هێدی|Hêdî

من لە وڵاتی بێ وڵاتدا لە دایک بووم:\

تۆ دڵۆپە خوناویکی لەسەر گەڵای عومری بەهار تۆ، گیانەکەم، کچی شەوی، زۆر دەترسم نێزیکت بم، نەوەک ببی بە پشکێ ئاو، نەوەک بتکێی بۆ سەر زەوی!

پەشێو

مانگی نوێ بۆیە هەموو شەو زیاد ئەکا و ئەشنێتەوە تا جەمالی هەروەکوو ڕووی تۆ بڕازێنێتەوە کاتێ بوو بە چواردەهەم شەو تێئەگا نابێ بەڕووت جا لە داخا وردە وردە کەم ئەکا و ئەتوێتەوە

کەماڵی

بەرلەوەی شار بەخەبەر بێ سێدارە هەستابوو لە خەو شادی لە هەر چوار بازگەوە دەرباز بوو مەرگ، کۆڵان کۆڵان دەگەڕا بۆ نێچیری‌تر بەرلەوەی شار بەخەبەر بێ شاعیر لە بان سێدارەوە گۆرانی هەرمانی دەچڕی!

ک_د_ئازاد

كه مردم شين و گريانت به من چی؟ كه گوڵ چوو، ئاوی بارانت به من چی؟ لەسەر تەرمی منی عاشق بەقوربان ئيتر زولفی پەرێشانت به من چی؟ له هۆدەی ماتەم و غەمدا كه سووتاوم سەفایی باغ و هەيوانت به من چی؟ كه هێلانەی شەهێنی دڵ خرا بوو قه‌دی سەروی گوڵستانت به من چی؟ به پاييز پووشی ويشكی تەن كه فەوتا به هاری لێوی خەندانت به من چی؟ كه مانگی بەختی من ڕووی نا له كەسری تريشكەی ڕۆژی كوڵمانت به من چی؟ به كاسی غەم دڵم شێواو و كاسه شەڕابی سافی فينجانت به من چی؟ كه تووشی له شكری دەرد و خەفەت بووم دەوایی دەرد و دەرمانت به من چی؟ كه پەيدا بوو شەوی تاريكی دووريت دەسی مووسایی عيمڕانت به من چی؟ لەشم گەر كەوته مەيدانی نەبوونی لەوه دا باسی لوقمانت به من چی؟ كه بڕوا نووری بينایی له چاوم جوانی رەنگی باغانت به من چی؟ له نێو چاڵی غەمی ‌تۆدا كه گيرام جوانی دەشت و كێوانت به من چی؟ «فيدايي» گەر نەما بۆ تەعزیەی ئەو دەم و لێوی غەزەل خانت به من چی؟

فیدایی

"غەڵبەغەڵبی ژیان" دەنگی مۆریانەی مەرگ لە دەروونمدا جەستەم دەجوێ! تۆزقاڵ تۆزقاڵ غەڵبەغەڵبی دەخنکێنێ! ئاخ! لەم پەنجەرە ڕووناکەوە ئەودیوی تاریکی حەقیقەت دیار نیە کەس نازانێ لە پشت ئەم زەردەخەنە گەمژانەوە پڕاوپڕی چەند گــــــۆڕستان فرمێسک تێیدا قەتیس ماوه! ئاخ...! ئەگەر بزانی ئەم ئاقارە بە ڕواڵەت هێمنە تەقینەوەی بۆمبی، چ مەرگەساتێکی ژاناوی دەیشڵەژێنێ! ئەوەی چاک و خۆشیم لەگەڵ دەکا بە جەفت ئیهانەم دەکات و وەک وایە سێوێک لە سێوێک تر بپرسێ ئەرێ قوربان! ئەحواڵی کرمە نازەنینەکانی لەشی موبارەکتان چۆنە؟! «جەلال مەلەکشا»

گوڵاڵە سورە بۆ پەشۆکاوی؟! مەگەر لێزمەی باران ئاوی نەداوی؟! مەگەر تۆ جوانیی شاخ وکێوان نیت؟! مەگەر تۆ هاوڕێی بلبلەکان نیت؟! بۆچی ڕەنگ زەردی تۆ گوڵاڵە سورەی تۆ دیاری جوانی کیژۆڵەکانی تۆ عەتر وبۆنی ناو جێژوانی گوتی: ئەی هاوڕێ، من هیچکامیان نیم تەنیا ئەو گوڵەم کەسادان ساڵە لە نێو ئەم خاکە بەخوێنی شەهید ڕەنگم سور بووە بە فرمێسکی دایک من ئاو ئەدرێم بە هەناسەی باوک سەر هەڵدەهێنم چۆن دەتوانم پەشۆکاو نەبم ؟! با گوڵالەیش بم با ڕەنگم سور بێت

✍هێدی

ئینسان هەر ئەوە نییە، بتوانێت غەمەکانی خۆی بکاتە تێفکرین و وردبوونەوە، دەتوانێت شادییەکانی خۆشی بگۆڕێتەوە سەر تێڕامان وخەیاڵ وبیرکردنەوە. تەنیایی وزیندان مڕۆڤ فێر دەکەن، سەماکانی بکاتە تێفکرین.

بەختیار عەلی|دواهەمین هەناری دونیا

هەندێک پێکەنین هەن لە ناخی تاڵیەکانەوە هەڵدەقوڵن ..

بەڵام ئێمە هەر بە جەستە زیندووین زۆر لەمێژە ڕۆحمان تێکەڵاوی مەرگ بوه وهەست بە هیچ ناکەین تەنانەت خەم نەبێ..

✍هێدی

منداڵیم زۆر پێ خۆشه.. ئەو کاتانە کە لەجێگای دڵمان سەر چۆک و ئانیشکمان بریندار بوو:))