Tech Xtream

شركة ميتا تهدد بإغلاق فيسبوك وإنستجرام في أوروبا 😯 بعد أيام من خسارة شركة فيسبوك أكثر من 25% من قيمتها السوقية أزمة جديدة بتواجهة شركة ميتا بعد ما ذكرت في تقريرها السنوي إنها ممكن تضطر لإيقاف بعض خدماتها زي فيسبوك وانستجرام في أوروبا بسبب بعض الإجراءات التنظيمية الأوروبية اللي في حالة تطبيقها هتمنع فيسبوك من نقل بيانات المستخدمين الأوروبيين إلى الولايات المتحدة لمعالجاتها، وهيكون مطلوب من الشركة تخزين البيانات ومعالجتها داخل أوروبا.. وبالتالي هتخضع العملية دي لقوانين البيانات الأوروبية اللي هتمنع الشركة أو هتحد من قدرتها على استغلال البيانات للتربح. جمال ودلال ❤️

شركة فيسبوك أضافت خاصية جديدة للعالم الافتراضي بتاعها (ميتافيرس) اسمها "Personal Boundary".. ودي ميزة بتمنع أي شخص من الاقتراب بمقدار مسافة معينة من شخصيتك داخل الميتافيرس. فيسبوك طورت الميزة دي بعد شكوى عدد كبير من النساء من تعرضهم للاعتداء اللفظي والتحرش.

المدير المالي لشركة فيسبوك "ديفيد وينر" قال في تصريح للمستثمرين إن خاصيّة "App Tracking Transparency" اللي أضافتها شركة آبل لنظام الآيفون هتسبب خسارة مالية لفيسبوك تصل إلى 10 مليار دولار. خاصيّة "App Tracking Transparency" هي واحدة من أفضل مميزات الآيفون حاليا لأنها بتسمح للمستخدم بالتحكم بدرجة أكبر في بياناته، وده من خلال منع التطبيقات من الحصول على معرّف الجهاز Advertising ID اللي من خلاله بتقدر تطبيقات زي فيسبوك تتبع نشاطك على الويب أو التطبيقات التانية. بما إن فيسبوك بتعتمد على البيانات بشكل رئيسي في أرباحها من خلال استخدامها في الإعلانات.. متوقع يحصل انخفاض كبير في دقة الاستهداف وبالتالي خسارة كبيرة في العوائد من الإعلانات على الآيفون. على فكرة السنة اللي فاتت جوجل أرسلت إيميل لمطوري تطبيقات الأندرويد بتعرفهم إنها بتشتغل على تطوير ميزة مشابهة في الأندرويد.

في البداية يذكر التقرير حادثة اغتيال "محمود المبحوح" التي نفذها الموساد في دبي، وأن هذا الأمر أغضب محمد بن زايد وأدى إلى قطع العلاقات مع الكيان بأمر منه، ولكن بمجرد أن عُرض عليه برنامج بيجاسوس والقدرة التي سيمتلكها للتجسس على معارضيه وخصومه في الداخل والخارج وافق على عودة العلاقات مقابل حصوله على البرنامج. تلت الإمارات المملكة العربية السعودية وتحديدا منذ ظهور محمد بن سلمان الذي أراد الحصول على البرنامج لمراقبة المنشقين من العائلة والمعارضين له، وبالفعل نجح في الحصول عليه مقابل بعد التسهيلات مثل تقارب العلاقات بين الكيان والمملكة، والموافقة الضمنية على اتفاقية السلام "المزعومة" تحت مسمى "الاتفاق الإبراهيمي"، وأيضًا مقابل 55 مليون دولار دفعة أولية.. وهو مبلغ باهظ حتى بالنسبة لتقنية بهذه القدرة. بعد حادثة اغتيال الصحفي السعودي "جمال خاشقجي" وفضيحة الشركة الصهيونية وتورط برمجياتها في عملية التجسس التي أدت في النهاية لعملية الاغتيال قررت الشركة قطع علاقتها مع النظام السعودي. لم يعجب هذا الأمر محمد بن سلمان الذي قرر الاتصال مباشرة برئيس الوزراء بنيامين نتن ياهو لمساعدته.. وبالفعل وافق نتن ياهو على ذلك ولكن بمقابل وافق عليه بن سلمان فورا. كان المقابل هو السماح لطائرات الكيان الصهيوني باستخدام المجال الجوي السعودي للمرة الأولى على الإطلاق.

