قُــٰرَّةُعَـٰيْـنٍ للسَّعَـٰادَةِ الزَّوجِيَّة♡

☂️قبل الزواج غالبا نكونو دايرين في بالنا صورة معينة على الحياة الزوجية... نتخيلو زوج يفهمنا من نظرة يحس بتغير نفسيتنا لوحده يعرف واش يفرحنا وواش يزعفنا وإذا زعفنا يجي يراضينا ونتصورو بلي الحب راح يخلي الحياة سهلة، بدون منغصات أو خلافات.. 🔥كله تحت شعار(مادام نحبوا بعض الباقي ساهل) 🥀لكن بعد الزواج، تكتشفي أن الواقع مختلف تماما زوجك ما ينتبهش دائما للأمور الي كنت حاسبتها بديهية وغالبا يعبر على حبه بطريقة مختلفة على الطريقة اللي كنت تستنايها وممكن تختلفوا في أمور كنت متأكدة قبل الزواج أنكم راح تتفاهموا فيها بكل سهولة 🪻الأمر لي يخليك تفتحي وشحال من تساؤل: (واش صرا؟) (علاش تبدل؟) (مادام يحبني تاع الصح لازم يفهمني بلاما ننطق) ... 🍁 و قبل ما نفسروا هذا الاختلاف على أنه نقص في الحب، خلينا نشوفوا علاش أصلا حسيتي بخيبة امل من الي ڨاعد يصير لأنك فالحقيقة قبل الزواج ما كنتيش داخلة للحياة الزوجية مع إنسان تحبيه واخترتيه وفقط وانما داخلة ومعاك صورة نمطية في بالك على كيفاش لازم يكون الزوج، وكيفاش لازم تكون الحياة بيناتكم .. ولهذا لما لڨيتي الواقع مختلف على هذيك الصورة، وليتي تحسي أنوا كاين حاجة تبدلت،وانو مش كيما هاك حلمتي ولا هاك تمنيتي.. ☂️ حتى لو ما كانش التغيير بالضرورة في الحب نفسه 🍂 وكمثال عن تلك التوقعات 👇🏻👇🏻 : (إذا يحبني، لازم يعرف واش نحتاج بلا ما نطلب) (إذا كنا متفاهمين، ما لازمش نختلفوا) (الزوج الي يحب زوجته لازم يكون دايما رومانسي ويعبر ويحتوي..) (إذا حكيت له على حاجة ضايقتني وفضفضتله، نلقى الاحتواء والراحة والحلول ..) 💯وهنا نحتاجوا فعلا نتعلمو نفرقوا بين الحقوق والتوقعات لأن بعض الأمور فعلا من حقك تطلبيها ، وبعضها مجرد أشياء جميلة كنت تتمنيها، و ماشي بالضرورة زوجك يعرفها وحده أو يقدمها بالطريقة اللي في بالك 💌 ولهذا، لما تتضايقي من تصرف زوجك، ما تستعجليش في الحكم عليه وعلى محبتك ليه 💥وانما وااجهي نفسك وسأليها بكل حزم ووضوح : 🪻هل هذا الشيء فعلا من حقوقي، ولا مجرد حاجة كنت نتمنى نشوفها منه؟ 🪻إذا كان احتياج حقيقي، هل سبقلي وعبرتلوا عليه بوضوح ، ولا كنت نستنى منوا يفهم وحده؟ 🪻وهل أنا متضايقة لانو صدر من زوجي تقصير حقيقي، ولا لأن تصرفه ما جاش موافق للصورة لي كنت راسمتها في بالي؟ 💯هذي الأسئلة ليس الهدف منها جلد الذات واللوم..، بقدر ماهي وسيلة وأداة تعرفي من خلالها واش راه يصير وكفاش يتصلح.👇🏻 🌼إذا اكتشفتي بلي الأمر حق من حقوقك، تكلمي عليه واطلبيه بوضوح، اريد كذا، أحتاج كذا وكذا .. 