MPSC-UPSC Katta

Shared from vFlat

#artical

युरोपमधील विशेषत: जर्मनी आणि फ्रान्समधील माध्यमांमध्ये भारताच्या निवडणुकीची जी चर्चा चालू आहे, त्याविषयी मी नुकतेच लिहिले होते. पण युरोपखालोखाल आशियातील एका देशाच्या माध्यमांत भारताविषयी विशेष चर्चा चालू आहे, तो देश म्हणजे तैवान. तैवानमधील टीव्ही माध्यमांत भारताच्या निवडणुकीची फारशी चर्चा होत नाही, पण ‘सेमीकंडक्टर उद्योगात भारत तैवानला मागे टाकील का?’ अशी चर्चा मात्र चालू आहे. खरे तर सेमीकंडक्टर उद्योगात तैवानला भारत मागे टाकील अशी शक्यता अजिबात नाही, पण तरीही तैवानी वृत्तवाहिन्या मात्र यावर चर्चा घडवून आणीत आहेत. याचे कारण असे की, तैवानी सेमीकंडक्टर उद्योजकांनी चीनमध्ये मोठ्या प्रमाणात गुंतवणूक केली आहे. पण हे सर्व उद्योजक आता चीनमधील गुंतवणूक काढून ती भारतात नेण्याचा विचार करीत आहेत. भारतात हा उद्योग नेणे कितपत किफायतशीर असणार आहे, भारतात कुशल कर्मचारी मिळतील का, अशी ती चर्चा आहे. खरे तर भारतात चार वर्षापूर्वीपर्यंत तैवान या देशाची फारशी माहिती सामान्य लोकांनी नव्हती. तैवानच्याही रडारवर भारत फारसा नव्हता. पण गलवान घटनेनंतर भारताने चीनबाबत प्रोएक्टिव्ह धोरण स्वीकारल्यानंतर तैवानशी संबंध वाढवले आहेत. त्यातच कोविडच्या काळात सेमीकंडक्टरचा तुटवडा निर्माण झाल्यानंतर या क्षेत्रात स्वावलंबी होण्याचे भारताने ठरवले, त्यामुळेही तैवानशी संबंध वाढविण्यात आले. आता तर तैवान आणि भारताच्या संबंधांची पातळी अधिक वाढली आहे. तैवानमध्ये अलीकडच्या काळात शिक्षण, नोकरी, व्यापार यासाठी जाणाऱ्या भारतीयांची संख्या चांगलीच वाढली आहे. गेली दिवाळी तैवानमध्ये मोठ्या प्रमाणात साजरी करण्यात आली. तैवानमध्ये केरळी लोक बऱ्याचा प्रमाणात गेले आहेत. तेथे त्यांनी केरळ ख्रिसमस सण मोठ्या प्रमाणात साजरा केला. एवढेच नाही तर तैवानच्या तैवान प्लस या वृत्तवाहिनीवर दिव्या गोपालन ही भारतीय इंग्रजी वृत्तनिवेदिका काम करीत आहे. ती भारतासंबंधीचे कार्यक्रम सादर करते. तैवान प्लस या वाहिनीवर तैवानी निवेदिका बेली चेन हिने नुकतीच भारतातला सेमीकंडक्टर उद्योग तैवानला मागे टाकील का अशी चर्चा घडवून आणली. या चर्चेत भारताने सेमीकंडक्टर उद्योगात १५.२ बिलियन डॉलर्सच्या गुंतवणुकीला मंजुरी दिली आहे, त्याबद्दल तैवानच्या चून हुआ इंन्स्टिट्यूट ऑफ इकॉनॉमिक रीसर्चच्या एसिआन स्टडी सेंटरच्या संचालिका क्रिस्ती त्सन त्झू हुआ आणि नॅशनल सायन्स अँड टेक्नॉलॉजी कौन्सील रीसर्च इन्स्टिट्यूटचे रॉजर लिऊ या दोन तैवानी तज्ज्ञांशी चर्चा केली. ही चर्चा ऐकण्यासारखी आहे. त्यावरून तैवानी उद्योजक व तज्ज्ञ भारताबाबत किती आशावादी आहेत हे कळते. तैवानने तेथील उद्योगात काम करण्यासाठी भारतीयांना आमंत्रित करावे असाही सूर या चर्चेत आहे. त्यासाठी भारतीयांकडून असलेल्या अपेक्षाही या चर्चेत व्यक्त करण्यात आल्या आहेत. चेहरे साधर्म्यामुळे तैवानची पसंती इशान्य भारतीयांना व अस्खलित मँडरीन बोलू शकणाऱ्यांना आहे. भारत व तैवान संबंधात चीन हा एक महत्त्वाचा घटक आहे. आजवर चीनशी चांगले संबंध रहावेत यासाठी भारताने तैवानशी फक्त व्यापारी संबंध, तेही गरजेपुरते ठेवले होते. पण चीनशी तसेही संबंध चांगले राहत नाहीत हे लक्षात आल्यानंतर भारताने आता सर्व क्षेत्रात तैवानशी संबंध वाढवण्याचे ठरवले आहे. त्यामुळे येत्या काळात चीनची फारशी पर्वा न करता हे संबंध विकसित होत राहतील असे दिसते. तैवान प्लस वाहिनीवरील चर्चेची लिंक खाली दिली आहे. https://youtu.be/Daiz1VMgxIc?si=UHUdizsbo2aHomaV

#artical