كشفت جريدة النيويورك تايمز في تقرير مطول لها عن كيفية استغلال الكيان الصهيوني لبرمجية التجسس الشهيرة بيجاسوس Pegasus لتعزيز نفوذه والتأثير على القرارات السياسية في كثير من دول العالم.. خصوصا في الدول العربية. يبدأ التقرير بالحديث عن علاقة الكيان بالولايات المتحدة، وكيف كانت الحكومة الأمريكية على وشك شراء برنامج تجسس يُسمى The Phantom يستطيع اختراق أي هاتف أمريكي فقط عبر رقم الهاتف وسرقة أي بيانات على الهاتف، بل وتحويله إلى أداة تجسس عبر التحكم في الكاميرا والمايكروفون. ينتقل التقرير بعد ذلك للحديث عن كيف ساهمت أدوات التجسس التي تصنعها شركة NSO Group في تعزيز العلاقات بين الكيان ودول كالهند والمكسيك والمجر، وجني مكاسب سياسية مقابل بيع برمجيات التجسس لتلك الدول. لكن الجزء الأبرز في التقرير هو الجزء الذي تحدث عن كيفية استفادة الكيان من بيجاسوس لإقامة أو تعزيز العلاقات مع الحكومات العربية.

اليومين دول ممكن تلاقي نفسك فجأة بتتابع صفحات جديدة كتير بالرغم من إنك عمرك ما اشتركت فيها.. السؤال ده اتسألته كتير على الجروب والموضوع مش متعلق باختراق.. ولكن باختصار اللي عنده صفحة فيسبوك يقدر حاليا يعمل نسخ للجمهور بتاعها على صفحة تانية عشان يكبرها.. ومعظم أصحاب الصفحات شغالين في الموضوع ده بالفلوس.. مفيش حل للقصة دي للأسف لأنها مشكلة من الموقع ابن المبقعة ده..

هاكر يقطع الإنترنت عن كوريا الشمالية 😯 السنة اللي فاتت فريق مشروع جوجل Project Zero نشروا تقرير عن حملة بتقودها كوريا الشمالية بتستهدف الباحثين الأمنيين لاختراقهم وسرقة أدواتهم وأي معلومات أو ثغرات اكتشفوها. واحد من الباحثين اللي تم استهدافهم (اسمه الحركي P4x) قرر ينتقم من خلال عمل فحص لأنظمة الشبكات وأجهزة إعادة التوجيه الخاصة بالإنترنت الداخلي للدولة، بالإضافة لنظام التشغيل بتاعهم المعروف باسم Red Star OS. بالفعل قدر P4x يلاقي مجموعة ثغرات نجح من خلال استغلالها في عمل هجوم حجب خدمة DoS على وقطع الإنترنت عن الدولة بالكامل.

يبدو إن محاولات الشركة لعمل Rebranding وتغير اسمها لميتا ومحاولة الدخول لمجال جديد (ميتافيرس) لم يحقق النتائج المطلوبة. بعد نشر أرقام فيسبوك خسر السهم بتاعها بشكل فوري 20% من قيمته وخسرت الشركة 200 مليار دولار من قيمتها السوقية ❤️

