فَرَوْحٌ وَ رَيْحَانٌ 🌻

يُغنيك بتغيير حركة قلبك ! 🌿 اشكال الاستجابة للدعاء لا تُعد ولا تُحصى .. من ضمنها إنه يغنيك بتغيير حركة قلبك، ازاي ؟ مثال : بدعي ربي بفلوس و انه يغنيني ماديًا ، و لعل ربك يعلم عنك إنك ( حاليًا ) مش انفع حاجة ليك رزق المال الكتير ، فـ من ضمن اشكال الاجابة ؛ تتغير حركة قلبك من احساس الفقر و الاحتياج الشديد للمال ( للغنى ) يعني قلبك يبقى جواه غنى و اقتناع بالموجود و احساس قناعة و يكأنك غني فعلًا ، اكيد لسه بتدعي ربنا يُعطيك مراد ، بس جوا قلبك ساكن و راضي مفيش افتقار شديد للشئ ده. اشكال الإجابة كتيير ،اهم حاجة كمل في دعائك لإن الدعاء بقاء الصلة ، و بركات الصلة دي هتوصلك بأشكال مختلفة 🌿 منى محسن 💛

الرضا عن الله " في توقيت النعمة " يعني مش بعد ما النعمة تيجي اقول ياريتها جت بدري شوية ! او لو جت بدري اقول ياريت كانت اتأخرت شوية ! توقيت النعمة نفسه " اختبار " راضي عن الله في التوقيت ده بالذات ؟ لإن النعمة دي مكنتش ينفع تيجي يوم بدري ولا يوم متأخر، مكنتش هتنفعك ! في بعض الافكار اللي بتداول عن إن احيانًا الحاجة لمّا بتيجي بعد ما نكون انتظارنها كتير بنفقد شغفنا ناحيتها و مش بيكون له طعم ، ده مش حقيقي ،، الفكرة كلها ان انت خلال انتظار لنعمة ما بيعدي بيك وقت و احداث و تربية لنفسك فـ بتنضج اكتر و مشاعرك بتنضبط اكتر فـ لمّا تيجي الحاجة بتكون فرحان بيها فرحة متزنة ناضجة مش فرحة انبهار مبالغ فيه او سعادة مفرطة، و ده صحي جدًا على فكرة . فـ رضاك عن توقيت النعم، بيقوي ايمانك بالله و بيحلي دنيتك، و عدم رضاك بيضعفك و بيخليك متشوفش حلاوة النعمة و تشوف بس حسرتك و قهرتك على توقيتها . فـ الحمدلله على ما كان، و ما سيكون 🤍 مني محسن 💛

وهذا الشيخ الشاب الذي لايعلمه عامة الناس ، صاحب الأسلوب السهل اللين الجميل جعل حياته كلها لله، جعلها فقط لتعليم شباب وبنات المسلمين كتاب الله وكيفية فهمه وتدبره والعمل به عن طريق عمل دورات مكثفة ( تاج الكرامة ) و ( أحسن الحديث ) وغيرها من الدورات التي تجعل من المسلم الذي لا يعرف شيئا عن كتاب الله، ولا يفهم آياته إلا القليل منها ( مفسرًا ) نعم يعلمك كيف تفهم كلام الله وكيف تستخرج منه العبر والعظات، وكيف تسقطه على الواقع، وكيف تتعامل به.. الشيخ محمد خيري = ذو القلب والروح التي يظهر جمالُهُ وطيبَتُها في حديثِهِ بشكلٍ جَليٍّ يأسِرُ القلوب قليل الظهور المرئي لكن دروسه ممتعة ومفيدة بشكل لا يُوصف. #دروس_الشيخ محمد = تضحك فيها وتبكي، وفيها تشعر وكأنَّ أبوابَ رحمةِ ربِّك تُفتحُ لك فترجوها مهما بَلَغَتْ مِنك الذنوبُ مبلغها، وتخشى عذابَه -سبحانه- مهما دقَّ زَلَلُكَ = فهذا واللهِ اتزانُ أهلِ الإيمانِ في تعاطيهم مع الدين وممارسته ونقله للناس. بارك الله لنا في الشيخ ورزقنا صُحبَتَهُ في الدارين🤲🤲 #الشيخ_حفظه_الله ورعاه، مثله لا بد أن يعرفه الناس أجمعين، في زمن أشتهر فيه الروبيضة والتافهون. فاللهم بارك فيه وأحفظه بحفظك وأنفع به الإسلام والمسلمين إنك بكل جميل كفيل🤲🤲 هذه قناة علي اليوتيوب خاصة بالشيخ حفظه الله مليئة باللآلئ والدرر من محاضراته👇👇 https://youtube.com/channel/UC5fDvuLnLPQcKiyHK6xKvZw قناته علي التلجرام👇👇👇 https://t.me/mhmd5airy الشيخ المشرف العام لمركز آيات @ayatqurancenter

