Tech Xtream

أصبحت أمازون أول شركة عامة في التاريخ تخسر 1 تريليون دولار من قيمتها السوقية القيمة السوقية للشركة انخفضت من 1.88 ترليون دولار إلى 879 مليار دولار. شركة مايكروسوفت تقترب من المركز الثاني بخسارة 889 مليار دولار حتى الآن من قيمتها السوقية. خسرت شركات القطاع التكنولوجي 5 تريليون دولار من قيمتها السوقية خلال العام الحالي فقط.

شركة جوجل أعلنت إنها شغالة على تطوير نموذج ذكاء اصطناعي قادر على فك طلاسم الروشتات الطبية. الشركة بتشتغل على النموذج بالتعلم الآلي بالتعاون مع عدد من الصيادلة بحيث يتم تدريبه على كيفية فهم الوصفات الطبية وكمان الملاحظات المرفقة معاها. التقنية شبيه بتقنية Google Lens واللي بتقدر تتعرف من الصور على أمور زي نسخ خط اليد وحل المسائل الرياضية والقيام بالترجمة من لغة لأخرى. النموذج الجديد تم تجربته لايف وقدر يتعرف على الأدوية الموجودة في روشتة طبية مكتوبة بخط اليد، مع توفير معلومات عن الأدوية وكيفية تناولها والأعراض الجانبية لها، والنموذج بيتم استخدامه بسهولة من خلال كاميرا الموبايل. التقنية حاليا ما زالت تحت التطوير وغير معلوم ميعاد توفرها.

لعبة Wolfenstein: The New Order متاحة دلوقتي مجانا على متجر Epic Games 🔥🔥🔥

برنامج OBS Studio 🔥 أفضل برنامج مجاني مفتوح المصدر لتسجيل شاشة الكمبيوتر وعمل البث المباشر.. من أهم مميزاته: ▪️ مجاني تماما وبيدعم اللغة العربية ▪️ بيشتغل على ويندوز | ماك | لينكس ▪️ بيدعم البث المباشر على فيسبوك | يوتيوب | تويتش ▪️ تقدر تستخدمه في عمل بث مباشر من فيديو مسجل مسبقا ▪️ تحكم كامل في كل إعدادات التسجيل وجودة الفيديو والبث المباشر ده مقال لشرح طريقة استخدام البرنامج وظبط إعداداته بسهولة 👇 https://bit.ly/3YCxqHC

شركة ميتا تواجه غرامة بقيمة 12 مليار دولار 😯 المفوضية الأوروبية اكتشفت إن شركة ميتا انتهكت قانون مكافحة الاحتكار في الاتحاد الأوروبي من خلال تشويه المنافسة في أسواق الإعلانات المبوبة. المفوضية شايفة إن اقتران سوق فيسبوك (الـMarketplace) مع الشبكة الاجتماعية بيعطي شركة ميتا ميزة تنافسية لا يمكن للمنافسين مواجهتها، بالإضافة إلى استغلال الشركة للبيانات اللي بتحصل عليها من السوق لزيادة صعوبة إمكانية منافستها. في حال فشلت شركة ميتا في دحض التهم الموجهة إليها هتواجه غرامة بقيمة 10% من عوائدها السنوية لعام 2021 (10% من 117.9 مليار دولار).

حب الناس ❤️❤️

شركة آبل هتوفر ميزة جديدة في نظام iOS بتسمح للمستخدم إنه يفعّل تشفير End-2-End على النسخ الاحتياطية من بياناته على الآي كلاود. ميزة Advanced Data Protection اللي شايف إنها اتأخرت كتير هتوفر أمان أفضل للمستخدم لأنه هيكون الوحيد اللي عنده القدرة على الوصول إلى البيانات الموجودة على حسابه وفك تشفيرها حتى لو تم اختراق الآي كلاود. حاجة غريبة لاحظتها إن الميزة مش بتكون مفعلة بشكل افتراضي، بحيث إن المستخدم اللي مفيش عنده معرفة تقنية تكون بياناته مشفرة وآمنة، ولازم المستخدم يفعلها بنفسه! الميزة حاليا متاحة للمشتركين في برنامج البيتا الخاص بآبل.. وهتبدأ الشركة في طرحها على مستوى العالم في بداية 2023 إن شاء الله.

