Saw Ba Maung

ပေါင်မြို့နယ်၌ အပြည်ပြည်ဆိုင်ရာဒီရေတောဂေဟစနစ်ထိန်းသိမ်းရေးနေ့အထိမ်းအမှတ် ပျိုးပင် ၁၂၀၀ ကျော်စိုက်ပျိုးသွားမည် +++++ မွန်ပြည်နယ်၊ပေါင်မြို့နယ်၌ ဇူလိုင်လ (၂၆)ရက်နေ့တွင်ကျရောက်မည့်  ၂၀၂၆ခုနှစ်၊အပြည်ပြည်ဆိုင်ရာ ဒီရေတောဂေဟစနစ်ထိန်းသိမ်းရေးနေ့အထိမ်းအမှတ် ပြည်နယ်အဆင့် သစ်ပင်စိုက်ပျိုးပွဲကို  အလှပ်ကျေးရွာအုပ်စု၊ ဆယ်အိမ်စုရပ်ရှိ ပင်လယ်ကမ်းခြေ၌  ဇူလိုင်လ(၂၆)ရက်နေ့ နံနက်(၈:၀၀)နာရီတွင် စိုက်ပျိုးသွားမည်ဖြစ်သည်။ အဆိုပါသစ်ပင်စိုက်ပျိုးပွဲတွင် သမဲ့(၉၁၀)ပင်နှင့် ဗြူရွှေဝါ(၃၀၀)ပင် စုစုပေါင်း (၁၂၁၀)ပင်တို့အား စိုက်ပျိုးသွားမည်ဖြစ်ကြောင်း၊ ဒီရေတောများသည် ကုန်းမြေနှင့် ပင်လယ်ပြင်ကြားတွင် တည်ရှိပြီး ပတ်ဝန်းကျင်အတွက်မရှိမဖြစ်လိုအပ်သော အခန်းကဏ္ဍတွင် ပါဝင်ကြောင်း၊ဒီရေတောသစ်ပင်စိုက်ပျိုးပွဲများ ပြုလုပ်ရခြင်း၏ အဓိကရည်ရွယ်ချက်မှာ ကမ်းရိုးတန်းဂေဟစနစ်ကို ထိန်းသိမ်းရန်၊ သဘာဝဘေးအန္တရာယ်များမှ ကာကွယ်ရန်နှင့် ဒေသခံပြည်သူများ၏ လူမှုစီးပွားဘဝကို မြှင့်တင်ပေးရန်ဖြစ်ပါကြောင်း ပေါင်မြို့နယ် သစ်တောဦးစီးဌာနမှ တောအုပ်ကြီးဦးဇော်လွင်ဦး၏ပြောကြားချက်အရ သိရသည်။ ပေါင်မြို့နယ်သစ်တောဦးစီးဌာနအနေဖြင့်  ၂၀၂၆ ခုနှစ်အတွင်း ဒီရေတောစိုက်ပျိုးပွဲများအပါအဝင် သစ်ပင်စိုက်ပျိုးပွဲများပြုလုပ်၍ သစ်တောပြုန်းတီးမှုများ လျော့ချနိုင်ရေးဆောင်ရွက်ပေးနိုင်ခဲ့ပြီး ရပ်ကွက်/ကျေးရွားများနှင့် အခြေခံပညာကျောင်းများတွင် ဟောပြောပွဲများပြုလုပ်ခြင်း၊ လက်ကမ်းစာစောင်များဖြန့်ဝေပေးခြင်းနှင့် ပြည်သူများအတွက် အသိပညာပေး (Talk Show)များဆောင်ရွက်ခြင်း စသည့် အသိပညာပေးလုပ်ငန်းများကို ကဏ္ဍစုံလင်စွာ ဆောင်ရွက်‌ပေးလျက်ရှိကြောင်းသိရသည်။