نوای ماندگار

دو گل زمی خو د محل داشتم وا جفت قاطری هردوتان کاشتم 🍀 ی گل جو کاشتم یکین هم گنم سالن و خووی دباشو رعنم 🍀 کَ  اُ جو سی حرد زمسون گلم وی گنمیا یرده د حورشلم وی 🍀 خوم ویم اُ عیال گله اُ رمه بچر گلمو بیلحر اُ کمه 🍀 خومو سیر ویدیم گلمو مس وی کولر دوتیکم دار سا خس وی 🍀 عناشتام ماس اُ خایه مرغ زرد وی کمچه که زئی دش منسی برد وی 🍀 چاسم گوشت کلشیر وا دومحلی پسی جاس روغه وا کلگ بلی 🍀 حونم سی فامیل بازار دسبیل وی فیسم د بالا بز بل حیل وی 🍀 تفنگی داشتم وا جفتی قطار یابوم بسه وی و دسک دوار 🍀 هم چوپو داشتم اُ هم برگلو سر موقع گلن آوردن و دو 🍀 برکت بارس و دراسونم خوانین مرک زن د لامردونم 🍀 سی خوم شاهی ویم لاوکه وی تختم شوق پرواز داشت ملیچه بختم 🍀 بچو د سر کار همه د شهر وین چنو دیر سر زن منسی قهر وین 🍀 فصلی ی دفعه رتم و مالشو بچه ی کاوه چیم د یخچالشو 🍀 اوما و روزی بچونکه شهرم بار کردن اومان بین و هومبرم 🍀 دهوس بچو پام د هوا وی ذکر سر لووم شکر خدا وی 🍀 سال اول خو وی دس زن د بارم چار چار زمسو بی و بهارم 🍀 سال دو کور کوشکه اوما وا تالی گوت سی زمینیا دارم خیالی 🍀 مه نام کوم نامرد رتی و زیر پاش گوت ها زمینیان بونم و خشخاش 🍀 هر چی مه گوتم نکرد افاقه دیم د حکایت آو اُ قورواقه 🍀 اخر زمینیان کردم دو شومه حساوکو پین هم نیام وسر دومه 🍀 زمینش پر وی د کود حیونی کاشتیم ده روزه اوما و رونی 🍀 سالش پر بارو بلین وی سر کرد تیغ که زیم دش چی ژرک درکرد 🍀 برداشتش سخت وی ایمو هم ناشی یکی گوت ساقش باید بتاشی 🍀 رتیم و منی اتباع بیگانه یکی گوت فقط بشیر میتانه 🍀 بشیرن بوردیم وا رونجه تیزیه گوت هی چی نهام بجز شولیزیه 🍀 وش گوتیم بشیر ایمو شاگردیم هاسیم تیغ دئیم گدشون دردیم 🍀 بیدیم و شاگرد بشیروطندار هی زه وا ری رو سی شهرقندهار 🍀 بشیر هم کمی لری وامختی ی روز مه رتم دیم بشیر لخت وی 🍀 وش گوتم بشیر اَ خیرت ویده گوت پخشه کوره خینم چیلنیده 🍀 خلاصه بشیر محصولن ورداشت ایسه تا اوسه نام چن کیلو داشت 🍀 کور گپ گوت دوسی دارم د سرمرز وم گوته بیارشو مه دیمشو و عرض 🍀 جاسازیشو کرد د مین وانت بار کاشکه نئشتیمه منه جفت ودار 🍀 د ایست بازرسی یاین وا مین رش پیداشو کنن وا گوره بو کش 🍀 کت وال بسه چی قاتل جونی کور گپن ونن د هولفدونی 🍀 کور د زندو وی مه هم آواره یا د پاسگاه ویم یا د اراده 🍀 و جو کنشتی اُ اشنا بازی حضوری رتم و خدمت قاضی 🍀 رت وا پشت قلم و حساو کتاو هر چی مه پرسیم و برم ده جواو 🍀 وم گوت جرم کورت خیلی سنگینه کاشت مخدر خلاف دینه 🍀 هر چی خون کردم و سقه سرش فقط غر ده و تزبی ذکرش 🍀 زندونی خویه بوری سی کورم نقشه هم کشی سی کارتیا پورم 🍀 رت وا پشت قلم سی فیش جریمه مه هم منسم دوره قدیمه 🍀 وش گوتم نقدی هم حساو کنی گوت د اعصابم ها خراو کنی 🍀 تبصره آورد کلا من بور کرد فیشیا جریمن امضا اُ مهرکرد 🍀 هر چی دی چن سال ونمی د کارتیا یکجا صورشو دم و حساو دادگا 🍀 کورکه مینتریم  زه وا چن کیلو الالی او من یرنی چی تلو 🍀 جاسازیشو کرد ونشو د پوتیه بُرد دشو و یه آدم ربوتیه 🍀 هم زبو نهفم اُ هم موله وی قسم حردنش چی آو توله وی 🍀 نه جا ری وش وی که ری وش بونی نه هم مالی داشت حقت بسونی 🍀 مدت زیادی تک روکمو وی نوم نسق نیاده سازکه کوکمو وی 🍀 اخرش بوردیم و اَرَک بورک رتیم د جومه بشونیم و یک 🍀 کور زه وا تفنگ زه و ری دلش وی ول بونسا بی و قاتلش 🍀 بچونش اومان و پا مامله گوتن دروسه کورت قاتله 🍀 اما باومو خوش شر دبار وی وا جردیا خوش هم ناسازگار وی 🍀 گلن وا رمه یابوم وا زینش همن فروختم دم د جا خینش 🍀 چن درمال منه هیشتم سی شیریه سی چاره سوختم جسم د پیریه 🍀 مال ثروتم رتن د دسم غم اوما وجا شوق هوسم 🍀 در وچیلم بی کش اُ دونیه روز تا ایواره د مالم بُونیه 🍀 انجیر پر بارم بیده و کره تل زیر پا خومن بوریم وا یره 🍀 هینه هم پهنی د روزگاره کشتی که تل وی کسبش کو ناره 🍀 ار کو داشتیه اتباع بیچاره هیچ وختی چنیه نوین آواره 🍀 ✍ شاعر داستان سرا استاد محرم ولیپور یعقوبوند🌹 #نوای_ماندگار ↙️🌸🌺💐 ╔═══💢═══╗       @navaye_lor ╚═══💢═══╝