سیروان کەیمنەیی

مامۆساو گۆرانیا خێڵ خانەی خەفەت باربەندیش کەردەن....... مەینەت ڕوو نیان وە ماوای مەردەن یاخوا مەردەنیت بۆ وە میمانم              ئیتر نەوینوش دووری یارانم   هونەر نە تەنیا دیاردێو هزریی گلیرگەین، بەڵکوو دیاردێوی سرووشتیچا. موسیقا بەشێوەن جە فەرهەنگوو ئینسانییەتی کە بە درێژایی وەڵینگەی چەنی ژیوای خەڵکی پەیوەندیش گێرتەن و گەشەش کەردەن. هونەر بەشێوی جیانەکریان جە ژیوای ڕۆوانەیما،ملەتو هەورامانی یۆن جا ملەتانە کە هەر جوڵەێوەش گوزارشت جە هونەرێ ڕەسەنی کەرۆ. سێ کۆچکەو سیاوچەمانەی حەمەحسێن وعۆسمان وجەمیل کەجە تاریخو هەورامانینە هەگیز جەیاڐ مەشاوهەمیشە زینەو پیرۆز مەناوە،سێ کۆچکێوە کەویشا پەی پارێزنای وبەیاگە یاونای وپی نیایرە رەسەنترین بەشوو مۆسیقای کۆردی یانێ سیاوچەمانە تەرخانشا کەردەن ویاگێ وێشا جە دلێ دڵوو هەردڵسۆزێ هۆنەری کۆردێ کەردەنۆ، وەختێ نامێ نۆسۆدی وحەۆزەلارێ وشەمشی مێ گۆش ما نامێ کەسێ مەی کە ئەچا خاکە نە خۆلقیان یۆ چاهۆنەرمەنداو هەورامانێ کەدڵش پەی پارێزنای هۆنەری رەسەن مڐۆوەنە وژیانش پەی تەرخان کەردەن مامۆسا جەمیل نەسوودین پێسەگۆرانی واچێ وە رەسەنی وتەوانای ،کەهەمیشە بەمامۆساو گۆرانیا نامێ بریۆ ویۆجە یایەکاو ئاسێ کۆچکێنە. برا، هامکارە و هام ویری وشەسیایاو مامۆسا جەمیل ئەحمەدی یان جەمیل نەوسووڐی ، یۆچا کەسە دیارانەنە، کەبە مەحزوئانەیە، نامی گۆرانیاو هەورامانیت بەردە بی ئەختیار نامێوە کە مەی ویرتەرە، نامێ کاک جەمیلینە. جەمیل، تەنیا مامۆساو گۆرانیا نیا، چن خەصلەتی تایبەتیش هەنێ کە تاوانشا، جەمیل کەرۆ بەیو جە کولکاو هنرو گۆرانیاو هەورامانی ئاڐیچ: یەکم : ئەخلاقی بەرزی هۆنەرین کەبە ماواو پەنجا ساڵا خزمەت کەردەی شەئنو گورانیاش نەماڕان و بێ ئەرزش نڐیان هۆنەریرە. وجە هۆنەری مۆبتەزەلی دوریش کەرد. دووم : حۆرمەتو هۆنەری هۆنەرمەنداش پارێزنا و حۆرمەتو شەخسیەتی هۆنەریی هەورامانی، پێسەو مامۆسا حەمەحسێنی و مامۆسا عۆسمانیش هەتا تاواش بەرز وبەرزتەر نگاداری کەرد هەرگیز نەلا مەیدانو بەربەرەکانی و ورو بە رو ئادیشا نمدراوە وهرکەسی یاگی ویشەنە شناسی. سێوم : قانعی وبی توقعی : هەرگێز بە خاتره و مۆشکڵاتی میناو ویش نەمارێ وەهەتا دۆنیانه بئ بە عەزت نەفسوە ژیوایش بەرد سەر وهۆنەرش نەکەرد بە دەسمایەو تەوەقعی پەی ژیوای، بە قەولو فارسی : اخلاقی نیکو و حسنەو ئاڐی بێ بە ئلگو پەی هۆنەرمەندا. چوارم : ماندگاری وبەردوامی جە ڕاۆ هۆنەرینە: کاک جەمیل، تەمامو عۆمریش، جە خزمەت کەردەی، کوتاییش نەکەردەن وبر دەوام و مۆحکەم سەرو ویرو باوریشوە، مدران ودفاعش جە هۆنەرو گورانیا کەردن . پەنجۆم: