حديثُ الروح

﴿قُل لَّن يُصِيبَنَا إِلَّا مَا كَتَبَ اللَّهُ لَنَا﴾🤍🌿

الآية دي من أقوى وأعظم الآيات اللي قريتها في حياتي، وكل مرة بفتكرها بحس قد إيه هي بتقوّيني وبتطمن قلبي. كل ما تحصل لي مصيبة، أو أمر يضايقني، أو موقف يعكّر مزاجي، بفتكر إن اللي ربنا كاتبهولي عمره ما هيروح لحد غيري، وإن اللي مش مكتوبلي مهما حاولت مش هقدر آخده. يا ريت كلنا يبقى عندنا اليقين ده... نؤمن إن كل حاجة ربنا كاتبها لينا هنوصل لها، حتى لو كانت في آخر الدنيا، وإن محدش يقدر ياخد رزقنا، ولا عمرنا، ولا نجاحنا، ولا نصيبنا.

رزقك، عمرك، نجاحك، فشلك، زواجك، فرحك، حزنك، وكل تفصيلة في حياتك... ربنا عالم بيها وكاتبها بحكمة.

فاطمّن، وسيبها على ربنا. مش كل حاجة بتوجعك معناها إنها شر، ومش كل حاجة بتتأخر معناها إنها مش من نصيبك. يمكن الحاجة اللي شايفها دلوقتي ضدك، تكون هي نفسها الخير اللي ربنا مخبيهولك. اطمّن... اللي ربنا كاتبهولك هيوصلك، واللي مش من نصيبك عمره ما هيكون ليك. وربنا دايمًا أرحم بينا من نفسنا. دمتم بخير وقلوبكم مطمّنة