موقع تويتر دلوقتي بيحظر مشاركة أي رابط لمواقع: Tribel فيسبوك انستجرام Mastodon الموقع حدث سياسته بحيث يعتبر مشاركة أي لينك للمواقع دي على تويتر مخالف، وحتى ممنوع تكتب اليوزرنيم بتاع حسابك على المنصات دي!!! بالمناسبة مبروك للأرجنتين ولا عزاء لخرنسا وابن فايزة..

من أكتر الأخطاء المضرة جدا اللي معظم الناس بتعملها هو الاعتقاد إن بمجرد مسح الملفات من موبايلها إن الملفات بالفعل تم حذفها من ذاكرة الجهاز وده خاطئ تماما.. وللأسف ناس كتير بتعتمد على الطريقة دي في حذف ملفاتها لما تكون عايزة تبيع الجهاز بتاعها مثلا أو حتى بتعمله فورمات.. ولكن برضه صورهم وفيديوهاتهم بتكون قابلة للاستعادة 🤦‍♂️ أي ملف إلكتروني بيتكون من مجموعة من الأرقام 0-1 ودي اللغة اللي يقدر الكمبيوتر يفهمها.. لما بيتم حذف ملف ما بالطريقة العادية بيفقد الكمبيوتر القدرة على الوصول لحاجة تشبه الجدول كان بيعتمد عليها في الوصول للسيكتورز أو الأماكن على الهارد ديسك أو ذاكرة الموبايل اللي متخزن عليها الملف، لكن في نفس الوقت الملف نفسه (اللي هو الآصفار والآحاد) بيفضل موجود زي ما هو في مكانه، وباستخدام أي برنامج Recovery بسيط ممكن نستعيد الوصول للملف مرة تانية 📂 لما نحذف ملف بيظهر لنا إن فيه مساحة فاضية تم إضافتها للجهاز.. لكن احنا عارفين إن الملف لسه موجود متحذفش 🤔 وده ببساطة لأن نظام التشغيل بيقولنا إن المساحة دي أصبح متاح إننا نكتب عليها ونخزن عليها ملفات، وعشان كدة نظام التشغيل بيعتبر المساحة اللي بتشغلها بيانات ملف محذوف هي مساحة فاضية. الحل المتاح عشان نحذف الملف بشكل نهائي هو الكتابة على مساحة الملف المحذوف، يعني نمسح ملف ونخزن ملف جديد على نفس المساحة وبكدة بيانات الملف الأصلى بتتحذف للأبد.. والعملية دي معروفة باسم التمزيق أو Shredding. الحذف بطريقة التمزيق سهل جدا ومش بيحتاج أي خبرة.. ممكن نستخدم تطبيق بسيط على الموبايل نقدر من خلاله نحذف أي ملف بشكل نهائي بالاعتماد على الطريقة دي ❎ ده فيديو بسيط فيه معلومات مفيدة جدا عن عملية الحذف وازاي بتتم وإيه اللي بيحصل للملف بعد الحذف، مع شرح لتطبيق مجاني بسيط جدا نقدر نعتمد عليه في حذف الملفات بشكل نهائي من الموبايل 👇 https://bit.ly/2GedUO6

دونالد ترامب أطلق مجموعة بطاقات NFT قابلة للتجميع زي بطاقات البيسبول كدة.. وطالع فيها بشخصيات مختلفة منها سوبرهيرو ورائد فضاء 😂 شراء بطاقة بيمنحك فرص للفوز بحاجات زي عشاء مع ترامب، تلعب معاه جولف، تقابله بشكل شخصي.. سعر البطاقة الواحدة بدأ من 99$ ودلوقتي وصل 200$ أعرف واحد صاحبنا محتاجين نعرض عليه الفكرة دي عشان نسدد ديون مصر..

