Federal Law and Justice Institute የፌዴራል የሕግና ፍትሕ ኢንስቲትዩት

በሰው ሠራሽ አስተውሎት (AI) አጠቃቀም ላይ የግንዛቤ ማስጨበጫ መድረክ ተካሄደ የፌደራል የሕግና ፍትሕ ኢንስቲትዩት ለተቋሙ አመራሮችና ባለሙያዎች በሰው ሠራሽ አስተውሎት (Artificial Intelligence – AI) ቴክኖሎጂ አጠቃቀም ዙሪያ ያተኮረ የግንዛቤ ማስጨበጫ መድረክ አያት ጨፌ በሚገኘው የተቋሙ ማሰልጠኛ አዳራሽ አካሂዷል። መድረኩ በሰው ሠራሽ አስተውሎት መሠረታዊ ግንዛቤን ለማሳደግ፣ ቴክኖሎጂውን በትምህርት፣ በምርምር፣ በሥራና በዕለት ተዕለት ተግባራት ላይ በብቃት እንዴት መጠቀም እንደሚቻል ለማስተዋወቅ ያለመ ነው። ሥልጠናውን የመሩት የኢንስቲትዩቱ መሪ የሕግ ተመራማሪዎች ወ/ሮ ሰሚራ አብዱልዋሲ እና አቶ ኖህ ግርማ ሲሆኑ፣ በመድረኩ የሰው ሠራሽ አስተውሎት መሠረታዊ ግንዛቤና ለምርምር ያለው ጠቀሜታ በስፋት ተዳስሷል። በተጨማሪም AI በሕግ ምርምር ሥራዎች ውስጥ የተሻለ ቅልጥፍናን ለማምጣትና የተመራማሪዎችን የዕለት ተዕለት ተግባራት ለማቀላጠፍ ያለው ሚና ቀርቧል። የቴክኖሎጂውን አጠቃቀም ተከትለው ሊከሰቱ የሚችሉ ሥጋቶችን በመለየት በኃላፊነት መጠቀም የሚቻልባቸው መንገዶች፣ እንዲሁም የAI ቴክኖሎጂን ትክክለኛና ፍትሐዊ አጠቃቀም የሚመሩ ሕጋዊና ሥነ-ምግባራዊ ማዕቀፎችም የውይይቱ አካል ሆነዋል። መድረኩ የተቋሙን አመራሮችና ተመራማሪዎች ዘመናዊ ቴክኖሎጂን በተገቢው መንገድ በመጠቀም የሕግ ምርምር ጥራትን ለማሳደግና ለፍትሕ ሥርዓቱ መሻሻል የሚያበረክቱትን አስተዋጽኦ ለማጠናከር ጉልህ ሚና እንደሚኖረው ተገልጿል። ================= ዘገባው፦ የሕዝብ ግንኙነትና ኮሚዩኒኬሽን ዳይሬክቶሬት