Аъзамхўжаев

“Миллатинг тараққийси учун ёзолмаслик — бу қандайин жазо! Бундай шароитда Ўзбекистонда ҳаёт йўқ”, — Чўлпон, 1928 йил.

Ғалаба боғида Мустақиллик йилларида Ватан ҳимояси ва эл-юрт тинчлиги йўлида ҳалок бўлганлар хотирасига бағишланган мажмуа ташкил этиларкан. Бу яхши ғоя. Ғалаба паркининг ўзи, ҳаммаёғига коммунистларнинг ўроқ-болғали рамзи қўйиб чиқилгани, Иккинчи Жаҳон уруши мавзуси фақат 1941 йил 22 июндан 1945 йил 9 майгача бўлган уруш билан чекланиб қолгани (ваҳоланки, Ўзбекистон ва ўзбекистонликлар Иккинчи жаҳон урушига 1939 йил сентябрдаёқ тортилиб, 1945 йил сентябргача унда қатнашган) - ёмон ғоя, лекин Мустақиллик йилларида фожиали ҳалок бўлган ходимлар хотирасини абадийлаштириш - яхши ғоя. Лекин барибир бир "лекини" бор-да - шу, исмлар ёзиладиган лавҳалар беш эмас, саккиз қиррали юлдуз кўринишида қилинса, мақсадга кўпроқ мувофиқ бўларди.

ЙПХ дрони. Автотеррористлар энди бир дунё антирадару антикамераларининг ёнига антидронларни ҳам қўшиб мошина ҳайдаса керак (#)

Манба.

Молдова президенти Майя Сандунинг интервьюсидан охирги парча (аслида эътиборга молик иқтибослар анча кўп, лекин меъёр ҳам яхши). 2022 йили Молдовада газ инқирози бўлган экан. Санду айтяптики, “Газпром” “Молдовагаз” биздан 700 (етти юз) млн доллар қарз, шу қарзни Молдова ҳукумати ўз зиммасига олиб, тўламаса, биз бошқа газ бермаймиз, деб шарт қўйган. Сандунинг маъмурияти халқаро аудиторларни жалб қилиб, “Газпром” келтирган ҳисоб бўйича қарздорликни ҳисоблаб чиқса, қарз “Газпром” айтганидек 700 млн эмас, атиги 8 (саккиз) млн доллар бўлиб чиққан. Ҳозир Молдова газни Европа бозоридан сотиб олаётган экан. Сандунинг интервьюсидаги бу парча нимаси билан эътиборга молик? Шуниси биланки, биринчидан, бу сценарий 2019 йили “Лукойл”га 600 млн доллар қарз бўлиб қолганимизга ўхшаркан, иккинчидан, Россия компанияси халқаро аудиторларни жалб этмаслигимизни билиб, бизни чув туширган бўлса керак. Тағинам ким билсин.

Молдова президенти қуруқ ойлик маошга яшаркан. Маоши 1000 евродан кам экан. Президент бўлишидан аввал Жаҳон банкида ишлаган экан, у ерда ойлиги "жуда катта" - 10 минг доллар бўлган экан, ўша ерда ишлаб, топиб, йиққан пулига сайловолди кампаниясини ўтказибди экан.

Миш-мишларга қараганда, Синтез студияси тайёрлаган мана шу вариант (видеоси) Янги Тошкент учун бренд сифатида танлаб бўлинганмиш (шу, тепадаги Маъно Брендингнинг 2-вариантига ўхшаркан), балки бирор жойда бу ҳақда айтилгандир ҳам. Энди, бу ерда ёзилган таърифлар сал ғалатироғу (нима, эски Тошкент маданиятсиз, ривожланмаган, хунукми, десанг-да), лекин логонинг ўзи манга ёқди.

Маъно Брендинг Янги Тошкент учун бренд ишлаб чиқибди. Буюртма 2022 йил декабрида берилган экан. Студия беш хил вариант тайёрлаган экан. Охири нима бўлганини билмадиму, лекин менга қуйидаги иккинчиси ёқди.

Бу Дудь қурғурнинг видеосидаги реклама ҳам ёқди. Айтяптики, 15 йил аввал Россия постсовет минтақасида машҳур бўлса-да, унча ёқимли бўлмаган Молдова виноси импортини тақиқлаган экан. Кейин нима бўлибди, денг. Молдова вино саноати ўлмабди, аксинча, Европа бозори учун ишлай бошлабди. Европа бозорига кириш учун унинг сифат талабларига мослашиш керак. Ўтган 15 йил ичида Молдова виноси шунчалик яхши бўлибдики, энди Европа винолари билан рақобат қилаётган экан. Қиссадан ҳисса: Россиянинг чекловлари, тақиқлари – унинг орбитасидаги мамлакатлар учун фақат фойда, Россиядан узилиш, одамга ўхшаб ишлаш ва бойиш, сўнг хотиржам яшаш учун яхши бир имкон. PS. Вино ҳақида шунча гап бўлгани билан, Юрий винони реклама қилмаган лекин шу жойида :)

Молдова президенти ҳозир ҳам президент бўлишидан анча аввал сотиб олган икки хонали квартирасида яшаркан. “Сиздан тепада ҳам, пастда ҳам одам яшайди, шундайми?”, деса, “Ҳа”, дейди. “Яъни, хоҳласа президентнинг устидан сув тошириб юбориши ҳам мумкин?”, деса, яна “Ҳа” дейди, бир марта сув тошириб ҳам юборишибди. Айнан президент бўлганидан кейин. Ғаройиб.