Kyym.ru

" Сэбиэскэй Аармыйа уулуссаҕа, ол эбэтэр Дьокуускайга" диэн биидьийэ сылдьар.

🔥ЕГОР ЖИРКОВ КЫАЙДА! Егор Жиркову анаан-минээн сойуолаһыы уонна онно кини бэйэтин кырдьыгын туруулаһыыта Саха сирин общественноһын хараҕын ортотугар хас да сыл устата барда. Дьон-сэргэ саха биир саарына киһитин ырааһыгар эрэнэн-итэҕэйэн, була сатаан буруйдааһынтан көмүскэһэн, илии баттааһыны хомуйбута, тустаахтарга суруктары суруйбута. Унньуктаах силиэстийэ, тура-тура бэрэбиэркэ, икки төгүл суукка кыайыытын кэнниттэн аны холуобунай дьыаланан эрийии хайа баҕарар киһи сэниэтин эһэр, санаатын сыппатар кыахтаах. Ол эрэн Егор Петровиһы оннук хоппот эбиттэрэ көһүннэ. Киһитэ кини буолан кыахтаахтык көмүскэнэн, бүгүн, ыам ыйын 17 күнүгэр, Алданнааҕы суукка эрэллээхтик кыайда. Суут маннык быһаарыыны таһаарда: ,,Алданский районный суд рассмотрев дело... постановил - уголовное дело против Жиркова Егора Петровича ПРЕКРАТИТЬ в соответствии в пунктом 2 части 1 статьи 24 УПК РФ ввиду отсутствия состава преступления". Манан Егор Жиркову утары тэриллибит дьыала сабылынна. "Арыы үрдүгэр уу дагдайбат, кырдьык үрдүгэр сымыйа ыттыбат" диэн өбүгэбит бэргэнник эппитин курдук буолла. Биллэрин курдук, Егор Жирков норуотун иннигэр оҥорбут өҥөтө өлбөөдүйбэт. Национальнай оскуола Кэнсиэпсийэтин олоххо киллэрии, сирбитин, сирбит баайын бас билиигэ көҥүлү түстээбит саҥа Төрүт Сокуоммут айар бөлөҕүн салайыы, оҥорон таһаарыы саҥа көрүҥүн тобулан, сайдыы аанын арыйарга холонуу... Кини сылдьарын тухары саха олоҕун хамсата, саҥаны киллэрэ, сайдыыга суол тэлэ сатыыр. Оннук киһибитин сир-буор сирэйдииргэ турунуу сатаммата: Егор Жирков кыайыыта - саха норуотун кыайыыта буолла!

🐮Сахаайа улаханнык кырдьаахтаабыт Ыам ыйын 8 күнүгэр Санкт-Петербург зоопаркатыгар өр сылларга турбут Сахаайа диэн саха ынаҕа олус буорайбыт көрүҥнээх хаартыската соцситимнэринэн тарҕаммыта. Зоопарка салалтатыгар суруйан, Сахаайа доруобуйатын туругун быһааралларыгар көрдөспүппүт эппиэтэ кэллэ. Доруобуйатын туруга үчүгэй, бэтэринээрдэр көрөллөр, кэтииллэр, ол эрээри, олус кырыйда диэн суруйбуттар. Саха норуота бэйэтэ сүөһүлээҕин Питерга көрдөрө турбут ынахпыт сирдээҕи олоҕо айылҕатын ыйааҕынан бүтэрэ чугаһаабыт. Хомолтолоох да, хайыыр да кыах суох. Оттон зоопаркалар эдэр саха ынаҕын ылаллара буолуо. Өр сылларга “саха ынаҕын имэрийии дьолу, табыллыыны аҕалар” диэн угуйуктаан, дьону үөрэппиттэр. Олор кэлэн суохтаан “саха ынаҕын аҕалыҥ, имэрийиэхпитин наада” диэн туруорсуохтарын сөп.

Игирэчээн оҕусчааннар Былырыын “Кыым” телеграм ханаалыгар Нам Аппаанытыгар баар 86 саастаах М.М. Лукин хаһаайыстыбатыгар Манчаары диэн наһаа иччимсэх, өйдөөх баҕайы, иччитигэр ураты минньигэстик эйээритэн мэҥирии-мэҥирии сүүрэн кэлэр тарбыйах видеотын таһаарбыппыт. Элбэх киһи таптыы көрбүтэ, билигин да өйдүүр буолуохтаахтар. “Манчаары историята” салҕаныа эрэ дии санаабакка да сырыттахпытына, Лукиннар Уйгулаана диэн ынахтара бу сарсыарда игирэ оҕусчааннары төрөтөн, Манчаары икки бырааттаммытытын туһунан кэпсээтилэр. Ньирэй төрүүрэ үөрүү, оттон игирэ ньирэй кэлиитэ хаһаайыстыбаҕа улахан эбиллии, үлүскэннээх үөрүү.

