شرح ومراجعات الرياضيات للعلامة سعد عبد الموجود

السلام عليكم ورحمة الله وبركاته.. 🌸 يا شباب ثانوية أزهرية.. سيبكم من أي كلام اتقال في لجنة الفيزياء النهاردة، وسيبكم من الامتحان كان طويل ولا قصير، سهل ولا صعب.. اللي حصل حصل، والدرجات خلاص اتكتبت، والخير دايماً في اللي ربنا كاتبه.. ارموا الفيزياء ورا ظهركم تماماً وقفلوا صفحتها. 🛑 إحنا دلوقتي في مرحلة "الفوقان التام".. قدامنا مادة من مواد المجموع اللي بتجبر الخاطر وتلم درجات لو ركزنا فيها.. مادة الصرف يوم الإثنين إن شاء الله. 🎯 المادة ممتعة وكلها مواضع ثابتة، ودي خريطة سريعة كده تلموا بيها الدنيا بالورقة والقلم: 📌 1- همزة الوصل والقطع، والتقاء الهمزات: ركزوا على مواضعهم في الأفعال والأسماء.. والتقاء الهمزتين في كلمة واحدة (امتى يجب الإبدال وامتى يجوز التسهيل).. دي نقطة مضمونة في الامتحان. 📌 2- المواضع الخمسة (قلب أحرف العلة همزة): دي أساس الامتحان وعمود الخيمة.. احفظوا شروطها كويس، وخدوا بالكم من الكلمات الشاذة اللي بتيجي دايماً في أسئلة "علل". 📌 3- المواضع العشرة (قلب الواو ياء) والعكس بتاعها المواضع الأربعة (قلب الياء واو): اعملوا بينهم مقارنة سريعة في ورقة.. واعرفوا شروط كل موضع عشان سؤال الاستخراج والقطع. 📌 4- باب الإبدال (قلب التاء طاء): مع حروف الإطباق (الصاد والضاد والطاء والظاء) لما بتيجي على وزن "افتعل".. وركزوا في الأحكام اللي فيها جواز الإبدال والإدغام. 💡 النصيحة الأهم دلوقتي: الصرف بيحب حل الامتحانات والقطع الكتير.. افتحوا امتحانات السنين اللي فاتت وحلوا على قد ما تقدروا، هتلاقوا الأسئلة والأفكار بتكرر نفسها بالنص. استعينوا بالله، واعملوا اللي عليكم، واقعدوا على الكتاب بهمة وعزيمة.. ربنا سبحانه وتعالى مش بيضيع تعب حد، وبإذن الله تطلعوا من امتحان الصرف مجبوري الخاطر وفرحانين. 💪 شدوا حيلكم يا أبطال، ربنا يوفقكم ويفتح عليكم يا رب! 🤲🥰

طمنوني؟؟؟

قلقان لي؟؟؟؟ امتحان الفيزياء بكرة سهل جداً إن شاء الله تعالى أبشر شد حيلك عشان تقفله ❤️❤️

م.محمود مجدي

صلي ونام شويا كويسين متضيعش وقت العصر كله عشان تصليه حاضر وتنام بعده أو لو راحت عليك نومه صلبه قبل الغروب واجب كتاب ليلة الامتحان الأزهر علي الصفحه هينزل في كل الحجات ال واجب تفتكرها لو مكنتش حليت قبل ارجع حل كتير اوي لو خليت قبل كدا ارجع راجع الأخطاء عشان تفتكر الأخطاء بتاعتك كلها وتأكد عليها وبعد كدا ارجع حل تاني في لايف اخر اليوم ( افضل تسمعيه بتركيز جامد اوي اوي ولو عدي حاجه رجعيها متعديش كلمه مش سمعاها) *الخطة* *الاربعاء*: كتاب ليلة الامتحان تراجع الباب الاول والثاني وتراجع أخطائك فيهم القديمه وتحل عليهم الايف بعد صلاة العشاء بس تسمعه وانت مذاكر وحالل أخطائك علي الأقل . تنام اتنتشر *تصحي الفجر الخميس :* تلم لو فاتك حاجه من الباب الاول والثاني وتذاكر الثالث والرابع نفس الطريقة لحد معاد الايف *السبت :*الفيزياء الحديثه باذن الله نفس النمط *خلال التلت ايام في فيديوهات هتنزل للأفكار الصعبه والمتشابهات والرسومات البيانيه كلها ال وردت وال متوقعه* *الكتب دي كلها تحت 👇*