أتحكالي قصه جميله أوي عن فضل الصدقه العجيب في دفع ( المصائب ) , ❤ صاحبة القصه بتحكي إن هي كل ما تيحي مسافره , لازم تطلع صدقات , لأن هي مقتنعه أن الصدقات بتدفع المصائب , و اللقُم تدفع النقم , بتقول طلعت مره و انا مسافره صدقه بسيطه و ربنا نجاني من مشكله كبيره حصلتلي أثناء سفري , و من ساعتها و يقيني زاد , أخر مره كنت مسافره , بس ملحقتش أطلع صدقات للأسف , ملحقتش خالص , طبعاً انا متوكله على الله و إنه هو خير حافظ سبحانه , بس الصدقه كـ سبب من أسبابي , المهم في نص الطريق , السواق نزل يصلي في مسجد , بعد ما نزل يصلي , لقيت واحد غلبان معرفش طلع منين , و وقف قدام العربيه , و كانت المنطقه فاضيه خالص مفيش فيها مخلوق , و كان شكله جعان جداً , و باين عليه إنه هزيل أوي , لقيت نفسي أفتكرت اني ملحقتش أطلع , و طلعت صدقه و قولت للـ جنبي , انا بتفائل بالصدقات دي , بتدفع ضرر كبير في السفر , و أديته الـ فيه النصيب , و جيه السواق , و مشينا , و إحنا في الطريق فجأه العربيه طلعت صوت جامد , و بدأت تترج , العجله كانت أتقطعت , و الطريق كان سريع !! سريع جداً ! و أحنا مستعجلين , و الدنيا فاضيه , و السواق مش معاها عجله كمان ستبن !! خضه اصلاً , و خوف , و توتر شديد .. السواق بيبص جمبه بسرعه لقى مفاجأه !! لقى ميكانيكي فاتح على الطريق !! العربيه باظت قدام الميكانيكي , قعد يقول سبحانك يارب !! العربيه يحصل فيها ده قدامه ؟!! و راح للمكيانيكي و الحمدلله حل المشكله و مشينا , وده بعد ما طلعت صدقتي بـ 10 دقايق تقريباً لو كنا أتأخرنا شويه بس , كان ممكن نعدي الميكانيكي و كان ممكن العربيه تتقلب لاقدر الله ال كانت جمبي قعدت تقول سبحانك يارب ,الصدقات فعلا بتعمل العجب , لطف ربنا بينا كان عجيب سبحانه , يقيني زاد أن اللقم تدفع النقم , يعني الصدقات أو الاطعام بيدفعوا المصايب عن البني آدم . (( تفائل بالصدقه , و أعرف ان كل جنيه بطلعه , أنت بطعله ليك , قبل للـ قدامك , و أنت متعرفش , النجاه بتيجي من أي باب , أطرق مع ربك كل الابواب , و لن تضيع , و لن تشقى )) Mona mohsen

لو ركزت مع ألاعيب إبليس هتلاقيه في معركة يومية معاك عشان يلهيك بالحزن والقلق، بيحاول كل يوم يدوّر على أي حاجة يخليك تقلق عليها بيتفنن إزاي يكبّر مخاوفك ويقنعك بإن كل الي جاي سيء جداً ويدعو للخوف والحزن وعدم التفاؤل الشيطان أدرك - قبل ما ناس كتير تدرك- حقيقة إن سوء ظنك بالله ممكن يشكّل خطر حقيقي على مستقبلك ويخلي مخاوفك تتحقق لمجرد إنك إعتقدتها وآمنت بحدوثها الشيطان عرف - قبل ماناس كتير تعرف- إن حزن المؤمن هو أكتر حاجة بتعطّله وتكتّفه وترجّعه 100 خطوة لورا الشيطان لما بييأس منك ومن مقاومتك لنفسك ممكن يبعتلك مخاوف جديدة على ألسنة الناس حواليك يوسوس لصحابك وقرايبك بدلاً عنك.. يقنعهم بفكرة ينقلوهالك عشان يحاربك من الخارج زي ما حاربك من الداخل قاوم نفسك وحاول تحوّل مخاوفك لإحسان ظن بالله عشان ماتقعش في مصيبة سوء الظن بالله وإنتظار تحقق مخاوف قادمة لا محالة إن أنت بها ظننت وأيقنت وآمنت. كل مازاد خوفك زوّد وِردك من القرآن وحارب الخوف بالقيام والاستغفار واللجوء لله بالدعاء والصيام هبه .احمد

