የዲያቆን አቤንኤዘር ተክሉ ገጽ

ዋልድባ ምኑ ነው መንፈሳዊነቱ?! እነእሸቱ መለሰ የሠሩትን የዋልድባን ገዳም ጉዳይ ተመለከትኹ። ልቤ እጅግ በጣም ነው ያዘነው። በገዳሙ ያሉ እህቶች ስለ ገዳሙ የሚናገሩት ኹሉ ከልብ አሳዛኝ ነው። ከንግግሮቻቸው መካከል ለአብነት እኒህን ወስጃለኹ። " ... ዋልድባ ፈውስ አገኝበታለኹ ተብሎ የሚመጣበት ቦታ አይደለም። ደዌ ተቀብዬ መከራ ተቀብዬ ክብር አገኝበታለኹ የሚባልበት ቦታ ነው። ..." "... የሚመጡ እናቶች የሞት ቦታ ነው ብለው ሰሌን ይዘው ይመጣሉ። ... በተለይ ሰው በክረምት በብዛት ይሞታል። ... እኛ በዚህ የሰው ሞት አያስለቅሰንም የዋልድባን አፈር ካገኘ ብለን ደስ ይለናል እንጂ ዕድለኛም ነው። ..." " ...የዋልድባ ቋርፍ መንፈስ ቅዱስ ያሳድራል፤ የመንፈስ ቅዱስ ማደሪያ ያደርጋል። ከዓለም የተለየ ምግብ ነውና። ... የነፍስም መድኃኒት ነውና ..." "በዋልድባ 44 ዓይነት በሽታ አለ። ከ44ቱ በአንዱ የሞተ ክብር አለው። ለዚህም ነው እንሙት እንታመም ፤ አንታከምም የሚሉ አሉ። ጸጋ ስለኾነ። ..." ይህ እንግዲህ በዚያው በገዳሙ የሚኖሩ መነኮሳዪያት እህቶች የተናገሩት ነው። ሰው ጽድቅን አገኛለኹ ብሎ በዚህ ልክ መንከራተቱና የክርስቶስን ጽድቅ ነቅፎ የራሱን ጽድቅ ለማቆም በዚህ ልክ ዋጋ መክፈሉ ከልብ ያሳዝናል። ገዳሙን በጣም መንፈሳዊ ለማድረግ "የመሠረተው ኢየሱስ ክርስቶስ ነው" ይላሉ። ጌታችን ኢየሱስ እንዲህ ያለ መከራና ሰቆቃ በሰዎች ላይ እንዲደርስ አይፈቅድምና፣ ይህ ፍጹም ሐሰትና ፈጽሞ ከእውነት የራቀ ነው። እንዲያውም ጌታችን ኢየሱስ፣ "እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ። ቀንበሬን በላያችሁ ተሸከሙ ከእኔም ተማሩ፥ እኔ የዋህ በልቤም ትሑት ነኝና፥ ለነፍሳችሁም ዕረፍት ታገኛላችሁ፤ ቀንበሬ ልዝብ ሸክሜም ቀሊል ነውና።" (ማቴ. 11፥28-30) አለ እንጂ የጭንቅና የጣር፤ የደዌና የሞትን መንገድ እንድንከተል አላስተማረንም። ርሱ ለደካሞችና ለሕሙማን የሚራራ መሃሪ ነውና! እና እንዴት በዚህ ልክ በሽታና ሞት፤ ስቅየትና ጣዕር ክብር ነው ተብሎ ይነገራል?! ይህ በየትኛው የክርስትና አስተምኅሮ የተደገፈ ነው? ክርስትና፣ በገዛ ጥበብና በሰው ሥርዓት የሚደረጉትን ተግባራት የሚጠየፍና በተለይም " ...እነዚህ ነገሮች በገዛ ራስ ላይ ከሚፈጥሩት የአምልኮ ስሜት፣ ከዐጕል ትሕትናና ሰውነትን ከመጨቈን አንጻር በርግጥ ጥበብ ያለባቸው ይመስላሉ፤ ነገር ግን የሥጋን ልቅነት ለመቈጣጠር አንዳች ፋይዳ የላቸውም።" (ቆላ. 2፥24) በማለት ሰዋዊ የጽድቅ መንገዶች ዕርባና ቢስ መኾናቸውን የሚያስተምር የጽድቅ እምነት ነው። ጽድቅ ክርስቶስ በመስቀል ላይ በከፈለው ሥራ ለኀጢአተኛው ዓለም ፈጽሞ ተከፍሎአል፤ ተደምድሞአልም። ከሰው የሚጠበቀው በዚህ በተሠራው የጽድቅ ሥራ ማመንና መጽናት ነው፤ በዚህም የዘላለም ሕይወት አለ። መጽሐፍ፣ "ሰው በኢየሱስ ክርስቶስ በማመን እንዲጸድቅ እንጂ በሕግ ሥራ እንዳይሆን አውቀን፥ ሥጋን የለበሰ ሁሉ በሕግ ሥራ ስለማይጸድቅ፥ እኛ ራሳችን በሕግ ሥራ ሳይሆን በክርስቶስ እምነት እንጸድቅ ዘንድ በክርስቶስ ኢየሱስ አምነናል።" (ገላ. 2፥16) ይላል። ሰዎች እንዲጸድቁና እንዲድኑ፤ የነፍስ መድኃኒትም ይኾናቸው ዘንድ እነሆ ክርስቶስ ለሰው ልጆች ኹሉ ሞቶአል። በዋልድባና በሌሎችም አያሌ ገዳማት ከዚህ ተቃራኒ የኾነ ትምህርትና ልምምድ አለ። ተሐድሶ ስንል ይኸንኑ መራራ ይነቀልና፣ የክርስቶስ አማናዊ ጽድቅ በሰዎች ኹሉ ልብ ይናኝ ዘንድ ነው።