🌼وإذا كان احتياج عاطفي عندك وما سبقش وعبرتي عليه، فهنا ما تستنايش منه يخمم فيه وحده، علميه واش يريحك وكيفاش تحبي منه يتعامل معاك وكفاش تحبيه يعبرلك.. 💥💥أما إذا كان مجرد توقع كنت راسمتيه في ذهنك، فهنا تحتاجي تراجعيه وتعمليلوا تصحيح وغربلة... بدل ما تڨعدي رابطتيه بمدى حب زوجك ليك 🌷 وكمثال للتوضيـح : 🔥الموقـف.: في هذي الفترة انت مقلقة وضايق خاطرك وو، فتبقاي دوري فالبيت وتروحي وتجي بوجه عابس وتصرفات جافة وكلام محدود واذا سقساك الزوج واش بيك ربما تنفجري فيه وتلقي عليه التهم وتحمليه مسؤولية الشي لي تحسي بيه... 💥 🔥التوقــع او الصورة النمطية : المفروض يجيني يحتويني ويقلي واش بيك مقلقة ياله نخرجوا ترفهي على نفسك وخليك من الشغل مهوش هارب عليك وعبارات وكلام ... 🎀التصرف الصحيح من الزوجة في حال ماوافقش تصرف الزوج توقعاتها : شوف زوجي راني حاسة نفسي ثقيلة وكارهة وملل ونحوس على خرجة معاك نحكوا فيها ونمشوا بلعقل نرفه بيها على نفسي ونفرغ هذي المشاعر... شوفي الفــــرق... ☂️الأولى تخليه يدافع على نفسه ولربما ينفي كامل واش راكي تمري بيه ☂️أما الثانية وصلتي له احتياجك واعطيتيه مفتاح يتعلم من خلاله كيفاش يراضيك 🌷وهذي واحدة من المهارات المهمة الي تخلي الزوجة تتجنب الكثير من الصدمات لي تسببها التوقعات المسبقة للزواج 💗فإذا لقيتي بعد الزواج أن الواقع مختلف على واش كنت متخيلة، ما تستعجليش تحكمي على زواجك بالفشل ولا تشكي في محبة زوجك ليك https://t.me/+YUvmXacUQI5kYWY8 ⛔ لا أحلل حذف الرابط من المنشور #نبيلة_أم_عائش_مدربة_واستشارية

نحاولو قدر المستطاع، وبالاستعانة بالله أولا وآخرا، ننظمو حياتنا : نوم، دار، أولاد، عمل، عناية بالنفس... بصح كاين أيام التعب يوصل بيك لدرجة تحسي حتى يدك ما تقدريش ترفعيها،خاصة الأمهاات 💧 وبالتالي انسحاب وفتور وعجز حتى عن أبببسط الضروريات اللازمة لك كأنثى 💦 🎀لكن هذا ما يمنعش يكون عندك حد أدنى من الأمور ما تلعبيش بيهم، لا في أيام النشاط ولا في أيام التعب أمور بسيطة،  بالصح تركها ما يريحكش، بالعكس يزيد عليك الوهن والضعف ولي هي  : 🪥تنظيف الاسنان قبل النوم 👗تغيير ملابس النهار بملابس نوم مريحة وخفيفة.. 💎ورشة العـطر هذو خليهم من الحدود الممنوع تجاوزها مهما بلغ بك التعب مبلغه 💕 وتصبحن على خير 🫂 https://t.me/+YUvmXacUQI5kYWY8

🌷الفترة الصباحية مهمة في العلاقة بين الزوجين، وتقدر تصنع فرقا جميلا في يومكم، فحاولي على قد ما تقدري تخليها هادئة، وما تبدايش نهاركم بشجار أو خصام أو اتهامات، أو تخلي أول كلام بينكم يكون طلبات ومشاكل ☕جهزي فطورك، وإذا قدرتي تفطري مع زوجك وحدكم بعيدا عن الأولاد، فلا تهملي هذي الفرصة، حتى لو مرة أو مرتين في الأسبوع وخلال هذي اللحظات، ما تنسايش لمساتك الحنونة وكلماتك الطيبة💝 وقبل ما يخرج، روحي معاه للباب وودعيه بدعوة جميلة من قلبك 🫂 إذا قدرتي تصنعي هذي اللحظات بين فترة وفترة، فلا تستهيني بأثرها الجميل على علاقتكم 🌷 https://t.me/+YUvmXacUQI5kYWY8

