Multaqa-😍 الملتقى 💖

يقول أحدهم: لي صديق كلما رآني مهمومًا قال لي : "لا تحزن سوف تتزوج يومًا ما."

"سيبتوا بعض ليه"..؟! صادفت السؤال ده فـ جروب مُختلط شباب وبنات ، فـ دخلت علشان أقرأ الكومنتس ، وكمان أرد بـ "مش عارفه" ، مش عارفه حقيقي سابنى ليه !؟ وأنا بقرأ الكومنتس لفت نظرى كومنت خلى قلبي يدق أوى ، يدق بلهفة . كومنت منه ، مركزتش ولا قرأت هو كاتب أيه ؟! ملفتش نظرى إلا أنه فك البلوك اللى كان عاملهُ بقالهُ سنه ونص .. ! جريت عـ بروفايله زى المجنونه ، زى شخص تايهه وما صدق لقي قشة يتعلق فيها . فضلت مركزة فى صورته أوى ، وحشنى أوى ، أنا بقالى سنه ونص كل يوم ببكى عليه بدل الدموع دم . سنه ونص وأنا بفتح الفويس نوتس بتاعته وبسمع صوته عشان أعرف أعيش . كل شوية بدخل أقرأ اللى بينا فـ الشات ، بشوف وعوده ليا ، وأهتمامه بيا ، قلبي بيوجعنى أنه مبقاش موجود . سنه ونص وأنا مش عارفه أتخطى ولا أتعافي من حبه ، أنا من بعده بقيت تايهه حرفياً . ناس كتير بتتقدم ليا ، وغيرهم بيطلب أنه يرتبط بيا وأنا بردو مش عايزة غيره ، مش متخيلة نفسى إلا بين أيديه هو ، فـ حضنه هو بس . أنا بس اللى مجننى أنه سابنى من غير سبب ! مشى من غير ما يعرفنى ليه ! بعدين خرجت من بروفايله وقولت أشوفه كاتب أيه فـ الكومنت . لقيته كاتب " عرفت أنى قُربى منها عصيان لله وأنى ممكن أخسرها بسبب القرب ده فـ قولت أسيبها وأصلح نفسى عشانها وأدعى ربنا يجمعنى بيها فـ الحلال ، وأنا النهارده فاضلى 3 سور فـ القرآن الكريم وابقي تميت حفظه لأجل أنها تبقي من نصيبي ، أنا حفظت 111 سورة من القرآن ويعتبر 111 أنجاز فـ حياتى ، فاضلى 3 سور وأبقي كملت 114 أنجاز والأنجاز ال115 أنى أتجوزها ، أدعولى تكون من نصيبي ." لقيت الكومنت بتاعه دونن عن كل الكومنتس جايب حوالى 200 ريأكت لاف وكير ، وناس كتير عملت ريبلاى وكانوا بيدعولنا نكون من نصيب بعض . عيونى دمعت من جمال الكومنت وجمال الدعوات ، معقول يكون فـ حد حبنى لهذا الحد ؟ معقول أنا أتحبيت بالطريقة الجميلة دى ، أنا مش مستوعبة الجمال بالله . لما كُنت بقلب فـ بروفايله كُنت شوفت بوستات كاتب فيها الأنجاز وكاتب جمبه رقم ، فـ الاول مكنتش عارفة أيه الانجازات دى ! لكن بعد الكومنت ربطت الكلام ببعضه وعرفت أنه بيقول كده عن سور القرآن الكريم . نمت فـ الليلة دى وأنا فـ قمة السعادة ، وفضلت مراقبه بروفايلهُ . بعدها بيومين نزل الأنجاز 113 ، عرفت أنه فاضله سورة ويتم حفظ باقي القرآن . فات وقت وعرفت أنه ختم القرآن بعد ما نزل بوست الأنجاز 114 . بعدها فضلت فـ قلق جامد وتوتر ، وساعتها عرفت أنا ليه مش عارفه أتخطى حبهُ ، وده لأنه كان بيحفظ القرآن علشانى ، علشان أبقي مراته وشريكة حياته . لحد ما فـ يوم لقيت بابا بيقولى : " فـ عريس متقدملك وهو شخص ملتزم وعارف أمور دينه كويس وأنك من رأيي أنك تقعودى معاه وبلاش رفض من غير ما تشوفيه زى ما بتعملى مع باقي الناس اللى بتتقدم " وافقت أقابله لأنى كُنت عارفة أنه هو ، كأنى البوست والكومنت دول جم فـ وقتهم علشان أوافق أقابله وأتكلم معاه لأنه من بعد ما سابنى بقيت برفض أى عريس من غير ما يدخل البيت . جه البيت وكانت الرؤية الشرعية ، وقعدت معاه وأتكلمنا ، قالى : " أنا حفظت القرآن علشانك ، أشتغلت وسعيت كتير علشان أكون شخص يليق بيكى ، كُنت ببكى ليل نهار أنك مش جمبي ، بس ربنا كان بيطمنى أنك ليا ، كُنت بلاقي أشارات فـ القرآن تدل أننا هنبقي لبعض ، كُنت خايف أغضب ربنا فيكى فـ بعدتك عنى ، حقك عليا أنى سيبتك من غير سبب بس وافقي عليا وأنا بضمنلك سعادة العمر كله " . بعدها أدانى مصحف ملون ، وقالى "ده هدية منى ليكى ، كُل يوم هخصص وقت ليكى وأحفظك فيه القرآن" . وبعدها طلب من بابا أنه يكتب كتاب وبالفعل بابا وافق . يوم كتب الكتاب وأحنا لوحدنا بعد ما كُله مشى ، قرب منى وحضنى حوالى ربع ساعة ، ودموعه فـ عينيه ، وبعدها باس أيدى وباسنى فـ خدى . - عارفة كتبت عليكى ليه ؟ = ليه ؟ - عشان أعرف أحضنك براحتى . أتجوزنا بعدها بـ 4 شهور ، كان هين لين لا يطيق الخصام حرفياً ولله . معاملته ليا بتفكرنى بـ لطف تعامل رسول الله مع زوجاته ، حقيقي هو أعظم شخص فـ الوجود . والنهارده بنزل البوست ده من قدام الكعبة لأنه وعدنى أول ما أحفظ القرآن كامل هيودينى العمرة ، وأنا الحمدلله وصلت للأنجاز الـ 114 فـ حياتى وهو الأنجاز الـ 115 .

