Dr.Suzan El-Shaf3y...د.سوزان الشافعي

★ رَكِّزي ★ ------ - لمَّا تكوني قاعدة وسط ناس في الشُّغل مثلا و حد سأل سؤال .. - هتلاقي ألف واحد بيجاوب 🙃😏 - اسكتي إنتِ و اركزي كده و اسمعي 🤌 - لو الإجابة طلعت اللي إنتِ كنتِ هتقوليه يبقى اتاكدتِ من اجابتك🫡.. - لو غير ما كنتِ هتقولي يبقى ربنا سترك 🫣😁 - اتعودي تتقلي و تخليكِ للآخر طالما السُّؤال مش موجه ليكِ شخصيًّا .. - ما هو إنتِ لازم تسكتي شوية علشان تفهمي و تتعلمي ، و لازم تخرجي برة الدائرة علشان تعرفي إيه اللي بيجري جواها.. - لو أنا دخلت في الكلام وأخد و رد مش هتعلِّم أبدًا في حياتي..أنا كده باتعلِّم من النَّاس.. - في وقت هأقولك خليكِ برة الدائرة اتفرجي و اتعلمي.. - و لمَّا تتحسِّني شوية هاعلمك ازاي تدخلي الدائرة و تبتدي تتكلمي مع النَّاس.. - و بعد كده هاعلمك ازاي إنتِ اللي تحركي الدائرة .. - ما هو انا ماقعدش اتكلِّم في أي موضوع مع أي ناس قاعدين يتكلموا في هبل🥴 أو يجيبوا في سيرة النَّاس😖 - هاعلمك ازاي تفتحي مواضيع بلباقة من غير ما يشعروا إنِّك مش عايزة تتكلمي في الموضوع ده.. - و تخلِّيهم و كأنُّهم همَّ اللي عايزين يتكلموا فيه🤩 - ده علم بس واحدة واحدة.. - و أول خطوة هى أصعب خطوة في اللسان ⬅️ و هيَّ إنِّك" تتعلمي تسكتي" طالما السُّؤال مش موجه ليكِ.. - و ده بيعالج حاجات كتير أوي فيكِ مش بس ازاي تتكلمي.. - بيعالج كمان فيكِ حُب الظُّهور ..في بنات بتحب تتكلِّم في أي حاجة من باب حُب الظُّهور.. # اتعلمي تسكتي و تتفرجي و تركِّزي علشان تفهمي و تتعلِّمي.. #دكتورة_سوزان_علمتني

"*أكل مال النَّاس "* --------------- إيَّاكُم وأكل مال النَّاس.. *هو إزاي ممكن حد ياكل مال حد؟ -ممكن مثلاً أخ ياكل على إخواته الميراث.. عَم يحرم بنات أخوه الأيتام مِن ميراثهم.. اشتريت حاجات من السُّوبر ماركت وبعدين الكاشير بيحطلي الحاجات في الكيس فحط بالغلط حاجة زيادة وأنا روحت البيت واكتشفتها ومارجعتهاش للسُّوبر ماركت.. في واحدة مرة حكيتلي إن لمَّا والدها تُوفِّي، أخوها خلَّاها هي وأختها يمضوا على ورق تنازل عن ميراثهم وفهِّمهم إنُّه حاجة تانية وهما وثقوا فيه ومضوا من غير مايقرأوا بيمضوا على إيه.. واكتشفوا الكلام ده بعدها، وطالبوه بميراثهم ورفض يرجَّعوا لهم؛ وطبعاً بالورق اللي هما ماضيين عليه هو متأمِّن قانونًا.. الأخ ده بعد كام سنة جاله مرض نفسي وربَّى دقنه وقال أنا المهدي ودخل المستشفى.. هو ظلم أخواته وأكل فلوسهم.. والظُّلم عقوبته بتبقى في الدُّنيا والآخرة.. قال رسُول اللَّه -صلَّى اللَّه عليه وسلَّم- "كُلُّ الذُّنُوب يُؤَخِرُ اللَّهُ مِنْهَا مَا شَاءَ إلَى يَومِ القِيَّامَةِ إلَّا البَغيَ وعُقُوقَ الوَالدَينِ ، أَو قَطِيعَةَ الرَّحِمِ ، يُعَجِّلُ لصَاحِبِها فِي الدُّنيَا قَبلَ المَوتِ" (البَغْي= الظُّلم والتعَدِّي على حقوق الآخرين).. فأكل أموال النَّاس خطيرة.. ربنا يكفينا بحلاله عن حرامه ويغنينا بفضله عمن سواه.. #دكتورة_سوزان_علمتني

*"حاجات صغيرة"* ---------------- في عندنا شوية حاجات دَارجة في كلامنا عايزين نغيَّرها.. ١. لمَّا بتلاقي حد مش شاطر في حاجة أو في حاجة مش عارفها خالص، ده بنقول عليه إيه؟ بنقول مِيح أو مَاحي.. دي مِيح في الكيمياء، ده مَاحي في الشَّوارع.. مع إن كلمة مَاحي دي معناها إيه؟ المَاحي اسم من أسماء رسُول اللَّه -صلَّى اللَّه عليه وسلَّم- لإن اللَّه -عزَّ وجَلَّ- محَى به ظُلُمات الكفر. قال رسُول اللَّه -صلَّى اللَّه عليه وسلَّم: "لِي خَمْسَةُ أَسْمَاء: أَنَا مُحَمَّد، وَأَحْمَد، وَأَنَا المَاحِي الَّذِي يَمْحُو اللَّهُ بِي الكُفْرَ، وَأَنَا الحَاشِر الَّذِي يُحْشَرُ النَّاسُ عَلَى قَدَمِي، وَأَنَا العَاقِب" (رواه البخاري). ٢. الشِّبشِب اللي بصباع، مش في ناس بتقول عليه شبشب "زنُّوبة"؟!! طيب وزنُّوبة ده مش دلع زينب.. واسم زينب عندنا كمُسلمين اسم مهم وقدره عالٍ قد إيه!!! ٣. الشِّبشب اللي وشه عريض، في ناس بتقول عليه "خَدُّوجة"، اللي هو دلع خديجة، والاسم ده عزيز علينا قد إيه!! ينفع بقى نقول اسم زينب وخديجة على حاجات بنلبسها في رجلنا.. أرجوكم خلوا بالكم من الحاجات الصُّغيرة دي لإنُّه رغم إنَّها تبان صغيرة لكنَّها مقصودة.. مقصود إنَّها تفرقع وسط المسلمين، إهانة لناس مُعينة.. وإحنا كمسلمين لازم نصحصح كده ومانقبلش الكلام ده.. #دكتورة_سوزان_علمتني

فيه حاجات صغيرة بتتقال من غير قصد بس ييبقى ليها أغراض آخرى عشان تقدح في الإسلام