، وطبعا أمازون بتفرض رسوم تخزين السلع على البائع، وكل ما السلعة فضلت في المستودع كل ما زادت تكلفتها على البائع لغاية ما الموضوع يوصل لإن التخلص من السلعة وتدميرها يبقى أرخص من تحمل تكلفة تخزينها. ➖➖➖➖➖➖➖➖➖➖➖➖➖➖ المنتجات اللي بيتم تدميرها دي أولا استهلكت موارد من موارد الكوكب المحدودة، سببت تلوث للكوكب وتأثيرات سلبية لسكانه أثناء إنتاجها ونقلها، موصلتش للأشخاص المحتاجين ليها في الغالب بسبب عدم قدرتهم على الشراء، وفي الآخر تم تدميرها ودفنها كنفايات سامّة غير قابلة للتحلل في باطن الأرض 😡😡

شركة هواوي حققت أسوء أرقام ربع سنوية ليها من بداية الحظر الأمريكي بعد ما حققت صافي ربح حوالي 2.2 مليار دولار أمريكي فقط خلال الربع الثاني من 2021 ↘️↘️ الشركة مبيعاتها انخفضت من بداية العام بنسبة 38% ده غير إنها خسرت حصتها في السوق الصيني وخرجت من قائمة أكثر 5 شركات مبيعا للهواتف في الصين. هواوي باعت جزء من أصولها زي "هونر" وحولت جزء من نشاطها لصناعة السيارات والشاشات الذكية.. وحسب تصريح نائب رئيس مجلس إدارة الشركة "Xu Zhijun" إن هدفهم حاليا هو إبقاء الشركة على قيد الحياة.

الولايات المتحدة حاليا بتتعرض لأسوء فترة جفاف من أكتر من 1200 سنة 😯 الجفاف ده أصاب ولايات الغرب الأمريكي زي نيفادا وأريزونا، لكن تأثيره أشد ما يمكن على ولاية كاليفورنيا اللي الزراعة فيها بتوفر 1/3 من الخضروات و 2/3 من الفاكهة المستهلكة في أمريكا. أكبر بحيرتين صناعيتين في أمريكا (ميد / باول) وصلوا لأدنى مستوى من وقت تطويرهم، لدرجة إن ولاية كاليفورنيا قررت حظر مياه الأنهار في بعض المناطق على المزارعين ومنعهم من استخدامها في ري المحاصيل. ➖➖➖➖➖➖➖➖➖➖➖➖➖➖➖ الأزمة دي مش بتأثر على وفرة المياه هناك فقط، بل على أسعار المحاصيل اللي سعرها هيرتفع، كمان هيكون فيه نسبة أعلى من الحرائق وهتكون أشد ما يمكن خصوصا مع عدم وفرة موارد مائية للمساهمة في إطفائها. السنة اللي فاتت الحرائق في أمريكا التهمت أكتر من 8 مليون فدان ومتوقع كل سنة تكون الحرائق أسوء من اللي قبلها. ➖➖➖➖➖➖➖➖➖➖➖➖➖➖➖ فترة الجفاف أو الـMegadrought زي ما بيسموها حاليا بتحصل لأسباب طبيعية متعلقة بتغير المناخ، ودرجة الجفاف بتزيد كل سنة ومش متوقع إنها تنتهي في المستقبل القريب.

"ويل كاثكارت" المدير التنفيذي لواتساب منزل سلسلة تغريدات بينتقد فيها مشروع آبل اللي أعلنت عنه بخصوص فحص صور المستخدمين على الآي كلاود.. وبيقول إن المشروع ده "نكسة لخصوصية المستخدمين" ! تخيل لما المسئول عن الواتساب بنفسه يكون قلقان إن مشروع آبل ده بيهدد خصوصية المستخدمين !