GSS Grade 6

🗓  ማክሰኞ፣ሰኔ 30 ፣ 2018 ዓ.ም ውድ የቦሌ 24 ቅርንጫፍ ወላጆች፣ የጊብሰን ትምህርት ቤቶች ስርዓት በትምህርት ዘርፍ ከሚገኙ መሪ ትምህርት ቤቶች አንዱ ሲሆን በትምህርት ጥራት ብቻ ሳይሆን ለሥነ-ምግባር በሚሰጠው ትኩረትም ይታወቃል። አገራችን የተማሩና ኃላፊነት የሚሰማቸው ዜጎችን ለማፍራት በምታደርገው ጥረት ውስጥ የበኩላችንን አስተዋጽኦ በማበርከታችን ኩራት ይሰማናል ። አገልግሎታችንን ለብዙ ታዳጊ ልጆች ለማዳረስም የተለያዩ ቅርንጫፎችን ከፍተናል፤ ከእነዚህም አንዱ የቦሌ 24 ቅርንጫፍ ነው። የቦሌ 24 ቅርንጫፍ በ2009 ዓ.ም. ተከፍቶ ላለፉት 10 ዓመታት ማኅበረሰቡን በማገልገል ላይ ቆይቷል። ይሁን እንጂ የኪራይ ውላችን ጊዜ በማብቃቱ ምክንያት በአሁኑ ግቢ አገልግሎታችንን መቀጠል የማንችልበት ሁኔታ ተፈጥሯል። ጉዳዩን ለተከበራችሁ ወላጆች በግልጽ ለማስረዳት ያህል ከኪራይ ውሉ ማብቂያ በኋላ የንብረቱ ባለቤቶች ለአዲስ ውል የኪራይ ዋጋውን በ300 % እንዲጨምር ጠይቀዋል። ይህን የተጋነነ ዋጋ በውይይትና በድርድር ለመፍታት የቻልነውን ጥረት ብናደርግም ስምምነት ላይ መድረስ ግን አልተቻለም። በመቀጠልም የንብረቱ ባለቤቶች ንብረቱን በጨረታ አቅርበው የነበረ ሲሆን እኛም በሂደቱ ተሳትፈናል። መጀመሪያ ጨረታውን ያሸነፈው ተወዳዳሪ ከጨረታው ራሱን አግልሏል። ትምህርት ቤታችንም በሁለተኛ ደረጃ ስለነበር የኪራዩን መብት የመረከብ ዕድል እንደሚሰጠን ተስፋ አድርገን ነበር። ሆኖም ባለቤቶቹ ከአሁን የትምህርት ክፍያችን ጋር የማይጣጣሙ እና የበለጠ ጥብቅ መስፈርቶችን በማካተት ሌላ አዲስ ጨረታ ለማውጣት ወስነዋል። ውድ ወላጆች፣ ግንቦት 30፣ 2018 ዓ.ም  በተካሄደው ጠቅላላ ስብሰባ ቃል እንደገባንላችሁ ሌላ አማራጭ ግቢ ለማግኘት ሰፊ ጥረት አድርገናል። እንዳለመታደል ሆኖ ከነበረን አጭር ጊዜ አንጻር ለመጪው የትምህርት ዘመን ለመማር ማስተማር ስራ አመቺ የሆነ እና የትምህርትና ስልጠና ጥራት ቁጥጥር ባለስልጣን መስሪያ ቤት መስፈርትን የሚያሟላ ግቢ ማግኘት ግን አስቸጋሪ ሆኖብናል። አዲሱ የትምህርት ዓመት ከመጀመሩ በፊት ያለውን ውስን ጊዜ ከግምት ውስጥ በማስገባት ፍለጋውን ያለገደብ በመቀጠል ወላጆችን በልጆቻቸው ትምህርት ዝግጅት ላይ በጥርጣሬ ውስጥ ማቆየት ተገቢ አይደለም ብለን እናምናለን። ስለዚህ፣ ለተማሪዎቻችንና ለወላጆቻችን ያለንን ቁርጠኝነት እየጠበቅን፣ ፍላጎት ያላቸውን ተማሪዎች በቅርብ በሚገኙ የጊብሰን ትምህርት ቤት ቅርንጫፎች፣ ማለትም በሲ ኤም ሲ፣ ላፍቶ፣ መካኒሳ፣ ሳርቤት እና ኮልፌ ካምፓሶች ውስጥ ባለው ክፍት ቦታ ብቻ  ለማስተናገድ ጥረት እናደርጋለን። ልጆቻችሁን ከላይ ወደተጠቀሱት ቅርንጫፍ ትምህርት ቤቶች ላይ ለማዘዋወር ፍላጎት ያላቹ ወላጆች እስከ ሐምሌ 8፣ ቀን 2018 ዓ.ም ድረስ ብቻ  ወደ ማዕከላዊ ቢሮ በመምጣት ማመልከት ትችላላችሁ ። ልጆቻቸውን ሌላ ት/ቤት ለማስመዝገብ ለሚፈልጉ ወላጆች በሙሉ አስፈላጊ የሆኑ የትምህርት ማስረጃዎችን አዘጋጅተን የምንጠብቃችሁ ሲሆን ከቅርንጫፍ ት/ቤቱ አስተዳደር እና ማዕከላዊ ቢሮ በመምጣት መወሰድ የምትችሉ መሆኑን ለማስታወስ እንወዳለን። በመጨረሻም ላሳያችሁን መረዳት፣ ትዕግሥት እና በጊብሰን ትምህርት ቤቶች ስርዓት ላይ ለጣላችሁት ቀጣይ እምነት ከልብ እናመሰግናለን። በዚህ የሽግግር ወቅትም ለተማሪዎቻችን ጥራት ያለው ትምህርትና ሙሉ ድጋፍ ለመስጠት ያለን ቁርጠኝነት እንደቀጠለ ይቆያል። ከአክብሮት ሰላምታ ጋር፣ የጊብሰን ትምህርት ቤቶች ስርዓት