تجربة_حُب..💛🌼

‎السيدة عائشة رضي الله عنها لما حست بالقهر قالت " فبكيت ليلتين ويوما لا يرقأ لي دمع ولا أكتحل بنوم حتى ظننت أن البكاء فالق كبدي" ‎يعني كانت حاسة إن كبدها وقلبها هيتقسموا نصين من كتر البكاء والوجع ‎🍁ليه قالت كده؟ ‎في حادثة الإفك لما رجعت فضلت شهر كامل تعبانة ومش فاهمة فيه إيه، بس حاسة بغربة وتغيّر غريب في البيت.. ‎بتشوف النبي صلى الله عليه وسلم يدخل عليها، وبدل اللطف والحنية اللي اتعودت عليهم منه، كان يدخل يسأل من على الباب بكلمة واحدة ومختصرة جدًا: كَيْفَ تِيكُمْ؟ ‎يعني: كيف حال هذه؟ أو أخبارها إيه؟.. ‎🍁 طريقة كلام رسمية وجافة هي مكانتش فاهمة سبب التغيير ده إيه، لحد ما عرفت بالصدفة الإشاعة البشعة والظلم اللي المنافقين خاضوا فيه في حقها وفي حق شرفها! ‎الصدمة كانت أكبر من طاقتها، استأذنت تروح بيت أهلها، وهناك انهارت من القهر.. فضلت تبكي ليلتين ويوم كامل من غير ما دموعها تقف ولا تعرف تنام، لحد ما قالت كده.. ‎🍁لكن بعد الليل الطويل الشديد ده، ينزل القرآن في سورة النور ببراءتها، وجبر خاطر يتقرأ لحد يوم القيامة. ‎﴿إِنَّ الَّذِينَ جَاءُوا بِالْإِفْكِ عُصْبَةٌ مِّنكُمْ ۚ لَا تَحْسَبُوهُ شَرًّا لَّكُم ۖ بَلْ هُوَ خَيْرٌ لَّكُمْ ۚ لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ ۚ وَالَّذِي تَوَلَّىٰ كِبْرَهُ مِنْهُمْ لَهُ عَذَابٌ عَظِيمٌ ﴾ ‎وبعدها ربنا قال البراءة بالنص { أُولَٰئِكَ مُبَرَّءُونَ مِمَّا يَقُولُونَ ۖ لَهُم مَّغْفِرَةٌ وَرِزْقٌ كَرِيمٌ } ‎🍁 الموقف ده بيفكرنا لما نمر بظلم أو كلام يتقال في حقنا بالباطل ونحس بالقهر والوجع.. يخلينا نفتكر إن السيدة عائشة، أحب الناس للنبي صلى الله عليه وسلم وأطهر نساء العالمين، مرت بنفس الشعور القاسي ده وجربت ألم الظلم ولحظات الانكسار النفسي الشديدة. ‎وإن اللي نصرها الله سبحانه وتعالى العليم، هينصرك إنت كمان.