Tech Xtream

ازاي تحول موبايلك الأندرويد إلى آيفون بدون روت؟ روح متجر جوجل بلاي وحمل تطبيق Launcher iOS 16.. التطبيق بيحول واجهة الموبايل إلى واجهة مطابقة لواجهة نظام iOS 16 الأحدث من آبل.. وبيحاكي فيها كل حاجة من أول الهوم سكرين لغاية شكل الآيقونات.. بالإضافة لإمكانيات تخصيص الواجهة بدرجة مش موجودة في الآيفون نفسه. بعد ما تجرب الواجهة امسح التطبيق واحمد ربنا على نعمة الأندرويد.

النهاردة كنت براجع تقرير بيتكلم عن خاصية التصفح داخل التطبيقات in-app browser ودي اللي هي لما تكون بتتصفح تطبيق زي فيسبوك مثلا وتضغط على رابط لموقع فالموقع يفتح داخل التطبيق نفسه بدل ما يفتحه في المتصفح الافتراضي على الموبايل. الباحث اللي نشر التقرير ذكر إن أشهر تطبيقات الموبايل خصوصا تطبيقات التواصل الاجتماعي لما بتفتح موقع داخلها بتحقن كود جافاسكريبت بتقدر من خلاله تجمع أي معلومة عن نشاطك على الموقع ده. على سبيل المثال التطبيقات تقدر تجمع بيانات زي: ▪️ معلومات الدخول للموقع ▪️ كل مكان بتضغط عليه ▪️ كل حاجة بتكتبها داخل الموقع ▪️ أي حاجة بتعملها نسخ من الموقع يعني بالمختصر بيكون في واحد قاعد بيتفرج عليك وبيشوف كل حاجة بتعملها. ده غير إن متصفحات التطبيقات أصلا بتكون غير آمنة، لأنها بتكون مصممة يدوبك لفتح الموقع، ومش بيكون فيها الحماية اللي بتكون موجودة في المتصفحات العادية. طريقة الحماية من المشكلة دي هي عدم الضغط على أي رابط مباشرة من التطبيق.. بعض التطبيقات لما بتضغط على رابط بتعرض خيارات منها فتحه في متصفح الموبايل اختار الأوبشن ده لو متوفر. لو مش متوفر انسخ الرابط وافتحه في المتصفح الافتراضي على الموبايل.

في حلقة Nosedive من مسلسل Black Mirror طُرحت فكرة مخيفة حيث مجتمع يتم تقييم البشر فيه تقييمًا رقميًا على مقياس 1-5 نجوم. هذا المقياس كان يستخدم في تحديد مكانة الإنسان داخل المجتمع من حيث المستوى المادي والاجتماعي. حيث يُسمح لأصحاب التقييمات المرتفعة الحصول على الوظائف الهامّة والسكن في المجتمعات الفاخرة وغيرها من المميزات.. على عكس ذوي التقييمات المنخفضة. الفكرة المرعبة التي طرحها المسلسل في الحقيقة يتم تطبيقها في الصين منذ عام 2014.. حيث طور الحزب الشيوعي الصيني نظامًا يُعرف باسم Social Credit والذي يقوم بتصنيف المواطنين حسب عدة أمور مثل النشاط السياسي، الآراء عن أداء الحكومة، مخالفات قيادة متكررة، الرصيد الائتماني وغيرها من الأمور. في حالة كان رصيد المواطن مرتفعًا يتم مكافئته من خلال أمور مثل منحه وظائف عليا وتعيينه في مناصب هامّة، أما إذا كان رصيده منخفضًا فيتم معاقبته من خلال حظره من وظائف معينة، تنحيته عن وظيفته الحالية حتى في الشركات الخاصة كما حدث مع جاك ما، بل وقد يتم منعه من السفر خارج البلاد!

