تَذْكِير - مُسْلِمونَ أَقْوِياء

🤍

غدا ١ شعبان بأمر الله.. الشهر اللي يعتبر النقطة الفيصلية لتجهيزك لرمضان.. فيه ثلاثة أنواع من الناس بيتجهزوا في الشهر ده؛ النوع الأول بيحضر قائمة المسلسلات اللي هيشوفها في رمضان ويبدأ يشوف ترشيحات الناس ويتابع بشراهة الأخبار عن كل مسلسل لأنه موسم بقى وكل سنة وأنت طيب. والنوع التاني اللي عايز يدخل الشهر بقلب عامر فيتدرب على الطاعة ويستزيد من الذكر ويحاول يدرب قلبه على الاستحضار.. والنوع الثالث اللي هو زي كل سنة يقول هعمل وهقرب من ربنا وهو لا بيتجهز لشيء ولا حتى قوّم نفسه يعمل حاجة زيادة يصلح بها شيء ما في قلبه وفاكر إنه هيدخل رمضان وهو غير مُجهز وهيتغير التغيير التام! مع إنه كل سنة بيقع في نفس الانتكاسة، لكنه لم يتعلم ولم يبصر ولم يفقه! نجمع الناس دي مع بعض ونحدثهم بشيء من البداهة؛ الابتلاءات حواليك عمالة تنغزك وتقول لك: تُب! أفِق! الاحداث حواليك بتديك دروس مجانية للرجوع إلى طريق الله سبحانه. انتكاستك لن تضر الله شيئا، لكنها حجر يتعثر به غيرك. طيب هل الأمة دي ناقصة تعثر؟ إنت فاكر نفسك عايش سبهللة! هتتحاسب عن كل ثانية بتمر عليك ولم تغتنمها.. كل ابتلاء لم تتعلم منه هيبقى عليك حجة يوم القيامة! ولو إنت فاكر إن اللي بيحصل في مشارق الارض ومغاربها وهو بعيد عنك فأنت كده مطمئن؛ تبقى غلطان! إنت في خضم الابتلاء أصلا؛ إنت واقع عليك شهادة عظيمة جدا، عملت إيه لإخوانك؟ ساعدتهم بإيه؟ أصلحت من نفسك؟ تبت لربك؟ لا يزال في عمرك بقية وأنت واقف محلك سر! والعجب العجاب إن طوابير بتسبقك وإنت مبتحاولش، اتخدرت بالمخدر المؤقت الدنيوي الزائل من شوية الزيف المرئي والمسموع اللي خدوا وقتك وأنسوك ذكر ربك وصلاح حالك. ربنا سبحانه وتعالى حليم بك وأمهلك السنة بعد السنة علشان تلحق مواسم الطاعات وترجع! بل الأكبر من كده إن فيه مصاب جلل على إخوانك وأنت لم تفقه الدرس بعد! لو اللي في صدرك قطعة حجر لتحركت من فورها ورجعت! اغتنموا الأيام والساعات والدقائق! حرك قطعة الحجر اللي في قلبك وادع الله ولا تنفك عن الدعاء.. هي مش بشطارتك أبدا إنك ترجع وتتوب زي ما أنت عايز، بل بهدى الله وتوفيقه على عباده. حاول كده تتضرع لربنا، اصطنع البكاء وأنت لوحدك في خلوتك واستحضر ما اقترفته من ذنوب.. واستغفر ربك وتب إليه.. الدنيا زائلة كما تعلم، وأنت تعلم أنك تعلم، وجريمتك أنك تعلم! لله الأمر من قبل ومن بعد. - إسلام منصور.

قال نبينا صلى الله عليه وسلم: "من قرأ سورة الكهف يوم الجمعة أضاء له من النور ما بين الجمعتين".

#سورة_الكهف_كاملة https://youtu.be/q8vniD-YV_s?si=pOvYBKkBpFiIbHgl

امْنُنْ عَلَيَّ بِتَوْبَةٍ تَمْحُو بِهَا مَاكَانَ مِنِّي في الزَّمانِ الأوَّلِ

فإن صَبَر، استحالت لذةً وكان أجلُّ ما يُعوَّض به = الأُنس باللّٰه