|شعر اوجاغی|

▫️آدینی یازاردیم. آدینی یازاردیم گؤی آسیمانا، حئییف، چاتمیر الیم منیم گؤیلره. یازسام من آدینی چنه، دومانا، توفان قوپسا بئله، دوشمز یئرلره. آدینی یازاردیم گونش حوسنونه، گونش، ایستیسی‌یله اریده بیلمز. یازسایدیم آدینی چمن اوستونه، شئه بئله، اوستونه سریله بیلمز. آدینی یازاردیم اوجا داغلارا، داغلارین قوینوندا بسلردیم اونو. یازسایدیم آدینی اؤتن چاغلارا، «حئییف کی سن گئتدین» سسلردیم اونو. آدینی یازاردیم من شلاله‌یه، عصرلر بویو آخسا، آپارا بیلمز. آدینی یازمیشام من بو اوره‌یه، هئچ بیر شئی آدینی قوپارا بیلمز. #علی_احمدوو #شعر_اوجاغی @SheirOcagi

▫️بیر گون آنلارسان. یوخولارین قاچار گئجه‌لری، هئچ بیر تهر صوبح اولماغی بیلمز. دیکیلر گؤزلرین تاواندا بیر نؤقطه‌یه دلی ائدن بیر اوغولتودور، باشلار قولاقلاریندا نه چارشاب حالدان آنلار، نه یاستیق، گیرمز پنجره‌‌لردن گؤزله‌دیگین آیدینلیق قاپانیب یاتاغینا، چاره‌سیزلیگینه آغلارسان اونون اونودا بیلمه‌دیگین خیالی، سیقارادان درین بیر نفس چکمیشجه‌سینه دولار ایچینه. سئومک نه ایمیش، بیر گون آنلارسان. بیر گون آنلارسان اصلینده هر شئیین بوش اولدوغونو، شرَفین، فضیلتین، یاخشیلیغین، گؤزللیگین. گون گلر ده، سسینی بیر دفعه‌جیک ائشیتمک اوچون وورارسان باشینی سویوق داش دیوارلارا بؤیویَر گئت‌گئده اینجیمیش‌لیگین، قیریلمیشلیغین آنلارسان تا دریندن چاره‌سیز قالمیشلیغین  آجیسینی. سئومک نه ایمیش، بیر گون آنلارسان. بیر گون آنلارسان اللرینین نه ایشه یارادیغینی نئچون یارادیلدیغینی، بو اییرنج دونیایا نه‌دن گلدیگینی، اوزون-اوزون سئیر ائدرسن ده آینالاردا گؤزللیگینی بوشونا کئچیب گئدن ایللرینه یانارسان دولار گؤزلرین، ایچین بورخولار. سئومک نه ایمیش، بیر گون آنلارسان. بیر گون آنلارسان دادینی سئویلن دوداقلارین سئویلن گؤزلرین یئتیشیلمزلیگینی او هئچ گؤزلَنمه‌ین ساعات گلدی می دوشر ساچلارین اؤنونه، آما بم‌بیاض اوزانار گؤی‌اوزونه اللرین، آما چاره‌سیز، آما یورغون آما بیتکین. بیر زامان کئچمیش گونلرین یوخوسونا گئدرسن سونرا دوزولر بیر-بیری آردینجا آجی گئرچک‌لر سئومک نه ایمیش بیر گون آنلارسان. بیر گون آنلارسان خیال قورماغی گؤزله‌مه‌یی اومید ائتمه‌یی بیر چیرکلی کؤینک کیمی چیخاریب آتماغین گلر بوتون ووجودونو ساران او قورخونج گئجه‌نی. لعنت ائدرسن یاشادیغینا کئچمیشدن نه قالمیشسا، ییرتیب آتارسان او زامان بیر چیچک بؤیویَر قبریمده اؤز-اؤزونه. سنی سئودیگیمی، ایشده او گون آنلارسان. #اومید_یاشار_اوغوزجان #شعر_اوجاغی @SheirOcagi

