ملتقى البيولوجيا | Biology Hub

هذا بعتاتو صديقة فالڨروب الباقي لي عندي انا مانقدرش نبعتهم الله غالب 🙂💔

#دليلك_إلى_عالم_المخابر_الجامعية

الكياتة رح يخرجكلم كل مرة لون جديد 🙈💗✨ #دليلك_إلى_عالم_المخابر_الجامعية

أمبعد شيمي 2 تع سوماستر الثاني رح ديرو تجارب صح بالادوات اهك تجربة هي المعايرة رح تخدمو بيها باش تحوسو على نقطة التكافؤ الى اخره #دليلك_إلى_عالم_المخابر_الجامعية

باش نتفاهمو شيمي 1 لي رح تقراو فالسوماستر لول تيبي اللول والثاني رح ديرو تجربة خفيفة لي هي التمديد أمبعد باقي تيبيات رح تقراو على الجزيئات #دليلك_إلى_عالم_المخابر_الجامعية

⚙️ سادسا | السلامة داخل مخبر الكيمياء

🥼 ارتداء Blouse | المئزر المخبري. 👟 ارتداء احذية مغلقة. 🧪 التعامل بحذر مع المواد الكيميائية والادوات الزجاجية. 🚫 ما تستعمل حتى مادة او جهاز بلا تعليمات. 🍴 ممنوع الاكل والشرب داخل المخبر(نسمع تبهدايل كوم تاكلو) 🧹 حافظ على نظافة وترتيب مكانك. 👐 اغسل يديك بعد نهاية الحصة. ⚠️ واذا وقع اي حادث او انسكبت مادة، بلغ الاستاذ مباشرة.

💚 نصيحة صغيرة لطلبة L1

في البداية ممكن تشوفو بزاف ادوات ومصطلحات جديدة، بصح ما تقلقوش 😭🤍 مع كل TP راح تتعلمو اداة جديدة، تعرفو دورها وكيفاش تستعملوها، ومع الوقت راح تولي الادوات مألوفة بالنسبة ليكم.

وخليو دائما في بالكم: الـTP ماشي حفظ فقط، الـTP هو فهم + تطبيق + ملاحظة + دقة 🔬🧪+التحضير + التركيز + التنظيم + احترام قواعد السلامة = TP ناجح 🥼🧪💚

#دليلك_إلى_عالم_المخابر_الجامعية

يا سلام الله عليكم جميعا اعضاء ملتقى البيولوجيا❣️♾️

📙 دليل الطالب في مساره الدراسي 🛑⚠️حلقة: داخل مخبر الكيمياء

بعد ما تعرفنا في الحلقة السابقة على قواعد الانضباط داخل مخبر البيولوجيا وكيفاش يكون التعامل داخل الـTP، اليوم راح ننتقلو مع بعض لمخبر الكيمياء 🔬🧪 ونتعرفو على اهم الادوات لي ممكن تلقاوها، واش دور كل اداة، وواش لازم تديرو قبل واثناء حصة الـTP.

🧪 اولا | واش هو الـTP de Chimie؟

🔹 TP – Travaux Pratiques هو الحصة التطبيقية وين تطبقو واش قريتو في دروس الكيمياء 🔹 خلال الحصة راح تتعلمو كيفاش تستعملو الادوات، تحضرو المحاليل، تديرو القياسات، تسجلو النتائج وتنجزو التجارب حسب Protocole 🔹 قبل ما تدخلو للمخبر، من الاحسن تقراو البروتوكول وتفهمو الهدف من التجربة. 💡 ماشي لازم تحفظو كل خطوة، المهم تفهمو واش راكم تديرو وعلاش راكم تديروه (حنا في للجامعة تاعنا كنا مطالبين نديرو ملخص للبروتوكول قبل مانجو نجاوبو على الاسئلة نحلو معادلات لي فيه لبروف تزيدلنا نقاطي)