⌛Өлүөнэ остуруога турбут сирин чуолкайдааһын Ыам ыйын 15 күнүгэр Уус Алдан улууһун баһылыга Василий Аммосов Суоттуга халаан уутун аһарыыга бэлэмнэнии хаамыытын билсэ тахса сырытта. Василий Иванович таарыйа, улуустааҕы Сэһэн Ардьакыап аатын сүгэр түмэл ыытар тэрээһинин чэрчитинэн, Суоттуга Дьокуускай иннинэ "Өлүөнэ остуруога" тура сылдьыбыт сиригэр-уотугар бу остуруок кылабыыһата буолуон сөптөөх былыргы көмүүлэри тиийэн көрдө. Онтон Кыһыл Кырдал диэн сиргэ батастар көстүбүт миэстэлэригэр сырыттылар. Түмэл дириэктэрэ Павел Пермяков-Тэлэкэ: "Биһиги улуус кыраайы үөрэтээччилэрэ уонна улуустааҕы түмэл үлэһиттэрэ остуруок тура сылдьыбыт сирэ-уота Саха сирэ Арассыыйаҕа киирбитэ 400 сылын көрсө чуолкайданарын туруорсабыт”, – диэн кэпсээтэ.

Челябинскайга – Мира Аргунова үлэлэрин быыстапката Арассыыйа башкир, саха, бүрээт уонна татаар омуктарын уратыларын уонна сомоҕолоһууларын, төрүт таҥастарын, оһуордарын-ойууларын көрдөрөр быыстапка Соҕуруу Урал этно-култуурунай олоҕор биир бэлиэ түгэн буолла.

*Cаха норуодунай суруйааччыта, тапталлаах бэйиэтэ Наталья Михалева-Сайа бу күннэргэ үбүлүөйдээх төгүрүк сааһын бэлиэтээн, дьонугар-сэргэтигэр, күндү көрөөччүлэригэр ураты айар түһүлгэтин бэлэхтээри долгуйар, бэлэмнэнэр. Эрэдээксийэҕэ ыҥыран кэпсэттим. Чугастан аан бастаан көрүүм, билсиһиим. Урут мээнэ харахтаан көрбөтөх, айах атан кэпсэппэтэх далбар хотунум.* Сэһэргэһиибит хаппахчытын арыйабын, тус олоҕор наһаа орооспотум. Бачча сыллар тухары суруллан кэллэ ини, кэлбэтэ ини...➡️https://kyym.ru/sonunnar/kultura/12232-saja-baryta-baar-ete

💰Москубаҕа Алтай кыраайын вице-губернатора Иван Кибардин 18 мөл. солкуобайдаах бэрик ылар кэмигэр тутулунна диэн киин ситимнэргэ суруйдулар. Кини дуоһунаһы туһанан түөкүннээһиҥҥэ уорбаланар. Онон сибээстээн, регион салалталын дьэндьийдилэр. Кибардин бу дуоһунаска 2018 алтынньытыгар анаммыт эбит. Кини региоҥҥа туризм уонна курорт үлэтин, баай-мал сыһыаннаһыыларын салайбыт, тутуу эйгэтигэр кэтэбилинэн, үп-экэниэмикэ хонтуруолунан уонна закупкаларынан дьарыктаммыт.

Бүгүн салгын олбохтоох суудуналар сырыылара эмиэ салҕаммыт. Сыананы 3000 солк. диэн быспыттар.

Дмитрий Садовников телеграм-ханаалыгар Дьокуускай эргин муус кимиэллээхтик баран иһэрин бэлиэтээтэ. Билиҥҥи туругунан, Кангаласс тумулун аннынан муус харыыта баар курдук. Ол да иһин, бу түөлбэҕэ уу таһыма хайыы сахха кутталлаах таһымы ааһан турар. Дьиҥ туругу бөртөлүөттэн үөрэтии түмүгүнэн быһаарыахтара. Туох миэрэни ылыллара барыта онтон тутулуктаах диэбит.