Tech Xtream

موقع Terms of Service; Didn't Read من المواقع الممتازة اللي لازم تكون بتستخدمها 👌 الموقع عارف إن مفيش حد على الكوكب بيقرأ شروط الاستخدام وهو بيسجل في موقع وكله بيعلم على الموافقة ويسجل على طول.. عشان كدة بيوفر تلخيص سريع على شكل نقاط مختصرة عن سياسة الاستخدام الخاصة بمجموعة كبيرة من أشهر المواقع على الإنترنت، وبيعرفك إيه الحاجات اللي ممكن تهمك واللي لازم تاخد بالك منها بدون ما تحتاج تقضي وقت طويل لقراءة الشروط بالكامل. الموقع تقدر تبحث فيه عن أي موقع بتسجل فيه، كمان بيوفر تصنيف لكل موقع من حيث تعامله مع بيانات المستخدمين والشروط اللي بيفرضها عليهم بداية من A وده تصنيف ممتاز لغاية تصنيف E وده تصنيف فيسبوك وما شابه. لينك الموقع 👇 https://bit.ly/3amD9JL

شركة فيسبوك حظرت مطور إضافة Unfollow Everything مدى الحياة ❌ إضافة Unfollow Everything كانت واحدة من أشهر الإضافات اللي بتساعد على تقليل إدمان استخدام فيسبوك وتقليل الوقت اللي بيتم قضائه على المنصة من خلال السماح للمستخدم بعمل إلغاء متابعة لكل الحسابات والمجموعات والصفحات على حسابه، وبعد كدة يقدر يختار عدد محدود من الحسابات والصفحات اللي عايز يتابعها وبالتالي يقلل الوقت المستهلك على الموقع. الإضافة اشتهرت جدا واستخدمها عدد كبير لدرجة إن جامعة "نيوشاتيل" تواصلت مع مطور الإضافة لعمل دراسة على مدى إدمان المستخدمين على الموقع. شركة فيسبوك معجبهاش الموضوع وبعتت للمطور إشعار قانوني بإزالة الإضافة من متجر كروم، والمطور للأسف اضطر للاستجابة لعدم قدرته المادية على تحمل تكاليف مقاضاة فيسبوك، كمان الشركة قررت حظر حسابه بشكل نهائي من فيسبوك وانستجرام !

شركة RockstarGames أعلنت عن مشروع Grand Theft Auto: The Trilogy - The Definitive Edition وهو مشروع لتطوير نسخ محسنة Remastered من ألعابها الشهيرة: ▪️ Grand Theft Auto 3 ▪️ Grand Theft Auto Vice City ▪️ Grand Theft Auto San Andreas عمل Remaster للألعاب معناه تحسين شامل لأجزاء اللعبة سواء الجرافيك أو الصوت وكمان أسلوب اللعب، مع الحفاظ على هوية اللعبة الأصلية. الألعاب هتكون متوفرة لكل الأجهزة تقريبا بما في ذلك الأندرويد والآيفون. بنسبة كبيرة الإصدار هيكون قبل نهاية 2021 ونسخ الموبايل هيتم إصدارها في النصف الأول من 2022.

من كام يوم حصلت حاجة مضحكة لما الصفحة الرسمية للمدمرة الأمريكية USS Kidd بدأت تنشر بث مباشر للعبة Age of Empires على الصفحة. مواقع كتير بدأت تنشر إن الصفحة اتعرضت للاختراق وده كان بالاعتماد على تصريح متحدث من سلاح البحرية الأمريكية. الموضوع بالنسبالي كان مش مقنع.. لأن مفيش حد هيبذل مجهود لاختراق صفحة عسكرية عشان ينشر عليها حاجة بالتفاهة دي.. وعشان كدة مكتبتش حاجة عن الحادثة. المهم اكتشفوا بعدها إن بالفعل مكانش في اختراق ولا حاجة.. الموضوع كله إن أدمن الصفحة كان بينسى يسجل خروج من حساب الصفحة ويبدل للحساب الشخصي بتاعه.. وبالتالي لما كان بيعمل بث مباشر كان بينزل على الصفحة بدل الحساب !