🧪 ثانيا | اهم الادوات في مخبر الكيمياء

🔹 الكأس الزجاجي | Bécher | Beaker يستعمل لخلط او تسخين المحاليل وقياس حجم تقريبي للسوائل. 🔹 المخبار المدرج | Éprouvette graduée | Graduated cylinder لقياس حجم السوائل. 🔹 الدورق المخروطي | Erlenmeyer | Erlenmeyer flask يستعمل لخلط وتحضير المحاليل. 🔹 الدورق الحجمي | Fiole jaugée | Volumetric flask يستعمل لتحضير محلول بحجم وتركيز محدد. 🔹 الماصة | Pipette | Pipette لنقل كمية محددة من السائل. 🔹 السحاحة | Burette | Burette تستعمل خاصة في عمليات المعايرة | Titrage | Titration. 🔹 أنبوب الاختبار | Tube à essai | Test tube لاجراء تجارب على كميات صغيرة من المواد. 🔹 القمع | Entonnoir | Funnel لنقل السوائل او القيام بعملية الترشيح. 🔹 الميزان | Balance | Balance / Laboratory balance لقياس الكتلة. 🔹 الملعقة المخبرية | Spatule | Spatula لاخذ ونقل المواد الصلبة بكميات صغيرة.

📚 ثالثا | واش تديرو قبل الـTP؟

قبل ما تدخلو للحصة، حاولوا: 🔹 تقراو عنوان التجربة. 🔹 تعرفو Objectif تاعها. 🔹 تفهمو الفكرة العامة للتجربة. 🔹 تلقاو نظرة على Protocole والخطوات. 🔹 تتعرفو على الادوات لي راح تستعملوها. 🔹 تراجعو القوانين والحسابات المرتبطة بالتجربة. 🔹 وتحضرو الاسئلة لي ممكن يطرحها الاستاذ.

⚖️ رابعا | واش تديرو داخل الـTP؟

🧪 تستعملو الادوات حسب تعليمات الاستاذ. ⚖️ تديرو القياسات بدقة. 📝 تسجلو النتائج والملاحظات. 📊 تنظموا النتائج في جداول. 🧮 تديرو الحسابات المطلوبة. 📈 واحيانا تنجزو منحنيات حسب التجربة. 👩🏻‍🏫 تسقسو الاستاذ اذا ما فهمتوش خطوة او نتيجة. 🧹 وفي نهاية الحصة تنظفو مكانكم وترجعو الادوات لبلاصتها(تهربو من غسيل لماعن فدار راح تغسلوهم فلابو شيمي🦦🚶🏻‍♀️)

✏️ خامسا | واش لازم تجيب معاك؟

🥼 Blouse | المئزر المخبري اهم حاجة وما تنساوهاش 😭🤍 📒 كراس او دفتر TP لتسجيل الملاحظات والنتائج اذا كان مطلوب. 📝 اوراق بيضاء للحسابات والملاحظات. ✏️ قلم رصاص + ممحاة 🖊️ قلم اسود او ازرق 📏 مسطرة مفيدة للجداول والمخططات والمنحنيات. 📚 Protocole / fiche de TP اذا كان متوفر او طلب منكم الاستاذ. #دليلك_إلى_عالم_المخابر_الجامعية

السلام عليكم عائلة ملتقى البيولوجيا 🌺 لقيتلكم بوت تلقاو فيه آلاف الكتب في مختلف المجالات إن شاء الله يفيدكم 🪷 البوت : 🫐 @GedoLibrary_bot

السلام عليكم ورحمة الله و بركاته عساكم في افضل حال..... جماعة مدام القناة القديمة تاع الباك راحت فقررت نحل قناة جديدة خاصة بتعلّم الإنجليزية 🇬🇧 حنحط فيها كلمات جمل عبارات وطرق للرد بالإنجليزية ونتعلمو مع بعضانا .. إذا حابين تطوروا الإنجليزية تاعكم دخلو للقناة وإن شاء الله تستفادو منها 🌷 وسورتو في هاذ الوقت الإنجليزية ولات مهمة ونحتاجوها بزاف في القراية الخدمة وحتى في حياتنا اليومية.. نورتونا مقدمًا 🤍 https://t.me/englishwithyoyaa