لأول مرة منذ إنشائها تسجل شركة فيسبوك خسارة في عدد المستخدمين النشطين يوميا بعد إفصاح الشركة عن أرقامها للربع الأخير من 2021 😯 الشركة سجلت انخفاض بمقدار 1 مليون مستخدم يومي.. ويمكن الرقم يكون مش كبير مقارنة بعدد المستخدمين الإجمالي 1.92 مليار مستخدم، لكنه دليل على معاناة واضحة بتعيشها الشركة بدأت تظهر في لغة الأرقام.. ومن أبرز المشاكل دي: ▪️ فيسبوك منصة العجائز (المنصة لا تستطيع جذب المراهقين مثل منصات سناب شات وتيك توك). ▪️ السمعة السيئة للشركة بعد عدة فضائح تتعلق بانتهاك خصوصية المستخدمين، وتأثير منتجاتها على الصحة النفسية لهم (آخرها تسريبات فرانسيس هاوجن). ▪️ عدم قدرة الشركة على القيام بأي عمليات استحواذ جديدة بسبب قوانين مكافحة الاحتكار (حتى موقع الصور المتحركة Gighy ممكن تتلغى عملية استحواذ فيسبوك عليه). ▪️ قطاع الواقع الافتراضي في الشركة المسئول عن تطوير منتجات الـVR ونظارة Quest حقق خسائر 10 مليار دولار العام الماضي. ▪️ تحديث شركة آبل لنظام تشغيلها على الآيفون للسماح للمستخدم بمنع التطبيقات من تتبع نشاطه (حجم من قدرة فيسبوك على عرض إعلانات على الآيفون وبالتالي قلت أرباحه منها).

جوجل عايزة تخليك تدفع فلوس عشان تعمل نسخ احتياطي للشات بتاعك على واتساب 🙂 شركة جوجل بتمنح مستخدمي الأندرويد مساحة مجانية 15 جيجابايت على منصة التخزين السحابي بتاعتها Google Drive. لما بتعمل نسخ احتياطي للشات بتاعك على واتساب مهما كان حجمه مش بيتحسب ضمن المساحة المجانية بعد اتفاق اتعمل بين جوجل وفيسبوك من عدة سنوات. دلوقتي يبدو إن جوجل قررت تلغي الاتفاق ده ضمن مجموعة قرارت أخدتها لتقليل المساحة المجانية اللي بتمنحها للمستخدمين زي ما ألغت موضوع مساحة التخزين الغير محدودة على Google Photos السنة اللي فاتت. الكلام ده اكتشفه موقع WABetaInfo بعد ما عمل تحليل لآخر نسخة بيتا من واتساب.. وحسب الموقع فالمساحة اللي هتقدر تستخدمها مجانا ممكن يصل حجمها لـ 2 جيجابايت فقط.. ودي مساحة قليلة لو مقضيها صور وفيديوز في الشات.

فيديو لشحنات أمازون المنهوبة أثناء نقلها عبر قطارات البضائع في أحياء لوس أنجلوس في أمريكا. القطارات دي بتشحن بضائع أغلبها من موقع أمازون، وحوالي 90 عربة بتتعرض للنهب يوميا بالشكل ده. الناس بتهجم على القطارات يفتحوا الشحنات وياخدوا ما قل وزنه وغلى ثمنه..

من أكتر الأخطاء المضرة جدا اللي معظم الناس بتعملها هو الاعتقاد إن بمجرد مسح الملفات من موبايلها إن الملفات بالفعل تم حذفها من ذاكرة الجهاز وده خاطئ تماما.. وللأسف ناس كتير بتعتمد على الطريقة دي في حذف ملفاتها لما تكون عايزة تبيع الجهاز بتاعها مثلا أو حتى بتعمله فورمات.. ولكن برضه صورهم وفيديوهاتهم بتكون قابلة للاستعادة 🤦‍♂️ ➖➖➖➖➖➖➖➖➖➖ أي ملف إلكتروني بيتكون من مجموعة من الأرقام 0-1 ودي اللغة اللي يقدر الكمبيوتر يفهمها.. لما بيتم حذف ملف ما بالطريقة العادية بيفقد الكمبيوتر القدرة على الوصول لحاجة تشبه الجدول كان بيعتمد عليها في الوصول للسيكتورز أو الأماكن على الهارد ديسك أو ذاكرة الموبايل اللي متخزن عليها الملف، لكن في نفس الوقت الملف نفسه (اللي هو الآصفار والآحاد) بيفضل موجود زي ما هو في مكانه، وباستخدام أي برنامج Recovery بسيط ممكن نستعيد الوصول للملف مرة تانية 📂 ➖➖➖➖➖➖➖➖➖➖ لما نحذف ملف بيظهر لنا إن فيه مساحة فاضية تم إضافتها للجهاز.. لكن احنا عارفين إن الملف لسه موجود متحذفش 🤔 وده ببساطة لأن نظام التشغيل بيقولنا إن المساحة دي أصبح متاح إننا نكتب عليها ونخزن عليها ملفات، وعشان كدة نظام التشغيل بيعتبر المساحة اللي بتشغلها بيانات ملف محذوف هي مساحة فاضية. الحل المتاح عشان نحذف الملف بشكل نهائي هو الكتابة على مساحة الملف المحذوف، يعني نمسح ملف ونخزن ملف جديد على نفس المساحة وبكدة بيانات الملف الأصلى بتتحذف للأبد.. والعملية دي معروفة باسم التمزيق أو Shredding. ➖➖➖➖➖➖➖➖➖➖ الحذف بطريقة التمزيق سهل جدا ومش بيحتاج أي خبرة.. ممكن نستخدم تطبيق بسيط على الموبايل نقدر من خلاله نحذف أي ملف بشكل نهائي بالاعتماد على الطريقة دي ❎ ده فيديو بسيط فيه معلومات مفيدة جدا عن عملية الحذف وازاي بتتم وإيه اللي بيحصل للملف بعد الحذف، مع شرح لتطبيق مجاني بسيط جدا نقدر نعتمد عليه في حذف الملفات بشكل نهائي من الموبايل 👇 https://bit.ly/2GedUO6