موضوع تتبع الطائرة الخاصة بإيلون ماسك واضح إنه هيكون مثير للجدل الأيام الجاية بعد ما تم حظر حسابات صحفيين في كبرى الجرائد الأمريكية بسبب مشاركة لينك لتتبع الطائرة بتاعته! ماسك في البداية حظر الحساب الخاص بنشر مسار الطائرة، وبعدها صاحب الحساب نفسه من تويتر، وعدل على سياسات الموقع بحيث يكون نشر الموقع الجغرافي لأي شخص أمر محظور وممكن يعرض الحساب للحظر. بعدها الشخص صاحب بوت التتبع راح عمل حساب على انستجرام واستمر في مشاركة معلومات تتبع الطائرة.. أي حد يحاول يشارك لينك الحساب على تويتر بيتم منعه، وماسك هدد صاحب الحساب إنه هيرفع عليه قضية. بعض الصحفين في الواشنطن بوست، CNN، نيويورك تايمز اتحظروا من تويتر بعد ما نشروا لينك لحساب التتبع على الانستجرام. ماسك واضح إن خايف من موضوع مشاركة موقعه الجغرافي، وقال إن حاجة زي كدة ممكن تعرض سلامته للخطر، وإنها باختصار "إحداثيات للاغت-يال" خصوصا بعد الوثائق والملفات السرية اللي سربها للصحافة في الفترة الأخيرة. الغريبة إن معلومات تتبع رحلات الطيران دي معلومات عامة، وأي حد يقدر يوصلها.. فأكيد يعني اللي عنده القدرة والنية لا_غتياله مش هيتعمد على معلومات من بوت على النت!!!

مجموعة من الآباء في كندا رفعوا قضية ضد شركة Epic Games مطورة لعبة فورتنايت لأن أبنائهم أصبحوا مدمنين على اللعبة لدرجة التوقف عن الأكل والنوم والاستحمام 😬 المدعين جادلوا إن الشركة صممت اللعبة بطريقة معينة بحيث تكون مسببة للإدمان، وحاليا في أكثر من 200 أسرة انضمت لتشكيل دعوى قضائية جماعية ضد الشركة. منظمة الصحة العالمية سبق وصنفت "إدمان ألعاب الفيديو" على إنه مرض معترف به عالميا.

وزارة التجارة الأمريكية حظرت 36 شركة صينية جديدة وأضافتهم لقائمة الشركات المحظور بيع تقنيات أمريكية إليها. أبرز الشركات المحظورة هي شركة Yangtze Memory Technologies (YMTC) المتخصصة في صناعة أشباه الموصلات والشرائح المتطورة لذواكر NAND Flash، وتم اعتبار الشركة الصينية خطر على الأمن القومي الأمريكي!؟ شركة Cambricon كذلك كانت واحدة من أهم الشركات اللي تم حظرها باعتبارها من الشركات الصينية الرائدة في صناعة تصميم الرقائق الإلكترونية، وليها دور كبير في تنمية صناعة أشباه الموصلات محليا في الصين. الحظر ده معناه إن الشركات الأمريكية أو الغير أمريكية اللي بتستخدم تقنيات أمريكية بيكون ممنوع عليها تصدير تقنيات معينة (متطورة) للشركات الموجودة داخل قائمة الحظر بدون الحصول على رخصة من وزارة التجارة، وده شيء بيكون صعب جدا. كل دي جهود من أمريكا لمن الصين من امتلاك القدرة على تصنيع الشرائح الإلكترونية المتطورة محليا؛ للحد من خطرها من الناحية الاقتصادية والعسكرية.