مسجدنا الأقصى غالٍ ودمـاء إخوتنا أغلى اللهم نصرك الذي وعدت

صحيت تاني يوم وأنا بتمنى إن كل ده يكون حلم، بس للأسف كان حقيقة، ميعاد كورس الإنجليزي بتاعي كان النهاردة.. كنت حاجزه بقالي فترة، دخلت المكان، أول ما دخلت جه في دماغي هاجس.. سؤال مش عارف ازاي مسألتوش للشخص ده من أول ما كلمني.. يمكن عشان مكنتش مقتنع بكلامه بس لقيتني بكتبله ع الواتس " كريم.. هو أنا كنت عارفك من امتى، صداقتنا ده ابتدت امتى يعني؟! " لقيته بيكتب ع الواتس وقريت الرسالة وأنا بترعش " مقدرش أنسى اليوم ده.. كان يوم ١٢/٥/٢٠٢٢ " ده.. ده.. لقيت واحد ظهر قطع تفكيري .. -ازيك.. أنت معانا هنا في الكورس؟! = ا.. أيوه. - اهلا بيك .. أنا كريم.. كريم أدهم. النهارده ١٢/٥/٢٠٢٢

الرسالة دي جاتلي من شخص غريب، بيدعي إنه صاحبي، في الأول كان باعتلي رسالة بيقولي " وحشتني يا صاحبي " بس لما رديت عليه وقولتله " أنت مين؟! " استغرب، وبدأ يسألني أنا رديت عليه ازاي! مفهمتش سؤاله في الأول، لحد ما بعت الرسالة الغريبة دي، في الأول اتخضيت، بس جه في دماغي ودماغه إن ده كان رقم واحد صاحبه ومن قلة الاستخدام الشركة لغته وبقى رقمي، شك إنه لما جاب الخط الجديد الي معاه اتلغبط وسجل رقم صاحبه غلط.. على أساس إنه كان عايز يفضل حافظه كنوع من الوفاء. بس لما سألني عن اسمي وقولتهوله اتصعق، وبالذات لما بعتله ريكورد بصوتي مكنش مصدق، كان بيحاول يتصل عشان يتأكد بس قالي الرقم مش بيجمع، وحاول يتصل video call بس قالي الواتس مش راضي يتصل برضو، وبدأ يقولي عن معلومات ميعرفهاش عني إلا الأشخاص القريبين مني جداً.. الموضوع كان غريب! كان اسمه " كريم أدهم " وبيقول إننا كنا أعز أصحاب، رغم معرفتنا ببعض معدتش السنة وكام شهر، كلامه كان هيجنني، شوفت صورته، أنا عمري ما شوفت الشخص ده في حياتي! وزاد رعبي لما بعتلي الرسالة العجيبة دي، بس الي شل جسمي فعلاً لما لقيته بعتلي صور أنا وهو واحنا مع بعض، أكتر من صورة.. قلبي اتقبض، بس.. لما فكرت في الموضوع كويس لقيت إنه ممكن يكون شخص نصاب، وبالنسبة للصور فمفيش أسهل من الفوتوشوب دلوقتي، رغم إن الصور تبدو حقيقية جداً. فضولي في إني أعرف هيكمل كدبته ازاي، أو عرف المعلومات دي عني ازاي خلتني أسأله " ايه الي حصل.. أنا موت ازاي؟! " لقيته بعتلي ريكورد وبدأت اسمعه.. " أنا مش عارف أنا اتجننت ولا ايه.. أنا ببعت ريكورد لشخص متأكد إنه ميت! على العموم الحكاية بدأت من كام شهر لما قعدنا بليل في الشارع زي كل كام يوم عادي، تحت عينك كان أسود، عمال تبص حواليك زي المجنون، الرعب كان باين عليك وبعدين قولتلي.. - كريم.. كريم أنا عايز أقولك على حاجة. = مالك يا عمر؟! - أنا جايز مقولتلكش الموضوع ده قبل كده بس أنا مبقتش مستحمل. = يا ابني في ايه مالك! - أنا من فترة كنت بشوف حاجات.. = حاجات ايه؟! - مش