አዳድስ መዝሙር

እንኳን ለጌታችን እና መድሃኒታችን እየሱስ ክርስቶስ የልደት በዓል በሰላም አደረሳችሁ! መልካም በዓል

💐የእንኳን አደረሳችሁ መልዕክት የተወደዳችሁ የእግዚአብሔር ምርጦች ሆይ እንኳን ለጌታችንና ለመድሃኒታችን ለኢየሱስ ክርስቶስ የልደት መታሰቢያ በዓል በሰላም አደረሳችሁ። ይህ ቀን ዓለማት የተፈጠሩበት ምድር የተመሰረተችበት ሰማያት ፀንተው የቆሙበት ቃል ፀጋን እና እውነትን ተሞልቶ በመካከላችን ያደረበት፣ የማይታየው አምላክ በረቂቅ ጥበቡ የሰውን ስጋና ደም ተካፍሎ ፍፁም ሰው የሆነበት፣ ከብፅዕት ቅድስት ድንግል ማርያም ተወልዶ ሁሉን ቻይነቱን የገለጠበት፣ የመለኮት ሙላት በሰውነት ተገልጦ በግርግም የተኛበት፣ የባህርዩ ምሳሌ የሆነው ወልድ አብ አባቱን የተረከበት፣ በእግዚአብሔር መልክ ሲኖር ሳለ ከእግዚአብሔር ጋር መተካከልን መቀማት እንደሚገባ ነገር ሳይቆጥር በሰው ምሳሌ ተገኝቶ የባሪያን መልክ የያዘበት፣ ፍጥረት ሁሉ ከሀጥያት ደዌና በሽታው እንዲድን መድሃኒት የተገኘበት፣ እንደ አሮን ልጆች ክህነት በበግና በኮርማ ደም ሊፀድቅ ያልቻለውን የሰው ዘር  በገዛ ንፁህ ደሙ ሊያፀድቅ ከሰማይ ሰማያት ዝቅ ብሎ የወረደበት፣ ፍጥረትን ከወደቀበት ርኩሰትና ከታሰረበት የክፉ ሰንሰለት ሊቤዥ የወደደበት፣ ክብሩን ሁሉ ትቶ ስለእኛ በደል መስዋዕት ሊሆን ለመስቀል ሞት እንኳ ሊታዘዝ ፈቅዶ ጌታችን እና መድሃኒታችን ኢየሱስ ክርስቶስ ፍፁሙ አምላክ ፍፁም ሰው የሆነበት ልዩ ቀን ነው! ደስ ይበለን ዛሬ በዳዊት ከተማ መድሃኒት እርሱም ክርስቶስ ጌታ የሆነ ተወልዶልናል! ድንቅ መካር ሀያል አምላክ የሰላም አለቃ የዘላለም አባት የሆነ ወንድ ልጅ ተሰጥቶናል!