▫️اوغول دردی 3 منه قارا یازان قلم گتیرین، دؤزوم ساریماسین کؤنول یارامی! سازیمی غم اوسته کؤک‌له‌ییب وئرین، تورپاغا تاپشیریم جییَرپارامی! قبیره تاپشیریم- یاتیب یئنمه‌سین، اینجیدر آغیرلیق-آغری بالامی. گئجه‌یه تاپشیریم- شامی سؤنمه‌سسن، قورخودان یاریلار باغری بالامین. بالامین بالاجا بیر قونشوسو وار، گؤروم یوخوسونا شیرینلیک دولسون! قونشونون یاخشیسی قونشونو دویار، تاپشیریم اوغلومدان گؤز-قولاق اولسون. یالواریم-یاخاریم آللاهلی گؤیه، کؤمَکسیز قویماسین قلبی نزییی. دئییم آنا دونلو بیر ملاکه‌یه، گزمه‌یه چیخارتسین او کؤرپه‌جییی. من اونا آتامین آدینی وئردیم، دوشوندوم: دار گونده دایاق اولاجاق. من هاردان بیله‌یدیم آرتاجاق دردیم، اوغول آتاسینا بیر داغ اولاجاق؟ هاردان بیله‌یدیم کی منسیز دؤزه‌جک، گؤزلری آرخامجا سَیرییَن اوغلوم؟ من ائودن چیخاندا های-هارای سالان، من ائوه گیرنده کیرییَن اوغلوم. چاغیرسا، سوراغی کیمه چاتاجاق، هاردا اویویاجاق، هاردا یاتاجاق؟ بوز کیمی داشلاردان نئجه توتاجاق، الیمدن یاپیشیب یئرییَن اوغلوم؟ یوخلوغو سینه‌مه داغ-دویون چکدی، بیر اوچان ملک‌دی، سولان چیچک‌دی. قلبیمی اپریدیب اریده‌جکدی. تورپاغین تکینده ارییَن اوغلوم. #آغا_لاچینلی #شعر_اوجاغی @SheirOcagi

▫️سوروشدو: -عاشیق نه دئمک‌دیر: دئدی: -اوره‌یی گؤزلریندن آخان کیمسه. #شل_سیلور_استاین #شعر_اوجاغی @SheirOcagi

▫️بوتون عشق اوزمانلاری بیزه اؤیره‌دیرلر: دوغرو عشق، چتینلیک و سیخینتی اولمادان، مومکون اولمور. #آلبر_کامو #شعر_اوجاغی @SheirOcagi

▫️قارا قارغا قارا قارغا، سنین نئچه یاشین‌ وار؟! یوردا گلدیم، سن ده گلدین غفیلدن. نه‌لر کئچدی خیالیمدان، بیله‌سن! ایللر اؤتور، اوخویورسان هله سن، قارا قارغا، سنین نئچه یاشین وار؟! هر آغاجین قوینو سنه بیر خانا، بوردا منی گؤزله‌یَردی بیر آنا. کؤنلون اولسون کؤنلوم کیمی ویرانا! قارا قارغا، سنین نئچه یاشین وار؟! چمن ایدی بو یئرلرین یانی بس، سن گؤردویون او اینسانلار هانی بس؟ آوازیندان زارا گلدیم؛ بسدی، بس! قارا قارغا، سنین نئچه یاشین وار؟! یئرده گزیب، گؤیده قاناد چالیرسان، گۆذارینی هارا گلدی سالیرسان. بیز گئدیریک، سن سونرایا قالیرسان، قارا قارغا، سنین نئچه یاشین وار؟! هیجران نه‌دی بیلمه‌میسن هله سن، اؤلدوم گئتدیم، سنی گؤروم اؤله‌سن! گرک ائله من گلنده گله‌سن، قارا قارغا، سنین نئچه یاشین وار؟! اوشومه‌سه تر چیچک‌لر سولارمی؟ بختوَر گول لچه‌یینی یولارمی؟ اوچ یوز ایل ده عؤمور سورمک اولارمی؟ قارا قارغا، سنین نئچه یاشین وار؟! عؤمور کئچدی، قوجالیرام ها، دئمه! یاخشی-یامان گؤردویونه «قا» دئمه! گؤردویونو، آمان گوندو، تا دئمه! قارا قارغا، سنین نئچه یاشین وار؟! #طالع_حمید #شعر_اوجاغی @SheirOcagi

▫️تانریم، دوغرودان‌می او دونیادا جهنّم یوخدور و بو آلچاق حریف‌لر باغیشلاناجاقلار؟! 📚 آلتی نؤمره‌لی پالاتا #آنتون_چئخوو #شعر_اوجاغی @SheirOcagi

