Data

في مرحلة حفظي للقرآن حفظت مع شيوخ كتير، جزاهم الله خيرًا، لكن مش هتكلم غير عن آخر شيخ حفظت معاه، وهو الشيخ اللي كملت معاه لحد ما ختمت القرآن وأخدت بعدها إجازات في أكثر من رواية بفضل الله. لما بدأت حفظ مع الشيخ كنت في سورة الحِجر، ووقتها كان هو في"سنة تالتة كلية هندسة قسم ميكانيكا باور"، وكنا حوالي عشرة بنحفظ عنده، بنسمّع إما بعد الفجر أو بين المغرب والعشا. ومع أن قسم ميكانيكا باور من أصعب الأقسام في كلية هندسة، ده مامنعوش أنه يحفّظنا .. والصدمة الكبيرة اللي هتعرفها أنه كان بيذاكر -حرفيًا بدون مبالغة- في اليوم من 10 لـ 14 ساعة .. أيوة زي ما قرأت. وطبعًا مش محتاج أقولك أنه كان كل سنة بيكون الأول على القسم، والفرق بينه وبين التاني على الدفعة في المجموع التراكمي حوالي 500 درجة .. أيوة زي ما قرأت بردو. طبعًا بردو مش محتاج أقولك أنه اتخرّج بترتيب الأول على الدفعة وحاليًا هو معيد في الجامعة وبيحضّر "الماجستير" اللي الناس بتسيب حفظ القرآن وفاكرة أنها هتجيبه. وسبحان الله والله، ربنا كان ميسرله أمور حياته كلها حرفيًا، وكان دايمًا يقولّي: "الخير اللي أنا فيه ده كله بسبب القرآن بس، مش باجتهادي أبدًا ولا بشطارتي." فأنا جاي أقولك أنك مهما هتذاكر مش هتذاكر زيه، ومهما هتهتم بدراستك مش هتهتم بيها زيه، ومهما هتحافظ على وقتك مش هتحافظ عليه زيه، وده مش إطراء له أبدًا بس دي الحقيقة فعلًا اللي احنا عارفينها بس بنتغافل عنها. أنت عارف وكلنا عارفين كام ساعة كل يوم بتضيع على السوشيال ميديا وكله في اللاشيء حرفيًا، وكام ساعة بتضيع في حجوزات الكورة، وكام ساعة بتضيع في الفُرجة على ماتشات الكورة وكام ساعة بتضيع ع الأفلام والمسلسلات، وكام ساعة بتضيع في الخروجات مع أصحابك والقعدة على القهاوي.. ف لو أنت بتحفظ قرآن وبتفكر تسيب الحفظ عشان الدراسة، فأنت حرفيًا بتضيّع البركة اللي بتكون في يومك. كان شيخ الإسلام ابن تيمية بيقول: "نسيان القرآن من الذنوب"، وعند الشافعية نسيان القرآن يُعدّ من الكبائر! أما لو أنت مش بتحفظ قرآن، فأنصحك تبدأ تحفظ -خذ من وقتك اللي بيضيع أغلبه ولو نص ساعة- مع شيخ قريب منك، وصدقني هتلاقي البركة والخير كله في حياتك. _ أ.أسامة أيمن.