ويندوز 10 هيفضل مدعوم من الشركة لغاية عام 2025. يعني النظام هيفضل يستقبل تحديثاته لمدة 4 سنين قادمة إن شاء الله. مفيش داعي للاستعجال والأفضل هو انتظار وصول النظام إلى مرحلة الاستقرار زي ما قولت.

❌❌ لماذا لا يجب عليك استخدام ويندوز 11 ❌❌ الأسبوع ده صدرت النسخة الرسمية من ويندوز 11 وناس كتير سألتني عليه ونصحتهم بعدم استخدامه دلوقتي.. وحابب أوضح كام نقطة بخصوص ويندوز 1️⃣1️⃣ ➖➖➖➖➖➖➖➖➖➖➖➖➖ مبدأيا كدة عود نفسك أي نظام تشغيل حديث الصدور أو إصدار جديد منه بيكون فيه عيوب ومشاكل. العيوب والمشاكل دي ممكن تكون بسيطة وممكن تكون مؤذية. مثلا شركة آبل يوم 20 سبتمبر نزلت الإصدار رقم 15 من نظام الآيفون iOS.. بعدها بـ11 يوم بس نزلت تحديث رقم 15.0.1 لعلاج مشاكل ظهرت في النظام. نفس الأمر حصل مع ويندوز 11.. شركة AMD أعلنت النهاردة إن معالجتها بتعاني من مشاكل مع ويندوز 11 بتؤدي إلى بطء في الألعاب بنسبة وصلت 15% مع وجود مشاكل في انتقال البيانات خلال ذاكرة التخزين المؤقت. بلاش تبقى حقل تجارب واستنى توفر نسخة مستقرة من النظام الجديد. ➖➖➖➖➖➖➖➖➖➖➖➖➖ أهم ميزة بيوفرها ويندوز 11 هي دعم تطبيقات الأندرويد بشكل افتراضي Native بدون حاجة لمحاكي. الميزة دي لسه مش موجودة في الإصدار الحالي، ومش هيتم توفيرها إلى في العام القادم حسب تصريح مايكروسوفت.

منصة تويتش أكدت عملية الاختراق الضخمة اللي اتعرضت ليها وتسريب ما يقرب من 128 جيجابايت من البيانات الحساسة عن منصة البث المباشر الأشهر على الإنترنت. البيانات المسربة تشمل: ▪️ الأكواد المصدرية لتطبيقات المنصة ▪️ منصة سرية منافسة لـSteam قيد التطوير ▪️ الأدوات الأمنية لفريق الحماية داخل الشركة ▪️ عقود الدفع لأشهر اللاعبين على المنصة من عام 2019.. أشهرهم اللاعب CriticalRole اللي الشركة دفعتله 9.6 مليون دولار، واللاعب xQcOW اللي الشركة دفعتله 8.5 مليون دولار خلال نفس الفترة من أجل اللعب على تويتش.

جوجل أعلنت إنها هتفعل المصادقة الثنائية بشكل تلقائي لأكتر من 150 مليون حساب بنهاية عام 2021 ⌛️ الخطوة دي هتتفعل لبعض الحسابات المؤهلة اللي بتمتلك وسيلة إضافية لاستقبال كود المصادقة خصوصا الحسابات اللي أصحابها بيمتلكوا قنوات على يوتيوب. بنصح بتفعيل الخطوة دي بشكل يدوي على حسابك قبل ما جوجل تفعلها بشكل تلقائي لضمان عدم حدوث أي مشاكل 👇 http://bit.ly/2VwHZxT

