Tech Xtream

هل تعلم أننا نوفر VPN سريع ومجاني لعيونك 👆

النهاردة روسيا أدرجت شركة ميتا ضمن لائحة "الإرهابيين والمتطرفين" 😯 في شهر مارس الماضي شركة ميتا الشركة الأم لفيسبوك أعلنت إنها هتسمح بوجود محتوى محرض للعنف ضد الجنود الروس، أو يحرض على قتل رئيس روسيا فلاديمير بوتين أو رئيس بيلاروسيا ألكساندر لوكاشينكو.. بالمخالفة للقوانين وسياسة الاستخدام اللي الموقع عملها بنفسه. الشركة حاولت الاستئناف على قرار إدانتها بارتكاب نشاط متطرف في روسيا لكن الاستئناف تم رفضه. محامي الشركة قال إنها لم ترتكب أي نشاط متطرف.. بل وإنها كانت ضد الروسوفوبيا "Russophobia" 🙂

شركة باي بال قررت التراجع عن التعديل اللي هما عملوه على سياسة الاستخدام 👇 الشركة قالت إن اللي حصل ده تم بخطأ غير مقصود وإنهم خلاص مش هيخصموا حاجة من أموال المستخدمين 🤡 شركة بحجم باي بال مش بتعمل حاجة "بالخطأ" خصوصا لما الموضوع يدخل في جانب قانوني زي سياسة الاستخدام.. لكن الهجوم اللي حصل عليهم والناس اللي قفلت حساباتها بسبب الموضوع ده خليتهم يتراجعوا عن قرارهم 💪

في مؤتمر الإعلان عن آيفون 14 قدمت شركة آبل ميزة جديدة في الموبايل وهي Car-Crash Detection ودي ميزة بتساعد الموبايل على استشعار الحوادث.. ولو الميزة دي اتفعلت الموبايل بيتصل بالطوارئ بشكل تلقائي وبتشغل رسالة استغاثة مسجلة وبتشارك إحداثيات الموقع الجغرافي. الميزة دي امبارح عملت إنذار كاذب بعد ما استشعرت اصطدام.. لكن اللي حصل إن صاحب الموبايل كان راكب الرولر كوستر.. وبعض ما خلص بيفتح الموبايل لقاه مكالمات من الطوارئ ومن جهات الاتصال اللي محددها لحالات الطوارئ والموبايل فضحه.. تقريبا الهبوط من مكان عالي لمكان منخفض بسرعة شديدة خلى الموبايل يستشعر إن في اصطدام أو حادثة وتم تفعيل الميزة. بالمناسبة ميزة Car-Crash Detection قدمتها شركة جوجل قبل آبل في بعض نسخ Pixel. المهم لو معاك آيفون 14 اتأكد أول إنك تقفل خاصية Car-Crash Detection قبل ما تروح تتمرجح..

قولت اشترك في تليجرم بريميوم كدعم للتطبيق.. طبعا مفيش فيزا مصرية نفعت لدفع الاشتراك 50ج دفعت بفيزا أوروبية التطبيق خصم مني 4 يورو 🙂 تقريبا مش مصدقين إني مصري

زر تسجيل الدخول باستخدام حساب فيسبوك بدأ يختفي من الإنترنت 👤 من الطرق اللي بتعتمد عليها المواقع لتسهيل إنشاء حسابات للمستخدمين هي توفير طريقة التسجيل مباشرة بحساباتهم على مواقع التواصل زي فيسبوك وجوجل وغيرها من المواقع. فيسبوك تحديدا بدأت مواقع كبيرة زي Best Buy - Dell - Nike - Twitch وغيرها تحذفه كخيار للتسجيل بسبب سوء سمعة الموقع.. وإن فيسبوك بيستغل مجرد وجوده كخيار للتسجيل لجمع معلومات عن المستخدمين حتى بدون ما يستخدموه.. ده غير كمية المعلومات اللي بيجمعها عن المستخدمين اللي بيسجلوا من خلاله وتتبع كل حاجة بيعملوها. مش محتاج أقول إن التسجيل بحسابات مواقع التواصل حاجة سيئة من أكتر من جهة سواء من الخصوصية أو من التحكم في الحساب.. لكنها بتكون مناسبة لعشاق الكسل. دايما الأفضل تسجل حساب بالإيميل وباسورد زي الناس الطبيعية.

شركة باي بال عملت بدعة جديدة لأول مرة في التاريخ بيقولك في سياسة الشركة الجديدة لو انت نشرت معلومات اعتبرتها الشركة "مضللة" تقدر تفرض عليك غرامة بقيمة 2500 دولار وتخصمهم بشكل فوري من حسابك 🤡 تخيل كدة تكتب بوست على الفيسبوك مثلا تلاقي رسالة وصلتك من البنك بيقولك انت اتغرمت 2500 جنيه عشان الهبد اللي انت كتبته !! لسه الأسبوع اللي فات نشرت فيديو حذرت فيه من المشاكل اللي موجودة في باي بال.. وبحذر الناس اللي بتستخدم الخدمة تاني إنها تسحب الفلوس فورا أول ما توصلها على حسابها.. ويفضل لو تستخدم خدمة تانية.