لما تبقى لسه خاطب جديد وتسمع حماتك بتقول إنها عايزة تشتري باور بانك..

شركة zLabs المتخصصة في اكتشاف التطبيقات الضارة نشرت تقرير عن 470 تطبيق ضار كان موجود على متجر جوجل بعدد تحميلات أكتر من 105 مليون تحميل أغلبهم في الدول العربية 🙂 معظم التطبيقات كانت بتتخفى على شكل ألعاب وأدوات لتعديل الصور، ولكن هدفها الحقيقي كان سرقة أرصدة المستخدمين من خلال الاشتراك في خدمات مدفوعة عبر شريحة الموبايل. أغلب الأجهزة المصابة كانت في: ▪️ مصر 💪 ▪️ تونس ▪️ العراق ▪️ باكستان ▪️ السعودية في أول تعليق رابط لجميع التطبيقات المصابة.. ادخل للرابط واتأكد إن مفيش على موبايلك أي تطبيق من التطبيقات دي 👇

هجوم على مزرعة تعدين في إسبانيا 😂😂😭

القرد ده اتباع النهاردة مقابل 1.3 مليون دولار.. وده القرد الوحيد اللي ينفع يبقى في عين امه غزال

في سنة 2018 في شخص قرر يستثمر 50 ألف دولار في عملة THETA.. وبالفعل اشترى العملات وخزنها على محفظة Trezor One، ودي محفظة هاردوير خاصة بالعملات الرقمية حجمها في حجم الفلاشة كدة. بعد مرور كام سنة أصبحت قيمة العملات أكتر من 2 مليون دولار، لكن لما حاول يبيع العملات اكتشف إنه نسى كلمة المرور الخاصة بالمحفظة وهي عبارة عن 5 أرقام. بعد 12 محاولة فاشلة قرر يوقف المحاولات لأن بعد 16 محاولة خاطئة المحفظة بتتمسح بشكل تلقائي. صاحبنا لجأ لمهندس كمبيوتر معروف اسمه "جو جراند" عشان يساعده يفتح المحفظة.. وبعد شغل لمدة 12 أسبوع متواصل وباستغلال ثغرة في فيرموير قديم للمحفظة قدر جو إنه يفتح المحفظة مرة تانية باستخدام تقنية معروفة باسم "Fault injection attacks" وده هجوم بيتم عبر التلاعب بالتيار الكهربي الداخل للشريحة الإلكترونية لتعطيل وسائل الحماية والدفاع الخاصة بيها.. ومن خلال الهجوم ده يقدر يوصل للمعلومات المخزنة في الرام ومنها كلمة المرور. مشكلة نسيان كلمات المرور أو ضياعها من أسوء المشاكل في المجال. في البتكوين فقط على سبيل المثال فيه أكتر 3.7 مليون عملة مفقودة بسبب نفس المشكلة.. قيمتهم حاليا تتجاوز 140 مليار دولار.

