توازن مع صفاء

(ياخ بهظّر معاك) 🤷‍♀️ لما تكون الإهانة نكتة وزعلك هو المشكلة عارفة الموقف البخليك تضحكي مع الناس، لكن من جواك تكوني اتضايقتي؟ تكوني قاعدة في قعدة عادية، وفجأة واحد يقرر يعلّق على شكلك ويقول ليك قدام الناس: (ياخ إنتِ لو ضعفتي شوية كان بقيتي خطيرة!) 😏 أو يتأمل في لبسك ويقول: (إنتِ مقتنعة إنو اللبسة دي لايقة عليكِ؟) والناس تضحك وإنتي تضحكي معاهم، لكن الكلام من جواك ما عدى عادي تقرري توضحي ليه إنو الكلام ده ضايقك، يقوم يرد بكل براءة: ياخ بهظّر معاكِ! إنتِ مالك حساسة كده؟ أها، هنا الحيرة بتبدأ! يعني إنتِ هسي المفروض تضحكي على شنو بالضبط؟ على الكلام البجرحك؟ ولا على فكرة إنك لو اتضايقتي، حتطلعي إنتِ النكدية البتفسد الونسة؟ 🤦‍♀ والأغرب إنك ممكن تكملي القعدة عادي، لكن بعد ما ترجعي البيت، تتذكري كلامه وتتضايقي. ومرات حتى لو كنتِي واثقة في شكلك، بتلقي نفسك فجأة بتفكري في الحاجة القالها!🤷‍♀ يا جماعة، ما كل مزحة ما عجبتنا معناها إن الشخص قاصد يهيننا، لكن برضو ما كل حاجة اتقالت وسط الضحك معناها إنها عادية. في فرق بين زول بهظّر معاكِ، وزول بخلي شكلك أو جسمك مادة للضحك، ولما تتضايقي يقنعك إن المشكلة فيكِ طيب وروني لو زول علّق على شكلك تعليق ضايقك، ولما وضحتي ليه قال: (ياخ بهظّر معاك)  غالبًا بتكون ردة فعلك شنو؟ بتضحكي وبتعدّيها؟ بتردّي عليه؟ ولا بتسكتي وبتتضايقي بينك وبين نفسك؟ #SafaaElmubark