- لما يبقى 15 يوم لأسبوع الكونطرولات وش ندير؟ نبدا نخدم في الملخصات يعني لكل موديل ملخص ( ملخص نخدمه وحدي بطريقة نفهمها و بأسلوبي ) و نبدا نحضر لي كور اكثر ( ممكن الاستاذ يلمح لكم على الكونطرولات أو نتا تروح ليه تسقسيه أي أسئِلة قبل ما تبدا المراجعة ) في هذي المرحلة راح تحتاج اداة ذكاء اصطناعي تعاونك يعني تبعث لها الكور و تطلب منها تشرح لك بالتفصيل ( انا كنت نستخدم جيميني لأنه يعرف يشرح بالدارجة الجزائرية) في الاسبوع قبل الكونطرولات نبدا نطبع في الامتحانات السابقة (تلقاوهم عند الطلبة القدم أو الفوايي ) و نبدا نفتح فيهم بالتدريج مع اكمال الملخصات طبعا ، حاولو انكم تركزو على الاختبارات اللي دارهم البروف تاعكم في الاعوام السابقة . ليلة الرعد باينة نكمل نفتح السوجيات + نقرا الملخص و نص الوقت يضبع في الرقاد 😂😂😂 .

السلام عليكم الطلبة الجدد ... اليوم راح نشارككم كيفاه عقب عامي الأول في الجامعة تخصص snv و كيفاه تحصلت على معدل 15.72 في السومستر الاول و 15.48 في السومستر الثاني نتمنى تفيدكم هدرتي هذي ... أول حاجة مع البداية راح تكونو مشوشين شويه بحكم انكم جدد في الجامعة و مزلتو ما تعرفوش السيستام كيفاه داير و لي بروف تاني ، أنا شخصيا عملية التأقلم مع المحيط الجامعي كامت صعيبة شوي في أول شهر و مبعد خلاص كلشي يصير عادي... ثاني حاجة، لازم تكونو من النوعية اللي تسقسي لما ما تفهمش خاصة انكم مزلتو ما تعودتو لا على اللغة لا على طريقة الشرح لا على سيستام القرايا تسما كي ما تفهمش حاجة سقسي ما تخليهاش عندك أنا كنت نسقسي بزاف لي بروف خاصة في ناحية اللغة و تاني سقسو الطلبة القدامى على كيفاه ديرو البحوث و كيفاه تقراو و كذا ... كيفاه تتعاملو مع لي tp ؟ شوفو في التيبي لازم تكون مركز و تتلاح (يعني تمد يدك) باسكو هي الفرصة تاعك باش تتعلم و تطبق وش قريت و ما تخافش ! سقسي لبروف اي حاجة مفهمتهاش أو أي تساؤل في بالك ، و تاني لازم تركز في الرسومات و البيانات ( باسكو البيولوجي فيها الرسومات التخطيطية و البيانات بزاف في التيبي) و البروتوكول التجريبي تاني لازم تشفا عليه لزوج اسباب أولها انك راح تحتاجه في التطبيق في الtp و ثانيها هو الانتيرو اللي احتمال يدير لك فيه البروف البروتوكول التجريبي ، اما من ناحية الcompt rendu لازم تخيرو ناس خدامين يعني يخدمو صح مش يخلو الخدمة عليكم نتم ، كاين البروف اللي يقول لك اخدم الcompt rendu في الحصة تم ( و هنا لازم تكون خفيف في الكتيبة و الفهامة و في الملاحظة و أكيد تدوين اسماء الحوايج كالأدوات المستعملة و اسماء الملونات و الملاحظات التجريبية ) و كاين البروف اللي يقول لالا جيب لي compt rendu الحصة الجاية ( و هنا لازم ما