يا أبطال الأزهر.. شدوا حيلكم، هانت وبانت! الحمد لله إن النحو عدى على خير، والنهاردة خلاص قفلنا صفحته. قدامنا دلوقتي معركة الفيزياء، الامتحان يوم السبت، ومعانا الخميس والجمعة وباقي النهاردة، يعني وقت ذهبي ومثالي للي عاوز يلم ويفنش صح. بشرى سارة جداً ليكم: السنين اللي فاتت كان بيبقى قبل الفيزياء أسبوع كامل، فالواضع بتاع الامتحان كان بياخد راحته ويحط أسئلة فيها لف ودوران. السنة دي، عشان الوقت قصير ومضغوط، الامتحان بنسبة كبيرة جداً هييجي مباشر، واضح، ومن الأسئلة القياسية المشهورة اللي مفيش فيها تعجيز. دي فرصتكم عشان تقفلوا المادة وتجيبوا أعلى درجة! عشان نلم الـ 8 فصول بذكاء ومن غير توتر، هنقسم الشغل لثلاث مراحل: النهاردة (باقي الأربعاء) هيكون معركة الفيزياء الحديثة. الفصول الخامس والسادس والسابع والثامن دي مضمونة، وأسئلتها سريعة وتلم درجات بالهبل. ركزوا على ظاهرة كومتون، والخلية الكهروبصرية، وسلاسل طيف ذرة الهيدروجين (ليمان، بالمر، باشين.. إلخ)، ومقارنات الليزر، والترانزستور والوصلة الثنائية والبوابات المنطقية لأن المسائل بتاعتهم مضمونة 100%. الهدف إنكم تناموا النهاردة ونص المنهج في جيبكم، وهتدخلوا النوم ونفسيتكم مرتاحة جداً. بكره (الخميس) هيكون قلب الفيزياء الكهربية العملاقة، الفصل الثالث (الحث الكهرومغناطيسي) زائد الفصل الرابع (التيار المتردد)، ودول عليهم أكبر وزن نسبي في الدرجات! في الحث ركزوا على قانون فاراداي، وقانون لينز وتحديد الاتجاه وده مهم جداً، والدينامو والمحول والمحرك. وفي التيار المتردد ركزوا على دوائر الرنين ودائرة RLC، وقوانين المعاوقة، لأن المسائل هنا بتكرر بنفس الأفكار. بعده (الجمعة) هيكون اللمسات الأخيرة والتقفيل السريع، الفصل الأول (التيار الكهربي) زائد الفصل الثاني (الفيض المغناطيسي). في الأول ركزوا على قانونا كيرشوف ودي مسألة مضمونة في الامتحان، وتوصيل المقاومات والأفكار المشهورة. وفي الثاني ركزوا على السلك المستقيم، الملف الدائري، الملف الحلزوني، وأجهزة القياس (الأميتر، الفولتميتر، الأوميتر) وركزوا على القوانين المباشرة للأجهزة. وبعد العصر حلوا امتحانات الأزهر بتاعة السنين اللي فاتت (الأعوام السابقة ومطوري الأزهر)؛ لأن الأسئلة بتعيد نفسها بالحرف! ودي نصائح ذهبية لليلة الامتحان: بلاش توتر، الوقت يكفي ويفيض لو بطلتوا قلق وبدأتم فوراً. اكتبوا القوانين في ورقة، كل فصل تخلصوه اكتبوا قوانينه والوحدات في ورقة خارجية سريعة عشان تراجعوها صباح يوم السبت. والنوم ليلة السبت لازم تناموا كويس جداً عشان التركيز في الحسابات والإشارات.