▫️کیم بیلیر، بلکه منیم عشقیم اؤز حیسلریمین، اؤز دوشونجه‌لریمین ساده‌جه منی آلداتماسیندان باشقا بیر شئی دئییلمیش. 📚 بیاض گئجه‌لر #فئودور_داستایئوسکی #شعر_اوجاغی @SheirOcagi

▫️کور قیز آللاهدان هئچ واختی اومید کسیلمز، سن اؤزون بیلیرسن فلک نه ساییر. اگر شر دئمه‌سن، خئییر ده گلمز، صاباحین ایشینی بیلمک اولماییر. باخسا دا اطرافا هئچ‌ نه‌یی گؤرمور، چوخ گؤزل اولسا دا گؤزلری کوردور. قلبینده وار اولان اومیدلر سؤنمور، اومیدلر او قدر سایسیزدیر، چوخدور. ساچینی تؤکوبسن یئنه یانینا، اوتوروب اؤزونچون خیال قورورسان. وورغونام قاپ قارا کیرپیک، قاشینا، سئوگیلیم، حیاتیم، نییه سوسورسان؟! ایلاهی، بو قدر گؤزل قیز اولار؟! سنه هر باخاندا گؤزلریم دولار. نییه بس گؤزلرین توتولدو سنین؟ آللاهیم، گؤزلری آچیلسین، نولار! هر گئجه الیمی آچیب آللاها، سنین تک جانینا دوعا ائده‌رم. ایسته‌مم اینان کی گیرم گوناها اینان کی من سنی آتیب گئتمه‌رم. #علی_احمدوو #شعر_اوجاغی @SheirOcagi

▫️عشق اوچون تشکّور ائدیرم. تشکّور ائدیرم، منه ایلک دفعه عشقی داددیردیغین اوچون، منه، سئوه‌رک یاشاماغی اؤیرتدیگین اوچون، حیاتا سیم‌سیخی ساریلماغی گؤستردیگین اوچون. تشکّور ائدیرم، منه سئوگینی، حسرتی، آجینی داددیردیغین اوچون، منی قیسقانج و نازلی بیر قیز ائتدیگین اوچون، منه بیر باخیشینلا حیاتی توزپمبه* گؤستردیگین اوچون. تشکّور ائدیرم، آز دا اولسا منه قلبینده بیر یئر آییردیغین اوچون، منی بیرآزجیق دا اولسا سئودیگین اوچون، منه اونودولمازلیغی قانیتلادیغین اوچون. تشکّور ائدیرم، گؤزلریمی آچدیغین اوچون. سون کز تشکّور ائدیرم، قلبیمده قاپانمایاجاق بیر یارا آچدیغین اوچون. بو تشکّورلر آز بئله. #اومید_یاشار_اوغوزجان *آچیق پمبه رنگی (چوخ گؤزل) #شعر_اوجاغی @SheirOcagi

▫️اوغول دردی 2 دئیین کی، آتاسی اینجیمیش اوندان، نییه چیلیک‌له‌دی¹ شوخ گولوشومو؟ چیخیب آناسینین ایستی قوینوندان، هایانا یوللاندی قیشین قیش گونو؟ تویو-بایرامی‌یدی ائوین-ائشیگین، داها بو کؤنلومون غم یویانی یوخ. عطیری ایچینده دونان بئشیگین، لایلا چالانی وار، اویویانی یوخ. اَییلیب آلنیندان اؤپردیم اونون، سؤزوم بزه‌نردی شیرین آلقیشلا. گئجه‌لر اوستونو اؤرتردیم اونون، ایندی ده اؤرتموشم... آنجاق کی، داش‌لا. چوخ دا بو یۏخلوغو سؽندیریر منی، تکلیکدن قورخمورام. توختاغام، توختاق. اۇزومو سورتورم- یاندیریر منی، بالامی سویودوب اوشودن تورپاق. آللاه، من گؤرموشم بو گؤزداغینی، دوشمنیم گؤرمه‌سین، دوستوم گؤرمه‌سین! عؤمرونده هئچ کیمین چیلچیراغینی، توفان قارالتماسین، یئل سؤندورمه‌سین! طالع گؤسترمه‌سین اؤلوملو گؤرکو!² باشینا گلن‌لر قوورولوب دئمیش: «بلالی دونیانین ان آغیر یوکو، بالا تابوتونو قالدیرماق ایمیش.» #آغا_لاچینلی ¹ دوغراماق، پارچالاماق ²- گؤستریش، گؤزل‌لیک (Görk) #شعر_اوجاغی @SheirOcagi