عنْ جابرٍ ، عَنِ النبي ﷺ قَالَ: منْ قَالَ: سُبْحانَ اللَّهِ وبحَمدِهِ، غُرِستْ لهُ نَخْلَةٌ في الجَنَّةِ. رواه الترمذي وَقالَ: حديث حسنٌ.

عن ابنِ عبَّاسٍ رضِيَ اللهُ عنهما قال: نَخْلُ الجنَّةِ جُذوعُها مِن زُمُرُّدٍ خُضْرٍ، وكَرَبُها ذهَبٌ أحمَرُ، وسَعَفُها كِسوةٌ لأهلِ الجنَّةِ، منها مُقطَّعاتُهم وحُلَلُهم، وثمَرُها أمثالُ القِلالِ والدِّلاءِ، أشَدُّ بياضًا مِن اللبنِ، وأَحْلى مِن العسَلِ، وأليَنُ مِن الزُّبْدِ، ليس فيها عَجمٌ. الراوي : [سعيد بن جبير] | المحدث : المنذري | المصدر : الترغيب والترهيب | الصفحة أو الرقم : 4/380 | خلاصة حكم المحدث : إسناده جيد

إيه الفرق بين النخل اللي بنشوفه في الدنيا ونخل الجنة؟ نخل الدنيا ساقه من خشب أما نخل الجنة فساقه من دهب وجزوعه من زُمرد أحمر وورقه بيستخدم كسوة لأهل الجنة، أما الثمرة فبيبقى ملمسها ناعم جدًا، وحجمها كبير جدًا جدًا، وطعمها أحلى من العسل، ومافيهاش نوى✨ رزقنا الله وإياكم رؤية نخل الجنة❤🌿 أما لو عايز يبقى ليك نخل مِلكك في الجنة، فقول سبحان الله وبحمده هيتغرسلك نخلة في الجنة وأنت هنا في مكانك!، مافيش أبسط من كده عشان يبقى عندك حاجة عظيمة كده!❤ هبة شلبى 💛

شايفين العالم كله مقلوب إزاي على خبر الكسوف؟ تخيلوا بقى إن حدث جلل زي ده حصل في المدينة والصحابة شافوه بعد موت إبراهيم ابن سيدنا النبي ﷺ مباشرةً كان طبيعي يتهامسوا ويتناقشوا ويتبادلوا الآراء بإن الشمس حصل لها كده بسبب موت ابن رسول الله ﷺ، خصوصًا إن كان من عاداتهم في الجاهلية إعتقادهم إنَّ الشمسَ والقمرَ لا يَنخسِفان إلا لموتِ عظيمٍ من عُظَماءِ أهلِ الأرضِ، فالناس ربطوا الكسوف بوفاة ابن سيدنا النبي ﷺ كأن الكون بيزعل معاه سيدنا النبي ﷺ -في عز حزن قلبه وبكاء عينه- قطع عليهم أفكارهم قبل ما يصرّحوا بيها وقفل على الشيطان مدخل الكلام ده قبل ما يتمادى فيه، ومنع عنهم الوهم وصحح لهم اعتقادهم وأرشدهم للتصرف السليم كمان حتى في أقسى الظروف النفسية على قلبه. فقال بشكل واضح لا يقبل التأويل " إنَّ الشَّمْسَ والقَمَرَ آيَتانِ مِن آياتِ اللَّهِ، لا يَخْسِفانِ لِمَوْتِ أحَدٍ ولا لِحَياتِهِ، فإذا رَأَيْتُمْ ذلكَ، فادْعُوا اللَّهَ، وكَبِّرُوا وصَلُّوا وتَصَدَّقُوا." فإذا رأيتم ذلك: فادعوا الله.. وكبِّروا.. وصلّوا.. وتصدّقوا. - heba a ahmad