شباب الثانوية الأزهرية، وحوش علمي.. ألف حمد الله على السلامة، والحمد لله إن جبروت التفاضل والتكامل والجبر عدى على خير والامتحان جه حلو ويفتح النفس. انسوا بقى الرياضة تماماً بعبكها وبأرقامها، اللي فات مات، والصفحة دي اتقفلت وبقينا ولاد النهارده. قدامكم فرصة ذهبية يوم الأربعاء، النحو يا رجالة! امتحان بـ 40 درجة مضمونين في جيبكم لو ركزتوا، يعني يرفعوكم في السماء ويعوضوا أي هفوة فاتت. المنهج متقسم وواضح ومحتاج بس دكر يلمه بذكاء: بوابات المضمون (المنادى، الاختصاص، التحذير والإغراء): دي أساليب تلموا منها درجات بالكوم، تكاتها معروفة وسهلة. نصب وجزم المضارع: ركزوا في الأدوات وشروط النصب والجزم، الإعراب والاستخراج هنا بيبقى واضح وصريح. باب العدد: عقبة كل سنة بس لو فهمتوا قواعد التذكير والتأنيث وصياغة على وزن فاعل هتحطوا الامتحان في جيبكم. اضغطوا على نفسكم اليومين دول، مفيش وقت للدلع ولا للخوف، النحو مادة تقفيل ومفيش حاجة بعيدة على تعبكم. شدوا حيلكم، عافروا في الـ 40 درجة دول، وبإذن الله تطلعوا يوم الأربعاء مجبرين الخاطر ورافعين راسنا. همتكم يا أبطال الأزهر!

إخواتي وحبايبي طلاب الثانوية الأزهرية.. ربنا يوفقكم ويجبر بخاطركم. عارف إن امتحان القرآن والحديث النهاردة مكانش سهل على الكل، وفي ناس منكم طالعة زعلانة ومفتقدة الأمل.. بس حابب أقولكم كلمتين من أخ ليكم: اللي حصل حصل، والورقة اتسلمت، ومفيش في إيدنا أي حاجة نغيرها في اللي فات.. اللي في إيدنا بجد هو بكره الأحد عشان نلحق نركز! بلاش تخلي زعل ساعة يضيع منك مجهود شهور، وبلاش تفكير في امتحان عدا يهد طاقتك قبل امتحان لسه مجاش. مجموعك لسه في الملعب، والدرجات اللي راحت -لو راحت- تقدر تعوضها في اللي جاي. قدامكم يوم الإثنين الجاي -اللي هو بعد بكره علطول- معركة جديدة مع الرياضة البحتة (التفاضل والتكامل، والجبر والهندسة الفراغية). اسمعوا نصيحتي: ركزوا مع مراجعات مستر سعد عبد الموجود، وشدوا حيلكم في حل امتحانات آخر ٣ أو ٤ سنين سابقة.. دي أهم حاجة هتعرفكم شكل الأسئلة وتثبت الأفكار في دماغكم. انسوا النهاردة خالص، استعينوا بالله، وابدأوا سموا الله في مراجعة الرياضة من دلوقتي. اعمل اللي عليك واجتهد لآخر لحظة، وسيب الباقي على تدبير ربنا.. ربنا مش بيضيع أجر من أحسن عملاً، وربنا يكرمكم إن شاء الله ويجبر بخاطركم جبر ينسيكم أي تعب. شدوا الحيل يا أبطال، وكلنا ثقة فيكم.. دعواتنا ليكم بالفتح والتيسير! ﴿إِنَّ اللَّهَ لا يُضيعُ أَجرَ المُحسِنينَ﴾.