في سنة 2016 شركة أوبر تعرضت لاختراق ضخم نتج عنه سرقة بيانات تخص 57 مليون مستخدم، بالإضافة إلى 600 ألف سائق. وقتها مدير قسم أمن المعلومات في الشركة جوزيف سوليفان قرر إنه يدفع فدية للهاكرز 100 ألف دولار في مقابل حذف البيانات وعدم الإفصاح عن الاختراق. بعدها بسنة في 2017 الشركة طردته والإدارة الجديدة قررت الإفصاح عن الاختراق -وده الطبيعي- للجنة التجارة الفيدرالية FTC.. والشركة عملت تسوية بقيمة 148 مليون دولار. من يومين فقط تم إدنة جوزيف بعدة تهم منها إعاقة العدالة وإخفاء أدلة وحاليا بينتظر حكم بعد الاستئنافات اللي ممكن يعملها. ده الطبيعي لما شركة تحصلها مشكلة أمنية أو يتم تسريب بيانات عملائها لازم تعمل إفصاح عن المشكلة عشان أصحاب البيانات يكون عندهم علم إن بياناتهم مع جهة تانية وممكن يتم محاولة استغلالها بأي طريقة. وده طبعا زي اللي بيحصل عندنا بالظبط زي ما انتوا عارفين 🙂

من الحاجات المفيدة اللي ممكن تعملها لحماية نفسك من التسريبات إنك تستخدم معادلات الإكسل وانت بتعمل باسورد.. مثلا تكتب في الباسورد 1+2 أو تستخدم فاصلة , وهكذا.. غالبا قواعد البيانات اللي بيتم تسريبها بتبقى بصيغة CSV وبالتالي البرنامج هيتعامل مع المدخلات زي 1+2 على إنها عملية حسابية.. يعني مش هيدرجها حرفيا زي ما هي.. وكذلك في حالة الفاصلة هيتقسم الباسورد في خليتين وهكذا.. بكدة لو باسوردك اتسرب بمجرد ما يدخل على الشيت هيتغير 😎

منزل بوست بتكلم فيه عن تسريب بيانات بنكية ودي بتكون كارثة في أي دولة.. المصريين:

يا ساتر في حد بيبع دلوقتي 134 ألف سجل لبيانات مصريين.. وواضح إن التسريب تم من إحدى الجهات المالية لأن البيانات بتضم معلومات بنكية من بنوك مختلفة. أبرز البنوك الموجودة في التسريب: بنك HSBC بنك الاسكندرية بنك مصر بنك كريدي أجريكول البنك الأهلي المصري في ملف اتسرب على تليجرام لنفس البيانات فيه أكتر من 12 ألف سجل فيهم: الإيميل العنوان الاسم بالكامل اسم البنك بيانات البطاقات الائتمانية باستثناء أرقام CVV أبرز المحافظات المتأثرة بالتسريب: القاهرة 70% الإسكندرية 12% أسوان 8% الجيزة 7% سوهاج 2%

تحليل مهم لمشروع مهم 👇 https://twitter.com/EgyHashX/status/1578086565745655813

النقطة اللي حابب أنوه عليها إن موقع تور الرسمي محظور في بعض الدول.. فالناس تخلي بالها من تحميل المتصفح من مصدر غير رسمي.. لأن النسخ المعدلة دي ممكن يكون فيها نفس المشكلة. ونفس الكلام ينطبق على أي برنامج خصوصا البرامج الحساسة زي المتصفحات وبرامج الفي بي إن ومحافظ العملات الرقمية. بالنسبة لتور.. في أكتر من وسيلة لتحميل بشكل آمن حتى مع حظر الموقع.. زي تحميل البرنامج من المستودع الرسمي للمشروع على Github.

النهادرة كنت بقرأ تقرير من إعداد باحثين في شركة Kaspersky بيتكلم عن انتشار نسخة معدلة من Tor بيتم استخدامها لاختراق المستخدمين. حسب التقرير النسخ كانت موجودة على فيديوهات على يوتيوب بتستهدف كلمة "Tor浏览器," ودي الترجمة الصينية لمتصفح تور. الفكرة إن الموقع الرسمي محظور في الصين.. فأي حد محتاج المتصفح لازم يحمله من موقع خارجي.. وهنا لجأت "الحكومة" على ما يبدو على عمل نسخة معدلة من تور ورفعها على مواقع تحميل متاحة في الصين ونشرها من خلال اليوتيوب (اللي هو كمان محجوب في الصين) ومواقع تانية عشان تصطاد أي حد بيحاول يتجاوز الجدار الناري بتاعها. النسخة دي معدلة بحيث تحفظ كل سجلات التصفح والمواقع اللي دخلها المستخدم وأي معلومات كتبها داخل المتصفح.. وتجمع من جهازه أي معلومة تساعد على تحديد هويته زي ID الجهاز أو عنوان الماك وغيرها من المعلومات.