بعد 10 سنين من التقاضي شركة آبل وافقت على دفع تسوية بقيمة 30.5 مليون دولار لموظفيها بسبب احتجازهم بعد ساعات العمل الرسمية لتفتيش الحقائب الخاصة بيهم! القضية بدأت في سنة 2013 بسبب إن آبل كانت بتجبر موظفي متاجرها على البقاء بعد ساعات العمل لوقت يصل إلى 45 دقيقة لفحص حقائبهم والتأكد من عدم سرقتهم لأي شيء. أساس القضية كان إن الوقت اللي الموظفين بيقضوه في الانتظار بعد ساعات العمل الرسمية يجب تعويضه ماديا.. كمان وصفوا عمليات التفتيش بإنها محرجة ومهينة. المحكمة رفضت دفاع شركة آبل وقالت إن من غير المقبول إن سياسة التفتيش في الحقائب الخاصة بالموظفين يمكن تبريرها على أنها تقدم منفعة لموظفيها.. أيوة دفاع آبل إن عمليات التفتيش ده مفيدة للموظفين وإن الموظفين كانوا ممكن يتجنبوا عمليات التفتيش دي بإنهم يروحوا الشغل من غير حقائب خالص 🙂

صورة توضح التشابك بين آلاف الخلايا العصبية داخل القشرة الدماغية للإنسان 🧠 تم تكوين الصورة عبر الحصول على عينة صغيرة من القشرة الدماغية [الجزء المسئول عن التفكير المعقد في المخ] ثم تقسيمها إلى أجزاء أصغر والتقاط صور لكل قطعة بالمجهر الإلكتروني ثم إعادة تجميع الصور في صورة واحدة باستخدام الذكاء الاصطناعي لتمييز نقاط الاشتباك العصبي وترميز كل نوع من أنواع الخلايا العصبية بلون مختلف.

شركة آبل للمرة الأولى قررت تصنع ساعاتها الذكية وأجهزة الماك خارج الصين. اختيار آبل وقع على فيتنام اللي أصبحت وجهة مفضلة لآبل وبتصنع بالفعل أجهزة زي الآي باد والإيربودز. آبل بتفكر تبعد تدريجيا عن الصين أو على الأقل تقلل الاعتماد عليها بعد مشاكل الإغلاقات المتكررة بالإضافة إلى التوتر في العلاقات بينها وبين أمريكا. يا ترى إيه اللي عند ڤيتنام مش موجود عند مصر عشان الشركات الكبيرة دي تيجي تفتح مصانع عندنا وتوفر فرص عمل وموارد للدولة؟

اختراق 1900 حساب على تطبيق سيجنال 🔺 امبارح منصة Twilio اتعرضت للاختراق من خلال هجمة تصيد على موظفيها نجح الهاكرز من خلالها في سرقة معلومات الدخول الخاصة بأحد الموظفين. منصة Twilio هي المنصة المسئولة عن تسليم رسائل التفعيل للأرقام الخاصة بمستخدمي تطبيق سيجنال. الشخص أو الجهة اللي نجحت في الاختراق قدرت توصل إلى الأرقام المرتبطة بـ1900 حساب، ويبدو إن الهجمة كانت مستهدفة جدا لأن المخترق بحث في قاعدة البيانات عن 3 أرقام محددة وسجل دخول للحساب أحد الأرقام.. وبالتالي كان عنده القدرة على إرسال واستلام رسائل من الحساب المخترق. جميع البيانات المستخدمين كانت آمنة من الاختراق.. والشركة نصحت مستخدمي التطبيق بتفعيل خاصية القفل على التطبيق واللي بتتطلب كتابة كود في حالة تسجيل الدخول لحساب سيجنال من جهاز مختلف.