عارف هم عبارة عن ايه، بس ساعات.. بصحى بليل من النوم والنور مطفي الاقي راجل واقف في وشي، وشه عامل زي الصنم.. مبرقلي، مبيتحركش.. ولما أقيد النور يختفي، و.. و ساعات وأنا معدي بليل قدام الحمام الاقي.. الاقي بنت صغيرة قاعدة في ركن الحمام.. ولما اجي أبص تاني الاقيها اختفت! = أنت بتقول ايه ياعمر؟! - ص.. صدقني زي ما بقولك كده بالظبط، بشوف حاجات كتير زي دي، في الأول مكنتش بهتم.. بقول خيالات، بس الموضوع زاد، زاد بدرجة مرعبة، أنا مبقتش عارف أنام يا كريم مش عارف أنام! معرفتش ساعتها أصدقك ولا أقول حصل في مخك حاجة، بس حاولت أعمل مصدق.. أو فعلاً اقتنعت، ملامحك كانت بتشير لده، وشك كان شاحب، وكل يوم بتبقى أسوء من الي قبله، كنت بتموت بالبطيء. لحد ما لقيتك في يوم بتتصل بيا، الساعة واحدة ونص بليل.. ايوه عمري ما هنسى اليوم ده، صوتك كان مرعوب.. كنت بتهمس " كريم.. أنا قاعد لوحدي، ك.. كلهم مسافرين، أنا مستخبي في الدولاب.. أنا.. أنا خايف يا كريم " وبدأت تعيط، حاولت أهديك فقولتلي " النور قطع.. النور قطع و كلهم هنا في البيت.. قدامي، الي قولتلك عليهم، شايفهم من فتحة الدولاب، البنت الصغيرة قاعدة قدامي، في ركن الأوضة، عماله تعيط، بس صوت عياطها مرعب.. مرعب أوي، والراجل الي وشه صامت، عمال يعدي كل شوية من قدام الدولاب.. ببرود " مكنتش عارف أقولك ايه، بس صوتك كان يقطع القلب بعدين لقيتك بتكمل " و.. و في راجل راقد على سريري، عمال ينازع.. كإنه بيموت.. بس ملامحه غريبة، مش قادر أحددها بسبب الضلمة، راقد وبيبرق وهو باصص للسقف، وعروق رقبته كإنها هتنفجر من الألم.. كريم سامع الي أنا سامعه؟! " مكنتش سامع حاجة غير صوت أنفاسك بس أنت كملت " في واحدة بتصوت.. ايوه أنا شايفها، شكلها مرعب أوي يا كريم.. عمالة تشد في شعرها، وتصوت، شعرها بيطلع في إيديها.. و " لقيتك سكت مرة واحدة بعد شهقه " في ايه يا عمر؟!.. عمر! " لقيتك بتهمس بصوت مسموع بالعافية " كريم الست شافتني، كانت.. كانت بتبرق وبتبص من الفتحة الي شايفهم منها، أنا قفلت الدولاب بسرعة، كريم.. كريم في حد بيقرب من الدولاب.. أنا سامع صوت خطوات، أكيد شافوني.. الحقني يا كريم الدولاب بيتفتح، كريم! " وبعدين سمعت صرختك الي فزعتني في مكاني، لقيتني بنزل من بيتي بسرعة جنونية، كان لازم الحقك، جريت بأقصى سرعتي لحد ما وصلت، بس لما وصلت لقيتك.. لقيتك واقف ع الشباك، بتبص وراك برعب.. - عمر.. انزل يا عمر.. انزل. منتبهتش لكلامي، بصيت تحت و.. ، والدور الرابع مكنش قريب، شوفت جثتك قدامي، غرقانة في دمها. " الريكورد خلص، كلامه شلني، قفلت ونمت من غير ما أقوله ولا كلمة، هقوله ايه؟! هقوله.. إننا فعلاً من ساعة ما انتقلنا للشقة الغريبة دي وأنا بشوف حاجات مش مفهومة، خيالات لناس.. غيرنا، بس ازاي.. أنا مقولتش الموضوع ده لحد تاني! عرف منين!