أحدث عروض الإنترنت المنزلي من شركة الاتصالات الأمريكية AT&T باقة إنترنت فايبر بسرعة تصل إلى 2 جيجابت في الثانية للرفع والتحميل ومعاهم اشتراك HBO مقابل 110 دولار. باقة إنترنت فايبر بسرعة تصل إلى 5 جيجابت في الثانية للرفع والتحميل ومعاهم اشتراك HBO مقابل 180 دولار. طبعا هما هناك 110$ و 180$ زي 110ج و 180ج عندنا كدة.. وسعة الباقات غير محدودة 🙂

تعرف إن عندك فرصة تحقق ثروة من خلال تقنية الرموز الغير قابلة للاستبدال NFT 🤔 نشرت قبل كدة بوست عن شاب إندونيسي اللي في الصورة ده، وإنه قدر إنه يحقق ثروة تجاوزت المليون دولار من خلال بيع صوره على هيئة NFT. طبعا حاجة زي دي مش هتنفع مع الكل.. لكنها مناسبة لتوضيح إمكانية بيع أي محتوى رقمي بالتقنية دي وتحقيق أرباح من خلاله. ➖➖➖➖➖➖➖➖➖➖➖➖➖ يعني إيه NFT؟ الـNFT اختصار Non-Fungible Tokens أو الرموز الغير قابلة للاستبدال. ببساطة هي تقنية لتوثيق ملكية الأصول الرقمية. يعني واحد رسم صورة وعرضها للبيع كـNFT.. اللي بيشتري الصورة بيكون معاه حاجة زي شهادة موقع رقميا بملكيته للصورة.. ويقدر بعد كدة يبعها لشخص تاني أو يحتفظ بيها. ➖➖➖➖➖➖➖➖➖➖➖➖➖ ليه واحد يشتري حاجة ممكن ينزلها ببلاش؟ ليه الأثرياء بيشتروا الأعمال الفنية بملايين الدولارت وهما ممكن يشتروا نسخة تقليد بفلوس أقل بكتير؟ + إن ممكن اللي بيشتري NFT بيكون محتاج يستخدمها تجاريا وبالتالي لازم يكون معاه رخصة باستخدامها. ➖➖➖➖➖➖➖➖➖➖➖➖➖ إيه المحتوى اللي ممكن أبيعه كـNFT؟ أي محتوى رقمي زي الصور، الفيديو، الصوت ممكن تبيعه NFT. لو كنت مصمم أو رسام ديجيتال أو فوتوجرافر أو بتعمل ڤويس أوڤر تقدر تبيع محتواك ده كرمز غير قابل للاستبدال. ➖➖➖➖➖➖➖➖➖➖➖➖➖ أنا سمعت إني محتاج أدفع فلوس عشان أبيع NFTs؟ صحيح. عشان تضيف محتوى رقمي للشبكة وتسجله محتاج تدفع رسوم. لكن في طريقة تانية مجانية. ➖➖➖➖➖➖➖➖➖➖➖➖➖ أنا لا مصمم ولا رسام ولا عندي أي موهبة وعايش عالة على المجتمع.. إيه اللي ممكن أبيعه كـNFT؟ متقولش على نفسك كدة يا حبيبي انت جميل. معاك موبايل بكاميرا البس كاب بالعكس وانزل الشارع صور الحاجات اللي تشوفها مميزة، صور مواقع أثرية، الأسواق، التجمعات.. عندك اليوتيوب افتح واتعلم تصميم اتلحلح يا أخي. ➖➖➖➖➖➖➖➖➖➖➖➖➖ أنا مفيش عندي خبرة في البتاع ده أبدأ منين؟ ده فيديو لسه منزله النهاردة فيه كل حاجة محتاج تعرفها. يعني إيه NFT؟ ازاي تسجل في موقع لبيع NFT؟ ازاي ترفع محتواك للموقع؟ ازاي تعرض NFT للبيع بدون ما تدفع أي رسوم؟ لو بعت NFT ازاي تسحب فلوسك.. كان ناقص بس اجي اشتغل مكانك. شوف الفيديو ومتنساش تسوي سبسكرايب للقناة.. ولو عندك استفسار اكتبه في تعليق على الفيديو وهجاوبك بإذن الله 👇 https://youtu.be/i9mQHEo9GoM