تنساش وش صرا في التيبي 🤦🏻 يعني لازم تكتب كلشي كلشي و تخدمو في اقرب فرصة نتا و زملائك ( من الأحسن تخدموه في المكتبة تاع الكلية تاعكم ولا تخدموه دردشة جماعية في التيليجرام او اي ابليكاسيون تحبوه ) و في كلتا الحالتين لازم تقسمو المهام يعني كل واحد لازم تكون عنده خدمة معينة و كل مرة تتبادلو المهام باش تتقنو الخدمة . كيفاه تتعاملو مع الtd ؟ شوفو التيدي هي حصة أعمال موجهة ، يعني راح تحلو فيها تمارين و سلاسل التمارين و تفهمو الكور مليح مع البروف بحيث في التيدي يكون عدد الطلبة أقل و بالتالي تفهمو اكثر ، حاولو انكم تضربو طلة على التمارين قبل الحصة و شوفوهم على الأقل، مش لازم تحلهم (رغم انه كاين لي بروف اللي يلزم عليك انك تحلهم قبل التيدي) و خلال التيدي ركز مع البروفو سقسيه أي سؤال حول الكور مش فاهمه ، و شارك في الحصة حتى لو ماكنتش فاهم ،مثلا أنا كي كنت ما نفهمش كشما حاجة نقول للبروف " نطلع نحل التمرين بصح عاونيني باسكو منيش فاهمة مليح" و عادي نطلع و البروف تعاوني و نفهم . كيفاه تديرو مع الاكسبوزي ؟ الاكسبوزي خدمة جماعية في الاغلب و لازم تخير زميل او زملاء يكونو خدامين مليح ، اعرف تخير المصادر ، التصميم و كلشي ، و اهم حاجة هي الالقاء يعني لازم ما تخافش و لازم تكون لغة الجسد تاعك واثقة و تستخدم يديك بطريقة مقبولة (مش من لي تبدا و نتا تحرك فيهم 🤦🏻) و تعرف كيفاه تخدم الوثائق تاوعك (سواء كانت باوربوينت أو بوستر أو اي حاجة ) بحيث تخدم الشرح و الموضوع و تكون مفهومة للطلبة و تبهر البروف في نفس الوقت و تكون ضمن المعايير الأكاديمية طبعا ( راح تفهمو كلشي مع البروف هو اللي راح يحط لكم الشروط و كلشي ) . كيفاه نطلعو السومستر؟ مش حاجة صعيبة انك تجيب 13/20 في البيولوجي عامك الاول! ساهلة بزاف برك عندكم الطريقة اللي اتبعتها انا شخصيا ( و كل واحد طريقته قادرين تلقاو واحد اخر يعتبر طريقتي استهتار و لعب بصح انا راح نحط لكم كيفاه قريت و خلاص و لازم ترفدو النقاط الايجابية برك و ما تغلطوش غلطاتي) : - كنت نحضر لي كور تاوعي كامل بلا غياب (برك ساعات نغيب اما بدافع الملل أو الظروف ) و لما نحضر نركز و نكتب رؤوس اقلام و الملاحظات ( الهايلايتر و الستيكي نوت راح يكونو اصحابكم) كنت نطبع البوليكوب تاوعي و في الكور نرفدهم و نرفد الهيلايتر و ستيلو و ستيكي نوت و نبدا ندون و نكتب ، مام في التيبي و التيدي ما كنتش نغيب ابدا ( 0غياب السومستر الاول و 0 غياب السومستر الثاني) . - الانتيرو: ههههه كيفاه نشرح لكم انه ماكنتش نجيب مليح في الانتيرو باسكو ما نراجعش مليح 😂 كنت نجيب فيه 1/5 نورمال 🙂 ، المهم نتوما ما تغلطوش غلطتي و تهملو الانتيرو كيما أنا 🤦🏻 اقراو و راجعو مليح .