▫️ایشیمیزه باخ! دار آغاجی یاشام ناغیلی دئییر، قادام دوشسون بئله یاشاماغین گؤزونه! آچ ساچینی، نازلیم، اینقلاب‌سیزلامیشام! #سیاوش_اکبری @SheirOcagi

▫️دوستوم! بوتون حیاتیم خیاللاردان عیبارت ایدی. هئچ واخت یاشامامیشام من، همیشه خیال قورموشام. 📚 دایینین یوخوسو #فئودور_داستایئوسکی #شعر_اوجاغی @SheirOcagi

▫️نه چتین‌دیر! نه چتیندیر، داریخاسان، سونرا باخیب نؤمره‌لره بیر نفری عزیزله‌ییب تلفون آچیب زنگ ائده‌سن گؤزله‌یه‌سن جاواب وئره اوره‌یینی صابینلاییب احساسینی حاضیرلاییب اؤزونو دیلتنگ ائده‌سن تئلئفونون زنگی بیته ملول-ملول سویویاسان سونرا آرتیق داریخاراق اؤزون‌له لاپ جنگ ائده‌سن سندن گیزلی، سوسقون، ایستی- کیپریگیندن گؤز یاشلارین- آخا؛ باخیب هنگ ائده‌سن! نه پیس اولور و نه چتین بو حالیندا میضرابینی اله آلیب اؤزون ده الدن گئده‌سن! #علی_محمدی_یورغون @SheirOcagi

▫️آتامین شکلی بیر یاندا ساعاتین دمیر عقربی، بیر یاندا زامانین سولاری آخیر. باشیمین اوستونده آتامین شکلی، گؤزلری گؤزومون ایچینه باخیر. منیم ایش اوتاغیم، منیم اؤز دونیام، کیتابلار، واراقلار سؤزوم-صؤحبتیم. بوردا چارپیشیرام هر سحر، آخشام، خیال‌دی، سؤال‌دی عؤمور مؤهلتیم. دونَنده نه قالدی؟ -بیر حسرت یئری، آنلار، دقیقه‌لر سانلی، چکیلی. زامان اؤتوشدومو- قاییتمیر گئری، منه نه‌لر دئمیر آتامین شکلی! آتالی آنلار دا خاطیره اولور، آنالی دونیا دا خاطیره اولور. ائله زامان گلیر، ائله واخت گلیر، گؤردویون رؤیا دا خاطیره اولور. شکیل منه باخیر ساغدان، سولومدان، او، منیم عؤمرومو-گونومو ساییر. مئهریبان-مئهریبان توتور قولومدان، بیر آرزو قورتاریر، بیری باشلاییر. واختین حئسابینی ایسته‌ییر مندن، آرزولار سئودالی، عؤمور ایستک‌لی. داها چوخدان چیخیب شکیل‌لیگیندن، آتامین اؤزودو آتامین شکلی. واختی ساکیت-ساکیت سئیر ائله‌سک ده، واخت گلیر سوکوتدا هارای قوپاریر. آتامین شکیلی توتوب الیمدن، منی هارالارا چکیب آپاریر! اینانا بیلمیرم عؤمرون حؤکمونه، کؤنلومه اوشاقلیق هوَسی گلیر. آتامین شکلینین قاچیر اوستونه، آتامین اوغلونون نوه‌سی گلیر. سیزده‌دیر معناسی اوزاشان* آنین، شکیللر، شکیللر، سیر-سوراق‌سینیز! باشینا دولانیم قوجا دونیانین، بیز قورتاران یئرده سیزلر وارسینیز! #طالع_حمید * اوزاقلاشان #شعر_اوجاغی @SheirOcagi

▫️بوتون حیاتیم، آنجاق قلبیم‌له منطیقیم آراسینداکی بیر سیرا کدرلی و اوغورسوز اویوشمازلیق‌لاردان عیبارت اولوب. 📚 زمانه‌میزین قهرمانی #میخائیل_لئرمانتوو #شعر_اوجاغی @SheirOcagi

▫️قلبیمین قوشلاری هپ سنه کوچ ائدیر، چونکی بیلدیکلری ان ایستی اؤلکه‌دیر سنین اوره‌یین. #اومید_یاشار_اوغوزجان #شعر_اوجاغی @SheirOcagi