يعد الويب العميق أو الديب ويب جزء من شبكة الإنترنت.. وهو عبارة عن مكان أشبه بالمخزن.. يحتوي في الأغلب على قواعد بيانات غير هامة للمستخدم العادي مثل قواعد البيانات الحكومية وموسوعات وسجلات عامة.. ولذلك تتجاهل معظم محركات البحث الشهيرة فهرسة هذا المحتوى لعدم أهميته للزائر.. ولصعوبة الأمر لأن حجم الويب العميق يبلغ أضعاف حجم الويب العادي أو سطح الويب. من مميزات الويب العميق أنه يمكن الاعتماد عليه لإنشاء مواقع مقاومة للحظر.. وهذا يجعل بعض النشطاء في مجالات مثل المجالات الحقوقية يلجأون لإنشاء مواقع على الويب العميق وليس الويب الظاهر لتجنب إغلاق أو حجب الموقع. بسبب بعد هذا الجزء من الإنترنت عن المستخدم العادي وتجاهل محركات البحث له.. وكونه يحتاج إلى طريقة مختلفة للوصول إليه مقارنة بالمواقع العادية.. نشأ جزء من هذا الويب العميق يسمى الويب المظلم أو الدارك ويب.. وهي عبارة عن مواقع وأسواق تجارية يتم عليها بيع وشراء وتبادل الأشياء الغير قانونية والتي لا يُسمح بوجودها على الإنترنت العادي. في هذا المقال نشرح ما هي أجزاء الويب؟ وما هي فائدة الويب العميق؟ وما الفرق بين الويب العميق والويب المظلم؟ وما هو مشروع تور وفائدته؟ وكيف يمكن استخدام شبكة تور للوصول إلى الويب العميق 👇 https://bit.ly/3SyRk2J

فرضت محكمة روسية غرامة على تطبيق تيك توك بسبب عدم إزالة محتوى الشواz بقيمة 51 ألف دولار 💰💰

في نفس الوقت أساتذة الشطرنج بيكون عندهم قدرة تحليل غير طبيعية أثناء المباريات.. وأحيانا بتكون فيه نقلات بيكونوا عارفين إن صعب جدا يكون المنافس عملها بشكل طبيعي. من أشهر النقلات دي نقلة عملها حاسوب ديب بلو في مبارته الشهيرة ضد جاري كاسبروف واللي قال وقتها إنها لا يمكن تكون نقلة "آلة" وزعم إن في شخص كان بيتحكم في حركات الديب بلو.. ويقال إن النقلة دي حدثت بسبب خطأ في برمجيات الجهاز.

في شهر سبتمبر بطل العالم للشطرنج النرويجي ماجنوس كارلسن (الصورة على اليمين) كان بيواجه لاعب أمريكي اسمه هانز نيمان في كأس سينكيفيلد.. وقدر نيمان يهزم ماجنوس واللي كان حدث كبير وقتها. بعد المبارة ماجنوس قرر الانسحاب من البطولة بدون إبداء أسباب. بعدها بفترة الاتنين لاعبوا بعض تاني وبعد أول حركة من نيمان ماجنوس انسحب للمرة التانية.. لكن المرة دي اتهم نيمان بالغش. نيمان سبق واعترف إنه غشّ في مرتين وهو صغير بعمر 12/16 سنة.. لكن دول المرتين في حياته اللي غش فيهم. امبارح جريدة WSJ نشرت مقال بعد اطلاعها على تحليل عمله موقع الشطرنج الشهير Chess دوت كوم واللي وجد فيه 100 حالة غش في مباريات نيمان!! الغش في الشطرنج من الأمور المعروفة وبتعتمد على استخدام محركات أو برامج بتقدر تحسب بشكل أفضل من أي عقل بشري أفضل حركة ممكنة لأن بيكون عندها القدرة على عمل التحليلات الإحصائية بناءً على بيانات من آلاف المباريات.. بالإضافة لاستخدام تقنيات زي الذكاء الاصطناعي وتعلم الآلة.. ومواقع الشطرنج بيكون عندها أدوات لكشف النوع ده من الغش من خلال تحليل نقلاته ومقارنتها بنقلات المحرك.. بالإضافة لسلوكه أثناء اللعب.

أفضل 5 طرق يمكن الاعتماد عليها لتحويل الأموال من مصر للخارج والعكس 👇 https://bit.ly/3e7g03m