Najmiddin Turon

Бир юпанч бор эди айтарли, Бир ишонч бор эди идраган. Битта йўл бор эди қайтарли, Битта гул бор эди қайтмаган. Оппоқ қор ёғганда гупуриб, Ох-зорлар оғдирди эсимдан. Оқшомга юз бурдим тонг туриб, Ох, Соғинч, сен кимнинг исмисан?.. Бу қисқа кўринган кунмиди, Бу қистаб жон олар тундир-а? Май тусаб турибман тўлдиру, Ҳа, истаб турибман ўлдира... Ютганда энг сўнгги ютимни, Чиққанда оғринчнинг измидан, Айтқани, унутган отимни, Ва, соғинч, сен кимнинг исмисан?.. Н.Э. Декабрь, 2022

* * * Келма! Соғинчни ўлдирар сенинг ташрифинг, Дийдорга тўйишдан қўрқаман, келма. Келма! Ҳижроннинг овчиси бўлган висолга, Ўлжасин беришдан қўрқаман, келма. Келма! Туғилмаган шеърлар туғилсин ҳали, Уволга қолишдан қўрқаман, келма. Келма! Бир олам бахт билан келарсан, келсанг, Мен бахтли бўлишдан қўрқаман, келма. Келма! Мана шу дард билан, гулим, тирикман, Даводан ўлишдан қўрқаман, келма. Нажмиддин Эрматов

Bugun do‘stim, jigarim Исломжон Қўчқоров ning dunyoni to‘ldirib tug‘ilgan kuni! Tabriklayman, jo‘ra! Haq yo‘lidan toymang! Ислом Қўчқoровга Бизга берилган замон, Сузмакка саёз келди. Эрк деб уруғ қададик, Тинмасдан аёз келди. Тил қантариқ келди ва Тори узук соз келди. Умримиз шундай ўтса, Яшаш бекордир, жўра. Шоир йиғлаб шеър айтса, Кулиб бораётирмиз. Бирор мард наъра тортса, Қувиб солаётирмиз. Не зотлар ўтди тур деб, Тизза букиб ётирмиз. Бундай қавм қулликка, Мудом дучордир, жўра. Босолмасдан ўмганин, Кўкка чиқди ҳар султон. Пастга тушгин де унга, Кетса кетсин битта жон. Машраб осилган дорнинг, Оғочи бутун ҳамон. Эгилмаган ҳар бошга, Дорлар хумордир, жўра. Бир ватан кўрдим бунда, Кўзи тўла жиққа ёш. Бир туйғу туйдим унда, Йўқлигимни қилди фош. Илдизи узук келса, Дорга ҳам арзимас бош. Бугунимиз ёр эмас, Қурган ағёрдир, жўра. Бўзтўрғай бўзлаб учган, Даштимда дайдиб келдим, Этак силтаб кетгандим, Элни деб қайтиб келдим, Куюк келди кўкайим, Кўзёшдай қалқиб келдим. Шоир бўлсанг қисматинг, Наҳот равондир, жўра. Чилвир чўлнинг йўлида, Ғиротдан из қолгандир, Бахши ўшал йўл томон, Кўзин тикиб толгандир. Ё пирим, дегин, қўзғал, Кураш бизга қолгандир... Ё эл учун алп туққан, Фақат мозорми, жўра. Н.Э.

Qor misoli kaftingga qo'ndim, Erib ketdi kafting taftimdan. Tisarilding, axir bilmasding, Qorning cho'g'dek yonishin, erkam. Men yonardim, sen hayron eding, Hadik ichra yumding ko'zingni. Ko'z o'rgangan, yurilgan o'sha, Yo'llar tomon burding yuzingni. Ketayapsan, yonayapman men, Ortingda qor- oppoq alanga. Olding sovuq- yog'ayapti qor... Ishonch bilan boqding o'shanga. Ranjimagin, yonarkan deya, Ketavergin sen o'sha izdan. Ranjimayman, dunyoning sovuq Qorlariga ko'nikkan qizdan. N.E.

Eski yangi!

Умримиз шундай ўтса, Яшаш бекордир, жўра... Шоир Нажмиддин Эрматовдан ёниқ шеърлар! 📺 "Қақнус" 👉 @mm_telekanal

qarsak bu- olqish emasdir balki balki u isyondir yetgancha majol minbardan uchgan so‘zlarni qo‘ymasdan qo‘nishiga hurkitishga urunishdir ehtimol N. E.

