📻МАРИЙ ЭЛ РАДИО📻

Йошкар-Оласе тӱссымыктыш галерейыште тазалык дене эмганен вияҥше-влакын илышыштлан пӧлеклалтше фотовыставкым почыныт. Россий фотохудожник ушем инвалид-влакын ушемышт дене пырля 9-ше гана «Без барьеров» конкурсым эртарен. Тушко пурышо паша гыч эн ойыртемалтшыжым ончерыш луктыныт. Фотохудожник-влак шке пашаштышт еҥ-влакын патырлыкыштым, вийыштым, лишыл еҥ-влаклан полыш кидым шуялташ ямде улмыштым ончыктат. Йошкар-Олаште «Без барьеров» фотовыставке 4 июнь гыч 10 июль марте пашам ышта, тидын деч вара выставкым Псков да Сыктывкарыште ончыктат.

Марий Элын вуйлатышыже Юрий Зайцев Российын вице-премьерже Марат Хуснуллин дене транспорт да корно инфрастуктурын вияҥмыже нерген Петербургысо экономике форумышто мутланен. Аэропорт комплексын реконструкцийже, троллейбус-влакым уэмдыме, тидын дене пырля шуко шочшан еш-влаклан ойырымо мланде участкыште инфраструктурым ыштыме, ныл зданийым федерал пого гыч Марий Элын собственностьышкыжо кусарыме нерген ойленыт. Тений Йошкар-Оласе аэропортышто у терминалым ыштен шуктат, тыгодым ончыкыжым взлетно-посадочный полосам тӧрлыман. Тиде йодышым регион вуйлатыше вице-премьер дене нӧлталын. 2030 ий марте троллейбус-влакым уэмдыме программе нергенат ойленыт.

🇷🇺 12 июньышто Российын кечыже палемдалтеш. Тидын лӱмеш Йошкар-Олаште концерт, ончер, ярмиҥга, спорт модмаш-влак эртаралтыт.

Морко районым ыштымылан 100 ий темме лӱмеш М.Н.Янтемир лӱмеш тоштерым тӧрлат. Тачысе кечын объект 33 процентлан ямде. Виктер вуйлатышын алмаштышыже ‒ тӱвыра, печать да калык-влакын пашашт шотышто министр Константин Иванов Морко поселкышко миен да ышталтше паша дене палыме лийын. Тоштерым «Культура» нацпроект дене тӧрлат. Тидлан тӱрлӧ бюджет гыч 11 миллион теҥге ойыралтын. Михаил Янтемир лӱмеш тоштерым 1994 ийыште почыныт, тушто 5 тӱжемат 600 наре экспонат аралалтеш, кажне ийын тоштерышке 5 тӱжем утла уна толеш. Константин Иванов Моркышто районын 100 ияш лӱмгечыжым палемдыме совещанийымат эртарен. Кеҥежым районышто самырык-влакын форумышт лиеш, тидын лӱмеш самырык политике комитет шатерым да организацийым эртараш оборудованийым пӧлекла. Тиде шуматкечын поселкышто «Сӱан пайрем» лиеш, июльышто ‒ Колумб лудмаш.

МОСКВА. ЙОШКАР ПЛОЩАДЬ. 6-9 июньышто Йошкар Плошадьыште книга фестиваль эртаралтеш. Тыште тӱрлӧ калыкын да регионын савыктыш пашашт да сылнымутышт дене палыме лияш йӧн уло.

Александр Пушкинын шочмыжлан ‒ 225 ий. Уста поэтым шарныме мероприятий Марий Элыштат эрта. Йошкар-Олаште С.Г.Чавайн лӱмеш книгагудышто кастене «И снова с Пушкиным свидание…» сылнымут кас лиеш. Тушто уста поэт, прозаикын произведенийжым лудыт. Александр Пушкин да Евгений Онегинын скульптур композицийышт воктене пайрем мероприятийым самырык-влак эртарат. Йошкар-Олаште Пушкинлан памятник уло, тыгак тудын лӱмжым уремлан, гимназийлан пуымо. Пушкинын произведенийжым марий йылмашкат ятыр поэт, писатель кусарен. Ты радамыште ‒ Шабрад Осып, Сергей Чавайн, Ким Васин, Миклай Казаков, Анатолий Тимиркаев, Василий Регеж-Горохов, Альбертина Иванова, Зоя Дудина, Светлана Григорьева да молымат палемдаш лиеш.

МОСКВА. ВДНХ. Тиде кечылаште С.Г. ЧАВАЙН лӱмеш калыкле книгагудын программыже моткоч поян лийын. Тӱрлӧ мастар-класс, викторине, кундемна дене палдарымаш изижымат-кугужымат пырля чумырен.

6 июнь ‒ Александр Сергеевич Пушкинын кечыже. Тений тудын шочмыжлан – 225 ий. Тиде кечылан пӧлеклалтше кугу мероприятий Чарла Кремльыште эрта.

6 гыч 9 июнь марте Москваште марий кундемыште савыктыме книгам ончыктат. Российын рӱдӧ олаштыже «Красная площадь» тӱнямбал фестиваль лиеш. Ик верыште Россий да йот элла гыч 400 утла издательстве-влак чумыргат. Уна-влак поэт, писатель дене вашлийыт, лекций, книга презентацийым эртарат. Марий книга савыктыш руш, олык да курыкмарий йылме дене 70 утла книгам наҥгая. Тиде ‒ историй, марий йомак, прозо, поэзий, шанче литератур. 9 июньышто Владимир Кудрявцевын да Анжелика Павлован «Искусство марийской вышивки» да Геннадий Оярын «Припадаю к истокам» книга-влакын презентацийышт лийыт.