Med space 🩺

ناس قع كملو قراية و داو عطلة و راهم يستمتعو بقيت غير انا و برومو تاعي 😭💔

Hey doctors🤍 W9tach rattrapage ta3kom ? (ARTERIA)

هذامكان 🤍 و اخر حاجة نقولها هي : ماتأذوش بعضاكم ، ما تأذوش الناس .. مانيش نهدر هكا "كضحية" لالا ، بصح صح صح ما تأذوش ، اذا ما نفعتوش انسان ما تضروهش ، كونو مسالمين حدكم حد روحكم ما تدناوش ، راقبو وش يخرج من فمكم .. خمم في الكلمة شحال من مرة قبل ما تهدرها .. كيما يقولو "الكلام كي الرصاص" يفوت يخرج ما يوليش .. اذا ما عجبكش شخص كيفاه يخمم ، شخصيتو ، كلامو .. بعد عليه بلا ما تاذيه .. ماشي لازم قع نتحابو ، الارواح تتنافر و تتجاذب ، كل انسان عندو لي يحبو و لي يكرهو .. كاين حتى ناس ما يحملوكش بلا سبة ، بالاك عندهم امراض في القلب .. دير في حسابك بلي كيما كاين لي يفرحلك لنجاحك كاين لي يتمنى يشوفك مقهور ، و كي يشوفك نجحت يسيي يحبطك .. بصح حنا لازم دايمن نبقاو نشوفو للقدامو نافونصيو ، كش مرة شتو حصان يجري و هو يشوف للور ؟✨ و تفكرو بلي ربي يشوف كلش ، اي كلمة غالطة قلتها في حق شخص ولا ضحكت عليه ولا اذيتو .. يخلصك عليها في الدنيا قبل الاخرة هادي حاجة تخوف .. و ليلة سعيدة للطاهرة قلوبهم ❤️

طبيعتي هي اني شخص ما يحكيش بزاف و ما نحبش نحكي امور صراتلي شخصيا و لا اشياء تتعلق بيا و بحياتي الخاصة ، بصح حبيت صح نحكيلكم هاد الامور باش تاخدو على الاقل شوية عبر من واش حكيت ❤️بداية من استغلال العطلة تع الصيف في حاجة تنفع وصولا الى 'كلام الناس .. إلخ ..

-و في المرة هاديك كي عاودت وليت لسوشل ميديا ، كانو بزاف قراب اختباراتكم ، و خسيت بالمسؤولية تجاهكم ، پاسك تفكرت انا شحال كنت مبحرة في س1 كي كنت رايحة نجوز ، و ماكاش لي يوريلي ، ماكاش لي يمدلي les astuces.. المهم .. ماعاودتش تأثرت بهاداك الكلام تع "فات الاوان " ، قلت معليش انا نمد قع وش عندي ، بالاك كش واحد يستفاد ، il n'est jamais trop tard .. و درت ريلز فيهم شحال من méthode باش تقراو في الايام الاخيرة ، و الاخطاء لي طيحو فيهم في الامتحان و بارطاجيت هنا تاني ملخصاتي معاكم❤️ معلاباليش اذا استعملتوها ولا استفدتو منها ، بسح على الاقل قدمت ما بوسعي و فرحت و انا نقدم في المساعدة لناس انا تان كنت في بلاصتهم محتاجة مساعدة 🤍 .. قلتلكم هادي هي سعادتي .. پاسك نيتي صادقة جدا .. - و كتعويض ، قلت في الس2 ، نكون معاهم كثر و كثر و نبارطاجي ملخصات اكثر و الحمدلله ❤️ شفت بلي كاين بزاف منكم يستاهلو كل خير ✨ و بلي مارانيش ندير هاد الامور في باطل ..