Тушларда қушларга қўшилиб учдим, Гоҳо булутларга тўш уриб учдим, Ўнггим оғир келди, пойингга тушдим, Тийрамоҳ, титраб оҳ чеккани келдим. Сарбон йўл кўрсатди, ўзи кўр эди, Гўрўли чиқмади , оғзим гўр эди, Жасорат унмади, манглай шўр эди, Бағрингга бир гиёҳ эккани келдим. Тақвим қашқирдайин умримга ўчми? Яширин бир титроқ бўғзимга кўчди, Кўзимда бир чироқ бор эди ўчди, Ўзимни мен сўроқ этгани келдим. Бир сулув қалбимга ўт қалаб ўтди, Ҳижронга кўнувчан жон тилаб ўтди, Лек руҳим ўтгунча ишқталаб ўтди, Ёшимни мен гувоҳ этгани келдим. Қабрлар қирларга туташиб борар, Йиллар бирин-кетин қир ошиб борар, Руҳим само сари тирмашиб борар, Қимсатдан мен йироқ кетгани келдим. Ул туғмас қабрда сўзлар сурунгай, Қашқирдан қочиб тан бекор урунгай, Асли тириклигим ёлғон кўрингай, Дор келтир, мен гуноҳ этгани келдим.

O‘shanda kuz edi - fasli nihoya, Shaffof sovutini kiyar edi ko‘l. Bir ayol dirdirab g‘o‘za yulardi, Nigohlari dilgir, yanoqlari ho‘l. O‘shanda kuz edi, qiyilgan kunlar Charnagan qismatday qiymati o‘chgan. Bir ayol dirdirab g‘o‘za yulardi, O‘ttiz kuzagida uch bahor ko‘chgan. O‘shanda kuz edi, Qora qarg‘alar Tentirab uchganda qo‘noq axtarib, Bir ayol dirdirab g‘o‘za yulardi, Yetmish kiprigida anduh ko‘tarib. O‘shanda kuz edi, Yo‘qsil yovg‘oni Sovugan sandaldan taft olmagan kun. Bir ayol dirdirab g‘o‘za yulardi, Vatanday unutlig‘ qolgani uchun. Necha kuzak o‘tdi o‘shandan beri, Qarg‘a tumshug‘ida qish keldi ko‘p bor. Mazlum ko‘zyoshida siyoh ivitib, Xalq, deb shior bitdik betakror - takror. Yangi qor yog‘yotgan shu yangi yurtda, Bir sezgi borlig‘im etmoqda barbod: Hamon g‘o‘za yulib yurganday ayol, Haliyam o‘shanday turganday hayot... N. E. noyabr 2020

Yomg‘ir yog‘sa, umid gulday unar bo‘lsa, Kemtik ko‘ngil xalqobdayin to‘lar bo‘lsa. Yo‘l chetida yomg‘irpo‘shsiz turgandir deb, Ketgan yoring qaytishiga ko‘nar bo‘lsa. Ko‘lob yo‘llar yag‘rinida yo‘l ko‘rsatib, Yolg‘izlikning azobini cho‘ng ko‘rsatib. Pinhon tutgan sog‘inchini etib oshkor, Boshlab kelsa ro‘molchasin ho‘l ko‘rsatib. Nigohidan yomg‘ir yuvgan so‘z taralsa, Ifor sochib barmog‘ingda soch taralsa. Peshonangga bitgan taqdir bo‘lib mulzam, Ul yor bilan bir ketgulik yo‘l yaralsa. Xovuchida gulgun gulob quyib bersa, Tag‘in yomg‘ir tinmay battar quyib bersa. Tosh ko‘chada chopsalaring qo‘l ushlashib, Oh, bu dunyo o‘z holingga qo‘yib bersa. Olib borsang, qo‘rg‘oningda issiq tancha, Ostonada oyoq ilsa rafiq kecha. Derazadan borligini etib isbot, Yomg‘ir tinmay yog‘aversa jon chiqquncha. Bir tong kelsa avvaliga o‘xshamayin, Yengillashib borsang quyosh chiqqan sayin. Yomg‘ir tingan dunyosiga etak siltab, Uchib ketsang ul yor ila bir bug‘dayin. Yomg‘ir yog‘sa... N. E. fevral, 2021

Бир ёқда суйгулинг кўзингдан ғойиб, Бир ёқда ватанинг ғарларга талош. Бир ёқда андуҳинг бормоқда бойиб, Бир ёқда қароққа тўлқин урар ёш. Бир ёқда шимолга сургун йигитлар, Бир ёқда жувонлар жамиятга қул. Бир ёқда ялоғи тиллодан итлар, Бир ёқда танглайи тешилган булбул. Бир ёқда Оролдай шўрлаган манглай, Бир ёқда адашган йўлчидай авом. Бир ёқда ёлғонни айтишар чиндай, Бир ёқда алданиш этади давом. Бир ёқда қулликни тусар кексалар, Бир ёқда ёшанглар фарқи йўқ ҳар ёқ. Бир ёқда келажак ҳиссиз ингранар, Бир ёқда қабрлар ҳайқирар узоқ. Бир ёқда бемалол қиш келаётир, Бир ёқда кўчини тўплар тийрамоҳ. Бир ёқда бемажол дил йиғлаётир, Бир ёқда самога ўрлаётир оҳ. Бир ёқда ҳаммаси ўткинчи гўё, Бир ёқда ҳар бири жон беришга тенг. Бир ёқда измидан қўймайди дунё, Бир ёқда бир ёққа кетгинг келар сен. Н. Э. ноябрь, 2021