جە دلی هونەرەکەیشەنە هەست بەنیشتمان پەروەری، بە ئیشو چەرمەسەری نەتەوەکیش و ئاوارەیو خەفەتو دوورە وەتەنی کەری، وە تاوانش چن پەیای گەورەیش پەنەبا، جە نموونەو: دڵداری و وەشەویسی، لاونایەو سروشتی، بەروستەی شادی یان خەمی، سرودی نیشتمانی و ئەوەگژیای پەی ئازادی و دژ بە نادادپەروەری. ئی خەسلەتا وفەرێتەر چێوێ  توانایی هۆنەری کاک جەمیلشا کەردن یوجه ئۆستورەکاو هۆنەرو گۆرانیاو هەورامانی که دەنگش پەی هەتاهەتای چی وەڵاته مەنۆوه وبۆ یاگێ شانازی مەردمو هەورامانی وبۆبه مایه و سەربەرزی وئلگوو هۆنەر مەندەکاو ئی وڵاتیه. ئیمه پێسەوهۆنەرمەنداولاین گیراو هۆنەری، هەم برايه ما جه دس دان هم رەفیقیه هەم ئۆستادێ و راهنمایه که پەرۆه کەرده و یاگێ ئادی پەی ئیمه، ئەگەر واچو ممکن نیا دور جه واقعیەتی نەلانا.     کاک جەمیل هەتاهەتان دەسو پەنجەش، گەڵوەی زەرینەش سەروهۆنەرو گۆرانیاو هەورامانیوە هەرمەنوە و یاگێ سەربەرزی وشانازی گردیمانە. . بەداخۆ دماو ململانێوە سەختی چەنی پیری و نەوشی ئی دەنگە ڕەسەنەو سیاچەمانەی و هونەرو هۆرامانی جە١٤٠٢/١٢/١٤شەمسی، ٤-٣-٢٠٢٤زایینی و دماو ٧٨ساڵا دڵە حەزینەکەش جە دایوەنەی کەوت و پەی هەتاهەتاین بارگەو بنەو ویش پێتۆ و یانەئاوایش جە هونەری و گلیرگەو کوردەواری کەرد. نەوجاسوسگەوە بەخەدەنگەوە دڵ تلنای وەزام هەزاررەنگەوە       سپاس پەی ئامادە بێەیتا سیروان خالێدی

موبارەکبای چەژنی جە گلیرگەو کوردی و تەمامو موسڵمانا دوونێ کەرو چەژنە شادییەن موبارەک بادەن باڵای قیبلەکەم جە دوور دیارەن بە بەرزی باڵاو نوەیچەڕی و شاهۆی و تەختی و بووەبەرامەو چنوری و سوورە هەراڵە و هەردو داڵانی و هەیاتی، سەلامو ڕیزو وەشەویسی پەی شەمەی ئەزیزی جە هەریاگێوە دوونێ هەندی. هیوادارەنا کە ئی چەژنی بۆ بە مایەو زیادکەردەو وەشەویسی بەینیما و نیشتیمانی زەریفیجما بەدووربۆ جە هەر جەنگو ئاژاوێ. فەلسەفەو چەژنی بەواتاو دەسبەرداربییەیمامێ جە هەر جۆرە کینو خەرەزێوە، کە وەرانوەرو یەکترینە هەنما. دیارا ئایین بەشێوە فراوان جە کولتوورو هەر گلیرگێوە پێکمارۆ. گلیرگەو کوردیج کە نوێنەرایەتی کولتوورو زاگرۆسی کەرۆنە، بە دریژای هەزاران ساڵان دەسو پەنچەش نەرم کەردەن چەنی پێوە ژیوایو ڕیزگیرتەو ڕەنگو دەنگە جیاوازەکاش، هەرپۆکی گلیرگەو کوردی ئایینچش وەرچەرخنان بەرەو ئایینێوە ڕۆحی و جە دلی تەکیەو خانەقاکاشەنە بەرگو تامێوە کوردیانەش دانە بە ئایینی. گەر ئینە ڕاستینەو فەلسەفەو چەژنی بۆ؛ با گردیما دڵەکاما جەوەرانوەرو یەکترینە پاک کەرمێو بە ڕۆحیەتێوە پاکۆ چەژنە موبارەکی و گەردەن ئازای جە یەکترینی کەرمی؛ و دووبارە چەژنەو گردلێوە موبارەکبۆ.