Тимур Мустафаев

— Кешіріңіз, шынымды айтсам, абьюзер деген сөз не мағына береді өзі?   — Яғни менмен, өзіндікін дұрыс санайтын, өзімшіл адам, — деп тарқатып берді жанымда бірге презентацияны қорғап тұрған Данияр.   — Ымм, яғни содыр мінезді, өктем, шатақ сипаттағы әйелге жолықса ер адам не істеуі керек? Сұрағыңызды дұрыс түсіндім ғой, иә?   — Тап солай, — деп қысқа қайырды психология пәнінің мұғалимасы.   Мен көзімді бір пәс жұмып, ойымды жинақтап алдым, сәлден соң:   — Менімше, егер де ер адам Дулат атамыз өзінің бір кейіпкерінің ауызымен айтқандай: “Мен екінің бірі сияқты ғашық болғым келмейді. Екінің бірі болу деген сөз түптеп келгенде төсекпен біту деген сөз. Ал сен мен үшін одан мың есе биіксің”, — секілді сана биігінде ол әйелді жанжары ретінде таңдаған болса, онда ол көп құрбандықтарға баруға таяр болғаны жөн-ақ. Мінезіне сабыр қылып, оның өзгеруіне шама-шарқынша әсерін тигізуі тиіс! — мен көзімді қысқа уақытқа жұмып-ашып, сөзімді жалғап. — Мәселен, Андре Моруа, белгілі француз жазушысы, өзінің бір кітабында бүй дейді: “Әйелді өз еркінен тыс ұстап тұруға ұмтылмаңыз. Нағыз бақыт — әйелдің тәніне иелік ету емес (иелік ету деген сөз ғашық адамның өктемдігін жақсы жеткізеді), оның сүйіктісіне айналу.” Міне, шешімі осы: ол оның сүйіктісіне айнала алса, сонда әйел де өзінің ұстанымдарынан қайтып, өзгеріп сала беруі ғажап емес. — Ал егер де ол жерде тап ондай биік сезім болмаса, ер адамның көкейінде “келешекте осы кісімен бақытты боламын” деген сурет бұлынғыр болса, онда ең абзалы — ертерек мәселеге нүкте қою керек. — Осы кезде аудиториядағы біраз қыздар көздерінің қиығымен жылт еткізіп, мені бір сүзіп өткен еді. — Иә, мен түсінем, әйел тағдыры нәзік мәселе, қазақта: “қыз тағдыры — қыл үстінде” деген хикметлі сөз бар. Задында ол байқұс өмір бойы бар асылын, қымбатын, пәктігін көкірегінің түбіне сақтайды һәм соны бір адамға сеніп тапсыра салады ғой. Әйткенмен де бағбанның еңбегін бағалай алатын, оның бағын ашатын адамға жолықса — мәре ғой, дегенмен кейде оны тұншықтырып, қажытып жіберетін қасиетсізге де жолығып, бағы қайтып, базары тарқап жатады… — Мен біраз үнсіз қалдым… Аудиторияның төрт көзі менде, ауадағы жеңіл ыңғайсыздықты айқын сезіп тұрмын. Бір күрсініп алып: — Сайып келгенде, бұл мәселе ауыр, соның үшін өгізді де өлтірмей, арбаны да қиратпайтын бір ортақ пәтуәға тоқталуға тырысқанымыз орынды болмақ, — деп сөзімді аяқтадым. 📖 Әлсіздік кітабынан.