Чопиб-чопиб тоғларда Бориб-бориб адашсам. Сулув-сулув оҳулар Орқасидан эргашсам. Баланд-баланд қоялар, Чуқур-чуқур зовларда Тақиб қилса қашқирлар Омон чиқсак овлардан. Зилол-зилол булоқдан Симиб-симиб сув ичсам. Куюк кўнгил жисмима Яхтай ховур тирмашса. Қаттиқ-қаттиқ тошларга Бериб ётсам кўксимни, Ҳайрон-ҳайрон какликлар Учиб ўтса устимдан. Эзиб-эзиб ҳаққушлар, Мунглиғ куйин бошласа, Эзғин-эзғин хаёллар Келиб кўзим ёшланса. Ўтлиғ-ўтлиғ туйғулар Чорлаганда кўнглимни Қорли-қорли кўчкилар Ёпиб қўйса йўлимни. Юксак-юксак чўққилар Кетай, десам қўймаса, Бориб-бориб тоғларда Қолсам! Биров билмаса. Сентябрь, 2022

Сентябрь тиғ урди август ортидан, Япроқларга сачраб кетди қон. Ҳолсизланган қуёшни судраб, Кетиб борар эди саратон. Куйиб куйлар эди ҳотима куйин, Атиргул шохидан кетолмаган қуш. Наводек ҳавога кетолмам сингиб, Уёғи хаёл ва у томони туш. Қайта келаверар армонлар ёдга, Ўтмишга интилиб тасаввур ҳалак. Тирама тиғига урар ўзини, Саратон қонига беланган юрак. ©Нажмиддин Эрматов

Булбуллар бош олиб кетгандай боғдан, Фанога кўчгандай сабуҳий саслар. Боғ аҳли энтикиб қулоқ осадир, сайраётир қафаслар. Тулпор туёғини тупроқ унутган, Ҳурлик шиддатини мавҳ этган ғовлар. Боғ аҳлин эрк дея топингани ул - чопаётир тушовлар. Қушлар самосини ишғол айлабон, Парвоз тасаввурин этганча бадар, Боғ аҳлин кафтида кучга тўйиниб, учаётир қарсаклар. Боғда боғ қолмайдир, тўрт тараф қолар, Тўрт тараф қибладир, шу эрур самар. Боғ аҳлин кўксидан аста бош олиб, кетаётир юраклар. Нажмиддин Эрматов июль, 2019

Товатош мисоли қизимоқда ер, Соя жон сақлайди дарахт пинжида. Қуриган майсани топтаганча ел Саросар кезмоқда гул илинжида. Ховучимда сув йўқ тутайин десам... Кўнгил куяверар кунга қастма-қаст, Кўкка ўрлаб борар куйинди ҳиди. Кутган мен эдиму келган у эмас, Аввал ҳам шунчалар суюклимиди?.. Белги ҳам бермабди борайин десам... Замин манглайимдек ўлчовли ҳудуд, Эрким бўйнимдаги арқонимга тенг. Куйган тулуп каби сиққанда вужуд, Қузғун мисол ҳижрон юрагимни ер. Ўзга бир манзил йўқ кетайин десам... Кечам—саҳифаси нам теккан китоб, Бугун—дўконига ўт кетган тужжор. Эртам—мавжудлигин этолмай ҳитоб Молининг қийматин билмаган даллол. Бисотим ҳам бўм-бўш олайин десам... Қуриган сойларда тарс ёрилар ер, Соянинг оқшомдан бордир умиди. Гулнинг сўлганидан хабар берар ел, Аввал ҳам шунчалар суюклимиди? Дунё йўл бермади ўтайин десам... Н.Э. Июль, 2022

*** Tun. Yomg'ir. Qorishiq ifor. Uchqur xayol, qadamlar asta. Borliqqa sochilib keladi ketging, Yomg'ir bo'lsam kerak, aslida. Sen yo'qsan. Hechkim yo'q. Nimalardir bor. Nenidir tuyarsan yomg'ir ostida. Men axir osmonda yashaganman-ku, Ne qilib yuribman zamin ustida?.. Shayton. Taqiq. Va o'sha meva. Afsur bor quvg'indi odam naslida. Negadir ularga aloqam yo'qdek, Yomg'ir bo'lsam kerak, aslida. ©Najmiddin Ermatov Umida Bekmurza ijrosida... @bmpjpg

qarsak bu- olqish emasdir balki balki u isyondir yetgancha majol minbardan uchgan so‘zlarni qo‘ymasdan qo‘nishiga hurkitishga urunishdir ehtimol N. E.

Shamning umri juda ham qisqa, Bir sokin kechada yongulik xolos. Kapalak ham uzoq yashamas bunda, Bir tongdan bir shomga yetgulik xolos. Gulning-da hayoti ko‘pga cho‘zilmas, Birgina bahorda ungulik xolos. O‘ylasam, bizning ham umr o‘lchovli Bir-ikki sultonni ko‘rgulik xolos... N. E.