- اختفيت تماما بعدها على السوشل ميديا ، لا انستغرام ، لا صحاب الباك ، لا نتوما ، لا والو .. شغل شتو كي تتاذاو من حاجة و تبعدو عليها قع .. هكاك ..✔️ الناس في سوشل ميديا يعرفو يحكمو عليك غير من زوج كلمات تقولهم .. و يأذيوك ..و اهم شيء يفشلوك .. المهم ، بعدت على قع الناس .. پاسك كرهت الناس ڨع اصلا 🤣 .. وليت قع نشوفهم بنظرة سلبية و بلي مؤذيين .. و ركزت غير مع نفسي و حياتي ، عائلتي و عندي صديقة وحدة 🤍 و ايامي كانت هادئة مطمئنة جدا ..✨ - تصالحت مع كل الامور اللي صراتلي و كان سببها الاشخاص .. ،و ما وليتش نضغط على روحي و نل م روحي بزاف على حاجات مانتحكمش فيهم انا .. 🤍 و اهم شيء ، كلام الناس مارجعتش اصلا نسمعو و مام اذا سمعت (+1-1) ما يزيد ما ينقص .. المهم ندير حاجة نحبها و ترضيني .. - بعدها ، عاودت وليت للسوشل ميديا أقوى من قبل 🤍 بشخصية جديدة ، نظرتي للامور تبدلت بزاف ، شخصيتي تبدلت ، نحس بلي "الأذى" يبدل بزاف الشخصية ، و ماشي بين ليلة ونهار تتبدل شخصيتك ، في الاول تنطوي على نفسك و تنعزل باش تتشافى ، اومبعد تتصالح مع الامور لي صراتلك و تعاود تكتسب القوة ... ❤️ ⬇️⬇️

- كنا في اكتوبر 2021 ، و بدات سنة 2 طب ✔️ دخلنا نقراو وعام جديد .. و راكم علابالكم سيستام ف دوزيام آني يتبدل .. كان لازم نركز شوية اكثر مع قرايتي و محط راسي مليح سوغتو البداية .. تسما انشغلت من اكتوبر لنوفمبر غير بالقراية و هذا كان قرار مني ، باش نعرف كيفاه نقرا و نكتشف سيستام تع القراية من اللول منبقاش مبحرة ، قلت و غير نجوز الامتحان في نوفمبر خلاص نعاود نولي للقناة ✔️ .. جاز الامتحان و حمدلله ريحت هاديك العشية ، و غدوة منداك رحت للافاك كي جيت راجعة بالكوس بديت المونتاج تع ليفيديو لي نكمل نبارطاجيهم في الكوس ... المهم ، اومبعد ، خلال هاداك الاسبوع .. شخص(يقدر يكون ذكر او انثى ماشي كي نقول شخص معنتها ذكر🤣) كانت بيننا صداقة .. سألني عن حال قناتي الجديدة ، قلت بلي خليتها هاد الشهر ما نشرت فيها والو بصح حا نولي خلاص .. ردة فعل الشخص هاداك ..( مانيش حابة نقول هي لي فشلتني ، پاسك هكا نبان انسان ضعيف لدرجة يتأثر بكلام شخص 🤣، بصح المهم هاديك ردة الفعل ... دوك نفهمكم ) دهشتني ، قال : يووو خلاص رانا فنوفمبر قريب ندخلو فديسمبر و ديجا خلاص الس1 هوما كملو و قراو خلاص... + علّق على جودة آخر فيديو لي ماكانتش مليحة ... بووم .. ، شغل معلاباليش كيفاه نفهمكم ، بصح شتو كي تكونو متحمسين لحاجة و تخدمو عليها و تتعبو عليها و هك ، اومبعد يجي شخص تحسوه كيشغل استهزا بمجهودكم و لا بينلكم بلي الشيء لي راكو ديرو فيه "لاداعي له " و غير ماكاله ديرو... ماشي عن طريق نقذ ايجابي ، پاسك اصلا نقد ايجابي يكون باين و بطريقة معينة سوغتو لانسان في بدايته و وسائله بسيطة .. .. قلتلكم مارانيش شخص يتاثر بالكلام لهاديك الدرجة ، بصح في هاداك الموقف بالذات.. بقيت غير نخمم ، سمانة قع و انا نخمم .. و قلت تسما انا راني في باطل ندير هاد الشيء كيشغل .. دخلني هاد التخمام .. و كرهت قع وش كنت ندير ، و قلت كي الجودة ماهيش واو " راني غير نضيع وقتي .. الشي لي راني نديرو ما عندو حتى قيمة عند الناس .. وقريب سوبريميت ليفيدو قريب غلقت لاشان في لحظة غضب 🤷🏻‍♀️ .. بصح ما سوبريميت والو و ما غلقتهاش ، ديكونيكتيت منها برك .. و ما وليتش نحب نهدر عليها ، شتو كي يكرهوكم الناس في حاجة تحبوها ؟ .. !! حابلي ربي راكم تعلمتو درس من تجربتي ❤️ يتبع ⬇️