▫️«قبول اوتاغی»ندا آغلایان علیل! کیمین قبولونا گلمیسن، قاغا! کیمین قاپیسینا آتیبلار سنی؟ گؤر کیمین یولوندا اؤلموسن، قاغا! گؤر کیمین کئفینه ساتیبلار سنی! کیمین نه وئجینه، نه گونده‌سن سن، آیاغین هاردادی، الین هاردادی، ائوینین ایچینده سورگونده‌سن سن، تورپاغین هاردادی، ائلین هاردادی. سنگره بنزه‌ییر قاپینین آغزی، قاپینین آغزیندا آبرین سۇرۇنور دلیر قولاغینی یایلیم¹ آتشی، قاپینین آغزیندا صبرین سۇرۇنور. اۇزۇر اوره‌یینی یاردیم آتشی. بوردا یالان-یالان قلپه‌لنیرسن². بوردا بوش وعدلره سپه‌لنیرسن. یالانا قاریشیب مأمورون باشی. تالانا قاریشیب مأمورون باشی وئرَنه قاریشیب مأمورون باشی، آلانا قاریشیب مأمورون باشی. قاپینین آغزیندا قبرین سۇرۇنور. یوردونو آغلایا بیلمه‌ین‌لرین، سنی آغلاماغی گولونج گؤرونور. بیلیرم، آللاها قالیب علاجین، هر گونون طالئعین گیزلن‌پاچی‌دی. سنی سوروندورن، چؤرک آغاجی؛ سنی دیک ساخلایان، ال آغاجی‌دی. حاقّین دویون دوشن باغی چورویوب، اینصافین، موروَتین تاغی چورویوب، نه اوجاق، نه ده کی، یادا یورد دوشور، بو پرده گؤزلردن چکیلن دئییل؟! سن گؤرن وطنه ائله قورد دوشوب، زلزله قوپسا دا تؤکولن دئییل. بو دونیا منیم ده قبول اوتاغیم، هله چوخ قاپیمی باغلار ایچیمده. تبریزلی، دربندلی علیل تورپاغین، «آراز»ی، «سامور»و آغلار ایچیمده. قارا یئللر اؤپور خاری بولبولو، من اسیر تورپاغین گول علیلی‌یم. شاعیرینکی سؤزدو، شاعیرینکی دیل، نئینیم کی، یانیندا دیلیم قیسادی. من سنین یانیندا دیل علیلی‌یم، الیندن توتماغا الیم قیسادی. من سنین یانیندا ال علیلی‌یم. منه گؤز داغی‌دی، سنه گؤز یاشی، گؤز-گؤز، اورک-اورک چورویَن بدن. قۏرو گؤز یاشینی، علیل قارداشیم! قۏرو! گؤز یاشی‌یلا گؤیرمز وطن. نه هؤنکور دردینی، نه گیلئی داشی، یوز اوزده، یوز آددا گؤزلردن قۏرو! قۏرو گؤز یاشینی، علیل قارداشیم! آشاغی، یوخاری... بیزلردن قۏرو! #رامیز_قوسارچایلی ¹- بیر نئچه سیلاحدان عئینی زاماندا آچیلان آتش ²- پارچالانماق #شعر_اوجاغی @SheirOcagi

▫️اؤپسن منی، سنینله گؤز-گؤزه گلسم، داغیلماغیمدان قورخورام. باخیشین بیردن‌-بیره آلوولانان قۏردور. من‌سه، هئچ قایغیسی اولمادان سونسوزلوق گؤزله‌ین بیر قیزیل گولون اۇزون یاشامینی دوشونورم. #آلدا_مرینی #شعر_اوجاغی @SheirOcagi

▫️اوغول دردی من یئرین آلتیندایام، من یئرین اوستونده‌یم. بیلن وارمی گؤره‌سن، دونیادا نه گونده‌یم؟ گؤرن وارمی گؤزومون سودا یانان اودونو؟ گؤرن وارمی قلبیمین آلیشان بولودونو؟ دویان وارمی- سئوینجیم، آغری‌یلا چپَرلنمیش عؤمرومون آغ یولونا، قارا قبیر تیرلَنمیش؟ اؤزوم ده مات قالمیشام، بو نئجه قالماقال‌دی؟ طالع شیرین پایینی، گئج وئرمیشدی، تئز آلدی. #آغا_لاچینلی #شعر_اوجاغی @SheirOcagi

دیالوق ▫️بعضی آداملار، پول کیمی منطیق‌لی شئی‌لر دالینجا دئییل‌لر. اونلاری نه ساتین آلماق، نه ده قورخوتماق اولار. 🎬 The Dark Knight 2008 #شعر_اوجاغی @SheirOcagi