أيوة انا اللي هسرح لمراتي شعرها وانا اللي هجبلها شيكولاته في نص الليل وانا اللي هساعدها في الطبخ ولو حرقت الأكل هاكله واقولها تسلم ايدك ، ايوا انا لما تبقي حامل مش هخليها تعمل حاجه ولما تتعب اسهر جنبها طول الليل ، لو حسيت انها مخنوقه هخرجها واسعدها مش هسيبها انا اللي هعملها الفطار الصبح واروح ع السرير اصحيها ونقعد نفطر سوا وانا اللي هجبلها غزل البنات وانا اللي هاخدها الملاهي واركبها المراجيح وانا اللي هدلعها زي الاب لما يدلع بنته .. عشان بنات الناس مش لعبه ومش جايين من بيت اهلهم عشان نحبسهم ف البيت ، البنت زي الورده لازم نحافظ عليها عشان ماتدبلش وتفضل موجوده ومحتفظة بشكلها الجميل ..♥️🍃

الزواج عبودية العمر؛ كل تفصيلة فيه بأجور عظيمة. -الشيخ محمد خيري

اللي بيقول انه مبيحبش الورق عنب ده، ف ده معناه انه امه مبتعرفش تعمله مش هو ال طعمه وحش.🙂🚶‍♂️💚

ماسمهاش بتغير على جوزها ❌ اسمها بتمارس فطرة ربنا اللي خلق بيها كل الناس ✔️ الخلل عندكم مش عندها🙂 مسموش مراته ممشياه أو مسيطرة عليه ❌ اسمه بيعمل حساب لخاطر ومزاج والروح المعنوية لشريكة حياته الوحيدة اللي ربنا جعل لها فيه أكتر منكم ✔️ الخلل عندكم مش عندها 🙂 مسموش مدلع مراته ❌ اسمه بيراعي الأمانة اللي ربنا رزقه بيها وبيحافظ على صحة الإنسانة الوحيدة اللي بتراعي راحته واللي بيعمله هيرجع في الآخر لأولاده وله هو ✔️ الموضوع كله ميخصش حد غيرهم✌️ فالخلل عندكم مش عنده🙂 باختصار أيا كان صفة اللي بيعلق على أي زوج وزوجة سواء أهل، أصدقاء، جيران.....إلخ فربنا قال ( وَمِنۡ ءَايَٰتِهِۦٓ أَنۡ خَلَقَ لَكُم مِّنۡ أَنفُسِكُمۡ أَزۡوَٰجٗا لِّتَسۡكُنُوٓاْ إِلَيۡهَا وَجَعَلَ بَيۡنَكُم مَّوَدَّةٗ وَرَحۡمَةًۚ إِنَّ فِي ذَٰلِكَ لَأٓيَٰتٖ لِّقَوۡمٖ يَتَفَكَّرُونَ ) أنت فين موقعك في الآية دي ؟؟؟ لك حق ربنا شرعه ليك بردو لكن مش في الموضع ده مهما كانت صفتك متحطش نفسك في مقارنة مع زوج لزوجته أو زوجه لزوجها لأنها مقارنة مبنية على أساس خاطئ من أولها لآخرها. اتقوا الله ولا تكونوا عوناً للشيطان على هدم بيوت أحبابك

