АВТОКРАТИЯ КЕТСИН!

Унутдингми оғриқларинг, ситамларинг, Боболаринг қул қилганни оқлаябсан. Наҳот яна қўмсаб, эски аламларинг, Момоларинг тул қилганни оқлаябсан. Тилинга ҳам дининга ҳам бериб зарба, Зиёли-ю, ойдинларинг қирган, тавба, Пайҳон қилиб боғларингни, боғингни, ҳа, Ғунчаларинг "гул" қилганни оқлаябсан. Бўлмас дерлар вахшийлардан меҳр кутиб, Босқинчилар босар, шайтон йўлин тутиб, Тарих гувоҳ мадрасангни ўққа тутиб, Ватанингни кул қилганни оқлаябсан. Қодирий-у, Чўлпонингни отган ҳам у, Зулукдайин қон-қонингни тотган ҳам у, Бир ватанни бешга бўлиб сотган ҳам у, Номусингни пул қилганни оқлаябсан. Йетар энди манқуртлик ҳам, ўзинга қайт, Боболаринг қул қилганни оқламагин, Ўтмишга боқ, фикр қилгин, сўзингни айт, Момоларинг тул қилганни оқламагин. Ватанингни кул қилганни оқламагин. 2022/04/15. Bahodir Iskandarov. Каналга уланиш👇 @centerasiastudy

​​МАН ЭРИШОЛМАСАМ МУҲАББАТИНГГА. Менга раҳминг келиб Олампаноҳим, Уммат қилиб қўйдинг Муҳаммадингга. Бир куни дўзаҳдан чиқадир оҳим, Ман эришолмасам муҳаббатингга. Сенга мудом қилдим ёз, куз, қиш баҳор. Сажжодада туриб севгимни изҳор. Ва лекин дунёга келибман бекор, Ман эришолмасам муҳаббатингга. Исминг шивирламоқ тилга малолмас, Қулингман иблисга кўнглим қаролмас Жаннатнинг ифори менга ҳалолмас, Ман эришолмасам муҳаббатингга. Гарчи мен Шаънингга бўҳтонлар тўқиб, Тарқатганим йўқдир Ўзингдан қўрқиб. Наҳотки бир умр Мактубинг ўқиб, Ман эришолмасам муҳаббатингга? Оёғим остига гуллар қилар жам, Наво қилар бўлсам арабу ажам. Олқишларни нетай Эй Улуғ Ҳожам, Ман эришолмасам муҳаббатингга. Чин ошиқ зотига мутлоқ мувофиқ, Яшаб ўтар экан топганлар тавфиқ. Демак каминадир тоза мунофиқ, Ман эришолмасам муҳаббатингга. Не фойда етмиш йил яшамоғимдан, Жанонлар бўлганин қарамоғимда. Армон бўғажакдир шул томоғимдан, Ман эришолмасам муҳаббатингга. Ҳеч қабул бўлмаса намоз, закотим, Гурзидан егайман ўлган заҳотим. Ўзингдан Ўзгаси бўлмас Нажотим, Ман эришолмасам муҳаббатингга. Умрим тугамади берганим йўқ жон, Томир дарёсида сузмоқдадир қон. Билдим тавбамни Сен қабул қилган он, Ман эришгайдирман муҳаббатингга. @A_meshayan 22:23-28.10.2022 Абдураҳмон Мешаян