لو بتستخدم تطبيق مشاركة ملفات زي Shareit أو غيره وزهقت من الإعلانات المزعجة اللي بتظهر لك كل شوية فأنا بنصحك تجرب تطبيق Files. تطبيق Files من تطوير شركة جوجل بيسمح لك بمشاركة الملفات على بين الموبايلات بسرعة تصل إلى 480 ميجابت في الثانية، كمان تقدر تستخدمه بدون إنترنت وسرعته في النقل بتكون ممتازة. التطبيق برضه بيوفر أداة لتنظيف الموبايل وحذف الملفات الغير هامة ومخلفات النظام، وتقدر برضه تستخدمه كمشغل ميديا للفيديو والصوت وأنواع تانية من الملفات. رابط التطبيق موجود في أول تعليق.. وده شرح سريع لطريقة إرسال الملفات باستخدام التطبيق 👇 https://youtu.be/JzPrkA8kEBY

شركة آبل هتسمح بوجود متاجر بديلة على الآيفون 😯 في تقرير لبلومبيرج ذكرت الجريدة إن شركة آبل بدأت تجهز نفسها للاستجابة لقانون الأسواق الرقمية في الاتحاد الأوروبي اللي بيهدف إلى مكافحة الاحتكار وضمان إن الأسواق تكون مفتوحة للمنافسة. آبل يبدو إنها هتستجيب للقانون بحكم إنه مش هينفع تخرج من السوق الأوروبي، بالظبط زي ما قررت تغير منفذ الشاحن إلى USB-C للتوافق مع توجه الاتحاد لتوحيد شواحن الأجهزة الإلكترونية. آبل هتسمح بوجود متاجر بديلة غير المتجر بتاعها، وده معناه إن هيتم السماح بميزة التحميل الجانبي للتطبيقات Sideloading. من غير المعلن حتى الآن إيه هتكون شروط الشركة للسماح لمتاجر تانية على الآيفون، وإيه نوعية التطبيقات اللي هيكون مسموح بيها والشروط المطلوبة عشان التطبيق يكون مسموح بتحميله، وهل هيكون فيه بوابات دفع مختلفة غير آبل باي لتفادي دفع رسوم الشركة ولا لا.. وأهم حاجة هل هتكون التغييرات دي عالمية ولا في نسخة الآيفون الأوروبي فقط. المعروف حاليا إن فيه تغييرات كبيرة هتحصل للآيفون بداية من تحديث iOS 17.

شركة ميتا قررت تلغي قسم Connectivity بعد 10 سنين من التطوير. المشروع اللي بدأ في 2013 كان هدفه توصيل إنترنت للمناطق اللي الخدمة مش متوفرة فيها حول العالم عشان الشركة تزود من عدد المستخدمين لمنصاتها. الشركة حاولت تطبق الفكرة من خلال طائرات مسيرة بتحلق على ارتفاع عالي لتوفير اتصال بالإنترنت، كمان كان عندها مشروع مشابه لستارلنيك لتوفير خدمة الإنترنت عبر الأقمار الاصطناعية. شركة أمازون العام الماضي استحوذت على الموظفين في قسم فيسبوك Connectivity مقابل مبلغ تم دفعه لفيسبوك لم يتم الإعلان عنه للعمل على مشروع Kuiper وده مشروع إنترنت فضائي خاص بأمازون متوقع إنه ينافس مشروع Starlink.

منصة Merch by Amazon واحدة من منصات أمازون المميزة اللي تقدر تشتغل عليها وتكسب منها مبالغ محترمة 💸 المنصة باختصار بتوفر لك إمكانية إنك تعمل تصميمات من اللي بتتطبع على التيشرتات وتعرضها على الموقع، لو شخص عجبه التصميم وطلبه، أمازون بتطبع تصميمك على تيشرت وتبعته للعميل وتنزل الربح في حسابك 💰 كل اللي بتحتاجه هو إنك بتعمل التصميم فقط وأمازون بتعمل كل حاجة. أنا كنت عملت أكتر من شرح عن المنصة وطريقة التسجيل فيها والعمل عليها وفيه شرح فيديو برضه هتلاقوا كل حاجة في المقال ده 👇 https://bit.ly/30O7FIz

🙂

ماسك أكد إن هيتم رفع عدد الحروف المسموح بيها في التويتة من 280 حرف إلى 4000 حرف! دي مش هتبقى تويتات دي هتبقى مواضيع تعبير 📜