" فُلان إتجوّز ما إتجوّزش، خلّف ما خلّفش، نجح ما نجحش، بيقبض كام، بيصرف فلوسه في إيه، بيعمل إيه في حياته، كُل دي حاجات مالكش دعوة بيها ولا من حقك أصلًا تسأل فيها، ولازم تفهم إن في حاجة اسمها خصوصيات .."

- هدومه مقطعة!. ده كل مرة يجي الجامعة بنفس الطقم ده. سمعت صحابي في مرة بيتريقوا على لبسي، مكنش عندي ولا طقم شيك غير واحد وكنت بساعد أبويا دايمًا في الزراعة وبسبب مصاريف الطب مكنتش بعرف أجيب لبس مناسب. وفي مرة رجعت من الكلية معيط فأبويا سألني مالك؟!. كذبت عليه وقولتله إني مخنوق شوية بسبب ظروفنا دي.. فابتسم ابتسامة مُرهقة وقالي: " احفظ القرآن يا سليم هو اللي هينجيك من كل حزن " وفهمني إن حفظ القرآن ده هو اللي هيكون حاجز بيني وبين أي ضرر يصيب قلبي وأي تعب يهد روحي، وعملت بكلامه وروحت فعلاً الكُتَّاب وكنت في كل مسابقة بجتهد فيها وأطلع الأول وده كان سبب للميثاق الغليظ اللي بقى بيني وبين شيخي واتصاحبنا وحكيتله كل حاجة عني، وفي مرة حكالي موقف للرسول فبدأ كلام وقال: تعرف سيدنا أنس بن مالك؟ فقولتله " أيوه " فكمل كلامه وقال: سيدنا أنس بن مالك كان خادم رسول الله ولما عمره أصبح عشر سنوات أمه خدته للنبي وقالتله ياخده عشان يخدمه وبعدين طلبت منه يدعيله؛ عارف النبي دعاله بإيه؟!!. - إيه؟ خده وباسه بين عنيه ودعاله دعوة كان سبب الخير والبركة طول حياته وكانت الدعوة: « اللهم أكثر ماله، وولده، وبارك له، وأدخله الجنَّة ». سيدنا أنس عاش تسعة وتسعين سنة، وربنا رزقه أحفاد وبنين كتير وكمان رزقه كان مُبارك فيه، بقى عنده بستان وكان بيحصد منه الفاكهة في السنة مرتين!. ومن وقت ما شيخي قالي الدعاء وأنا مكنش بيفوت يوم غير وهو ملازم لساني، والنهاردة أنا واقف على الاستيدج وبحكي قصة حياتي للجميع في حفلة كانت معمولة ليا كأفضل دكتور لأنقاذ أكبر عدد من المُشوَّهين وتجميل ملامحهم، وبحكيلهم إزاي ربنا رزقني بمكانة كويسة، وزوجة أصيلة، وولدين ختموا القرآن في عمر عشر سنوات.. فأحب أقولكم إنك عمرك ما هتنجح وأنت قاطع حبل الوصل بين وبين ربنا، وعمرك ما هترتاح ومصحفك عليه تراب، وعمر الرزق والعوض ما هينزلوا من السماء إلا بالمداومة على الذكر وبعد ما سيبت المايك من ايدي افتكرت جُملة عظيمة جدًا فرجعت مسكته تاني وقولت: " الدعاء روح اليقين واليقين قلب العوض " ♥ عزة العمروسي