في سنة 2015 صدر فيلم The Big Short بيحكي عن كارثة فقاعة العقارات اللي حصلت في أمريكا سنة 2008 واللي سببت انهيار في سوق العقارات وركود اقصادي في أمريكا ومعظم الاقتصادات حول العالم. واحد من عدد قليل جدا من الأشخاص اللي توقعوا الانهيار ده اسمه مايكل بيري Michael Burry.. اللي عاكس معظم المحللين الماليين وشركات الاستثمار وحتى البنوك وقرر يفتح شورتنج بوزيشن على الأوراق المالية المدعومة بالرهون العقارية.. لأن الجميع كان معتقد إن سوق الرهن العقاري سوق غير قابل للانهيار. الشورتنج يعني توقع انخفاض قيمة الشيء، وفي التداول لما تفتح Shorting Position وقيمة الشيء اللي بتراهن ضده تنخفض بالفعل بتحقق أرباح. الأخ مايكل بعد ما توقعه طلع صحيح والكارثة والانهيار حصل ضاعف قيمة الصندوق الاستثماري اللي كان بيديره بنسبة 489٪ بإجمالي ربح 2.69 مليار دولار. المهم أنا بحكي القصة دي لأني امبارح عرفت إنه مايكل صفى البورتفوليو بتاعه وباع جميع الأسهم اللي بيمتلكها في كل الشركات.. باستثناء شركة واحدة متخصصة في الاستثمار في السجون الخاصة ومنشآت الصحة النفسية 🙂

تطبيق تليجرام كان المفروض ينزله تحديث من حوالي أسبوعين على iOS.. لكن شركة آبل فضلت معطلة التحديث طول الفترة دي لغاية ما مؤسس التطبيق نشر عن الموضوع على قناته على تليجرام.. بعد ما المواقع كتبت عن القصة تاني يوم آبل طلبت من فريق التطبيق إزالة خاصية واحدة من التحديث اسمها Telemoji للموافقة عليه. خاصية Telemoji عبارة عن إصدار فريد متحرك من الوجوه التعبيرية بجودة عالية بيخليه أفضل بكتير من الإيموشنز العادية. تقريبا الحركة دي ضايقت آبل لأنها هتعرض مستخدميها لتجربة مميزة وفريدة مش موجودة في تطبيق الشات بتاعها iMessage.. خصوصا إمكانية إضافة عشرات الإيموجيز في الشات وعرضها في وقت واحد بشكل متحرك وسلس. مؤسس التطبيق ذكر كمان إنه خد الموتوسيكل بتاعته وراح عند مقر شركة آبل وشغل أغنية متغاظ عارفك يلا مننا متغاظ 🎶🎶

متصفح إيدج فيه ميزة شبيهة بمتصفح Brave تقدر تعتمد عليها لمنع المواقع من التجسس عليك وتتبع معلوماتك. الميزة بتوفر 3 مستويات زي ما في الصورة.. أفضلهم هو مستوى المقيد واللي بيحظر أغلب أدوات التتبع خصوصا الضار منها. الميزة دي كمان مش مجرد حماية للخصوصية، ولكنها بترفع من درجة الحماية الخاصة بالمتصفح خصوصا ضد بعض مشاكل الذاكرة وتنفيذ أكواد الجافاسكريبت. تقدر تتأكد من تفعيل الميزة على متصفحك من خلال فتح تبويب جديد والدخول إلى إعدادات الخصوصية من هنا: edge://settings/privacy