▫️باغیشلاماز. اولارمی بو عشقی سالماماق یادا؟ حئسابی حئسابا قاتما هئچ زامان! چیینینده خالقینین الی وارسا دا، او الی چیینیندن آتما هئچ زامان! آلوولارا چاخیل، اودلارا قالان، گونشه اوز چئویر، آیدان دالدالان، خالقا اوز چئویرمه، خالق باغیشلاماز! تانری بخشیشی‌ییک، دوغولوروق بیز. آتا چؤره‌یی‌له، آنا سودویله، گوج‌لنیر دیزیمیز، وورور قلبیمیز. ناخلف یارانساق میندن بیریمیز، آتا باغیشلایار، آنا اونودار، خالقا خیانتی خالق باغیشلاماز. اونسوز دا قیسادیر عؤمرون مؤهلتی، خالقدان اوزاقلاردا گزمه شؤهرتی، گؤزله‌سن، سن اوندان گؤزله حؤرمتی! دولانیب گیزلینده، گزیب خلوتی، آدینا ناحاقدان یازسان تؤهمتی، آللاه باغیشلایار، خالق باغیشلاماز. #طالع_حمید #شعر_اوجاغی @SheirOcagi

▫️آنا ائی دونیا، سسیمه سس وئرین منیم! آنادیر حیاتدا منیم همدمیم. آنادیر سئوینجیم، آنادیر غمیم، منیم حیاتیم دا ائله آنادیر. آنا اَییلمزدیر، آنا موقدّس، قوی بوتون دونیایا یاییلسین بو سس! بیر اینسان هاواسیز یاشایا بیلمز، بیزه هاوادان دا واجیب آنادیر. اوشاقکن قدرینی بیلمیردیم سنین، اؤپمزدیم آغارمیش تئلیندن، آنا! ایندی جان اوسته‌سن، نه معناسی وار، یوز کره اؤپسم ده الیندن، آنا؟! #علی_احمدوو #شعر_اوجاغی @SheirOcagi

▫️من، سنینله دانیشا بیلمه‌دیگیم بوتون کلمه‌لر یئرینه، آغلامیشام. #دیدم_ماداک #شعر_اوجاغی @SheirOcagi

▫️اؤلن یالنیز آداملار اولمور کی. تلفون نؤمره‌لری ده اؤلور. عؤمور بویو چوخ رقملری اونوداجاقسان. 📚 من،سن، او و تلفون #آنار_رضایئو #شعر_اوجاغی @SheirOcagi

▫️اؤزوم بیله-بیله سنی سوراقلادیم، سنی آختاردیم، دولاندیم یاخینی، گزدیم اوزاغی. سن منیم سون آرزوم، حسرتیم اولدون، بونو مندن یاخشی کیم بیلدی آخی؟! ائله «منیم» دئدیم، منیم اولمادین، کؤنلومه، روحوما آخیب دولمادین، ساکیت حیاتیما کسیلدین قنیم- اوزاق اولدوز کیمی، گؤزَلیم منیم. هر سحر، هر آخشام یولوندا دوردوم. کوچه‌نیزده بیتن سالخیم سؤیودون، اورکک تئللرینی اوخشادیم، هؤردوم، اونا اورک وئردیم؛ او، سن دئییلسن. بلکه حسرتیم ده اوچوب گئدردی، سؤیودتک اوستومه بیر یول اَییلسن. یوخ، ایندی بونو دا ایسته‌میرم من، گؤزومدن دوشرسن بیر گون اییلسن. آرخانجا کؤلگه‌تک سورونه‌سی‌یم، اؤزوم بیله-بیله منیم دئییلسن. #طالع_حمید #شعر_اوجاغی @SheirOcagi

▫️اینسان اوغلونون شیدّته مئییل‌لی اولماسی آنادان‌گلمه بیر حیس‌‌دیر و مدنیّتین قارشیسینی کسن ان بؤیوک انگل‌لردن بیری‌دیر. 📚 خوشبختلیک احتمالیمیز #زیگموند_فروید #شعر_اوجاغی @SheirOcagi

▫️Aşk sana benzer... #koray_avcı @SheirOcagi

دیالوق ▫️- گلن دفعه زیانکارلیق ائدنده، ناغیل قوشما، ساده‌جه ایشینین سوروملولوغونو بوینونا آل! 🎬 Angry Birds 2016 آمریکا #کلی_کایتیس & #فرگال_ریلی #شعر_اوجاغی @SheirOcagi