بالنسبة للفيديو اللي فات.. مش بنصح باستخدام رقم الموبايل كخطوة للمصادقة الثنائية لأن الرقم ممكن يتسرب زي ما شوفنا في الفيديو وأي حد يقدر يوصله.. ده غير كمان إن بتوع الإعلانات مش هيسبوك في حالك.. ➖➖➖➖➖➖➖➖➖➖➖➖➖ طريقة تفعيل المصادقة الثنائية الأفضل هي من خلال استخدام تطبيق زي Google Authenticator أو Microsoft Authenticator وتأمين الحساب باستخدامه. سبق وشرحت الطريقة دي في مقال واتكلمت بردو طريقة الحصول على أكواد احتياطية تقدر تستخدمها لو فقدت الوصول للموبايل أو للتطبيق وعايز تدخل حسابك تاني.. الخطوة دي مهمة.. المقال في الرابط ده 👇 https://bit.ly/2YrVdPW ➖➖➖➖➖➖➖➖➖➖➖➖➖ الطريقة التانية هي استخدام مفتاح أمان U2F Security Key وده مفتاح بيبقى عامل زي الفلاشة كدة بتوصله بالكمبيوتر عشان تعمل المصادقة الثنائية، ودي يمكن أكتر طريقة آمنة لحماية الحساب لأنها بتعتمد على أداة مادية. كمان المفاتيح دي بتدعم NFC عشان عمل المصادقة على الموبايل. كنت كتبت مقال بردو عن طريقة الحماية دي وكيفية شراء مفتاح واستخدامه.. تقدروا تشوفوا المقال من الرابط ده 👇 https://bit.ly/3DmWvLh

قولت 100 مرة بلاش نضيف رقم الموبايل على فيسبوك 🙄 ده موقع على الديب ويب تقدر تبحث فيه عن معلومات أكتر من 435 مليون شخص ومنهم معلومات متسربة السنة دي.. وممكن تجيب منه رقم أي حساب..

كورس كامل لتعلم برمجة تطبيقات الموبايل باستخدام فلاتر بالعربية 🔥 الكورس مجاني لفترة محدودة 👇 https://bit.ly/3mtAbZB

خلال الساعات القليلة اللي تطبيقات فيسبوك وقعت فيها حصل تطبيق تيليجرام على 70 مليون مستخدم جديد 😯 الحاجة المهمة هنا إنه بالرغم من العدد الضخم ده من المستخدمين اللي بيسجلوا في التطبيق في وقت قصير دفعة واحدة وغير طبعا المستخدمين الحاليين نفسهم فضل التطبيق شغال بدون مشاكل 💪

أثناء تنظيم عرض بالدرونز بمناسبة افتتاح مول جديد في الصين سقطت العشرات من الدرونز من السماء وسببت حالة من الفزع لدى المتفرجين 😲

اليوم مثلت موظفة فيسبوك "Frances Haugen" التي قامت بالتسريب واختارت الكشف عن هويتها أمام لجنة من مجلس الشيوخ الأمريكي لمدة تجاوزت الثلاث ساعات لتتحدث فيها عن الفظائع التي رأتها خلال عملها بالشركة. كان أبرز تصريحات "فرانسيس هاوجن" هي أن فيسبوك تركز على عقلية تحقيق النمو بأي ثمن، وأن تعظيم الأرباح هو الهدف الأول حتى لو كان على حساب صحة الأطفال والمراهقين وحياتهم. ➖➖➖➖➖➖➖➖➖➖➖➖➖➖➖ في تحقيق سابق نشرته دورية الجمعية الطبية الأمريكية JAMA أن الكثير من الفتيات يخضعن للجراحات التجميلية لكي يشبهن صورهن أثناء استخدام فلاتر انستجرام وسناب شات، لدرجة أن الأطباء أطلقن على هذه العمليات مصطلح "Snapchat Sysmorphia" أو اضطراب تشوه الجسم، حيث يبحث المرضى عن جراحة لمساعدتهم على الظهور مثل النسخ المفلترة لأنفسهم داخل سناب شات والتطبيقات المشابهة له. مسألة التفكير في المظهر العام للجسم مقارنة بكيفية ظهوره بعد استخدام فلاتر التجميل أو حتى بالمشاهير من المسائل الهامّة التي أصبح يعاني منها المراهقون حتى من قبل بداية سن المراهقة.. خصوصًا مع انتشار تطبيقات التواصل. على الآباء والأمهات الانتباه جيدًا لصحة أبنائهم النفسية ومدى تأثير محتوى مواقع التواصل عليها.