سلام الله عليكم أعضاء ملتقى البيولوجيا 🥰💚

🌱💚 تجارب من قلب الجامعة | كيف نجحت طالبة في سنتها الأولى؟

اليوم رح نشارك معاكم تجربة طالبة في سنتها الأولى جامعيًا، حكات كيفاش كانت بدايتها مع الجامعة، وكيف نظمت وقتها، وطريقة مراجعتها، وكيف قدرت تتجاوز الصعوبات وتنجح في سنتها الأولى 📚✨ 💭 أحيانًا تجربة شخص آخر تقدر تعطينا أفكار ونصائح ما كناش ننتبهولها، خاصة إذا كنا مقبلين على أول سنة جامعية أو ما زلنا نحاول نتأقلم مع نظام الجامعة.

إذا عندكم تجارب حابين تشاركوها مع أعضاء الملتقى، مرحبا بيكم دائمًا 💚

#سلسلة_التفوق_والتوفيق_بين_الباك_والجامعة

بخصوص الفيديو اللي هدرتلكم عليه في نقطة التلخيص هذا هو 🪷بالمناسبة ننصحكم و بشدة تتفرجوا فيديوهات هاد القناة خاصة البنات راهي رح تفيدكم بزاف سوا في القراية ولا في الجوانب الأخرى

اسم قناتها : koky pink

#سلسلة_التفوق_والتوفيق_بين_الباك_والجامعة

بسم الله الرحمان الرحيم السلام عليكم و رحمة الله و بركاته أهلا و سهلا بعائلة ملتقى البيولوجيا 🇩🇿

رجعتلكم بعد غياب طويل علابالي توحشتوني 🤭؛ المهم بما أنو التصويتات كانوا بزاف على وريلنا التقنيات فيسعدني أن أشارك معكم مختلف التقنيات السهلة و المنتجة لدرجات أعلى و أفضل 🌸 عنوان الحلقة لليوم: تقنيات دراسية لأكثر إنتاجية 📝

قبل مانبداو ماتنساوش الصلاة على النبي صلى الله عليه و سلم و على بركة الله نبدأ 🫐

✓أول تقنية معانا لليوم هي : تقنية بومودورو (pomodoro technique) 🪷التقنية محبوبة الجماهير ؛ تقنية تعتمد على تقسيم الجلسات الدراسية الطويلة إلى جلسات دراسية قصيرة ؛ بالمختصر المفيد تقسموا وقتكم ل25 دقيقة دراسة و 05 دقائق راحة ؛ 🫐الهدف منها هو جعل الدراسة أكثر تركيزا و تقليل التعب و الإرهاق ( يعني في بلاصة ماتقراو 05 ساعات دفعة وحدة قسموا 25 دقيقة قراية و 05 دقائق راحة حتان تكملوا الخمس ساعات تاعكم ) ✓ثاني تقنية : التكرار المتباعد (Spaced Repetition) 🪷تقنية نصنفها من أفضل التقنيات للناس اللي عندهم مواد تحتاج الحفظ ؛ و طريقتها سهلة بزاف ؛ مثلا عندكم درس و حبيتوا تحفظوه ؛ أحفظوه اليوم الأول ؛ بعدها عاودوه بعد يومين ؛ بعد أربع ايام ؛ بعد سمانة و هكذا 🫐الهدف منها هو تثبيت المعلومة لي الذاكرة طويلة المدى و عدم نسيانها ✓ثالث تقنية : تقنية 321 🪷جربت هاد التقنية أنا شخصيا و فادتني ؛ و مليحة للحفظ ثاني ؛ دك نفهمكم 03: تقرا المعلومة ولا الدرس ثلاث مرات 02:تعاوده خطرتين بصح بلا ماتشوف 01: تكتبه خطرة وحدة 🫐الهدف منها نفس تقنية التكرار المتباعد؛ الحاجة المليحة فيها هي الكتابة لأنو المخ يتفكر المعلومة عن طريق الكتابة ✓رابع تقنية : الإسترجاع النشط( Active Recall) 🪷تقنية مليحة بزاف للناس اللي حابة تراجع وش قرات ؛ طريقتها هي أنو تقفل الكتاب ولا البوليكوب تاعك و تجيب ورقة بيضاء ولا كراس عادي و تكتب كامل وش تتفكر من المعلومة اللي كنت تقراها 🫐 الهدف منها هو تقوية الدماغ على تذكر المعلومة دون الرجوع إلر الكتاب او المطبوعة ✓خامس تقنية : إختراع كلمات لتسهيل الحفظ تتفكروا عام الباك المصطلحات هاذوك تاع الجغرافيا تاع دول منظمة الأوبيك و كذا ؛ الإختصارات ( مثلا عش لك زرق تاع الإسلامية) هاذي بالذات مليح تطبقوها مع الحوايج اللي فيهم بزاف تفكير و يحتاج تتفكروا الفروع تاعهم 🫐الهدف منها هو تسهيل التذكر بطريقة مرحة و سهلة عن طريق الإختصارات ✓سادس تقنية : التلخيص 🪷دك نحطلكم فيديو كيفاش تنظموا التلخيص تاعكم باش تجيكم القراية ساهلة ؛ التقنية هاذي مليحة للمراجعة في ليالي الرعد ؛ تعاونكم بزاف و تنقص عليكم التعب تاع تقراو بزاف مواد فيهم معلومات بزاف في ليلة وحدة ✓سابع تقنية : تقنية كايزن 🪷هاد التقنية يستعملوها اليابانيين بزاف في قرايتهم ؛ و معناها التطور المستمر بخطوات صغيرة ؛ كيفاه هاذي ؟ دك نفهمكم؛ مثلا عندكم درس طويل في بلاصة ماتقراه كل دفعة وحدة أقرا منو شوية اليوم ؛ زيد عليه معلومة خرى غدوا و هكذا ( مع المراجعة باش ماتنساوش ) و بهاد الطريقة تتراكم المعلومة هاذيك و تبقى في مخكم 🫐الهدف منها هو تحقيق التحسن المستمر بخطوات صغيرة