▫️قارغا بالاسی تک صبیر گتیردی قارغا بالاسی، «آز یاشا!» دئدیلر چوخ یاشایانلار. اینجیدی... اینجیدی قارغا بالاسی، بیلمه‌دی اؤلومون تئزی گؤزل‌دی، عؤمور یوخ، اؤلومون اؤزو گؤزل‌دی. بیلمه‌دی... بیلمه‌دی قارغا بالاسی، ان چوخ او دویاجاق «آتش» سسلرین، ان چوخ او گؤره‌جک آتش‌کس‌لری. #صدام_لاچین #شعر_اوجاغی @SheirOcagi

▫️هئچ آغلامازدیم. گؤزله‌دیم من سنی حسرتله هر گون سن‌سه کیبریت کیمی آلیشیب سؤندون. سونرادان نه اولدو، عهددن می دؤندون؟ من بئله بیلسه‌یدیم هئچ آغلامازدیم. ائله بیلیردیم کی منی سئویرسن، سن منی قلبینه حاکیم بیلیرسن. آخی نه بیلیردیم ایکی اوزلوسن؟! من بونو بیلسه‌یدیم، هئچ آغلامازدیم. بیر زامان حیاتدا گرک‌دیم سنه، ابدی دوست ایدیم، دیرک‌دیم سنه. گؤزومده بیر حوری-ملک‌دین منه، بیلسه‌یدیم شئیطانسان، هئچ آغلامازدیم. سن ووردون یئرلره تمیز سئوگیمی، اینجیدیب کوسدوردون حیاتدان منی. ایندی ائی وفاسیز، سینان قلبیمی- دوزَلده بیلسه‌یدین، هئچ آغلامازدیم! من سنی بیر دفعه هئچ آغلاتمادیم، سندن اینجیسم ده، یالان ساتمادیم. منی اونوتسان دا، من اونوتمادیم. اونودا بیلسه‌یدیم هئچ آغلامازدیم. ایناندیم هر دئنن شیرین سؤزونه، آلداندیم من سنین ملک اوزونه، نئیله‌ییم؟ وورولدوم قارا گؤزونه، اگر سئومه‌سه‌یدیم، هئچ‌ آغلامازدیم. #علی_احمدوو #شعر_اوجاغی @SheirOcagi

▫️حسرت قالیب دوغما یوردون، نازلی، موشفیق قوجاغینا، گؤزلر یاشلی، بویون بوکوک، وطنسیزمی اؤله‌جه‌یم؟ گؤز دیکه‌رک یاد ائللرین شفا وئرمز اوجاغینا، بؤیله غریب، بیر پارچاجیق- کفنسیزمی اؤله‌جه‌یم؟ اولو تانریم... گوناهیم بو، باهار گلدی، من چاغلادیم. بو بیر ائلین دیله‌یی‌دیر، یاد بیر سؤزه اویدوغوم یوخ. دونیا سئودی، من ده سئودیم ائللر گولدو، من آغلادیم. سئودیم، آما دیزلرینه، بیر دفعه باش قویدوغوم یوخ. تانریم! منه چوخ‌مو گؤردون، اود سوووران تورپاغیمی؟ جنّت سنین، کعبه سنین، بیر مزارلیق یوردومو وئر! جهنّمدن آلسین، بوراخ- دونیا منیم سوراغیمی! منه یالنیز بیر ایچیم سو، باش‌قویاجاق بیر آز دا یئر! #آلماس_ایلدیریم #شعر_اوجاغی @SheirOcagi

▫️من اؤز دینیمی تاپمیشدیم: دونیادا هئچ بیر شئی منه کیتابلاردان داها اؤنملی گؤرونموردو. کیتابخانا ایسه تاپیناغیم ایدی. 📚 سؤزجوک‌لر #ژان_پل_سارتر #شعر_اوجاغی @SheirOcagi

▫️دیله گتیریلمه‌ین سؤزلر آرامیزدا دیوار کیمی اوجالیردی. 📚 سارانین آچاری # تاتیانا_دوروزنه #شعر_اوجاغی @SheirOcagi