شركة آبل طلبت حصة من أرباح فيسبوك من الإعلانات قبل إطلاق تحديث لمنع التطبيقات من تتبع نشاط المستخدم لعرض إعلانات ملائمة ! النهاردة كنت بقرأ تقرير ظريف كدة لجريدة WSJ بيتكلم عن عدة اجتماعات حصلت بين ميتا وآبل في الفترة من 2016-2018. آبل كانت عايزة تحصل على جزء من أرباح فيسبوك من الإعلانات اللي بتحصل من تطبيقها.. تحديدا نوع إعلانات اسمه "Boosted Posts".. لكن شركة ميتا رفضت لأنها إعلانات داخل تطبيقها زي باقي الإعلانات مش عملية شراء داخل التطبيق App Purchase (آبل بتحصل على حصة تصل إلى 30% من عمليات الشراء داخل التطبيقات على متجرها). الشركتين كمان ناقشوا فكرة نسخة مدفوعة من فيسبوك بدون إعلانات.. بردو عشان آبل تاخد نسبة من الاشتراكات لكن الفكرة لم يتم تنفيذها. بعد كدة طبعا آبل فهمت إن مفيش سبوبة في موضوع الإعلانات ده فقدمت تحديث App Tracking Transparency ودي ميزة بتسمح للمستخدم بمنع التطبيقات من التجسس على نشاطه على المواقع والتطبيقات الأخرى من خلال منعهم من الحصول على معرف الإعلان للجهاز Advertising ID. طبعا الميزة دي سببت ضرر بالغ لسوق الإعلانات وخسائر بمليارات الدولارت.. وأكبر الشركات الخاسرة بالطبع هي فيسبوك.

أفضل طريقة لاحتراف تصميم تطبيقات الموبايل 📱 لغة دارت مع إطار فلاتر من الطرق اللي تم تطويرها حديثا من قبل شركة جوجل واللي هدفها توفير طريقة مثالية لبرمجة تطبيقات الموبايل سواء الأندرويد أو الآيفون بنفس الكود 📲 ميزة الطريقة دي إنك بتكتب الكود مرة واحدة ومن خلاله تقدر تعمل تطبيق أندرويد أو آيفون أو حتى تطبيق على الويب 🖥 كمان من مميزات الطريقة دي إنك تقدر تبدأ باللغة مباشرة بدون حاجة لوجود خلفية عن البرمجة. ده رابط المقال موجود فيه تعريف باللغة، مميزاتها، استخدامتها، أفضل كورسات عربية مجانية متاحة لتعلمها 👇 https://bit.ly/3eM9glL

🤔🤔🤔

بنك اسمه Banorte من أكبر البنوك في المكسيك اتعرض للاختراق وسرقة بيانات العملاء.. الهاكر خد الداتا اللي سرقها وراح عرضها للبيع على منتدى تسريب مشهور.. البنك وكّل شركة أمن إلكتروني اسمها Group-IB للتفاوض نيابة عنه ومنع تسريب البيانات حماية لخصوصية العملاء.. الشركة تواصلت مع أدمن منتدى التسريب وبعتوله أمر قانوني Cease and Desist لحذف عرض البيع من موقعه.. أدمن الموقع شعر بالإزعاج والاستخفاف من طريقة تواصل الشركة.. فاشترى البيانات بنفسه وسربها لأي حد ينزلها.. بدل ما البيانات كان شخص واحد هيشتريها وخلاص.. البيانات دلوقتي مع أمة لا إله إلا الله..

النهاردة كنت بقرأ تقرير عن مواطن أمريكي اسمه Jared Mauch كان ساكن في منطقة ريفية موجود فيها إنترنت DSL فقط بسرعة 1.5 ميجابت.. لما اتواصل مع إحدى الشركات عشان توصل فايبر لبيته طلبوا منه 50 ألف دولار عشان يمدوا كابلات توصل للمنطقة اللي هو ساكن فيها. بدل ما يدفع المبلغ ده ولأنه مهندس شبكات قرر ينشئ مزود خدمة بنفسه وبدأت مجموعة من المنازل حوله يسجلوا معاه عشان يوصلهم إنترنت سريع.. وبالفعل قدر إنه يوفر اتصال بالإنترنت بسرعة تصل إلى 1 جيجابت في الثانية. الأسبوع ده Jared حصل على دعم حكومي بقيمة 2.6 مليون دولار لتوفير اتصال إنترنت فائق السرعة لمزيد من المنازل الريفية 🙂