شباب الثانوية الأزهرية الأبطال، صباح الفل والرضا.. النهاردة أول خطوة في طريق حلمكم، وعارف إن الخوف شغال وضربات القلوب سريعة. خدوا نَفَس عميق كدة، واعرفوا إن كل تعب وسهر الشهور اللي فاتت دي ربنا شايفه ومش هيضيعه. ادخلوا اللجان وقلوبكم مليانة يقين إن ربنا شايل لكم الخير والبركة في كل خطوة. ارمو حمولكم على الله، وخلو ثقتكم في كرمه ملهاش حدود. سمّوا الله أول ما تستلموا الورقة، واقروا الفاتحة بنية الفتح والتيسير. ابدأوا بالأسئلة السهلة اللي عارفينها، دي بتفتح النفس وتطرد الخوف. لو سؤال وقف معاكم سيبوه للآخر، الهدوء هو اللي بيجيب الإجابة. افتكروا دايماً إن التوفيق والرزق بإيد ربنا، مش بإيد ورقة امتحان. أنتم قدها وقدود يا رجالة وبنات الأزهر، وربنا هيفرح قلوبكم ويجبر بخاطركم. توكلوا على الله، وادخلوا بقلب جامد، ودعواتنا معاكم في كل سجدة.

يا رجالة الأزهر، بكرة أول معركة، والشباب اللي بتبعت ومخنوقة ومستنية "الشغف" يرجع.. أحب أقولكم مفيش حاجة اسمها شغف دلوقتي، في حاجة اسمها "طولة بال ونَفَس طويل". الشاطر مش اللي عبقري، الشاطر هو اللي بيفتح كتابه بـ "عافية" وهو مش طايق نفسه بس مستحمل وضابط رجله عشان وراه هدف ويقين في الله. لو حاسس المنهج واسع وفاضل ساعات على اللجنة، متقفلش وتكتئب، اشتغل بذكاء.. ركز على المواضيع التقيلة اللي المدرسين ركزوا عليها في حصص المراجعة، وافتح امتحانات السنين اللي فاتت وحل.. الأفكار بتعيد نفسها والأسئلة بتتكرر. اضمن نص المنهج 100% أحسن ما تدخل اللجنة بمنهج كامل مهزوز. ونصيحة لوجه الله.. فخ "التطبيق" هيدمرك. تروح اللجنة منمتش دقيقة فاكر نفسك بطل؟ إنت كده بتدخل بعقل مشلول والذاكرة متبخرة وتفضل تعيط جوه "أنا عارف المعلومة بس مش فاكرها". ناملك 5 ساعات على الأقل عشان مخك يرتب اللي ذاكرته، غير كده إنت داخل بملف تالف. وبكرة لما تطلع من اللجنة.. المادة اللي تخلص "تموت وتندفن". إوعى تفتح جروب تلجرام ولا فيسبوك وتراجع وتتحسر على درجتين، فتقوم داخل المادة اللي بعدها ونفسيتك مدمرة وتضيع درجات تانية في رجليك. اللي فات بره صلاحياتك خلاص، فكر في اللي جاي. جوه اللجنة بقا.. قاتل على كل ربع درجة. المصحح بشر وبيمر عليه مئات الأوراق، لما يشوف ورقة دش سايح وخط شفرات هيخصم منك وهو مستريح، لكن لما تفرض عليه ورقة منظمة، متقسمة نقط، وفيها محاولة ذكية حتى في الأسئلة الصعبة وكتابة للقوانين أو الأدلة القريبة، إنت كده بتجبره يحترم تعبك ويطلعلك الدرجة من تحت الأرض. إوعى تسيب ورقة بيضا! اقفلوا الموبايلات حالاً، المادة اللي في إيديك دلوقتي هي معركتك الحالية، ادخلوا بقلب ميت، ارموا حمولكم على ربنا، وخليكم على يقين إن رب العزة سبحانه وتعالى عدل ومبيضيعش تعب حد. شدوا الحيل يا أبطال، ربنا يوفقكم بكرة ويسدد خطاكم!