‍ ▫️هارداسان؟ گؤزوم آغلار تئله بند، حسرت کؤورک گوله بند، کیپریکلریم سئله بند، آی کوسَنیم، هارداسان؟! سئوینجیمیز آد آلیب، گؤزلریندن اود آلیب، ایندی بیزه یاد اولوب، آی کوسنیم، هارداسان؟! عؤمرومه گومان گلیب، ساچیما دومان گلیب، قاپینا اومان گلیب، آی کوسنیم، هارداسان؟! شعر و سس: #امینه_یوسیف‌قیزی #شعر_اوجاغی @SheirOcagi

▫️گیزلی سئوگی بیر یئرده اولان کیمی، بو قیسمته شادلانیریق، کیمسه بیر یئرده بیزی گؤرَر دئیه، ساخلانیریق. بو گیزلی گؤروشمه‌نین بیر آدی یوخدور، بیلیرم. من ده حیسّ ائله‌ییرم، بیر آد اوچون یادلانیریق. هر گؤروشده نئچه یول عشقه عایید سؤال چیخیر. معناسیز سؤال‌لارا عصب‌لشیب خوف‌لانیریق. سنی بیلدیم هاوادار خسته، ویرانه کؤنلومه. بیر گؤروشدن اؤتَری، هر عذابا قاتلانیریق. یالانا ال آتیریق، بوینو بوکوک اوشاق کیمی، قورخوروق چیخار اوزه، ماسکا تاخیب بویلانیریق. #علی_احمدوو #شعر_اوجاغی @SheirOcagi

▫️اینسانلار چوخ غریبه وارلیقلاردیر. اونلار اؤزلریندن گوجسوز اولانلاری سئومیر، اؤزلریندن گوجلو اولانلارا نیفرت ائله‌ییرلر، اؤزلری کیمی‌لر ایسه اونلارا ماراقسیزدیر. 📚 شئیطانین کیتابی #قاراقان #شعر_اوجاغی @SheirOcagi

▫️منیم اعتبار ائده‌جه‌ییم، اوره‌ییمی آچا بیله‌جه‌ییم تک دوستوم، منیم کؤلگه‌م ایدی. 📚 باشقا بیر خوشبختلیک #مارک_لئوی #شعر_اوجاغی @SheirOcagi

▫️یوللار تزه‌له‌دی خاطیره‌لری، گلدی قولاغیما سئحیرلی سسین. یاماجدان بویلانان نرگیزین تری، ساندیم کی سینه‌ندن آسیلیب سنین. بیز بوردان ال-اله گئدیب-گلیردیک، آی گیزلی سئودیگیم، مکتب یولداشیم! بیز بوردا اَیلنیب، دئییب گولوردوک، آی آرزو یولداشیم، مطلب یولداشیم! سن ایپک دونونو گئییندیگین گون، من اوز دؤندریردیم اؤز پئنجه‌ییمدن. دویوب کدریمی کؤکس اؤتوروردون، سؤز-صؤحبت سالیردین گله‌جه‌ییمدن. سوفره ائله‌میشدیک بو یاستی داشی، دیل-آغیز تؤکوردوم... اینجیک باخیردین. چیخاریب چانتاندان پئندیر-لاواشی، چایین قیراغیندان یارپیز ییغیردین. بوردا اویناییردیق بیز «گیزلین‌پاچ»ی، اوستونه اووجوم‌لا سو آتیردیم من. ساچیندان سوزولن میرواری دامجی، گؤزومه، قاشیما قونوردو بعضاً. بعضاً ده آلیردیم تعطیل واختینی، اوتانیب یانینا گلیردیم گئج-گئج. بس نییه گؤرنده من گؤزآلتیمی،* سئویب-سئویلمکدن دانیشمیردیق هئچ؟ سانما کی من سنی بیَنمه‌میشدیم، آی سیغال ایسته‌ین جئیران قوزوسو! ائله وورولموشدوم، ائله سئومیشدیم، یادیمدان چیخمیشدی ووصال آرزوسو. گؤر هانسی چاغلاریم دوشوب کؤنلومه! اۆزومو دالادی چایین کوله‌یی. سو دا سؤندورمه‌یه عاجیزمیش دئمه، سئوگیدن آلیشیب یانان اوره‌یی. دورور گؤی چمنین او داش سوفره‌سی، یارپیزدا عطری وار اؤتن ایللرین. دۆزو، ایسته‌ییردیم اونودوم سنی، یوللارا سپیلیب خاطیره‌لرین. #آغا_لاچینلی * سونرادان ائولنمک اوچون، نظرده توتولان آدام (Gözaltı) #شعر_اوجاغی @SheirOcagi