خدمات الخلط بتعتمد على كسر سلسلة معاملات محفظة ما على البلوكتشين من خلال إيداع المستخدمين لأموالهم داخل الخدمة اللي بدورها بتخلط الأموال دي لمدة معينة وبعد كدة بتعيد توزيعها بنفس النسب السابقة للمستخدمين بشكل مجهول تماما.. يعني المستخدم أودع أمواله في الخدمة من خلال محفظته المعروفة واستلامها من الخدمة على محفظة جديدة مجهولة الهوية.. وبكدة يكون كسر الرابط بين مصدر الأموال وبين الأموال نفسها. في نفس الوقت اللي الخدمة دي ليها استخدامات كويسة.. بعض الهاكرز استغلوها في غسيل الأموال اللي بيسرقوها من منصات التداول وحتى من الأشخاص العاديين.. وده كان سبب توقيع عقوبات على الخدمة من وزارة التجارة الأمريكية. الغريب في الموضوع إن بمجرد الإعلان عن الخبر مستودع الخدمة على GitHub اتحذف وحسابات المطورين اتعملها بلوك، دومين الموقع اتوقف من شركة الاستضافة، رصيد الموقع من عملة USDC بما فيه من أموال المستخدمين اتجمد بشكل نهائي. اللي حصل ده من أغبى الحاجات اللي حصلت من جهة حكومية في مجال التكنولوجيا بشكل عام.. لأن مش عشان تكنولوجيا معينة تم إساءة استغلالها تفرض حظر وتعاقب التكنولوجيا نفسها؟!؟! وإلا المفروض تحظر الـVPN والتورنت وشبكة TOR وغيرها من الأدوات التكنولوجية المفيدة اللي تم إساءة استخدامها. العجيب بردو إن مستحيل دولة مهما كانت قوتها تعاقب أو تحظر خدمة مفتوحة المصدر.. لأنها ببساطة هيتم استنساخها وتفعيلها بكل سهولة. في عصر ما قبل البلوكتشين والبتكوين ولحد وقتنا هذا ما زالت الشركات الوهمية Shell corporations والبنوك أكبر مصدر لغسيل الأموال في العالم.

الأسبوع ده وزارة الخزانة الأمريكية في سابقة تاريخية فرضت حظر على أشهر خدمات خلط العملات الرقمية وهي خدمة Tornado Cash. أي معاملة بتحصل باستخدام العملات الرقمية يمكن تتبع مصدرها بسهولة، لأن العملات الرقمية بتعتمد على تقنية البلوكتشين اللي هي عبارة عن سجل رقمي عام غير قابل للتعديل. تقنية البلوكتشين بتوفر درجة من الشفافية غير موجودة حتى في المعاملات النقدية التقليدية زي تحويلات البنوك، لأن زي ما قولت كل معاملة بيتم تسجيلها على البلوكتشين، وبعد التسجيل بتكون غير قابلة للحذف أو التلاعب. دي حاجة ممكن تكون كويسة، لكن في نفس الوقت فيها جدال يطول الكلام عنه بالنسبة للخصوصية، لأن مش كل شخص مؤمن بفكرة إن كل معاملاته المالية بالكريبتو تكون علنية وسهل أي حد يقدر يوصلها.. كمان في ناس بتكون عايزة تشتري خدمات بشكل مجهول لسبب آو لآخر وهنا بتكون شفافية المعاملات نقطة سلبية.

قطاع الذكاء الاصطناعي في شركة ميتا طور شات بوت اسمه BlenderBot 3 بيقدر يعمل محادثات مع البشر بشكل متطور، وكمان البوت مصمم على التعلم وتحسين ردوده من خلال التفاعل مع أسئلة المستخدمين. أحد الأشخاص سأل البوت عن رأيه في مؤسس الشركة مارك زوكربيرج وكان رده: I don't really like him at all. He's too creepy and manipulative. في الحقيقة لا أحبه على الإطلاق. إنه مخيف للغاية ومتلاعب 👀