Ўзбек тили байрами эмиш Эй, ўзимиз каби бечора, ўзимиз каби ғариб она тилимиз....Сенинг нимангни байрам қилишар экан, ҳеч тушунмадим. Номигагина, йилда бир марта марҳумларни эслагандек эслашади сени. Ҳолбуки, сен марҳум эмассан, чалажонсан. Чалажон эса кучсиз бўлади, балки кучли бўлганингда сени бир йилда бир марта эслаб, устингдан кулишдан қўрқаришармиди? Тармоқдаги бир дўстимиз сени шеър қилганди: Бизда бордир икки хотин, Бири кирил, бири лотин... Ўзинг айт, сени қайси алифбода эслайлик? Иккаласи ҳам бизга бегона, аҳли Туркистон шу алифболар сабаб бўлиб, яна сарсон саргордон бўладими энди? Лотинда ёзай десам, тенгқурларимнинг 80% ёзганимни тушунмайди. Унда ёзиб нима қиламан? Яхшиси, икки алифбода эълон қилай ёзганларимни... Бу ватанда ғариб, бечора бўлган фақат сен эмассан! Адабиёт ҳам, сиёсат ҳам, адолат ҳам, таълим ҳам, хуллас нима борки, аҳволи сендан баттар бўлса баттардир, лекин яхши эмас. Чунки ватаннинг ўзи, давлатнинг ўзи, халқнинг ўзи ҳам бечора ва ғарибдир неча юз йиллардан бери. Устоз Алихонтўра Соғуний бир миллат тилини йўқотса, ўзи ҳам йўқ бўлади, деганди. Устоз Шароф Бошбек мен учун ватан Она тилим ва Ислом динимдир, деганди. Тошкентда яшайдиган бир дўстим айтганди: Ўзбекистонга қайтиб келсангиз, бу ердаги "Ўзбек тилини" тушунмасангиз керак, деб. Сени шу ҳолларга туширдиларми Она тилим! Шу ерда тўхтайман, ўзи нимжонсан, бошингни оғритиб нима қиламан! Сени севаман Она Тилим, Ўзбек тилим! Бир ғариб ўғлинг... Намоз НОРМЎМИН 21.10.22 O‘zbek tili bayrami emish Ey, o‘zimiz kabi bechora, o‘zimiz kabi g‘arib ona tilimiz....Sening nimangni bayram qilishar ekan, hech tushunmadim. Nomigagina, yilda bir marta marhumlarni eslagandek eslashadi seni. Holbuki, sen marhum emassan, chalajonsan. Chalajon esa kuchsiz bo‘ladi, balki kuchli bo‘lganingda seni bir yilda bir marta eslab, ustingdan kulishdan qo‘rqarisharmidi? Tarmoqdagi bir do‘stimiz seni she’r qilgandi: Bizda bordir ikki xotin, Biri kiril, biri lotin... O‘zing ayt, seni qaysi alifboda eslaylik? Ikkalasi ham bizga begona, ahli Turkiston shu alifbolar sabab bo‘lib, yana sarson sargordon bo‘ladimi endi? Lotinda yozay desam, tengqurlarimning 80% yozganimni tushunmaydi. Unda yozib nima qilaman? Yaxshisi, ikki alifboda e’lon qilay yozganlarimni... Bu vatanda g‘arib, bechora bo‘lgan faqat sen emassan! Adabiyot ham, siyosat ham, adolat ham, ta’lim ham, xullas nima borki, ahvoli sendan battar bo‘lsa battardir, lekin yaxshi emas. Chunki vatanning o‘zi, davlatning o‘zi, xalqning o‘zi ham bechora va g‘aribdir necha yuz yillardan beri. Ustoz Alixonto‘ra Sog‘uniy bir millat tilini yo‘qotsa, o‘zi ham yo‘q bo‘ladi, degandi. Ustoz Sharof Boshbek men uchun vatan Ona tilim va Islom dinimdir, degandi. Toshkentda yashaydigan bir do‘stim aytgandi: O‘zbekistonga qaytib kelsangiz, bu erdagi "O‘zbek tilini" tushunmasangiz kerak, deb. Seni shu hollarga tushirdilarmi Ona tilim! Shu erda to‘xtayman, o‘zi nimjonsan, boshingni og‘ritib nima qilaman! Seni sevaman Ona Tilim, O‘zbek tilim! Bir g‘arib o‘g‘ling... Namoz NORMO‘MIN 21.10.22