نَبَطيّ

إليا رقد نومه كوابيس و أحلام ‏وإليا صحى ودّه يعوّد محله ‏من كثر ما يونس عظامه إذا قام ‏تقول كنه يركض الليل كله

‏أعْرفك مثل السماحه فـ وجه المستضيق ‏ضيقتك ما هي بـ عاده، وضحكاتك جهر ‏عيّت -غيوم السماء- تخفي لنجمك بريق ‏كل ما غطّت بريقك وأراد الله؛ ظهر ‏الحزن لو كبّر -فـ نظرتك- ما لا يليق ‏خلّ عينك للتغاضي، وظهرك للسهر ‏كلّ ضيقه من حبيبه، وزلّه من صديق ‏ماهي بخيبة أماني، ولا طعنة ظهر ___ماجد النفيعي.

أنا ليا كثرت علوم الزواريب لو زعزعن طويق ما زعــزعــني ما أرخي لها راسي ولا أسمع ولا أجيب لين الرماة سهومهم يركـدنـي أخاف أجي مزهاف وأرمي ولا أصيب والرمية اللي ما تصيب تغبني — بن زوبين رحمه الله

«كنت أنا في لهيب القيض مرمي واليوم أنا تحت صب السحابة»

‏"تفهمين الشِّعر ولا تجهلينه ‏ماعرفته قبل تهدينه عليّه ‏تامرين وتاخذين اللي تبينه ‏يالعيون الناعسات النرجسيّة ‏شاعرك لا من تغنّت بك سنينه ‏شال بأعلى صوته أعذب سامريّه ‏تفهمين الشِّعر ولا تجهلينه ‏"قابلك ربي بليّا شاعرية" ‏__فلاح السبيعي

"كنت أقول إني لو تضيق الوسيعة ما أضيق ‏و اكتشفت إن البني آدم ضعيف ولو قوى! ‏كل ما سقت القدم يمّ السعة ضاق الطريق ‏و كل ماحطيت رجليني على درب التوى امتلت عيني من الماء وفي صدري حريق والطعون إللي من يدين الحبايب ماهي سوى ‏و الله إني كنت أدف طويق و أطيّح طويق ‏لين صرت أطيح لو يلفح طرف ثوبي هوى"

سقاك الفقد واشجاك الرحيل وقسوّة الغيّاب ‏يا قلبي مالك إلا الشوق ومكابد تناهيده ‏على صوت المطر طاحت ملامح والحنين انساب ‏ يمر البال من ثغره خذا من الورد توريده ‏عليك آذوب يا عودٍ ليانه للدلال إسهاب ‏يهّب الغي منّه كل ما مالت عناقيده ‏تحسب اني نسيتك ! كيف ابنسى ؟ والجوى غلّاب ‏يا مجدول القوام ! اللي مضى ؟ من يقدر يعيده ‏بعد وجهك ؟ غدت كل الوجيه اللي لمحت اغراب ‏خذتني عزلتي لأحساسي الحالم واناشيده ‏يلومون الغصن لا اقفى اليباس بلبسه الجذّاب ‏شـ ذنب الغصن ؟ وكفوف الخريف ! تحب تجريده ‏دخلت من اوسع ابواب العذاب وللعذاب ابواب ‏تجعّد خاطرٍ ماتمحي البسمه تجاعيده ‏بعد ما كان يغريه الجمال وثوبه الخلّاب ‏سمح من كل ربّات الجمال وغيد اماليده ‏انا ما اشتقت لأيام السمر ومنادم الاصحاب ‏كثر ما اشتاق صوتي لأسم ما مليت ترديده ‏تمنيت انّه يرتّب حكاية عذره المرتاب ‏لو ان اللي حصل ؟ مكتوب لا بيدي ولا بيده ‏ينام الليل ما مّر السهاد بطرفه الكذّاب ‏ولا عادت طيوفي هي سبب شوقه وتسهيده ‏حبيبي طارت احلام الصِبا ذاك النهار اسراب ‏شعور المنجرح يصعب على الجرّاح تحديده ‏اعرف ان الطواري ما تمر إلا تجيب احباب ‏يجي طاريك كن البال في جدول مواعيده ‏ادوّر لك عذر ياللي تدوّر للغياب اسباب ‏يا شبه الكلمة اللي بعدها غصّه وتنهيده ‏من آداب الفراق انّك تصون العهد للغيّاب ‏اخاف الجرح يهدى وانت تلقى عذر و تزيده

عزاي إني ردعت القلب عن باقي غلاك وتاب وصحى في داخلي طفلٍ غرير وشايب اعرابي ‏حبيبي للصبر بالٍ طويل وللجروح أسباب ‏وانا ما رحت ادور للجروح أعذار وأسبابي ‏ ‏حبيبي يوم شفت إن الزمان برجعتك كذاب ‏تركتك للتجافي والغرور بزحمة أصحابي ‏رحلت وقلت اسافر عنك وأجزيك الغياب غياب ‏اببعد واستريح من السهر وأريح اعصابي ‏هجرت أرض الجروح ابغى عن تراب الجروح تراب ‏عساي أنساك وأنسى رجعتك والجرح وترابي ‏يطيب الجرح وإلا يا عسى جرح الهوى ماطاب ‏ بكيفك داو جرحك واستريح وجرحي اولا بي ‏طلع صبح الفراق بشاطىء الغربه ودار اجناب ‏ولعنت أم الحنين وسالت الدمعه على أهدابي! __عادل الذيابي