عبدالعزيز العبلان

ما أنت مثلك فالقديم من الرسايل فيك واحد حي .. والثاني توّفى

والله وجتني بك الدنيا وأنا لاهي ‏لولا الدفا اللي بصوتك ماتذكرتك ‏هز البطا صورتي ولا على ماهي؟ ‏دار الزمن فيك .. ولا الناس غيّرتك؟ ‏مدري متى مات لك حبٍ على شفاهي ‏بس أذكر إني سهرتك عمر وأسهرتك ‏دور وتلقى عساك تعيّن أشباهي ‏أنا تنازلت عنّك .. كثر ما أخترتك

في رجا الشوق وإن غابت مواعيده ‏مامحى الوقت رسمٍ لك على بالي ‏وإن شكى القلب من همّه وتسهيده ‏ترضي الغالي ، الضحكة من الغالي ‏سمّ وآمر : على الخفاق ياسِيده ‏مستخفّه عليك الروح من تالي ‏عيّد الخاطر اللي شوفتك عيده ‏يابعد من رسايلهم بجوالي

روح الإنسان مبنيّه على ماضيه

‏لا تعلّم غافي القلب عن خضر الطعون ‏هاتها والله كفيل بمرار إحساسها ‏فدوتك قلبٍ على كل عرقٍ به تمون ‏والطعون اللي من ايديك يسلم راسها ‏فيك ماطعت السوالف وصدّقت الظنون ‏سيرتك يحرم على خاطري دنّاسها ‏من عرفتك والقصايد تحت فيّ الغصون ‏جعل مايزعل مطرها .. على نسناسها

توّصى على روحك من البرد والنسناس ترا طيحتك .. يمرض بها واحدٍ غيرك قبل لا يطيب لْك المسامر مع الجلاس تذّكر صباح الخير .. لامن فقد خيرك على شوفك اعدّ الليالي صحا ، ونعاس "مشاوير عمري كل ابوها مشاويرك" تبسّم ترا معك المواعيد ، حبس انفاس ولا تعتذر لي : فإنشغالك وتقصيرك تغانم سلامي ، وأخذني عن عيون الناس أنا عاذرك من غير ما اسمع معاذيرك لو اللي يشوف الشعر ، حبرٍ على قرطاس ينافس هل الساحه بوصفك ، وتصويرك تسيّد عليهم فالعذوبه ، وفالإحساس فما بالك : بمن يكتبه تحت تأثيرك

مالها عندي إلا أحفظ لها الذكريات ‏صورتك .. هَزّت الأيام بروازها ‏قبل لا بيني وبينك يطول السكات ‏أنا ممتن لعيونك على إيجازها ‏خذ من الأمنيات أطيب وأعز أمنيات ‏وعطني الضحكه اللي ما أنت معتازها ‏أقدر أقول لك : ماهي مسيرة حياة ‏قِصتك مرحلة فالعمر .. واجتازها

عسى ترضي غرورك غيبتي كان الغلا ما ارضاك وانا لا طاب قلبي .. خطوتي ماهي بـ تعصاني تمنيتك تعذَّر .. لين أقول إن الخطا : يفداك اداري دمع عينك وادري ان ماهو على شاني لا يضنيك الحنين - ولا تعنّي فالسراب خطاك ترا اللي جابني لك ؛ نفسه اللي عَنك وداني .. ولا أنت أسف على فرقاي ولا أسف على فرقاك تساهلنا الجفا .. لين إنجرح كلٍ من الثاني

على وجهك اللي نوره يقدّي السارين ‏ملامح فراق .. ونيةٍ مابعد بانت ‏تكبَّر ماكن الله عطا الناس مثلك زين ‏وأشوفك بعينٍ منْك .. ماكنها عانت ‏حقيقة غلاك أكبر من الظن والتخمين ‏تهون الجروح .. ونظرتي فيك ماهانت ‏مصير الزمن لا دار .. كانك من الحيين ‏يعلمك أنا وش كنت ، والناس وش كانت

للوهله الاولى