خواطر د/حازم عبدالتواب

يا بخت اللي عنده حد واقف في ضهره وبيقولّه دايمًا انت كويس #خواطر_قد_تصل

ما تحاربش تظهر كويس قدام الناس اللي عايز يشوفك وِحش مفيش حاجة هتقنعه #خواطر_قد_تصل

من اكتر الايام اللي مقدرتش أنساها من وأنا طالب لحد النهارده يوم امتحان الفارما نظري في سنة تالتة .. اكتر حاجة مش بحبها هي الحفظ .. مكنتش بحب المادة دي خالص وكل ما احفظ فيها حاجة انساها زي ما تحط شوية ميّة على سطح أملس فمش هيتبقى ميّة خالص. خرجت من الامتحان وانا في اشد الحزن والاكتئاب وما صدّقت دخلت البيت غسلت وشّي من تعب الطريق ودخلت صليت وقعدت ابكي وانا ساجد.. يا رب انت عالم اني عايز اجيب درجات كويسة عشان اكمّل الحلم بتاعي وابقى دكتور في الكلية دي. فضلت ساجد لفترة طويلة لدرجة اني نسيت السجدة الاولى دي ولا التانية وأي ركعة لكن عزائي ان ربنا هوا اللي كنت بصلّي له. تعدي باقي الامتحانات وانا في دماغي امتحان المادة دي اللي الشفوي بتاعها مكانش احلى من النظري ولما ظهرت النتيجة كانت واخدة في وشها كمية درجات كتيرة لكن كنت استودعت الدرجات دي كلها عند ربنا عشان يعوضني في حاجة تانية وقت تاني بحكمته. مكانتش المادة الوحيدة اللي قهرتني قبلها كان البيوكيمستري وبعدها النسا اللي كنت بحلم اتخصص فيها وما حصلش الحمد لله. بعد سنين من الامتحان دا وغيره ومع استمرار السعي وعدم اليأس والحرب عشان مكان ووظيفة بحلم بيها ربنا سبحانه منَّ عليّ من فضله وخلاني واحد من دكاترة الكلية اللي بيحاولوا يفهموا الطلاب في كل مكان وكل كلية وكل جامعة دلوقت رسالة معينة قد تصل: الحلم مشروع وممكن وبعيدًا عن خسارة كام معركة سواء خسارة صغيرة او كبيرة الا ان الحلم ممكن، وممكن كمان توصل للي انت عايزه فبلاش احباط رغم الخساير اللي بتعدي عليك وروح اغسل وشك وصلّي وادعي ربنا وطوّل في الدعاء. #خواطر_قد_تصل

"لِكَيْلا تأسَوْا على ما فاتكم، ولا تفرحوا بما آتاكم" مش كل اللي فاتك كان يستاهل الحزن ومش كل اللي جالك كان يستاهل الفرح ما كتبه الله لك في علم غيبه نافذٌ فيك رغم أنفِك واعْلَم يا صديقي أنه الخير لك هو فقط الخير لك #خواطر_قد_تصل

تشاء أنت النجوم ويشاء الله لك السماء كلّها لكنك تتعجّل #خواطر_قد_تصل

خليني أعلّمك درس في معنى ان الدنيا بتلفّ فبلاش تحط نفسك في مكان أعلى من اللي تستحقه: أنا بحب طلابي جدًا .. حب فرض عين مش كفاية.. يعني مش بحب واحد وأكره او محبش واحد تاني. الوحيد اللي ببتعد عنه هو صاحب اللسان -وركّز في دي- صاحب اللسان الفج الذي لا يفرّق بين الرأي الآخر وبين النقد غير المهذّب. عشان كده بعمل حساب بُكره جدًا.. عارف ان في يوم من الايام طالب هيبقى زميل وزميل ممكن أتعلم منه كمان. دفعة من الدفعات اللي درستلهم زمان واتعلقت بيهم كمان بقى منهم زميل دورت عليه بنفسي واخترته يبقى مشرف معايا في رسالة لحد تاني صغير بدوره في يوم جاي هيبقى كبير. سيبك من اللي يقولك ان العلم ما بيجيبش فلوس او راحة لأن العلم بيجيب أثر والأثر باقي لا يزول والأثر دا عند ربنا أحسن من قِرش لا يُستغل في حق بل يُدفع في باطل. #خواطر_قد_تصل

عارف يعني إيه تبقى الدنيا مقفّلة في وشك بس انت بتقول إنّي عبد الله ولن يضيّعني #خواطر_قد_تصل

١- لا تهتم لرأي الناس فيك طالما قلبك بخير. ٢- معنى قلبك بخير انك لا تتمنى لأحدٍ اي سوء. ٣- طالما قلبك بخير لا تقلق من تأخر حصاد عملك. ٤- الناس تفكيرهم سلبي بس انت خليك ايجابي. ٥- لو كل واحد اقتنع لوحده الكل هيبقوا ايجابيين. ٦- المشكلة في العلاقات الانسانية التخوين. ٧- حرّص ولا تخوّن. ٨- لو حد خانك ما تحكمش عالكل بالخيانة. ٩- في قلوب نضيفة كتير بس خايفة. ١٠- لا تهتم لرأي الناس فيك طالما قلبك نضيف. #خواطر_قد_تصل د حازم محمد عبدالتواب

كل ما في حياتك خُلِقَ لنفعك حتى الابتلاء يمرُّ بك لتتذكر ما كنت فيه من نعمة وتنتظر من الله الفرج. أبشِر د حازم محمد عبدالتواب

ليلة الامتحان قل اللهم علّمني ما نسيت وانفعني بما علمتني ولا تحرمني منه وقت حاجتي اليه وانت طالع لجنة الامتحان قل اللهم يسّر لي أمري واشرح لي صدري وانت بتستلم ورقة الاجابة قل اللهم اجعل ما اكتبه في هذه الورقة كاملًا غير منقوص وانت بتستلم ورقة الأسئلة قل اللهم لا سهل الا ما جعلته سهلا وبقدرتك وحدك تجعل الصعب سهلا وانت بتحاول تفتكر اجابة سؤال قل اللهم ردّ لي ما تعلمته وما فهمته وما حفظته وانت بتسلّم ورقة الاجابة قل اللهم افتح بيني وبينهم بالحق وأنت خير الفاتحين عوّد نفسك تطلب من ربنا وربنا لا يرد من يطلبه. اطلب من الله المستحيل فما يعجزك لا يعجز الله. #خواطر_قد_تصل