𝑺𝒊𝒎𝒑𝒍𝒆 𝑪𝒐𝒓𝒏𝒆𝒓 || رُكن بسيط

𝑼𝒑 𝒕𝒐 𝑳𝒆𝒗𝒆𝒍 𝟐...♥️

بما إن خلاص كلها ساعات ونتيجة إخواتنا في الأزهر تظهر، ومن بعدها الثانوية العامة...

إن شاء الله ربنا يجبر بخاطركم جميعًا ويفرح قلوبكم يا رب.♥️

حابب أقولكم: الثانوية العامة دي مجرد خطوة، مش نهاية العالم، ولا مستقبلك واقف على رقم مكتوب في شهادة. عارف ومجرب إحساس الخوف والقلق والزعل اللي بييجي لما تشوف مجموع مكنتش تتوقعه...إحساس كان صعب جدًا لما جربته. بس ساعتها جملة واحده طمنتي كانت من والداتي قالتلي:

"إحنا شفنا إنت تعبت قد اي، وطالما دي النتيجة، يبقى هو ده الخير ليك وربنا شايفلك الأحسن والأنسب."

من وقتها وأنا اتعلمت أسعى وبس، ومفكرش في النتيجة. وأي حد بيكلمني بقوله: مفيش حاجة في إيدك غير إنك تعمل اللي عليك، وتدعي ربنا. خلي عندك ثقة كاملة في تدبير ربنا للأمور، وخليك واثق إن اختياراته دايمًا هي الأفضل ليك. يمكن تكون فيه حاجة هتموت عليها، وشايف إنها حلمك، لكن ربنا شايلك مكان تاني خالص هتنجح وتتفوّق فيه أكتر.

﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ﴾.

عشان كده، متزعلش ولا تضغط على نفسك نفسيًا، دي كلها تدابير ربنا، وخلي عندك دايمًا حسن ظن بيه. وافتكر إن النجاح والتميز مش اسم الكلية، النجاح الحقيقي هو إنك تثبت نفسك، وتعمل أفضل ما عندك في المكان اللي ربنا اختارهولك. وبعد النتيجة، اهدى كده، وشوف كل الكليات المتاحة قدامك، واختار الحاجة اللي حاسس إنك تقدر تبدع فيها، ومناسبة لإمكانياتك، وصلي استخارة قبل أي خطوة.

ربنا يفرحكم كلكم، ويكتبلكم الخير والنجاح في اللي جاي، ويرضّي قلوبكم بما اختاره لكم.