⚠️ملاحظة : هاذو هوما التقنيات الأكثر إستعمالا و المفيدة و الفعالة ؛ إعتمدوا كل تقنية على حساب الشي اللي راكم تقراو فيه

و هذا ماكان في حلقة اليوم إن شاء الله ياربي تكونوا إستفدتوا ؛ و بما أنو الدخول الجامعي قرب حبيت نقللكم سنة موفقة لكم جميعا إن شاء الله تطبقوا النصائح اللي مديتهملكم و تجيبوا معدلات ملاح 🌺 و إلى الملتقى إن شاء الله في حلقة جديدة و السلام عليكم و رحمة الله و بركاته

هاكو وردة بمناسبة الدخول الجامعي 🌹

#سلسلة_التفوق_والتوفيق_بين_الباك_والجامعة

🧬 Biology Hub Specialty | ملتقى البيولوجيا 💚

⏳ مابقاش بزاف ونفتحو قروب السبيسياليتي تاعنا

🚨حاليا وفرنا 16 أدمن من مختلف التخصصات، وباقيلنا غير 3 تخصصات ونكملو التغطية ونفتحو القروب على بركة الله 🌿

📚 التخصصات لي مازالو:

🔹 L2 Sciences Agronomiques 🔹 L3 Sciences Agronomiques 🔹 L3 Génétique إذا كنت تقرا في واحد من هاذ التخصصات وحاب تنضم لفريق الأدمنز، مرحبا بيك 💚 📩 لي مهتم يبعثلنا باش نكملو التغطية.

@iyyyyyyoouy

سلام عليكم ورحمة الله وبركاته شكون هما يقرا فزيولوجي انيمال

السلام عليكم عائلة ملتقى البيولوجيا 🌝🌷

توحشتوو المصطلحات البيولوجية🌝؟ تحبو نكملو في السلسلة نتعنا ولا نعاود نديرلكم ريفيزيو خفيفة بشكل كويز سع على المصطلحات اللي حطيتهم قبل ومبعد نكملو مع مصطلحات اخرى 🌱؟