بشتري حواوشي ف في بنوتة واقفة جنبي طلبت اتنين وبتتكلم في التلفون بتقول:( أنا جعانة بغباء مكلتش طول اليوم فهجيب حواوشي عشان بحبه أوي ممكن اكل منه أربعة من حلاوته ) أنا خدت طلبي وهي خدت روحنا المترو والحاجة في شنطتنا لسة مطلعنهاش يعني مش عاملة ريحة اصلا لاقينا بنت شكلها ١٣ سنة بتتكلم مع مامتها : نفسي مرة ناكل كفتة او أي حاجة من اللي بنشم ريحتها دي ومش بنشوفها ، مامتها شتمتها وقالت لها وطي صوتك يا حيوانة هنجيب شيبسي واحنا ماشيين أنا الكلمة فطرت قلبي أقسم بالله لاقيت البنت اللي اشترت جنبي وكانت هتموت من الجوع طلعت. الكيس كله منغير متفتحه ولا تاكل منه حتة وراحت مديهالهم وقالت بالنص للصغنونة : أنتِ بنت حلال أنا كلت وشبعت أوي وكنت بقول حرام يترموا كدة والبنت كانت هتموت من الفرحة ورب الكعبة لمعت عنيها خطفت قلبي البنت عشان متحرجهمش راحت آخر العربية بعيد عنهم روحت وراها عشان ناكل سوا ( أنا كنت شارية واحد ) بكل أريحية كلنا نص رغيف كل واحدة وشبعنا جامد جداااا ولاقيتني وانا نازلة بحضنها وبتقولي شبعت كأني واكلة ألف واحد ❤❤❤❤❤ ( لن تنالوا البر حتى تنفقوا مما تحبون ) الخير كل الخير ف أمة نبينا محمد صلى الله عليه وسلم -مقتبس ♥️♥️♥️

امي مصحياني إمبارح الساعة اتنين ونص بلليل بتقولي.. طب يابني نتكلم بالعقل.. زي مانت بتحب خد وادي معايا.. قلتلها خير يا حجة إيه اللي حصل.؟؟ - قالتلي.. انت مبسوط كدا.. يعني هتعيش لوحدك.. قلتلها.. ياماما انت الجماعة ولو كنت فردا.. أيوا أنا سعيد بشقائي.. مبسوط بكياني المنفرد والله سبيني أنام بقى.. قالتلي يعني مش عايز واحدة كدا تعملك أكل وغسيلك وتهتم بيك.. قلتلها ربنا يخليكي ليا ، أنا بعمل الحاجات دي كلها أصلا من عشر سنين وكدا كدا اي واحدة دلوقتي بتتجوز مش هترضيني لا هتعرف تطبخلي زي مانا عايز ولا هتعرف تطبق زي مانا بطبق وبغسل.. لازم أنا اللي أعلمها ، وانا كبرت ياماما وبدهن فولترين.. قلتلها بزمتك انت تعرفي الفرق بين الاوريجانو والريحان.. قالتلي لا.. قلتلها خلاص سبيني أنام بقى.. قالتلي لا بقولك إيه.. أنا سكتالك من زمان.. انت لازم تتجوز أنا مش عيشالك كتير.. شوف أي واحدة وخلاص.. قلتلها شمس التبريزي كان بيقول.. المرء مع من لا يفهمه سجين.. قالتلي ياخويا سجين مع واحد ما بيفهموش أحسن من سجين في حبس انفرادي.. دول لما يحبوا يعذبوا الانسان يحطوه لوحده في السجن يابني.. قلتلها يا ماما بلاش شمس التبريزي.. الشافعي قال.. اهرب بنفسك واستأنس بوحدتها.. تبقى سعيدا إذا ما كنت منفردا.. قالتلي يابني الجنة من غير ناس ما تنداس.. والنار العذاب فيها فرداني.. انت بس عشان قاعد لوحدك فاكر إنك مبسوط.. بس أنا حاسه بيك انت بتنام من زعلك على نفسك.. أقولك إتجوز وطلق يابني .. آه.. إتجوز وطلق.. خوض التجربة يابني أحسن من إنك تفضل تقول يا رتني لما تكبر .. قولتلها يا ماما أن يفوتك القطار خير من أن يدهسك.. قالتلي يابني ما تتشعلق في القطر من ورا.. مش لازم تركب جواه.. اتشعلق ويبقي إسمك ركبت مع اللي ركبوا.. وقالتلي مش نفسك تتجوز وتحب.. قلتلها تعرفي جورج اوريل بتاع رواية مزرعة الحيوان قال لا يرغب المرء في الحب بقدر ما يرغب بأن يفهمه أحد.. وإنت يااماما مش فهماني.. أنا عايز ألاقي نفسي في إنسانه.. مش ألاقي إنسانه عشان ألاقي نفسي.. قالتلي بص يا روح أمك عشان أنا زهقت معاك ومفيش منك رجا.. تلاقي نفسك ما تلاقيش نفسك.. يوم الثلاثاء الجاي فيه عروسة هتروح تشوفها وتوافق عليها.. لو كنت اتوكست وخطبت وجبت شبكة كان زمان سعرها دلوقتي الطاق طاقين.. وتنهدت شويا وقالتلي.. انا عيزاك مبسوط والله يابني.. قلتلها يا ماما السعادة الحقيقية هي انسجام داخلي للذات مع النفس.. مش إني ألاقي السعادة في واحدة.. قالتلي ما تكملش يابني وروح نام.. يا رتني ما علمتك.. يا رتني قعدتك على القهوة زي اخوك الكبير.. الغلطة غلطتي ما دقتش لك الهون وانت صغير.. عمرك ما سمعت كلامي..