في الفترة الأخيرة ولات تنتشر بزاف نصائح للزوجات من نوع : (ما تهلكيش روحك في شغل الدار… صحتك وراحتك أهم ) (ما تعبيش روحك، خلي شغل الدار حتى تكوني قادرة ) (الا تبعتي الشغل، صحتك تكمل وهو ما يكملش ) 🌱والنصيحة في أصلها ما فيها حتى مشكل فالمرأة ماشي مطالبة تهلك صحتها وتستنزف روحها باش يكون بيتها كامل ومثالي كل يوم 🍃لكن من كثرة ما ولات تتعاود عبارة (ارتاحي… خلي عليك الشغل… صحتك أهم ..) كاين بزاف نساء من غير ما يحسوا فهموها بطريقة مختلفة (كل حاجة تعبني نخليها لوقت نكون مرتاحة ..) 🥀ومن هنا تبدأ الدوامة ماعن الصباح تخليهم للعشية وتاع الليل للصباح .. غدوة يزيد عليهم الغسيل فتظطر انها تقضي غير واش في يديها هذاك اليوم .. ومن بعد تلقى الأرضيات تستنى حقها من التنظيف، وحوايج أخرى تزيد تتراكم… وهنا ما يبقاش التراكم على شغل دار وحسب، وانما يولي يلعب عالنفسية والمورال .. 💧كل ما تدخلي للمطبخ تشوفي لماعن متراكمة 💧تشوفي الغسيل متراكم 💧تشوفي الفوضى في كل مكان ⭕وعقلك يولي يقلك راه كاين شغل في كل جهة وجانب .. 💦وانت تقولي من وين نبدا وكفاش نكمل .. ومع الوقت، هذا الضغط يقدر يخليك 💢 أكثر توتر 🌵أكثر عصبية 🥀وغالبا يزيد ينقصلك الرغبة في الإنجاز 🧽 لأنه هذاك الشغل لي كان قادر يكمل في سويعات ولا أقل، اصبح يحتاج أيااام ومجهودات كبيرة باش تلحقي عليه، كيما ولا مصدر ضغط وارهاق ليك .. 💡وهنا يجي وقت اننا نصححوا الفكرة أن الراحة ماشي معناها نهربوا من كل حاجة تعبنا ✔️ والاهتمام بصحتك ماشي معناه تخلي الأعمال تتراكم عليك ✔️ 🌸واحيانا التعب تاع المهمة لي تنجزيها، يعطيك راحة ونشاط اكثر من الراحة المؤقتة لي يمدهالك التأجيل 🪻بمعنى الحل ماشي في التأجيل للاشغال طلبا للراحة 🪻وانما تخدمي وديري شغلك على قد طاقتك ⚡فلو عندك اليوم طاقة قليلة متقوليش ( نأجل كل شيء لغدوة) وانما اسئلي نفسك ،(وش هو الشيء الي اذا اجلته اليوم راح يضاعف عليا التعب غدوة؟!) وعلى حساب الجواب راح يكون الانجاز ✔️ وبهذي الطريقة ترتاحي، وفي نفس الوقت ما تخليش القليل يتراكم حتى يولي كثير.. 🌷وخليها قاعدة عندك : الراحة لا تكون في التجرد التام من المهام والمسؤوليات ،  بقدر ماهي في المداومة على الانجاز ولو كان قليلا https://t.me/+YUvmXacUQI5kYWY8 ⛔ لا أحلل حذف الرابط من المنشور #نبيلة_أم_عائش_مدربة_واستشارية