- الجودة لم تكن ممتازة .. و لم تكن جيدة جدا ، كانت مقبولة فقط ✔️ و هذا طبيعي و عادي جدا ، من جهة ، لأنها اول محاولة و كلش انا نكتشفو و نديرو وحدي ماكاش زعما شخص نشاورو و يوريلي و لا .. و من جهة اخرى ، الوسائل التي استعملها ليست احترافية كيما قلتلكم .. تيليفوني عادي و بسيط ماشي ايفون ، و بعدما نكمل المونطاج مانجي نطلع لافيديو بسيف .. يولي ثقيل .. إلخ + يوتوب ينقص الكاليتي شوية علاجال كونكسيو تع دزاير .. - و هذا لا يعني انني نفشل ، العكس، رغم اني انسان يقسو على نفسه ، و نحاسب روحي و نلوم روحي كي ندير حاجة و ما نخرجليش كيما كنت حابة و كيما توقعتها ، بصح كاين اشباء ما تقدرش تلوم نفسك عليها لانك درت كل ما بوسعك .. و نيتك كانت صادقة جدا .. ماكاش شخص يقدر يفهم نيتك الصادقة ، الناس يعرفو غير يديرو زوج عفايس - اما يضحكو عليك و ينتقدوك - اما يفشلوك و يلوموك .. المهم لا يهم .. - رغم كل شيء ، على الاقل حاولت ، "شرف المحاولة" كيما يقولو ، حاولت ندير حاجة نحبها و تفيد ناس بماكان متوفر انذاك ، ما بقيتش نتذمر و نقول "ايييه لوكان عندي هك و هك لوكان راني درت .." .. و هادي حاجة نفتخر بيها 🤍 پاسك اللي قدر يخدم في اصعب الظروف و بابسط الوسائل ، نهار يتوفرلو ماهو احسن يطير طيارة✨ .. هذا من جانب ✔️ ومن الجانب الاخر ⬇️

- بديت المونطاج و وجدت 7 ليفيديو اللولين خلاص ديجا كانو واجدين✔️ ، فتحت القناة ✔️ ، صممت ال logo ✔️ , اسم القناة ✔️.. - اعلنت في انستغرام تاعي بلي راني فتحت قناة ندير فيها دروس تع ميدسين ✔️ بزاف شجعوني (مع انني لم اكن بحاجة الى التشجيع كي ندير حاجة فراسي و نحب نديرها نديرها يالوكان الناس قع معارضين) بصح التشجيع حاجة اضافية جميلة❤️ - نشرت اول الفيديوات ✔️ و بداو يتفاعلو معاها ..🤍 ، لم اروج لقناتي في اي مكان و لا في اي groupe ، و لم اطلب النشر ولا شيء ، طبيعتي هي اني كي ندير حاجة جامي نطلب مساعدة باش واحد ما يمن عليا مستقبلا ، نحب ندبر راسي وحدي مام لوكان نتمرمد ..(رأي شخصي فقط) .. يتبع ⬇️

- و هذا وش درت ، حبيت ندير طريقتي الخاصة في تقديم الدروس ، پاسك شفتهم تقريبا فيوتوب كيفاه يقدمو الدروس (طلاب الطب) ماكانتش تعجبني الطريقة ، پاسك نحس بلي مفيهاش ابتكار و لا ابداع ، منحبش نجيب الديابو تع الپروف و نبقى نشرح ، نحس كيشغل مادرت والو ، ما أنا لي تعبت على الديابو ما أنا كتبتو ما والو .. المهم (كان رأي شخصي برك) ، تسما قلت نقدم الدروس بملخصاتي پاسك كان المصدر تاعها هو الديابو (تسما موثوق) + منظمة بزاف مليح و بالالوان و سهلة للمراجعة ... ❤️ - خلاص كي حددت الطريقة ، دوكا التصوير كيفاه .. بالبيسي ؟ كي خممت فيها مابانتليش طريقة pratique في البداية ، تسما قلت ندير فيديو بتيليفوني و عادي .. - رحت شريت support للتيليفون باش نصور و خلاص بديت نصور و انا فرحانة و في 5 ايام برك كنت كملت فيلميت شابيتر كومبلي .. ❤️ كنت نستمتع بزاف و ندير فحاجة نحبها و متمكنة منها .. يتبع ⬇️