لو كان اختيار الزوج بصفاء النية وطهارة قلب المرأة لما تزوجت أسيا من فرعون .. ولو كان اختيار الزوجة الصالحة بحكمة الرجل ورجاحة عقله، لما تزوج نوح ولوط عليهما السلام من خائنتين للحق .. ولو كان صلاح الإبن وفساده بسبب الأب لما أنجب آزر خليل الرحمن ولا غرق ابن نبي من أولى العزم مع الكافرين .. ولكنها ابتلاءات أخذ بعضها برقاب بعض ليصبر من يصبر ويحتسب من يحتسب و ليميز الله الخبيث من الطيب، ونأخذ منها العبر .. فصبراً علي ما لم تحط به خبرا !!

‏عزيزتي التي هي أنا/ أنا أعلم أنّ ما تمرين به شاقٌ ومُرهق، ولكنكِ قويةٌ وقادرة على تأدية هذا التكليف وأجتيازه ببراعة، من يملك قلبًا كقلبك لايسقط أبدًا، أنا فخورة بكِ جدًا..💚

" ما تستبعدهاش عن ربنا .. ومتستكترهاش علي نفسک .. الحلو جاي جاي .."♥️

منتظرة بكُل شغف ويقين وحُب، التحوُّل الجميل لحياتي بعد ما ربنا يراضيني والحياة تنصفني وأخُد كل حاجه بتمناها، خاصة بعد فترات التعب والمُعاناة ليل نهار! ربنا يراضيني ويراضيكم.♡゙

إن شاء الله لما أتزوج، زوجي ميرضاش يخليني أتعامل مع المجتمع الخارجي نهائي، ولا يرضى أخرج من البيت، أبقى في البيت أنشُر الغسيل، وأولع بخور، أرتب البيت، أحط صينية البطاطس بالفراخ في الفرن، ويكون دا محتوايا اليومي.❤

اقعد انت بقا عك طول حياتك واستنزف في طاقتك ومشاعرك ،، من غير م تحط احتمال او اعتبار انك ممكن مستقبلا تعرف ناس تكمل معاك.. من غير احتمال انك تلاقي شخص انضف/اجمل/احسن مما تتخيل ويحبك لذاتك ليس لانجازاتك.. شخص First rate كده.. ساعتها هتكون شايف انك مش كافي له/مش مستعد ولا عندك اي حاجه تديهاله ..او انك مش قد مسئوليه احتواء هذا القدر من الجمال والصدق.. ياريت نحط فرضية ان كل شئ وارد وانك لازم تحافظ علي نفسك ومشاعرك ومتديهاش لاي حد معدي والله يا جماعه حرام مشاعركم تبقي overused.. حوشوا مشاعركم مهما حسيت انك وحيد او منسي او كل اللي حواليك معاهم ناس وانت لا ،، بلاش تبقي مع اي حد معدي والسلام عشان هتلاقي الحد ده بيـ break his words ..وللاسف انت اللي هتغرق.

لو فيه حد هيزعل من الوضوح، والصدق، وإنك تكون إنسان صاحب وش واحد مش مليون يبقى شخص مختل!.. أحياناً بتبقى مشكلتك في وجهة نظر بعض الناس إنك كنت حقيقي زيادة عن اللزوم.. بس في الواقع دي المشكلة اللي تستحق تفخر بيها مش تزعل بسببها، ولو هتتشاف كـ أزمة فهي أزمة اللي هيشوفها كده مش أنت.. من كُتر ما عيون الناس أخدت على المزيف، والمحلو، والمعطوب بقت بتلغوش قدام الحقيقي، والحلو، والأصلي.