"فيسبوك علمت أن الانستجرام بيئة سامّة للمراهقات ولكنها قررت ألا تفعل شيئا". منذ أسبوعين تقريبًا نشرت جريدة الوول ستريت تقريرًا خطيرًا حول تأثير تطبيق Instagram على الصحة النفسية للفتيات المراهقات. تقرير الجريدة اعتمد على وثائق سربتها موظفة في الشركة. وتضمنت التسريبات أبحاث أجرتها الشركة حول تأثير التطبيق على المراهقات؛ وكانت نتائج الأبحاث سلبية للغاية بالنسبة للشركة التي اختارت أن تبقيها طيّ الكتمان. واحدة من كل ثلاث مراهقات يستخدمن التطبيق شعرن بالسوء بشأن مظهرهن الخارجي بسبب الانستجرام، بالإضافة إلى معانتهم من القلق والاكتئاب نتيجة لذلك. التقرير أحدث ضجة كبيرة ليس بسبب المعلومات التي قدمها بالدرجة الأولى -والتي ربما تكون معلومة بشكل جزئي لدى الكثيرين بشكل مسبق- ولكن بسبب اعتماده على أبحاث وتحقيقات مسربة من داخل الشركة نفسها؛ والتي اختارت عدم مشاركتها بشكل عام. هذه الضجة دفعت فيسبوك إلى تبني سياسة الهجوم في ردها على تقرير الوول ستريت لتؤكد أن التقارير المسربة ليست دقيقة وأنها تمت على عينة صغيرة من المراهقات.

من الحاجات المضحكة اللي حصلت امبارح.. تحديث سجلات BGP الخاصّة بشبكات فيسبوك واللي كان سبب المشكلة عمل Lock Out للموظفين من الشبكة.. يعني منعهم إنهم يعدلوا على إعدادات الشبكات ريموتلي.. الحل كان إن الموظفين يروحوا بنفسهم للمبنى اللي موجود فيه أجهزة الراوتر عشان يعدلوا إعداداتها بشكل يدوي ويحلوا المشكلة.. المبنى اللي بيكون فيه أجهزة زي كدة بيكون متأمن لأن مينفعش أي شخص يكون ليه قدرة على الوصول للأجهزة دي لأنها حرفيا ممكن توقع شركة فيسبوك بالكامل زي ما شوفنا.. عشان الأشخاص اللي ليهم صلاحية الدخول للأجهزة دي يوصلوا ليها لازم يستخدموا "شارات التعريف" بتاعتهم اللي بيتم مراجعتها من خلال نظام أمني للتأكد من امتلاكهم لصلاحية دخول المبنى. قوم إيه بقى اللي حصل؟ الموظفين فضلوا فترة طويلة خارج المبنى مش عارفين يدخلوه لأن النظام اللي بيراجع الشارات للتحقق منها مرتبط بشبكة فيسبوك الداخلية اللي هي أصلا كانت واقعة 😂

أدمن التيليجرام على تويتر كان عامل حفلة امبارح 😂

عودة خدمات فيسبوك للعمل بشكل طبيعي مرة أخرى 🔄

هذه السيدة في الصورة هي موظفة سابقة في شركة فيسبوك، وهي المسئولة عن تسريب مجموعة ضخمة من الوثائق السرية لجريدة Wall Street Journal حول أنشطة خطيرة ومعلومات هامّة قام فيسبوك بإخفائها عن العامّة. تسريبات ضجت بها مواقع التواصل والإنترنت في الأيام الأخيرة وزادت من سوء سمعة الشركة. هذه السيدة ظهرت بالأمس في البرنامج الحواري الشهير في أمريكا 60 Minutes، وفي خلال أقل من 24 ساعة حدث أطول عطل في تاريخ الشركة. مصادفة 🤔

موقع فيسبوك بدأ يستجيب بشكل جزئي 👀